¿Kenijki nechpaleuis Biblia? Parte 2: Uelis tikuelitas tikamapouas Biblia

Se telpokatsin akin itoka Will kijtoua:“Tla xtikmati kenijki tikamapouas moBiblia, uelis melak mitstlatsiuitis”.

¿Tikneki tikmatis kenijki uelis más tikuelitas tikamapouas Biblia? Yejuin tlamachtijli uelis mitspaleuis.

• Xkonnemili ika tinemi ipan tlen tikamapoujtika

• Xtejtemo okseki tlen tlajtoua itech tlen tikamapoujtika

• Tlen telpokamej niman ichpokamej kijtouaj

Xkonnemili ika tinemi ipan tlen tikamapoujtika

Uelis tikmachilis tlen tikamapoujtika tla tikchiua yejuin:

1. Xtlapejpeni itlaj itech Biblia tlen tikuelitaskia timomachtis. Uelis yes itlaj tlen yeuejkaui opanok, tlen kijtoua se Evangelio noso se itech tlapoualtin itech Biblia tlen onoyektlali kualtsin makakisti, tlen onka ipan jw.org.

2. Xkamapoua. Uelis san moselti tikamapouas noso uelis yes iuan mofamilia noso imiuan moamigos. Se uelis kiamapouas tlen kijtoua narrador niman oksekimej uelis kiamapouaskej tlen kijtouaj oksekimej akin ompa noteneuaj.

3. Xchiua seki tlen nikan noteneua:

   • Xchijchiua se dibujo noso miyek dibujos itech tlen tikamapoujtika. Xkijkuilo tlenon kijtosneki yejon dibujo.

   • Xkijkuilo tlen mitspaleuis xkasikamati tlen tikamapoujtika. Ijkuak tikamapouas itech yakaj akin omelajkanen, xkita kenijki tlen kuajli okichiuj okipaleui kuajli makisati.

   • Xchiua ika tlen tikamapoua manesi ken se noticia. Xteneua nochi tlen opanok niman “xkintlajtolti” akin ompa nemiyaj nochi tlen okitakej.

   • Tla yakaj akin ompa noteneua okichiuj itlaj tlen xkuajli, xnemili tlenon panoskia tla xijkon kichiuaskia. Xkonnemili ijkuak Pedro okijto ika xkixmatij Jesús (Marcos 14:66-72). ¿Tlenon ueliskia kichiuaskia Pedro ijkuak okijlikej tla kixmati Jesús?

   • Itech tlen otikamapouj uelis tikijkuilos itlaj tlen tejua otikuelitak, niman noijki uelis tikijkuilos tlenon otiuel (Romanos 15:4).

     

Xtejtemo okseki tlen tlajtoua itech tlen tikamapoujtika

Tla kuajli timomachtia tlen tikamapoujtika, uelis tiknextis itlaj tlen xtikmatiya. Kemantika, maski san achijtsin timomachtis uelis melak miyek tiuelis.

Xkita tlen kijtoua Mateo 28:7 niman Marcos 16:7.

• ¿Tleka Marcos okijto ika Jesús kichiuaskia ika inomachtijkauan “niman Pedro” makitakan?

• Tlen mitspaleuis xkasikamati: Marcos xompa nemiya, nesi ika Pedro yejua akin okijli tlen opanok.

• Tlen mitsmachtia: ¿Tleka oyolseuj Pedro ijkuak okimat ika Jesús oksejpa kitasnekiya? (Marcos 14:66-72). ¿Kenijki Jesús okititi Pedro ika melauak iamigo katka? ¿Kenijki uelis tikchiuas ijkon ken Jesús tla tikneki tiyes se kuajli amigo?

Tla tiknemiliaj ika tinemi ipan tlen tikamapoujtika niman kuajli tikita nochi tlen opanok, más tikuelitas tikamapouas.