Juan kiteijliaya yejuin tlajtoltin: “Yakaj akin melak ueyixtika xijkon ken nejua uajlas”. Ijkuak Jesús kipiaya kanaj 30 xiuitl, oualeuj Galilea niman oyaj atentli Jordán, kampa Juan kinapolaktijtoya tlaltikpakchanejkej. Jesús kinekiya ika Juan makiapolakti, san ika, Juan okijli: “Nejua xnechmelaua nimitsapolaktis. Tejua noneki tinechapolaktis”. Jesús okijli: “Jehová kineki tejua xnechapolakti”. Kuakon okalajkej ijtik atentli Jordán niman Juan okiapolakti Jesús.

Ijkuak Jesús okis ijtik atl, okichiuj se teoyotl. Nimantsin iluikak otlapouj niman iespíritu toTajtsin ipan ouajtemok kentla paloma. Kuakon Jehová ouajtlajto itech iluikak: “Tejua tinoKoneuj, akin niktlasojtla. Nejua yonimitsseli”.

Ijkuak Jesús okiseli iespíritu Jehová, yejua onochiuj Cristo noso Mesías. Aman ueliskia peuas kichiuas tekitl tlen Jehová okinauati makichiua ipan tlaltikpaktli.

Nimantsin ijkuak Jesús onoapolakti oyaj ipan tlaluaktli niman ompa onen 40 tonajli. Ijkuak ouajnokuep okitato Juan. Ijkuak Jesús nonisiuijtiaya, Juan okijto: “Yejuin iborreguito toTajtsin akin kikixtis tlajtlakojli itech tlaltikpaktli”. Ijkon okijto pampa kinekiya ika tlaltikpakchanejkej makimatikan ika Jesús katka Mesías. ¿Tikneki tikmatis tlenon ipan opanok Jesús ijkuak onen ipan tlaluaktli? Matikitakan.

Ijkuak onoapolakti Jesús, iespíritu santo toTajtsin okuikak ipan tlaluaktli. Ipan 40 tonajli xtlaj okikua niman melak oapismik. Kuakon Diablo okitlatlatak Jesús niman okijli: “Tla melauak tiiKoneuj toTajtsin, xkimijli yejuin temej manochiuakan pan”. San ika, Jesús okinankili ika tlen kijtoua iTlajtol toTajtsin: “Ijkuiliujtika ika xsan ika tlakuajli se yoltika. Noneki kikakis nochi tlajtojli tlen kijtoua Jehová”.

Sakin, Diablo okixnamik Jesús ika okse tlatlatalistli: “Tla melauak tiiKoneuj toTajtsin, itech yejuin ikuatipan teopan, xonmotlajkali. Ijkuiliujtika ika toTajtsin kinuajtitlanis iiluikaktekitkauan mamitspaleuikij”. San ika, Jesús oksejpa okinankili ika iTlajtol toTajtsin: “Ijkuiliujtika ika xkipiya tiktlatlatas Jehová”.

Kuakon, Satanás okititi Jesús nochi tekiuajyomej tlen onka ipan tlaltikpaktli iuan inueyilis niman okijli: “Nimitsmakas nochi yejuin tekiuajyomej niman inueyilis, tla tinechueyichiua maski san sejpa”. San ika, Jesús okinankili: “¡Xuiya Satanás! Ijkuiliujtika ika san Jehová kipiya tikueyichiuas”.

Kuakon Diablo okikaujteuj, niman iluikaktekitkej oyajkej itech Jesús niman okimakakej tlakuajli. Sakin ijkuak opanok yejuin, Jesús opeuj tenojnotsa kuajli tlajtoltin itech iTekiuajyo toTajtsin. Yejuin tekitl tlen ika okuajtitlankej ipan tlaltikpaktli. Tlaltikpakchanejkej kuelkakiyaj tlen Jesús kinmachtiaya niman nochiuiyan kitokayaj.

Kanaj ipan metstli abril itech xiuitl 30, Jesús oyaj Jerusalén. Miyekej oyajkej ipan ueyikalpan okipanoltitoj Pascua. Ipan yejuin iluitl tlauentlaliayaj ipan teopan. Sekimej kinuikayaj inyolkauan niman oksekimej kinkouayaj Jerusalén.

Ijkuak Jesús oajsik teopan, okitak ika sekimej ompa kinemakayaj yolkamej. ¡Tlanemakatoyaj ichan Jehová, kampa kiueyichiuayaj! ¿Tlenon okichiuj Jesús? Okichijchiuj se mekatl niman ika okinuajkixti borregos niman uakaxtin itech teopan. Noijki okintlajkal inmesas akin tepatiliayaj tomin niman nochi yejon tomin oxixin. Jesús okimijli: “¡Xkixtikan nochi yejuin! ¡Maka xchiuakan ichan noTajtsin ken kampa tlanemakalo!”.

Akin nemiyaj ipan teopan melak otlamojkaitakej ijkuak okitakej tlen Jesús okichiuj. Inomachtijkauan okilnamijkej teotlajtojli tlen tlajtouaya itech tlen kichiuaskia Mesías: “Melak niktlasojtlas ichan Jehová”.

Sakin, ipan xiuitl 33, Jesús oksejpa okichipauj teopan. Yejua xkitekauiliskia san makauilmatikan ichan iTajtsin.

Sakin ijkuak yopanoka Pascua, Jesús iuan inomachtijkauan panouayaj Samaria ijkuak nokuepayaj Galilea. Yejuamej onoteltijkej inisiuj ueyikalpan tlen itoka katka Sicar, kampa noixmatiya ken ipozo Jacob. Jesús noseuijtoya ijkuak inomachtijkauan oyajkej ueyikalpan okikouatoj tlakuajli.

Se siuatl okikixtiko atl. Jesús okijli: “Xnechmaka atl”. Siuatl okijto: “¿Tleka tinechnotsa? Nejua nisamaritana. Judíos xkinnotsaj samaritanos”. Jesús okijli: “Tla tikmatiskia akinon nejua, tinechtlajtlaniliskia atl niman nejua nimitsmakaskia atl tlen kitemaka nemilistli”. Siuatl okitlajtolti: “¿Tlenon tikijtosneki? Tejua nion xtikpiya tlen ika tijkixtis atl”. Jesús okijto: “Akin konis atl tlen nikmakas, xok keman amikis”. Siuatl okijli: “NoTeko, xnechmaka yejon atl”.

