Se teopixki kikaua ireligión

Xtechtlajtlajtouili motech.

Onitlakat ipan 1943. Nejua iuan nokniuan otoskaltijkej ipan se kalpantsin. Notaj katka tokaketl niman kojxinketl, yejua niman nonan otechiskaltijkej ipan religión católica.

¿Tleka otimochiuj teopixki?

Ijkuak nikonetl katka melak nikuelitaya nias misa para nikakis tlen kijtouaya teopixki. Melak nikuelitaya ken tlajtouaya niman tlen kichiuaya ijkuak kipanoltiaya misa, yejua ika, oniknek ninochiuas teopixki. Ijkuak inikpiaya 13 xiuitl, nonan onechkauato kampa kinmachtiaj akin kineki yeskej teopixkej.

¿Otimomachti Biblia ijkuak timomachtijtoya para titeopixki yes?

San achijtsin. Ijkuak inikpiaya 15 xiuitl, se akin nechmachtiaya onechmakak se libro tlen kinpiaya Evangelios noso tlen tlajtouaya itech inemilis Jesús niman miyekpa onikamapouj. Ijkuak nikpiaya 18 xiuitl, onichantito Roma para ninomachtis ipan universidades tlen kinyekanaya papa. Ompa oninomachti latín, griego, historia, filosofía, psicología niman teología. Xmás tomachtiayaj Biblia, tejuamej san tikinamapouayaj niman tikinkakiyaj seki versículos ipan misa tlen nopanoltiayaj domingos.

¿Noijki titemachtiayaj ijkuak titlayekanaya kampa kinmachtiaj akin kineki yeskej teopixkej?

Nejua san nikitaya ika nochi kuajli maonia, san ika, kema onitemachti itech Concilio Vaticano II.

¿Tleka opeuj tiknemilia ika tlen temachtiaya Iglesia xmelauak katka?

Pampa nikitaya ika Iglesia nokalaktiaya ipan política, ika xtlaj kinchiuiliayaj teopixkej akin kichiuayaj tlen xkuajli niman ika seki tlen temachtiaya xnotlajtolnamikiya iuan Biblia. Nejua ninotlajtoltiaya, ¿kenon toTajtsin akin melak tetlasojtla uelis kintlajyouiltis akin yomijkej? ¿Yemelak kineki ika matiktekitiltikan se rosario niman miyekpa matikimijtokan san no yejuamej tlajtoltin?a

¿Tlenon otikchiuj?

Ika nochi noyojlo oniktlajtlanili toTajtsin manechpaleui. Sakin, onikouj se Biblia de Jerusalén tlen kemach yokiska ika italiano, niman opeuj nikamapoua. Se domingo ika kualkan chika nikpilojtoya notlaken tlen niktekitiltiaya ijkuak nikpanoltiaya misa, oyejkokej omemej tlakamej niman onechijlikej ika yejuamej katka iteixpantijkauan Jehová. Opeuj imiuan nitlajtlatoua, kanaj ipantsin se hora titlajtlatojtoyaj itech Biblia niman tlen kijtoua itech religión tlen melauak.

¿Tlenon otikuelitak itech iteixpantijkauan Jehová?

Melak onikuelitak ken temachtiayaj niman ken melak kuajli kixmatstoyaj Biblia maski tla católica katka. Sakin, se iteixpantijkauj Jehová akin itoka Mario opeuj nechmachtia. Yejua melak onechijyoui, niman nochi sábados nechontaya a las nueve ika kualkan, maski san tlenon panoskia yejua nochipa yaya.

¿Niman tlenon kijtouayaj oksekimej teopixkej pampa timomachtiaya imiuan iteixpantijkauan Jehová?

Onikimijli nouan manomachtikan Biblia, san ika, nesiya ika yejuamej xmelauak kinekiyaj kasikamatiskej tlen kijtoua Biblia. Melak nikuelitaya manechmachtikan, pampa sajnoye kualtsin tlen niueltoya. Nejua xnikasikamatiya tleka toTajtsin kitekauilia mapano tlen xkuajli niman matitlajyouikan, san ika, tlen niueltiaya ipan Biblia onechpaleui manikasikamati nochi yejon.

¿Yakaj akin mitsyekanaya omitsijli maka sa xmomachti Biblia?

Ipan 1975 miyekpa oniajka Roma para nikteijlis tlen ninomachtijtoya. Akin nechyekanayaj okiyejyekojkej nechititiskej ika xmelauak tlen ninomachtijtoya, san ika, nion se xokitekitilti Biblia. Ipan 9 de enero de 1976 onikontitlan se carta ne Roma, kampa onikteijli ika nikauaskia Iglesia. Ijkuak yonikiska de teopan, oniaj ipan se tlanechikojli tlen kipanoltiaj iteixpantijkauan Jehová, ompa nopanoltijtoya se ueyi tlanechikojli kampa nemiyaj miyekej tokniuan. Nochi melak kualtsin katka, xkeman nikitaya ika nochimej makipiyakan Biblia niman makintejtemojtiakan textos tlen kinteneuaya akin kipanoltijtoya tlamachtijli.

¿Tlenon okichiuj mofamilia ijkuak okimat tlen otikchiuj?

Sekimej melak okualankej. San ika, sakin, oniktekakili ika se nokniuj akin nemiya ne Lombardía, tlen nokaua norte de Italia, noijki nomachtijtoya Biblia imiuan iteixpantijkauan Jehová. Oniaj oniktlajpaloto, niman iteixpantijkauan Jehová akin ompa chantiyaj onechpaleuijkej maniknexti kanon nitekitis niman kanon nichantis. Ipan yejon xiuitl oninochiuj iteixpantijkauj Jehová.

¿Timoyolkuepa ipampa tlen otikchiuj?

Ka, xninoyolkuepa. Aman kuajli ninouika iuan toTajtsin, pampa yoniuel ipan Biblia akinon yejua niman xok sa nikneltoka tlen oksekimej kijtouaj niman tlen kichiua religión católica. Melak nikuelita nikinnojnotsa oksekimej itech tlen yoniuel ipan Biblia, pampa kuajli nikmatstika ika yejon tlen melauak.