Jehová okijli Samuel: “Xuiya ichan Jesé. Semej itech ikoneuan tekiuaj yes ipan Israel”. Kuakon Samuel oyaj ichan Jesé. Ijkuak okitak akin yakatstiuj itech ikoneuan Jesé, okinemili: “Yejuin telpochtli yes”. San ika, Jehová okijli ika xyejua akin yokitlapejpenijka. Jehová okijli: “Nejua nikita tlen onka ipan iyojlo tlaltikpakchane, xsan tlen nesi ixko”.

Jesé okititi Samuel oksekimej chikuasen ikoneuan. San ika, Samuel okijto: “Jehová nion se xokitlapejpeni. ¿Tikinpiya oksekimej mokoneuan?”. Jesé okijto: “Nikpiya okse, yejua xokoyotl, itoka David. Kintlajpiya borregos kiyauak”. Ijkuak David okalak, Jehová okijli Samuel: “Yejua akin yoniktlapejpeni”. Samuel okitoyauili David ipan itsontekon tlen chiauak, ika yejuin onoteititi ika yejua yeskia tekiuaj ipan Israel.

Sakin, israelitas niman filisteos inoixnamikiskiaj. Imiuan filisteos nemiya se soldado akin melak uejkapan, itoka katka Goliat. Mojmostla Goliat kinpijpinaujtiaya israelitas. Yejua okintsajtsili: “Xnechuajtitlanilikan se tlakatl akin manechixnamiki. Tla nechtlani tochiuaskej nemotlakeualuan. San ika, tla niktlani nentotlakeualuan yeskej”.

David oyaj kampa soldados israelitas, okinkauilito tlakuajli ikniuan akin soldados katkaj. David okikak Goliat niman okijto: “Nejua nikixnamikis”. Tekiuaj Saúl okijli: “San titelpochtli”. Yejua okinankili: “Jehová nechpaleuis”.

Saúl okitlaneujti itlaken tlen kikui ijkuak ontlaixnamiki, san ika, David okijli: “Xuelis nitlaixnamikis ika yejuin”. David okajsik imatematlauj niman oyaj ipan atentli, okitlapejpeni makuijli temej pestijkej niman okintlali ipan imorral. Kuakon, David onotlalo kampa Goliat. Yejon tlakatl uejkapan otsajtsik: “Xuajla nikan, telpochtsintli. Nikchiuas mamitskuakan totomej niman yolkamej tekuanimej”. David xonomojti niman okinankili: “Tejua tinechixnamiki ika se espada, niman se lanza, san ika, nejua nimitsixnamikis ika itoka Jehová. Xtejuamej titechixnamiktika, tikixnamiktika toTajtsin. Nochimej nikan kitaskej ika Jehová melak kojtik xijkon ken se espada noso se lanza. Yejua kichiuas matimechtlanikan”.

David okitlali tetl ipan imatematlauj niman okimotlak ika nochi ikojtilis. Ika itlapaleuilis Jehová, tetl tlen ika okimotlak okalak ipan ixkuateuj Goliat. Yejon uejkapan tlakatl ouets ipan tlajli niman omik. Kuakon filisteos ocholojkej. ¿Titlaneltoka ipan Jehová ijkon ken okichiuj David?

Ijkuak David yokimiktijka Goliat, tekiuaj Saúl okitlali makinyekana isoldados. David miyekpa otetlan ijkuak otlaixnamik niman melak okixmatkej. Ijkuak yotlaixnamijka niman nokuepaya ichan, siuamej nokuikatiayaj niman nijtotiayaj ijkuak kuajnamikiyaj niman kijtouayaj: “Saúl okinmikti miyekej, san ika, David okinmikti melak miyekej”. Saúl opeuj kinexikolita David niman kinekiya kimiktis.

David melak kuajli kitsotsonaya arpa. Se tonajli, ijkuak kitlatsotsonilijtoya Saúl, tekiuaj okimotlak ika ilanza. David nimantsin onejkuani niman lanza okalak ipan tepantli. Sakin, Saúl miyekpa okiyejyeko kimiktis. Kuakon David ocholoj niman oniyanato ipan tlaluaktli.

Saúl oyaj imiuan 3,000 tlakamej okitejtemotoj David. Saúl okalak ijtik teostotl kampa nemiya David niman akin imiuan kistinemiya. Yejuamej okichtakaijlikej David: “Amantsin uelis tikmiktis Saúl”. David ononisiui itech tekiuaj niman okitekili tlajkotsin itlaken. Saúl nion xokimat. Sakin, David melak xkuajli onomachili pampa xokitlakaitak tekiuaj akin Jehová yokitlapejpenijka. Yejua xokinkauili tlakamej makimiktikan Saúl. Ijkuak Saúl ouajkis itech teostotl, David okonijli: “Ueliskia nimitsmiktiskia, san ika, xonikchiuj”. ¿Kipatlaskia Saúl tlen kinemiliaya itech David?

Ka. Saúl ok okitlaueltokak David. Se yeuajli, David niman isobrino Abisái sa ichtakatsin okalajkej kampa Saúl niman isoldados onokajkaltijkej. Hasta Abner akin kitlajpiaya tekiuaj Saúl kochtoya. Abisái okijto: “¡Aman kema uelis tikmiktiskej! Xnechkauili manikchiua”. David okijli: “Jehová kitlajtlakolmakas Saúl. San xkajsi iatekon niman ilanza, niman tiauej”.