Sakin Jesús okijli: “Xkijli moueuentsin mauajla”. Yejua okinankili: “Xnikpiya noueuentsin”. Jesús okijli: “Melauak tlen tikijtoua, pampa makuilpa yotimonamiktijka niman aman tinemi iuan se akin xiuan timonamiktia”. Siuatl okijto: “Nikita ika titeotlajtoketl. Nokalpan kineltoka ika tiueliskej tikueyichiuaskej toTajtsin ipan yejuin tepetl. San ika, judíos kijtouaj ika noneki san tikueyichiuaskej ipan Jerusalén. Nikneltoka ika ijkuak yejkos Mesías, techmachtis ken ijki tikueyichiuaskej toTajtsin”. Kuakon Jesús okijli itlaj tlen xkeman yakaj kijliaya: “Nejua niMesías”.

Siuatl nimantsin oyaj ueyikalpan niman okimijlito samaritanos: “Niknemilia ika yoniknexti Mesías. Yejua nochi kimati notechkopa. ¡Xuajlakan niman xkitakan!”. Kuakon oyajkej iuan kampa pozo niman okikakej itlamachtiluan Jesús.

Samaritanos okijlikej Jesús manokaua ipan ueyikalpan. Ome tonajli yejua okinmachti niman miyekej itech otlaneltokakej. Yejuamej okijlikej siuatl samaritana: “Aman ika otijkakej yejuin tlakatl, tikmatij ika melauak yejua akin kimakixtis tlaltikpaktli”.

Sakin ijkuak Jesús onoapolakti, opeuj kiteijlia yejuin tlajtoltin: “ITekiuajyo toTajtsin iyejkotika”. Inomachtijkauan iuan oyajkej nochiuiyan Galilea niman Judea. Ijkuak Jesús onokuep ichan Nazaret, oyaj ipan sinagoga, okitlapo iamatlajkuilol Isaías niman opeuj chikauak kipoua: “Jehová yonechmakak iespíritu santo niman ijkon manitenojnotsa kuajli tlajtoltin”. ¿Tlenon kijtosnekiya? Miyekej kinekiyaj kitaskej imilagros Jesús. San ika, yejua xokiseli espíritu santo tlen san ika makichiua yejon. Okiseli pampa ika tenojnotsaskia kuajli tlajtoltin. Kuakon yejua okimijli akin kikaktoyaj: “Aman nochiua yejuin teotlajtojli”.

Sakin, Jesús oyaj ipan mar tlen onka Galilea, kampa okinnexti naui michtlamajkej akin onochiujkej inomachtijkauan. Yejua okimijli: “Nouan xuajlakan niman nimichtlamajkej yeskej itech tlakamej”. Yejuamej katkaj Pedro, Andrés, Santiago niman Juan akin nimantsin okikaujkej intekiyo niman okitokakej. Nochiuiyan ipan Galilea otenojnotskej itech iTekiuajyo Jehová. Otenojnotskej ipan sinagogas, kampa tlanemakalo niman ipan ojtli. Miyekej kintokayaj kampa yayaj. Nochiuiyan, hasta Siria, onomat tlen kichiuaya Jesús.

Jesús okichiuj ika sakin sekimej inomachtijkauan mauelikan matepajtikan niman matekixtilikan xkuakualtin espíritus. Oksekimej iuan otenojnotsatoj ipan uejueyimej kalpamej niman ipan kalpantsitsintin. Niman miyekej siuamej akin yolmelaujkej katkaj ken María Magdalena, Juana, Susana niman oksekimej, kipaleuiayaj Jesús niman inomachtijkauan.

Ijkuak yejua yokinmachti inomachtijkauan, Jesús okintitlan matenojnotsatij. Ijkuak tenojnotstiayaj Galilea, miyekej onochiujkej inomachtijkauan niman onoapolaktijkej. Miyekej kinekiyaj nochiuaskej inomachtijkauan Jesús niman yejua okijto ika katkaj ken tlaltin ijkuak inopixkas. Yejua okijto: “Xtlajtlanilikan Jehová makinuajtitlani okseki tekitkej matlapixkakan”. Yejua okintlapejpeni 70 inomachtijkauan niman ojomemej okintitlan matenojnotsatij ipan nochi Judea. Nochimej kinnojnotsayaj itech Tekiuajyotl. Ijkuak ouajnokuepkej, melak kinekiyaj kijliskej Jesús tlen inpan onochiujka. Diablo xueliskia kiteltis intenojnotsalis.

Jesús okinmachti inomachtijkauan nochipa matenojnotsakan sakin ijkuak nokuepaskia iluikak. Yejua okimijli: “Xtenojnotsakan kuajli tlajtoltin ipan nochi tlaltikpaktli. Xtemachtikan itech iTlajtol toTajtsin niman xteapolaktikan”.

Jesús ouajla ipan tlaltikpaktli otenojnotsako itech iTekiuajyo toTajtsin. Noijki, Jehová okimakak iespíritu santo tlen ika makichiua milagros ijkon teititis tlen kichiuas ijkuak Tekiuaj yes. Yejua ueliya kinpajtiaya nochi kokolistin. Maski san kanon yaya, kokoxkej kitlajtlaniliayaj makinpajti niman yejua kinpajtiaya. Akin xtlachiayaj, tlachiayaj, akin xtlakakiyaj, tlakakiyaj niman akin sepoujtoyaj, nejnemiyaj. San kikitskiliayaj itenko itlaken, pajtiyaj. Noijki akin kipiayaj xkuakualtin espíritus kinpajtiaya. Miyekej kitokayaj Jesús maski san kanon yaya. Maski kemantika kinekiya nemis iselti, nochipa kinseliaya akin kitejtemouayaj.

Se tonajli, okuikakej se akin sepoujtoya ipan kajli kampa Jesús nemiya. San ika, pampa melak tojlan katka, xouelkej okalajkej. Kuakon, okikoyonijkej ikuatipan kajli niman okontemoltijkej kampa Jesús nemiya. Kuakon Jesús okijli tlakatl: “Xmokuiteua niman xnejnemi”. Ijkuak yejua okichiuj, nochimej otlamojkaitakej.

Okse tonajli, Jesús okalak ipan se kalpan niman majtlaktli tlakamej akin kipiayaj lepra uejka okontsajtsilijkej: “Jesús, ¡xtechpaleui!”. Ipan yejon tonaltin, akin kipiayaj lepra xkinkauiliayaj manonisiuikan intech oksekimej. Jesús okimijli mayakan teopan, ijkon ken iTlanauatil Jehová kinnauatiaya leprosos makichiuakan ijkuak yopajtikaj. Ijkuak yejuamej ok xiajsiyaj, opajtikej. Ijkuak se itech yejuamej okitak ika yopajtika, ouajnokuep okitlasojkamachilito Jesús niman okiueyichiuj toTajtsin. Itech yejon majtlaktli, san yejua okitlasojkamachilito Jesús.

