TLAJTOLTILISTLI 6
¿Kenon uelis nikxikos tla nexchiualtiaj itlaj manikchiua?
¿TLENON TIKCHIUASKIA?
Xtlanemili itech yejuin: Brian kimati ika xok ueli tlajtoua ijkuak kita ika omemej akin inuan nomachtia kuajnisiuijtiuej. Ipan yejuin semana okpa yokijlikej mapoki. Niman aman iyexpa yes.
Se kijlia:
“¿Oksejpa san moselti? Mej, ika yejuin xtikochis”.
Kuajkixtia itlaj, konuetskilia niman kontekiuiltilia Brian.
Brian konita cigarro tlen yokuajkixti yejuin telpochtli. Niman kimati ika melak xok ueli tlajtoua.
“Ka, tlaxtlaui, yonimitsijli ika nejua...”.
Niman okse kitlajtolkotontikisa: “¿Tlenon panoua? ¿Timomojtia?”.
“Ka, xyejon nikijtosneki” nochikaua Brian niman kinnankilia.
Kuakon, telpochtli kikechnapaloua niman kijlia kentla iuan nouikaskia: “Brian, san se cigarro”.
Telpochtli akin kachtopa okinots kontekechilia cigarro niman san yoliktsin kijlia: “Xakaj tikijliskej. Yejuin san tejuamej tikmatstoskej”.
Tla tiBrian yeskia, ¿tlenon tikchiuaskia?
XMOTELTI NIMAN XTLANEMILI
¿Tikneltoka ika akin inuan nomachtiaj Brian kimatstokej tlenon kichiuaj? ¿Tiknemilia ika yejuamej kitlapejpeniaj tlen kichiuaj? Kanaj ka. Miyekpa san kichiuaj ken oksekimej pampa kinekij makinselikan, ika yejon, kinkauiliaj oksekimej makimijlikan tlenon kichiuaskej.
Tla ijkon mopan nochiujtoskia, ¿xtikuelitaskia tejua tiktlapejpenis tlenon tikchiuas niman maka tlen oksekimej mitsijliskej?
XMOYEKTLALI
Biblia kijtoua: “Akin tlamachilise kita tlen teijtlakoua niman niyana, san ika, akin xtlamachilise ompa tlamelaua niman tlajyouiya itech tlen panoua” (Proverbios 22:3).
Kemantika, nimantsin tikitas ijkuak uajlauj tlauejli. Xnemili ika tejua tinejnentiuj niman tikominita telpokamej akin pokitokej. Tla tejua nimantsin titlanemilia kenon tikixnamikis yejuin tlauejli, kuajli tikmatstos kenon tikinnankilis.
XTLANEMILI
Biblia kijtoua: “Maka xkauilikan nemotlamachilis mamechtlajtlakolmakakan” (1 Pedro 3:16).
Xmotlajtolti: “¿Kenon ninomachilis tla nikchiua ken oksekimej?”. Kanaj akin imiuan timomachtia mitsseliskej, maski xnochipa. San ika ¿kenon timomachilis sakin? ¿Melauak tikneki timouikas inuan akin timomachtia maski uelis tikpolos akin tejua? (Éxodo 23:2).
XTLAPEJPENI
Biblia kijtoua: “Akin tlamachilise kuajli kita tlen kichiua niman nejkuania itech tlen xkuajli” (Proverbios 14:16).
Kachtopa noso sakin, kipiya ika tiktlapejpeniskej tlenon tikchiuaskej niman tikixnamikiskej tlen kuajkuis. Biblia tlajtoua itech tlakamej akin kuajli okitlapejpenijkej, ken José, Job niman Jesús, san ika, noijki tlajtoua itech oksekimej tlakamej akin xkuajli okitlapejpenijkej, ken Caín, Esaú niman Judas. ¿Tejua tlenon tikchiuas?
Biblia kijtoua ika noneki matikchiuakan “tlen melauak” (Salmo 37:3). Tla tejua yotiknemili kenon tonkisas ipampa tlen tikchiua niman yotiktlapejpeni tlenon tikchiuas, xmitstekiyomakas tikteijlis tlen tikneltoka niman melak mitspaleuis.
Maka xmajmana, xnoneki tikimijlis miyek tlemach. San xkinmelajkaijli ika xtikneki. Noijki uelis kuajli tikimasikamachiltis tlen yotikijto, uelis ijkin tikimijlis:
“Maka teuan xnechkalakti”.
“Nejua xnikchiua yejon tlemach”.
“Itikmatstika tlenon niknemilia”.
Melak mitspaleuis tla nimantsin kuajli titlanankilia. Tla ijkon tikchiua, kanaj mitsmojkatlachialtis tikitas kenon akin imiuan timomachtia xok mitschiualtiskej xchiua itlaj.
¿TLENON NIKCHIUAS TLA NECHPIJPINAUJTIAJ?
Tla tikchiua tlen mitsijliaj akin imiuan timomachtia, yejuamej mitsyekanaskej.
Kanaj akin imiuan timomachtia kichiuaskej ika oksekimej mamitsuejuetskilikan. Kanaj mitsijliskej: “¿Tlenon panoua? ¡Timomojtia!”. Yejuin tlen kichiuaj akin kinekij mitschiualtiskej xchiua itlaj. ¿Tlenon uelis tikchiuas? Kanaj ome tlemach tlen uelis tikchiuas:
Tikinnakilijtias. Uelis tikijtos: “Melauak tlen tikijtoua, xnikneki nikchiuas”. Sakin, xkimijli achijtsin tleka xtikneki tikchiuas.
Xkintlanemililti. Xkintomili tleka xtikchiua niman xkimijli: “Yakaj akin tlamachilise ken tejua xpokiskia”.
Tla ok mitspijpinaujtiaj, xuiya. Xkilnamiki: tla imiuan ompa tinemi ouijtika tikxikos tlen mitschiualtijtokej xchiua. Ijkuak tikinkajteua, tikteititia ika tejua akin tikijtoua tlen tikchiuas.
Kuajli matikmatstokan: nochipa mitschiualtijtoskej xchiua itlaj. San ika, uelis tiktlapejpenis tlenon tikchiuas, kuajli xkimijli tlenon tiknemilia. Maka xmokauili mamitsyekanakan pampa tejua tikijtos tlenon tikchiuas (Josué 24:15).