“Akin kuelita tetlayokolis kiteochiuaskej”

ITECH miyek xiuitl, tiktemakas uentli melak ueyi kijtosneki ijkuak noueyichiua Jehová. Israelitas kitemakayaj yolkamej ken uentin, niman akin kichiuaj ken Cristo melak kuajli kimixmatij pampa kimakaj “uentli” toTajtsin tlen ika kiueyichiuaj. San ika, onka okseki uentin tlen toTajtsin noijki kuelita (Heb. 13:15, 16). Akin kichiuaj yejuin melak yolpakij niman kiseliaj tlateochiualistin, ijkon ken tikitaskej itech seki neskayomej.

Ana katka se israelita akin yolmelauak niman melak kinekiya kipiyas se ikonetsin, san ika, xueliya kinpiaya ikoneuan. Ipan se teoyotl, yejua okijli toTajtsin ika tla kipiaya se ikoneuj, kimaktiliskia niman ijkon makitekichiuili “nochi tonaltin ipan inemilis” (1 Sam. 1:10, 11). Sakin, Ana okoneuatiak niman okipix se ikoneuj akin okitokayoti Samuel. Ijkuak xok kichichitiaya okuikak ipan tabernáculo, ijkon ken okijtoka kichiuas, niman ijkon ompa makitekichiuili Jehová. Jehová okiteochiuj Ana pampa okitemakak tlen kipiaya. Yejua okipix okseki makuijli ikoneuan, niman Samuel onochiuj se teotlajtoketl niman se akin okijkuilo Biblia (1 Sam. 2:21).

Ijkon ken Ana niman Samuel, akin tikchiuaj ken Cristo noijki uelis tijkuiskej tonemilis ika tiktekichiuiliskej toTajtsin, akin otexchijchiuj. Noijki, Jesús okijto ika ijkuak tokojtiliaj tiktekichiuiliaj Jehová, tikseliskej miyek tlateochiualistin (Mar. 10:28-30).

Ipan kachtopa siglo, se siuatsintli akin kichiuaya ken Cristo itoka katka Dorcas melak kixmatiyaj pampa nokojtiliaya kinpaleuis oksekimej, yejua “nochipa kichiuaya on tlen kuajli niman kimpaleuiyaya on yejuan tla itlaj kimpolouaya”. Teajman ika sakin “okualok niman omik”, niman tokniuan akin nemiyaj ipan itlanechikol melak onajmankej. Ijkuak okimatkej ika Pedro nisiuj nemiya, melak okitlajtlanilijkej nimantsin makinmitati. ¡Xnemili kenon melak okinyolpakti ijkuak Pedro oajsik niman okiyoliti Dorcas! Yejuin kachtopa yoliuilistli tlen kiteneua Biblia ika kichiuaya se apóstol (Hech. 9:36-41). ToTajtsin xkeman okilkauj tlen okichiuj Dorcas (Heb. 6:10). Inemilis onoijkuilo ipan Biblia, niman ipan yejuin tonajli uelis tikixkopinaskej ineskayo.

Apóstol Pablo noijki se kuajli neskayotl pampa okinmakak itiempo oksekimej niman okinpaleui. Okimijkuilouili akin kichiuayaj ken Cristo ipan Corinto: “Nejua ikan kuajli noyojlo niktemakas nochi on tlen nikpia, niman xsan yejua on, yej nejua no niktemakas nonemilis ipampa nemoalma” (2 Cor. 12:15). Nochi tlen Pablo okitak ipan inemilis okimachti ika ijkuak tikchiuaj miyek tlemach inpampa oksekimej techyolpaktia. Niman, tlen melak ueyi kijtosneki, Jehová techteochiua niman techselia (Hech. 20:24, 35, TNM).

Kuajli nesi ika Jehová kuelita matijkuikan totiempo niman tochikaualis ipampa Tekiuajyotl niman inpampa tokniuan. San ika ¿onka okseki tlen uelis tikchiuaskej? Kema. Ijkon ken uelis tikchiuaskej tlen kuajli ipampa oksekimej, noijki uelis tikueyichiuaskej Jehová ika totomintsin. Yejuin tomintsin tepaleuiya ika tenojnotsalistli ipan nochi tlaltikpaktli maka manotelti. Se neskayotl, ika yejon nopaleuiyaj tokniuan misioneros niman oksekimej tokniuan akin tekitij ken siervos de tiempo completo especial. Noijki notekitiltia ika kinchijchiuaj niman kintlajtolkuepaj amoxtin niman videos, ika kinpaleuiyaj tokniuan akin chantij kampa otlaixpoliuj, niman noijki ika kinchijchiuaj Kaltin kampa Tosentlaliaj. Kuajli matikmatstokan ika “akin kuelita tetlayokolis kiteochiuaskej”. Niman ijkon, noijki tikueyichiuaskej Jehová “ika nochi tlemach tlen patioj” tikpiyaj (Prov. 3:9; 22:9).