Se siuatsintli akin ikipiaya 12 xiuitl ika kualouaya, melak kinekiya pajtis. Yejua okinisiui Jesús maski melak tojlan katka niman okajsik itenko itlaken. Nimantsin siuatsintli opajtik. Kuakon Jesús otetlajtolti: “¿Akinon onechkitski?”. Siuatsintli melak onomojti, okinisiui niman okijli nochi tlen opanok. Jesús okiyolseui niman okijli: “Nokoneuj, xuiya ika yolseuilistli”.

Se tlakatl akin ueyixtoya itoka katka Jairo, okitlajtlanili Jesús: “¡Xuajla nochan! Noichpokatsin melak kualo”. San ika, ijkuak xiajsiyaj ichan Jairo, iichpokatsin omik. Ijkuak Jesús oajsik, okitak ika miyekej chokatoyaj. Jesús okimijli: “Maka xchokakan, yejua san kochtika”. Kuakon okajsik ima ichpokatsin niman okijli: “Ichpokatsin, ¡xmokuiteua!”. Yejua nimantsin onokuiteuj niman Jesús okimijli itajuan makitlakualtikan. ¡Xnemili kenon onomachilijkej itajuan ichpokatsin!

Ijkuak Jesús kipiaya kanaj se xiuitl uan tlajko ika tenojnotstinemiya, yejua okitlapejpeni itlaj tlen melak ueyi kijtosnekiya. ¿Akinomej kintlapejpeniskia iuan matekitikan? ¿Akinomej kinmachtiskia makiyekanakan tlanechikojli? Achtopa kijtos tlen kichiuas, okitejtemo itlayekanalis Jehová. Kuakon oyaj ipan tepetl kampa iselti nemiskia niman nochi yeuajli okichiuj teoyotl. Uajmostla ika kualkan, Jesús okiminnots sekimej inomachtijkauan niman okintlapejpeni 12 itlatitlankauan. ¿Tikilnamiki intokayo? Yejuamej katkaj Pedro, Andrés, Santiago, Juan, Felipe, Bartolomé, Tomás, Mateo, Santiago tekoneuj itech Alfeo, Tadeo, Simón niman Judas Iscariote.

Yejon 12 itlatitlankauan yaskiaj iuan Jesús. Sakin ijkuak yokinmachtijka, okintitlan matenojnotsatij. Jehová okinmakak kojtilistli tlen ika kitekixtiliskej xkuakualtin espíritus niman kinpajtiskej akin kualouayaj.

Jesús kimitaya 12 itlatitlankauan ken akin imiuan nouikaya niman intech tlaneltokaya. Tlamachtijkej itech tlanauatijli kimitayaj tlatitlankej ken akin xonomachtijkej niman xueyixtoyaj. San ika, Jesús xijkon kimitaya. Yejua kuajli yokinmachtijka ijkon kuajli kichiuaskej intekiyo. Yejuamej nemiskiaj iuan Jesús ijkuak melak nonekiskia, ken ijkuak ikimiktiskiaj niman ijkuak oksejpa yoliuiskia. Miyekej itlatitlankauan Jesús ualeuayaj Galilea ijkon ken yejua. Sekimej yononamiktijkaj.

Itlatitlankauan tlajtlakojlekej katkaj ika yejon nopopolouayaj. Kemantika xkinemiliayaj tlen kijtouayaj niman xkuajli kitlapejpeniayaj tlen kichiuayaj. Xnochipa oteijyouijkej. Hasta onokualanijkej pampa kinekiyaj uejueyixtoskej itech oksekimej. San ika, kuajli katka inyojlo niman kitlasojtlayaj Jehová. Yejuamej akin peuaskiaj kiyekanaskej tlanechikojli sakin ijkuak Jesús xok nemiskia ipan tlaltikpaktli.

Sakin ijkuak okintlapejpeni 12 itlatitlankauan, Jesús ouajtemok itsintlan tepetl kampa melak miyekej yonosentlalijkaj. Yejuamej ualeuayaj: Galilea, Judea, Tiro, Sidón, Siria niman kalpamej tlen kipanauiayaj atentli Jordán. Okinuajuikilijkej akin kualouayaj noso tlajyouiayaj ipampa xkuakualtin espíritus. Jesús okinpajti nochimej. Kuakon onotlali ipan tepetl niman opeuj kinnojnotsa. Okijto tlenon noneki tikchiuaskej tla tiknekij touikaskej iuan toTajtsin. Noneki matikasikamatikan ika noneki matikpiyakan itlapaleuilis Jehová niman matomachtikan matiktlasojtlakan. San ika, xuelis tiktlasojtlaskej toTajtsin tla xtikintlasojtlaj oksekimej. Nochimej matikinchiuilikan tlen kuajli, noijki akin techtlauelitaj.

Jesús okijto: “Xsan noneki nenkintlasojtlaskej akin inuan nemouikaj. Noijki noneki nenkintlasojtlaskej akin mechtlauelitaj, niman nentetlapopoluiskej ika nochi nemoyojlo. Tla yakaj nemouan kualani, nimantsin xkitatij niman xkijlitij mamechtlapopolui. Xkinchiuilikan oksekimej ijkon ken nenkinekiskej mamexchiuilikan”.

Jesús noijki okinmakak tlajtolpaleuilistin itech kenon noneki kitaskej tlen kipiyaj. Yejua okijto: “Tlen melak ueyi kijtosneki, timouikas iuan Jehová xijkon ken tikpiyas miyek tomin. Se tlachtejketl uelis kichtekis nemotomin, san ika, xakaj uelis mechichtekilis ken kuajli iuan nemouikaj Jehová. Ika yejon maka xmajmanakan itech tlen nenkikuaskej, nenkoniskej noso tlen ika nemotlakentiskej. Xkimitakan totomej, toTajtsin nochipa kinmaka tlen kikuaskej. Tla san nemajmantokej, xkichiuas uejkaujtipan xnemikan. Xkilnamikikan, Jehová kimatstika tlen mechpoloua”.

Tlaltikpakchanejkej xkeman kikakiyaj makinnojnotsakan ijkon ken Jesús okichiuj. Tlamachtijkej ipan tlanauatijli xkinmachtiayaj yejon. ¿Tleka Jesús melak kuajli temachtiaya? Pampa nochi tlen temachtiaya ualeuaya itech Jehová.

Fariseos kinekiyaj nochimej kinmojkatlachialtiskej. Tla kichiuayaj itlaj tlen kuajli san kichiuayaj pampa kinekiyaj oksekimej makimitakan. Teixpan kichiuayaj teoyotl niman ijkon nochimej ueliskiaj kimitaskej. Fariseos kitsontekontlaliayaj ueueyakej teoyomej niman miyekpa kijtouayaj ipan sinagogas niman kampa tojlan nojuitilo kampa ueliskiaj kinkakiskiaj. Kuakon tlaltikpakchanejkej otlamojkaitakej ijkuak Jesús okimijli: “Maka xchiuakan teoyotl ken fariseos. Yejuamej kinemiliaj ika toTajtsin mojkatlachias pampa miyek tlajtoltin kijtouaj, san ika, yejon xmelauak. San nemoselti xnotsakan Jehová”.

