¿Iteixpantijkauan Jehová kichiuaj san sekan manouikakan familias noso kinxelouaj?

Ken tiiteixpantijkauan Jehová, melak tochikauaj kuajli tinemiskej iuan tochanejkauan niman noijki tikinpaleuiyaj oksekimej kuajli manemikan imiuan inchanejkauan. Tiktlakaitaj namiktilistli niman tochanejkauan pampa tikmatstokej ika toTajtsin akin okitlali (Génesis 2:​21-​24; Efesios 3:​14, 15). Ipan Biblia tikinnextiaj tlajtolpaleuilistin tlen yokinpaleui miyekej tlaltikpakchanejkej ipan nochi tlaltikpaktli kuajli manouikakan imiuan imixnamik niman manemikan ika pakilistli.

¿Kenon iteixpantijkauan Jehová kinpaleuiyaj familias kuajli manouikakan?

Tochikauaj tiktlakamatiskej tlajtolpaleuilistin tlen kipiya Biblia, yejuin techpaleuiya matikintlasojtlakan tokoneuan niman kuajli matinemikan iuan toixnamik (Proverbios 31:10-​31; Efesios 5:22–​6:4; 1 Timoteo 5:8). Tlamachilistli tlen kipiya Biblia techpaleuiya kuajli matouikakan iuan tochanejkauan maski kipiyaj okse tlaneltokijli (1 Pedro 3:​1, 2). Matikitakan tlenon kijtouaj sekimej akin imixnamik iteixpantijkauan Jehová:

• “Ijkuak tikuikayaj chikuasen xiuitl ika yotonamiktijkaj, nochipa tokualaniayaj niman xok toxikouayaj. San ika, ijkuak Ivete onochiuj iteixpantijkauj Jehová, opeuj melak nechtlasojtla niman nechijyouiya. Pampa yejua onopatlak otechpaleui maka matokauakan.” (Clauir, de Brasil)

• “Nejua melak onikualan ijkuak noueuentsin, Chansa, opeuj nomachtia Biblia iuan iteixpantijkauan Jehová, pampa niknemiliaya ika yejuamej kinxelouaj familias. San ika, sakin opeuj nikita kenon Biblia melak yotechpaleui ipan tonamiktilis.” (Agness, de Zambia)

Noijki ijkuak titenojnotsaj kampa tichantij, tikimititiaj tlaltikpakchanejkej kenon tlamachilistli tlen kipiya Biblia uelis kinpaleuis itech yejuin tlemach:

• Kuajli tiktlapejpenis akinon iuan timonamiktis

• Tikixnamikis tlaueltin ijkuak kemach tikpiyas se xiuitl ika yotimonamikti

• Kuajli timouikas iuan momontajuan

• Kuajli tiktekitiltis tomin

• Maka timotlaueltsajtsilis iuan moixnamik

• Timotlapopoluis iuan moixnamik

• Tikinmelaujkatlalis mokoneuan

¿Kichiua maonia tlauejli ijkuak se itech akin yononamiktijkej kipatla itlaneltokil?

Kemantika kema. Se empresa itoka Sofres okijto ipan 1998 ika 1 itech 20 akin yononamiktijkej kampa se onochiuj iteixpantijkauj Jehová peuayaj kipiyaj tlauejli pampa okipatlak itlaneltokil.

Jesús okijto ika akin kichiuaskiaj tlen yejua otemachti kipiyaskiaj tlauejli imiuan inchanejkauan (Mateo 10:32-​36). Will Durant okijkuilo ika ijkuak Roma ueyixtoya, “akin kichiuayaj ken Cristo okintlajtlakolmakakej ika kinxelouayaj familias”a, niman ipan yejuin tonajli noijki ijkon kijtouaj intech iteixpantijkauan Jehová. Kuakon, ¿kijtosneki ika iteixpantijkauan Jehová kichiuaj maonia tlauejli?

Ijkuak onoijto ika iteixpantijkauan Jehová kinxelouaj familias, Tribunal Europeo de Derechos Humanos okijto ika kemantika inchanejkauan akin xiteixpantijkauan Jehová kichiuaj maonia tlauejli ipan familias pampa “xkiseliaj niman xkitlakaitaj tlen inchanejkauj kitlapejpenia kineltokas niman xkikauiliaj makichiua tlen kineltoka”. Yejuin Tribunal noijki okijto: “Yejuin kixnamikij nochimej akin yononamiktijkej niman xsan se tlaneltokijli kipiyaj, iteixpantijkauan Jehová noijki inpan nochiua”.b San ika, ijkuak kixnamikij yejuin, iteixpantijkauan Jehová nochikauaj kitlakamatiskej tlen kijtoua Biblia: “Tla yakaj mechchiuilia itlaj xkuajli, ma ka no ijki xkuepilikan. [...] Xchiuakan kanika hasta kampa nenueliskej ken ijki nemoyolika [noso ika yolseuilistli] nennemiskej iuan nochi tlakatl” (Romanos 12:17, 18).

¿Tleka iteixpantijkauan Jehová kineltokaj ika kipiyaj nonamiktiskej san imiuan akin noijki tlaneltokaj ken yejuamej?

Iteixpantijkauan Jehová kitlakamatij Biblia ijkuak kijtoua ika manonamiktikan san “iuan se yejuan kineltoka toTeko”, kijtosneki, ika se noneki nonamiktis san iuan akin noijki iteixpantijkauj Jehová (1 Corintios 7:​39). Yejuin tlanauatijli tlen uajlauj ipan Biblia melak techpaleuiya. Matikteneuakan yejuin, ipan 2010 Journal of Marriage and Family (Revista tlen tlajtoua itech familias niman akin yononamiktijkej) okijto ika “akin yononamiktijkej niman kipiyaj san se tlaneltokijli” kinpaleuiya melak kuajli manouikakan.c

San ika, iteixpantijkauan Jehová xkimijliaj akin imiuan nosentlaliaj ika makikauakan imixnamik tla xiteixpantijkauj Jehová. Biblia kijtoua: “Tla se tokniu kipia isiuau yejuan xkineltoka Cristo, niman on siuatl maski ijkon paki para iuan chanti, ma ka ma nokakaua noso noxotoni iuan. Niman tla yej, yejua on tokniu siuatl kipia iueuentsin yejuan xtlaneltoka, niman on tlakatl maski ijkon paki para iuan chanti, ma ka ma nokakaua noso noxotoni iuan” (1 Corintios 7:​12, 13). Tiiteixpantijkauan Jehová noijki tiktlakamatij yejuin tlanauatijli.