Kenon sekimej tepaleuiyaj itech tekitl ipan nochi tlaltikpaktli

Ijkon ken itech itonaluan apóstol Pablo, ipan yejuin tonaltin miyekej kixelouaj seki intomintsin niman kontlajkalij ipan cajas kampa notlalia tomin tlen onka ipan tlanechikoltin, tlen kijtouaj “Tekitl ipan nochi tlaltikpaktli” (1 Cor. 16:2). Nochi metstin tlanechikoltin kontitlanij yejuin tomin ipan sucursal tlen kinyekana, tlen iyaxka iteixpantijkauan Jehová. Tla tejua tikneki, uelis tikomintitlanilis motomintsin iteixpantijkauan Jehová, ken ijkuiliujtokej ixpan tekiuajkej ipan país kampa tichanti. Tiknextis kanon uelis tiktitlanis ipan www.jw.org/ngu. Nikan tikitas seki tlen uelis notitlanis (tlen notlajtlani ijkuak tiktitlanis tomin uelis nopatlas ipan okseki países).

TIKTEMAKAS TLEN TIKPIYA

Uelis tiktitlanis motomin ika se transferencia bancaria electrónica, noso ika tarjetas de débito niman crédito. Ipan seki sucursales noijki kitekitiltiaj jw.org noso okse página itech Internet tlen yonotlapejpeni makiseli.
Uelis tiktemakas tomin, mokoskauan noso okseki tlen tikpiya tlen patioj. Makitki se amatl kampa makijto ika tiktetlayokolia.

TIKTEMAKAS TOMIN TLEN UELIS MITSKUEPILISKEJ

Tiktemakas tomin tlen uelis tiktlajtlanis oksejpa tla mitsonpoloua.
Makitki se amatl kampa makijto ika uelis tiktlajtlanis tla nonekis tiktekitiltis.

TLEN YOTIKNEMILI SAKIN TIKTEMAKAS

Aman tiktlaliaj okseki tlemach ken uelis titlapaleuis itech tekitl ipan nochi tlaltikpaktli ipampa Tekiuajyotl. Tla tikneki itlaj tiktemakas itech yejuin, timitstlajtlaniliaj xontenotsa ipan sucursal tlen tlayekana kampa tichanti niman ijkon tikitas tla uelis tikchiuas. Pampa tlanauatiltin niman tomin tlen kitlajtlanij se makitlaxtlaua xsan noijki ipan nochi países, melak noneki xtlajtolti akin tekiti itech yejuin niman ijkon tiktlapejpenis ken kinamiki tikchiuas.

Seguros niman tlen se kiselia ijkuak xok tekiti: Uelis tiktlalis intokayo iteixpantijkauan Jehová, ken ijkuiliujtokej ixpan tekiuajkej, ika makiselikan tomin ipampa se seguro de vida noso tomin tlen tikselia pampa xok titekiti.

Tlen tikpiya ipan banco: Uelis tiktlalis intokayo iteixpantijkauan Jehová, ken ijkuiliujtokej ixpan tekiuajkej, ika yejuamej kiseliskej motomin tla timiki, ijkon ken kitlajtlanij tlanauatiltin itech bancos ipan se país.

Acciones niman bonos: Yejuin uelis tikinmakas iteixpantijkauan Jehová, ken ijkuiliujtokej ixpan tekiuajkej, noso uelis tikchijchiuas se amatl kampa makijto intech mapano ijkuak timikis.

Motlaluan niman mokaluan: Tla tejua tikpiya motlaluan niman mokaluan tlen uelis nonemakaskej, uelis tikinmakas iteixpantijkauan Jehová, ken ijkuiliujtokej ixpan tekiuajkej. Tla ompa tichanti uelis tiktlapejpenis ompa tinemis nochi kech tinemis.

Testamentos niman fideicomisos: Uelis tikijlis se notario makitlali ipan motestamento ika tikinkauilis iteixpantijkauan Jehová, ken ijkuiliujtokej ixpan tekiuajkej, tlen tejua motlatki noso motomin. Noijki uelis tikinkauilis itlaj ika se contrato de fideicomiso. Yejuin amamej tepaleuiyaj ijkuak tiktlaxtlauas tlen kitlajtlanij tekiuajkej.

Noneki kuajli tiknemilis kenon tikchiuas, ika yejon itoka “tlen yotiknemili sakin tiktemakas”. Onka se amatlajkuilojli tlen yonochijchiuj niman ijkon kinpaleuis akin kinekij tlapaleuiskej itech tekitl ipan nochi tlaltikpaktli tlen kichiujtokej iteixpantijkauan Jehová, yejuin amatlajkuilojli itoka Donaciones planificadas para favorecer el servicio del Reino en todo el mundo, onka ika inglés niman español. Yejuin amatlajkuilojli kijtoua kenon se uelis kitemakas tomin noso tlen kipiya. Uelis ika tlen ompa kijtoua xnochiuiyan uelis nochiuas pampa tlanauatiltin niman tlen tekiuajkej kitlajtlanij manotlaxtlaua xsan noijki ipan nochi países. Ipampa yejuin tetlayokoliltin, miyekej tlaltikpakchanejkej youelkej kinpaleuiyaj oksekimej itech tlen kinpoloua niman tlapaleuiyaj itech itekiyo toTajtsin, se tekitl tlen tikchiuaj ipan nochi tlaltikpaktli, niman noijki, yokinpaleui ijkuak kitlaxtlauaj tlen kintlajtlaniliaj tekiuajkej. Tla yejon amatlajkuilojli onka kampa tichanti, uelis tiktlajtlanilis secretario itech tlanechikojli mamitsmaka se.

Tla tikneki tikmatis okseki, xpachouili kampa kijtoua “Nikneki niktemakas tomintsin ipampa tekitl ipan nochi tlaltikpaktli” tlen tiknextis tlatsintlan itech san katlejua página ipan jw.org, noso xontenotsa ipan sucursal.