Jesús okimijli kenon kichiuaskej teoyotl: “ToTajtsin akin tinemi iluikak, machipaui motoka. Mauajla moTekiuajyo. Manochiua nikan ipan tlaltikpaktli tlen tikneki, ijkon ken nochiua iluikak”. Noijki okimijli ika ipan inteoyouj makitlajtlanikan tlen mojmostla kikuaskiaj, makintlapopoluili intlajtlakoluan niman itech okseki tlen kinmajmanaskia.

Noijki, Jesús okijto: “Maka xkajkauakan ika nenkichiuaj teoyotl. Nochipa xtlajtlanilikan nemoTajtsin, Jehová, tlen kuajli. Se tajtli kineki kimakas ikoneuj tlen kuajli. Tla nemokoneuj mechtlajtlanilia pan, ¿nenkimakaskej se tetl? Tla mechtlajtlanilia se michin, ¿nenkimakaskej se kouatl?”.

Jesús otetomili tlenon kijtosnekiya tlen okijto: “Tla nenkimatstokej kenon nenkintlayokoliskej tlen kuajli nemokoneuan, ¡kuajli xmatstokan ika nemoTajtsin, Jehová, mechmakas espíritu santo! San noneki xtlajtlanilikan”. ¿Tikchiua tlen Jesús okijto? ¿Tlenon tiktlajtlanilia Jehová ijkuak tikchiua teoyotl?

Ijkuak xiajsiya Pascua ipan xiuitl 32, tlatitlankej ouajnokuepkej kampa otenojnotsatoj. Yejuamej melak siaujtoyaj, kuakon Jesús okinuikak Betsaida ipan se barco kampa ueliskiaj noseuiskej. San ika, ijkuak oajsikej itempan atl, Jesús okitak ika miyekej tlaltikpakchanejkej okintokakej. Maski yejua kinekiya nemis iselti iuan itlatitlankauan, kuajli okinseli. Okinpajti akin kualouayaj niman opeuj miyek kinmachtia. Nochi tonajli okinmachti itech iTekiuajyo toTajtsin. Ijkuak iteotlak katka, itlatitlankauan okijlikej: “Tlaltikpakchanejkej kanaj apismikij. Xkintitlani mauiyan niman ijkon ueliskej kikouaskej tlen kikuaskej”.

Jesús okimijli: “Xnoneki mauiyan. Nemejuamej xkinmakakan tlen kikuaskej”. Itlatitlankauan okitlajtoltijkej: “¿Tikneki matijkouatij pan tlen kikuaskej?”. Felipe, se itlatitlankauj Jesús, okijli: “Maski tikpiyaskiaj miyek tomin, xtechaxiliskia tijkouaskej miyek pan tlen nochimej makikuakan”.

Jesús okintlajtolti: “¿Kech pan tikpiyaj?”. Andrés okijli: “San tikpiyaj makuijli pan niman ome michintsitsintin. Yejon xtechaxilis”. Jesús okijto: “Xnechuajkuilikan yejon pan niman michintsitsintin”. Kuakon okimijli tlaltikpakchanejkej manotlalikan ipan sakatl niman manosesentlalikan, sekimej 50 niman oksekimej 100. Kuakon okontilan pan niman michimej, oajkotlachix niman okichiuj se teoyotl. Sakin okinmakak itlatitlankauan yejon tlakuajli, niman yejuamej okinxexelouilijkej tlaltikpakchanejkej. Nochimej 5,000 tlakamej akin ompa nemiyaj, noijki siuamej niman kokonej otlakuajkej hasta kampa oixuikej. Sakin, tlatitlankej okisentlalijkej tlen onokauj niman ijkon maka maijtlakaui. Okitemiltijkej 12 chikijtin. ¿Xmelak ika temojkatlachialti yejuin milagro?

Nochimej melak otlamojkaitakej hasta kinekiyaj ika Jesús manochiua intekiuaj. San ika, Jesús kimatstoya ika Jehová ok xkinekiya manochiua tekiuaj. Kuakon okimijli tlaltikpakchanejkej mauiyan niman okimijli itlatitlankauan makipanauikan mar Galilea. Yejuamej oyajkej ipan barco, niman Jesús iselti otlejkok ipan tepetl. ¿Tleka? Pampa kinekiya tlajtos iuan iTajtsin. Maski kipiaya miyek tekitl, Jesús nochipa kichiuaya teoyotl.

Jesús xsan ueliya kinpajtiaya akin kualouayaj niman kinyolitiaya akin yomijkaj, noijki ueliya kinauatiaya ajakatl niman kiyaujtli. Ijkuak otlan kichiua teoyotl ipan tepetl, Jesús oontlachix kampa mar de Galilea niman okonitak ika ajakakiyaujtoya. Itlatitlankauan nemiyaj ipan se barco niman nokojtilijtoyaj maka amimikiskej. Jesús otemok niman opeuj nejnemi ixko atl niman oyaj intech. Ijkuak tlatitlankej okitakej ika yakaj nejnemiya ixko atl, melak onomojtijkej. San ika, Jesús okimijli: “Nejua niJesús. Maka xmomojtikan”.

Pedro okijto: “NoTeko, tla melauak tejua, xtlanauati maniuiya motech”. Jesús okijli Pedro: “Xuajla”. Kuakon, maski ajakakiyauiya, Pedro otemok itech barco niman opeuj nejnemi ixko atl niman ijkon ajsis kampa Jesús. San ika, ijkuak ikinisiuijtiaya, Pedro okitak ken ajakakiyauiya niman melak onomojti. Yejua okimat ika iapolakiya. Pedro otsajtsik: “¡NoTeko, xnechmakixti!”. Jesús okajsik ipan ima niman okijli: “¿Tleka opeuj tiometlamati? ¿Kanon onka motlaneltokil?”.

Ijkuak Jesús iuan Pedro otlejkokej ipan barco, nimantsin onotelti ajakakiyaujtli. ¿Kenon tiknemilia onomachilijkej itlatitlankauan Jesús? Yejuamej okijtokej: “Tejua melauak tiiKoneuj toTajtsin”.