David otlejkok ikuatipan tepetl tlen nisiuj onkatka, ompa ueliya kitaya kampa onokajkaltijkaj Saúl niman isoldados. Yejua okitsajtsili: “Abner, ¿tleka xotiktlajpix motekiuaj? ¿Kanon onka ilanza niman iatekon?”. Saúl okitenkak David niman okijli: “Ueliskia tinechmiktiskia niman xotikchiuj. Aman nikmati ika titekiuaj yes ipan Israel”. Tekiuaj Saúl onokuep ichan. San ika, xnochimej ichanejkauan Saúl kitlauelitayaj David.

Ikoneuj tekiuaj Saúl akin yakatstiaya, Jonatán, katka se tlaixnamijketl yolchikauak. David okijto ika Jonatán melak chikauak notlalouaya xken se águila niman melak kojtik xken se león. Se tonajli, Jonatán okitak seki filisteos ikuatipan tepetl. Kuakon yejua okijli itlajpixkauj: “Tikimixnamikiskej san tla Jehová techititia ika ijkon kineki, tla filisteos kijtouaj matitlejkokan, kuakon tikmatiskej ika noneki tikimixnamikiskej”. Filisteos okintsajtsilijkej: “Xuajtlejkokan, matoixnamikikan”. Kuakon, yejuamej otepetlejkokej niman okintlankej yejon 20 soldados.

Pampa Jonatán yakatstiaya itech ikoneuan Saúl, yejua yeskia akin kitekipatlaskia Saúl. San ika, kimatstoya ika Jehová yokitlapejpenijka David ken akin tekiuaj yes ipan Israel, maski ijkon xkinexikolitaya. Jonatán niman David melak kuajli onouikakej. Onoijlikej ika notlajpiyaskiaj niman nopaleuiskiaj. Jonatán okimakak David itlaken, iespada, iarco niman icinturón ijkon okititi ika melak kuajli nouikayaj.

Ijkuak David niyantinemiya ipampa Saúl, Jonatán okitato niman okijli: “Xpiya kojtilistli niman xyolchikaui. Jehová yomitstlapejpeni ken tekiuaj niman notaj kimatstok”. ¿Tikuelitaskia tikpiyas akin iuan timouikas ijkon ken Jonatán?

Miyekpa Jonatán okipaleui David maski ueliskia mikis. Yejua kimatiya ika tekiuaj Saúl kinekiya kimiktis David, kuakon okijli itaj: “Tla tikmiktia David titlajtlakos. Yejua xokichiuj tlen xkuajli”. Saúl melak okualan iuan Jonatán. Opanok seki xiuitl niman Saúl iuan Jonatán omijkej san sekan ijkuak tlaixnamikiyaj.

Ijkuak Jonatán yomijka, David okitejtemo ikoneuj Jonatán akin itoka katka Mefibóset. Ijkuak okinexti, okijli: “Pampa motaj melak kuajli iuan ninouikaya, nimitstlajpiyas ipan nochi monemilis. Nouan tichantis niman nouan titlakuas”. David xkeman okilkauj Jonatán akin iuan onouikak.

Ijkuak Saúl omik, David onochiuj tekiuaj. Kipiaya 30 xiuitl. Opanok seki xiuitl, se yeuajli ijkuak nemiya ikuatipan ichan, okitak se siuatl melak kualtsin. David okimat ika siuatl itoka katka Bat-Seba niman ika yononamiktijka iuan se soldado akin itoka katka Urías. David otlanauati makuikakan ichan, san sekan onotekakej niman siuatl okoneuajtik. David okiyejyeko kiyanas tlen okichiuj niman okijli akin kinyekanaya isoldados makitlali Urías inyekapan kampa tlaixnamikij niman iselti makikauakan. Urías omik kampa tlaixnamikiyaj, sakin David ononamikti iuan Bat-Seba.

San ika, Jehová okitak nochi tlen xkuajli opanok. ¿Tlenon kichiuaskia? Jehová okititlan teotlajtoketl Natán kampa David. Natán okijli: “Nemiya se tlakatl akin kipiaya miyek tomin niman miyek borregos, niman okse akin xkipiaya tomin, yejua san se borreguito kipiaya niman melak kitlasojtlaya. Tlakatl akin kipiaya tomin okikuili iborreguito akin xkipiaya tomin”. David melak okualan niman okijto: “¡Yejon tlakatl akin kipiya tomin kimelaua mikis!”. Natán okijli: “¡Tejua yejon tlakatl!”. David melak onoyolkoko niman okijto: “Yonitlajtlako ixpan Jehová”. Yejon tlajtlakojli okuajkuili miyek tlauejli niman noijki ichanejkauan. Jehová okitlajtlakolmakak David, san ika, okikauili manemi pampa okijto tlen melauak niman onoyolyemanili.

David kinekiya kichijchiuilis iteopan Jehová. San ika, Jehová okitlapejpeni Salomón, ikoneuj David, makichijchiuili. David opeuj kiyektlalia tlen kitekitiltiskia Salomón niman okijto: “Iteopan Jehová noneki melak ueyixtos. Salomón ok telpochtli, san ika, nikyektlalilis nochi tlen notekitiltis”. David otemakak melak miyek itomin tlen notekitiltiskia ipan tekitl. Okinnexti tekitkej tlamachilisejkej, okisentlali oro niman plata. Noijki cedro tlen ualeuaya Tiro niman Sidón. Ijkuak sa achijtsin poliuiya ika mikiskia, David okimakak Salomón amamej kampa nesiya kenon nochijchiuaskia teopan. Yejua okijli: “Jehová onechijli manikijkuilo niman manimitsmaka yejuin. Jehová mitspaleuis. Maka xmomojti. Xyolchikaui niman xchiua motekiyo”.