Xsan ijkuakon Jesús okitelti ajakakiyaujtli. Okse tonajli, ijkuak imiuan yaya itlatitlankauan ipan barco niman kipanauiskiaj mar, Jesús okochito tlakuitlapan. Ijkuak yokochka, opeuj temojti ajakakiyaui. Atl chikauak kimapeuaya barco niman opeuj atemi. Itlatitlankauan okitlachialtitoj Jesús niman okitsajtsilijkej: “¡Tlamachtijketl, itimikiskej! ¡Xtechpaleui!”. Jesús onokuiteuj niman okijli mar: “Xmotelti”. Nimantsin onotelti ajakatl niman mar. Jesús okintlajtolti itlatitlankauan: “¿Kanon onka nemotlaneltokil?”. Yejuamej opeuj noijliaj: “Hasta ajakatl niman mar kitlakamatij”. Tlatitlankej okasikamatkej ika tla yemelak tlaneltokaj itech Jesús, xkipiayaj itlaj kimakasiskej.

Fariseos kitlauelitayaj Jesús niman kitejtemouiliayaj kenon kajsiskej. Yejuamej kijtouayaj ika Jesús xkipiya ika tepajtis ipan sábado pampa ipan yejon tonajli noseuilo. Se sábado, Jesús okinexti se tlakatl akin xtlachiaya niman tomintlajtlaniya ipan ojtli. Yejua okimijli inomachtijkauan: “Xkitakan kenon ikojtilis toTajtsin kipaleuis yejuin tlakatl”. Jesús okinelo ikualak iuan tlajli niman okichijchiuj sokitl niman okitlalili ipan ixtololojuan. Jesús okijli: “Xuiya niman xmixtenpajpakati ipan pozo itoka Siloam”. Tlakatl ijkon okichiuj niman aman kema ouel otlachix.

Tlaltikpakchanejkej melak otlamojkaitakej. Yejuamej kijtouayaj: “Yejuin tlakatl akin notlaliaya niman tomintlajtlaniya, ¿xmelak? ¿Noso okse akin noijki ijkon tlachia?”. Tlakatl okijto: “¡Nejua akin xnitlachiaya ijkuak onitlakat!”. Yejuamej okitlajtoltijkej: “¿Tleka aman iueli titlachia?”. Ijkuak okimijli tlenon opanok, yejuamej okuikakej kampa fariseos.

Tlakatl okimijli fariseos: “Jesús onechtlalili sokitl ipan noixtololojuan niman onechijli maninoixtenpajpakati. Onikchiuj niman aman iniueli nitlachia”. Fariseos okijtokej: “Tla Jesús tepajtia ipan sábado, ikojtilis xuelis ualeuas itech toTajtsin”. San ika, oksekimej kijtouayaj: “Tla ikojtilis xualeuaskia itech toTajtsin, xueliskia tepajtiskia”.

Fariseos okinnotskej itajuan yejon tlakatl niman okintlajtoltijkej: “¿Tleka aman nemokoneuj iueli tlachia?”. Itajuan nomojtiayaj pampa fariseos okijtokaj ika akin tlaneltokaskia ipan Jesús kikixtiskiaj itech sinagoga. Kuakon yejuamej okijtokej: “Xtikmatij tleka. Yejua xtlajtoltikan”. Fariseos okseki okitlajtoltijkej tlakatl, niman yejua okijto: “Nochi tlen nikmatstika yonimechijli. ¿Tleka ok ninechtlajtoltijtokej?”. Fariseos melak okualankej niman okikixtijkej kiyauak.

Sakin Jesús okitato yejon tlakatl niman okitlajtolti: “¿Titlaneltoka itech Mesías?”. Tlakatl okijto: “Nikneltokaskia tla nikmatiskia akinon yejua”. Jesús okijli: “Nejua niMesías”. ¿Xmelak ika Jesús okiteititi ika melak yolkuajli katka? Yejua xsan okipajti, noijki okipaleui matlaneltoka.

Lázaro niman ikniuan, María iuan Marta, chantiyaj Betania. Jesús melak kuajli imiuan nouikaya. Se tonajli ijkuak Jesús nemiya Perea, María iuan Marta otlanauatijkej makijlitij Jesús yejuin tlajtoltin: “Lázaro melak kualo. ¡Timitstlajtlaniliaj nimantsin xuajla!”. Jesús xnimantsin oyaj, onokauj Perea ome tonajli niman sakin okimijli inomachtijkauan: “Matiuiyan Betania. Lázaro kochtika, niman nejua nikontlachialtis”. Itlatitlankauan okijlikej: “Tla Lázaro san kochtika, kuakon pajtis”. Jesús okinmelajkaijli: “Lázaro yomik”.

Ijkuak Jesús oajsik Betania, Lázaro ikipiaya naui tonajli ika yokitokakaj. Melak miyekej okinyolseuitoj Marta iuan María. Ijkuak Marta okikak ika Jesús yoajsika, nimantsin onotlalo okinamikito. Marta okijli: “NoTeko, tla nikan tinemiskia, nokniuj xmikiskia”. Jesús okijli: “Mokniuj oksejpa yoliuis. ¿Tikneltoka yejuin, Marta?”. Yejua okijto: “Nikneltoka ika nokuiteuas pampa onias se yoliuilistli”. Jesús okijli: “Nejua niyoliuilistli niman nemilistli”.

Kuakon Marta oyaj okijlito María: “Jesús nikan nemi”. María onotlalo kampa Jesús niman oksekimej okitokakej. Yejua ikxitlan onotlakuankets niman xnokajkauaya ika choka. María okijli: “NoTeko, tla nikan tinemiskia, tokniuj ok yoltoskia”. Jesús okitak ika yejua melak noyolkokouaya niman noijki opeuj choka. Ijkuak akin ompa nemiyaj okitakej yejon, opeuj kijtouaj: “Xkitakan kenon Jesús melak kitlasojtlaya Lázaro”. San ika, sekimej kijtouayaj: “¿Tleka xniman okipajti?”. Aman, ¿tlenon kichiuaskia Jesús?

Jesús oyaj kampa okitokakej Lázaro, katka se teostotl tlen tsauktoya ika se ueyi tetl. Yejua otlanauati: “Xkejkuanikan tetl”. Marta okijto: “NoTeko, ¡kanaj yomoloniak pampa ikipiya naui tonajli!”. Maski ijkon, okejkuanijkej tetl niman Jesús okichiuj teoyotl, okijto: “NoTajtsin, tlaxtlaui pampa tinechkaki. Nikmatstok ika nochipa tinechkaki, san ika aman chikauak nitlajtoua niman ijkon nochimej akin nikan nemij makineltokakan ika otinechuajtitlan”. Kuakon chikauak okontsajtsili: “Lázaro, ¡xuajkisa!”. Opanok itlaj tlen melak temojkatlachialti: Lázaro ouajkis niman uajtejkuixtiaya ika miyek tlakentin. Jesús okijto: “Xkixtilikan tlakentin niman xkauilikan mauiya”.

Miyekej okitakej yejuin niman otlaneltokakej itech Jesús. San ika, sekimej oyajkej okimijlitoj fariseos. Ompa opeuj ika fariseos kinekij kimiktiskej Lázaro niman Jesús. Semej itech 12 tlatitlankej, Judas Iscariote, oyaj kampa fariseos niman okintlajtolti: “¿Kech ninechtlaxtlauiliskej tla nimechpaleuiya xkajsikan Jesús?”. Yejuamej okijtokej kitlaxtlauiliskiaj 30 platajtomin niman Judas opeuj kitejtemoua kenon kitemaktilis Jesús.

Judíos kipanoltiayaj Pascua nochi xiujtin ipan tonajli 14 metstli nisán. Yejuin kimilnamiktiaya kenon Jehová yokinmakixtijka ken tlakeualtin itech Egipto niman okinuikak ipan Tlajli tlen yokijtoka kinmakas. Ipan xiuitl 33, Jesús iuan itlatitlankauan okipanoltijkej Pascua ipan se kajli tlen onkatka Jerusalén. Ijkuak yotlakuajkej, Jesús okijto: “Semej itech nemejuamej nechtemaktilis”. Itlatitlankauan melak otlamojkaitakej niman okitlajtoltijkej Jesús: “¿Akinon ijkon mitschiuilis?”. Jesús okijto: “Yejon tlakatl akin nikmakas yejuin pan”. Kuakon okimakak Judas Iscariote tlajkotsin pan. Judas onokuiteuj niman okis itech cuarto.

Sakin Jesús okichiuj se teoyotl, okitlajtlapan pan niman okinxelouili itlatitlankauan. Kuakon okimijli: “Xkuakan yejuin pan tlen kixneskayotia notlalnakayo, tlen niktemakas nemopampa”. Noijki okichiuj teoyotl ipampa vino, okinpanoltili itlatitlankauan niman okimijli: “Xkonikan yejuin vino tlen kixneskayotia noyesyo tlen niktemakas, niman ijkon mechtlapopoluiliskej nemotlajtlakoluan. Kuajli nimechijlia ika nouan nentekiuajtiskej iluikak. Nochi xiujtin xchiuakan yejuin tlen ika xnechilnamikikan”. Nochi xiujtin, akin kichiuaj ken Cristo, ok nosentlaliaj ipan sa noijki tonajli ijkuak itlapoyaujtika. Aman yejuin tlanechikojli noixmati ken iTlakualis toTeko.

Ijkuak yotlakuajkej, itlatitlankauan Jesús onokualanijkej itech akinon ueyixtoya. San ika, Jesús okimijli: “Akin ueyixtos nemotsajlan noneki noitas ken yakaj akin xueyixtika”.

“Nejua nemouan ninouika. Nimechijlia nochi tlen noTajtsin kineki manimechijli. Xuejkaujtipan, ninokuepas kampa noTajtsin. Nemejuamej nikan nemokauaskej, niman nochimej kimatiskej ika nennotemachtijkauan ipampa tlasojtlalistli tlen nimoititiskej. Kipiya nemotlasojtlaskej ijkon ken nejua onimechtlasojtlak”.

Sakin, Jesús okichiuili teoyotl Jehová. Okitlajtlanili makintlajpiya nochimej inomachtijkauan, makinpaleui san sekan matekitikan ika yolseuilistli niman manochipaua itoka Jehová. Kuakon Jesús niman itlatitlankauan okikuikatlalilijkej Jehová niman okiskej kiyauak. Sa achijtsin poliuiya ijkuak kajsiskiaj Jesús.

Ijkuak oyajkej ipan tepetl itoka Olivos, Jesús niman itlatitlankauan okipanauijkej valle itoka Cedrón. Yopanoka tlajkoyeuajli niman tentoya metstli. Ijkuak oajsikej kampa noixmati ken Getsemaní, Jesús okimijli: “Nikan xmokauakan niman xtlachixtokan”. Kuakon onoxelo intech inomachtijkauan niman onotlakuankets. Melak najmantoya, Jesús okinots Jehová niman okijli: “Manochiua tlen tikneki”. Kuakon, Jehová okititlan se iiluikaktekitkauj makiyolchikauati. Ijkuak Jesús onokuep kampa nemiyaj yeyimej itlatitlankauan, yejuamej kochtoyaj. Yejua okimijli: “¡Xtlachiakan! ¡Amantsin xkimelaua xkochikan! Yoajsik tonajli ijkuak nechtemakaskej intech akin nechtlauelitaj”.

Judas oajsitiuets. Yejua kinyekanaya akin kitkiyaj espadas niman intlakouan. Kimatstoya kanon kinextis Jesús pampa miyekpa ompa oyajkaj. Judas okimijli soldados ika yejua kimititiskia akinon katka Jesús. Oyaj itech Jesús niman okijli: “Tlamachtijketl”, niman okipipitso noso okitenkua ipan ixayak. Jesús okijli: “Judas, ¿ijkin tinechtemaka?”.

Jesús onotelkets imixpan nochimej niman okintlajtolti akin ompa nemiyaj: “¿Akinon nenkitejtemouaj?”. Yejuamej okijtokej: “Jesús akin ualeua Nazaret”. Jesús okinnankili: “Nejua niJesús”. Yejuamej otsinkiskej niman hasta iuetsiyaj. Oksejpa Jesús okintlajtolti: “¿Akinon nenkitejtemouaj?”. Oksejpa okijtokej: “Jesús akin ualeua Nazaret”. Jesús okimijli: “Nimechijlia ika nejua niJesús. Xkinkauilikan yejuin tlakamej mauiyan”.

Ijkuak Pedro okitak tlen nochiujtoya, okikixti iespada niman okinakastek Malco akin itlakeual katka ueyi teopixketl. San ika, Jesús okikitski inakas niman okipajti. Kuakon okijli Pedro: “Xkejyeua moespada. Tla ika espada titlaixnamiki, ika espada timikis”. Soldados okajsikej Jesús niman okinsalouilijkej imauan, niman itlatitlankauan Jesús ocholojkej. Yejuamej okuikakej Jesús ixpan teopixki Anás, akin opeuj kiyolkuitia niman okuikak ichan ueyi teopixketl Caifás. San ika ¿tlenon inpan onochiuj itlatitlankauan?

Ijkuak Jesús ok nemiya iuan itlatitlankauan ijtik cuarto, yejua okimijli: “Yejuin yeuajli, nemochimej ninechtlalkauiskej”. Pedro okijli: “Maski oksekimej mitstlalkauiskej, ¡nejua xkeman nikchiuas!”. San ika, Jesús okinankili Pedro: “Ijkuak xitsajtsi se kaxtil, yexpa tikijtos ika xtinechixmati”.

Ijkuak soldados okuikakej Jesús ichan Caifás, miyekej itlatitlankauan yocholojkaj. San ika, ome okitokakej. Pedro teuan oyaj. Yejua okalak ikiyauatenko ichan Caifás niman okinisiui tlitl, ompa onototonito. Se siuatlakeuajli okitak Pedro niman okixmat, kuakon okijli: “¡Nimitsixmati! ¡Tejua tinemiya iuan Jesús!”.

Pedro okijto: “¡Ka, xiuan ninemiya! ¡Xnikmati tlenon tikijtotika!”. Yejua oyaj kampa puerta. Kuakon okse siuatlakeuajli okitak niman okimijli nochimej akin ompa nemiyaj: “¡Yejuin tlakatl nemiya iuan Jesús!”. Pedro okijto: “Nion xnikixmati Jesús”. Se tlakatl okijto: “¡Tejua semej itech yejuamej! Pampa ken titlajtoua kakisti ika tiualeua Galilea, ijkon ken Jesús”. San ika, Pedro okijto: “¡Yemelak ika xnikixmati!”.

Ijkuakon, se kaxtil otsajtsik. Pedro okitak ika Jesús konitstoya. Yejua okilnamik tlen okijto. Kuakon okis kiyauak niman melak ochokak.

Ipan ichan Caifás onosentlalijkej akin teuan nopouayaj itech Sanedrín. Yejuamej yokijtokaj ika kimiktiskej Jesús niman kitejtemojtoyaj kenon kimiktiskej. San ika, xkinextiayaj kenon kichiuaskej. Sakin Caifás okitlajtolti Jesús: “¿TiiKoneuj toTajtsin?”. Jesús okijto: “Kema”. Caifás okijto: “Xnoneki okseki tijkakiskej. ¡Yokiuijuikalti toTajtsin!”. Yejuamej okijtokej: “Yejuin tlakatl kinamiki mamiki”. Yejuamej okixayakauijuitejkej, okixayakachijchakej, okintlapachouilijkej ixtololojuan, okiuisojkej niman okijlikej: “Tla melauak titeotlajtoketl, ¡xtechijli akinon omitsuisok!”.

Ijkuak otlanes, okuikakej Jesús kampa nosentlaliaya Sanedrín niman oksejpa okitlajtoltijkej: “¿Tejua tiiKoneuj toTajtsin?”. Jesús okinnankili: “Kema. Ijkon ken nemejuamej nenkijtotokej”. Kuakon okitlajtlakoltijkej ika yokiuijuikaltijka toTajtsin niman okuikakej kampa tekiuaj romano Poncio Pilato. ¿Tlenon ipan onochiuj? Matikitakan.

Teopixkej okuikakej Jesús ixpan tekiuaj. Pilato okintlajtolti: “¿Tlenon yokichiuj yejua ika nenkiteixpantiaj yejuin tlakatl?”. Yejuamej okijtokej: “¡Yejua kijtoua ika se tekiuaj!”. Pilato okitlajtolti Jesús: “¿Titekiuaj itech judíos?”. Jesús okinankili: “NoTekiuajyo xonka ipan yejuin tlaltikpaktli”.

Kuakon Pilato okititlan Jesús ixpan Herodes, tekiuaj itech Galilea, niman ijkon makita tla itlaj onka tlen ika kiteixpantiskej. Herodes xtlaj okinextili Jesús tlen xkuajli, kuakon oksejpa okikuep ixpan Pilato. Kuakon Pilato okijli kalpan: “Nejua nion Herodes xtlaj otiknextilijkej tlen ika manotlajtlakolmaka. Nikmakauas yejuin tlakatl”. Yejuamej otsajtsikej: “¡Xmikti! ¡Xmikti!”. Soldados okiuijuitejkej Jesús, okixayakachijchakej niman okiuisojkej. Okimaniltijkej se corona tlachichiujtli ika uitstli niman kipipinaujtiayaj ika yejuin tlajtoltin: “Kuajli xnemi, intekiuaj judíos”. Pilato oksejpa okimijli: “Xtlaj niknextilia yejuin tlakatl tlen ika manotlajtlakolmaka”. San ika, yejuamej tsajtsiyaj: “¡Xpilokan ipan kojtli melaktik!”. Kuakon Pilato okitemaktili Jesús makimiktikan.

Soldados okuikakej Jesús kampa itoka katka Gólgota, okitetsotsonkej ipan kojtli melaktik niman ompa okipilojkej. Jesús okichiuj se teoyotl niman okijto: “NoTajtsin, xkintlapopolui, pampa xkimatij tlen kichiuaj”. Miyekej kipipinaujtiayaj niman kijliayaj: “Tla tiiKoneuj toTajtsin, ¡xuajtemo itech yejon kojtli! Sa no tejua xmomakixti”.

Se akin pilkatoya inakastlan, okijli: “Xnechilnamiki ijkuak tiTekiuaj yes”. Jesús okijli: “Nouan tinemis Xochitlalpan”. Ika teotlak, otlayouatiak yeyi hora ipan nochi tlaltikpaktli. Sekimej inomachtijkauan Jesús niman inan, María, onokaujkej nisiuj kojtli melaktik. Jesús okijli Juan makitlajpiya María ken inan yeskia.

Sakin, Jesús okijto: “¡Yonochiuj!”. Yejua san ouajnotsonpilo niman omik. Kuakon melak chikauak otlalolin. Ipan teopan, cortina tlen kixelouaya Santo itech Santísimo otlajkotsayan. Se akin kinyekanaya soldados okijto: “Melauak katka iKoneuj toTajtsin”.

Sakin ijkuak Jesús yomik, se tlakatl akin kipiaya miyek tomin, itoka katka José, okitlajtlanili Pilato makikauili kitemoltis itlalnakayo Jesús itech kojtli melaktik. José okitejkuix itlalnakayo Jesús ika tlakentli itoka lino niman okitlalili tlen ajuiyak. Sakin okitlali ipan se teostotl tlen xakaj kikuiya niman otlanauati makitsakuakan ika se ueyi tetl. Teopixkej okijlikej Pilato: “Tikmakasij tla inomachtijkauan konkixtiskej itlalnakayo niman kijtoskej ika yejua yoyoliuj”. Kuakon Pilato okimijli: “Kuajli xtsakuakan itenko teostotl niman xtlajpilikan”.

Sakin ijkuak yopanoka yeyi tonajli, san ika kualkan, sekimej siuamej oyajkej kampa teostotl niman okitakej ika tetl tlen ika tsauktoya yokejkuanikaj. Tlaijtik nemiya se iluikaktekitketl, akin okimijli: “Maka xmomojtikan. Jesús yoyoliuj, xkimijlitij inomachtijkauan makinamikitij Galilea”.

María Magdalena oyaj nimantsin okintejtemoto Pedro niman Juan. Okimijli: “Yakaj okikixti itlalnakayo Jesús”. Pedro niman Juan onotlalojkej kampa teostotl. Ijkuak okitakej ika xompa onkatka itlalnakayo Jesús, onokuepkej inchan.

Ijkuak María onokuep kampa teostotl, ompa okimitak tlaijtik omemej iluikaktekitkej niman okimijli: “Xnikmati kanon okikauatoj noTeko”. Kuakon okitak se tlakatl niman okinemili ika katka akin ompa tlajpiaya, yejua okijli: “Nimitstlajtlanilia xnechijli kanon otijkauato”. San ika, ijkuak tlakatl okijli: “¡María!”, yejua okimat ika katka Jesús. Yejua okijto: “¡Tlamachtijketl!”, niman okinapalo. Jesús okijli: “Xuiya xkimijliti nokniuan ika yotinechitak”. María nimantsin oyaj okimijlito inomachtijkauan Cristo ika yejua yokitaka Jesús.

Yejon tonajli ika teotlak, omemej inomachtijkauan Cristo oualeujkej Jerusalén niman yayaj Emaús. Se tlakatl opeuj imiuan nejnemi niman okintlajtolti itech tlenon tlajtouayaj. Yejuamej okijlikej: “¿Xtiktekakilia? Ikipiya yeyi tonajli ika teopixkej otlanauatijkej makimiktikan Jesús. Niman aman sekimej siuamej kijtotinemij ika yoyoliuj”. Tlakatl okintlajtolti: “¿Xnenkineltokaj teotlajtokej? Yejuamej okijtokej ika Cristo mikiskia niman sakin yoliuiskia”. Yejua okintomilijtia iTlajtol toTajtsin. Ijkuak oajsikej Emaús, inomachtijkauan Cristo okitlajtlanilijkej tlakatl imiuan manokaua. Ijkuak itlakuaskiaj niman tlakatl okichiuj teoyotl ipampa tlakuajli, kuakon okitakej ika katka Jesús. Kuakon yejua opopoliuj.

Yejuin omemej inomachtijkauan Cristo onotlalojtikiskej Jerusalén kampa tlatitlankej nosentlalijtoyaj niman okimijlikej tlen inpan onochiujka. Ijkuak nemiyaj kalijtik, Jesús ouajnonexti. Kachtopa tlatitlankej xueliyaj kineltokayaj ika katka Jesús. Yejua okimijli: “Xkimitakan nomauan, xnechkitskikan. Ijkuiliujtika ika Cristo yoliuiskia”.

Sakin ijkuak Jesús ouajnonexti imixpan itlatitlankauan, Pedro omichtlatlamato ipan mar tlen onka Galilea. Tomás, Santiago, Juan niman oksekimej inomachtijkauan Jesús iuan oyajkej. Nochi yeuajli omichtlatlamajkej, san ika, xtlaj okajsikej.

Uajmostla ika kualkan, yejuamej okitakej se tlakatl akin ijkatoya itenko mar. Yejua okimintlajtolti: “¿Onenkajsijkej michin?”. Yejuamej okijlikej: “¡Ka!”. Tlakatl okimijli: “Xkonchapanikan nemomatlauj iyekmakopa barco”. Ijkuak ijkon okichiujkej, inmatlauj melak oten ika michimej niman xueliyaj kitlejkoltiayaj ipan barco. Juan okimat ika yejon tlakatl katka Jesús niman okijto: “¡Yejua toTeko!”. Pedro nimantsin onatlajkal niman oapanotia hasta kampa nemiya Jesús. Oksekimej okitokakej ipan barco.

Ijkuak oajsikej itenko mar, okitakej michin onkatka ipan tlitl. Ompa noijki onkatka pan. Jesús okimijli makitkikan seki michimej tlen yokajsikaj. Yejua okimijli: “Xuajlakan, xtlakuakij”.

Ijkuak yotlakuajkej, Jesús okitlajtolti Pedro: “¿Melak tinechtlasojtla xijkon ken tikintlasojtla yejuin michimej?”. Pedro okinankili: “Kema, noTeko, tejua tikmatstika”. Jesús okijli: “Kuakon, xkintlakualti noborreguitos”. Jesús oksejpa okitlajtolti: “Pedro, ¿tinechtlasojtla?”. Pedro okinankili: “NoTeko, tejua tikmatstika ika kema”. Jesús okijto: “Xkintlajpiya noborreguitos”. Jesús okitlajtolti ika yexpa. Pedro melak onoyolkoko. Yejua okijli: “NoTeko, tejua nochi tikmatstok. Tikmatstika ika nimitstlasojtla”. Jesús okijli: “Xkintlakualti noborreguitos”. Sakin okijli: “Nochipa nouan xnemi”.

Jesús iuan inomachtijkauan onosentlalijkej Galilea. Okinmakak se ueyi tlanauatijli: “Xuiyan niman xkinmachtikan tlaltikpakchanejkej ipan nochi kalpamej. Xkinmachtikan tlen onimechmachti niman xkinapolaktikan”. Niman okimijli: “Xkilnamikikan, nochipa nemouan ninemis”.

Ipan yejon 40 tonajli, sakin ijkuak Jesús oyoliuj, ouajnonexti imixpan miyekej inomachtijkauan ipan Galilea niman Jerusalén. Okinmachti tlen melak nonekiya makimatikan, niman okichiuj miyek milagros. Ipan itlamiyan yejon 40 tonajli, sa iyeka onosentlali imiuan itlatitlankauan ipan tepetl itoka Olivos. Jesús okimijlika: “Xnemikan Jerusalén. Xchiatokan tlen Jehová yokijto mechmakas”.

Itlatitlankauan Cristo, xokasikamatkej tlen kimijlitoya. Yejuamej okitlajtoltijkej: “¿Ititekiuajtis ipan Israel?”. Jesús okijto: “Ok xajsi tonajli ijkuak toTajtsin kijtos niTekiuaj yes. Sa achijtsin poliui ika nenkiseliskej espíritu santo niman nennoteixpantijkauan yeskej. Xtenojnotsatij Jerusalén, Judea, Samaria niman nochiuiyan ipan tlaltikpaktli”.

Kuakon, Jesús oyaj iluikak niman se moxtli okitlapacho. Inomachtijkauan sa ajkotlachixtoyaj, sakin yejua opopoliuj.

Inomachtijkauan Jesús onokuepkej Jerusalén. Ipan se kajli, yejuamej nochipa nosentlaliayaj niman kichiuayaj teoyotl. Kichiayaj ika Jesús makimijli okseki tlen kichiuaskiaj.