Historia 30

Uitskojtli tlen tlikuitika

MOISÉS yoyejkoka ipan tepetl Horeb kuajtejtemotiuj xiujtli tlen kikuaskej iborregos. Nikan okitak se uitskojtli tlen tlikuitika, san ika, ¡uitskojtli xtlatla!

‘¡Xkeman ijkon panoua!’ Moisés okinemili. ‘Nikontas tlen panoua.’ Ijkuak ononisiui kampa onka uitskojtli, okakistik se tlajtojli tlen okijto: ‘Xmotelti maka sa xuajmonisiui. Xkinkixti mokakuan, pampa yejuin tlajli chipauak’. ToTajtsin tlajtotoya ika se iluikaktekitketl, ika yejon, Moisés onoxayakatlapacho.

Kuakon toTajtsin okijli Moisés: ‘Nejua yonikitak kenon tlajyouijtika nokalpan ipan Egipto. Nimitstitlanis xkinkixtiti kampa nemij niman ijkon nikinmakixtis’. Jehová kuikaskia ikalpan ipan se kualtsin país, itoka Canaán.

Ika yejon, Moisés okijto: ‘Nejua xtlaj ika nitepaleui. ¿Kenon uelis nikchiuas yejuin? Niman tla niauj nechijliskej: “¿Akinon omitsajtitlan?” ¿Kuakon tlenon nikimijlis?’

‘Yejuin tikimijlis’, okijto toTajtsin. ‘“JEHOVÁ akin iTajtsin Abrahán, iTajtsin Isaac niman iTajtsin Jacob onechajtitlan nemotech”.’ Kuakon toTajtsin okijto: ‘Yejuin nochipa yes notoka’.

Moisés otlanankili: ‘¿Niman tla yejuamej xnechneltokaj ijkuak nikimijlis ika tejua otinechtitlan?’

‘¿Tlenon tikpiya ipan moma?’, okitlajtolti toTajtsin.

Moisés okinankili: ‘Se tlakotl’.

‘Xtlajkali’, okinauati toTajtsin. Ijkuak Moisés ijkon okichiuj, itlakouj tlen kipiaya onokuep se kouatl. Kuakon, Jehová okititi Moisés okse milagro. Okijli: ‘Xtlapacho moma ika motlaken’. Moisés okichiuj, niman ijkuak okitak ima, ¡melak istak katka! Nesiya kentla kipiaya se kokolistli itoka lepra. Kuakon Jehová okikauili Moisés makichiua okse milagro. Ijkuak otlamito okijto: ‘Ika yejuin milagros, kichiuas matlaneltokakan israelitas ika nejua onimitstitlan’.

Sakin, Moisés oyaj ichan niman okijli Jetró: ‘Nimitstlajtlanilia, xnechkauili oksejpa maniuiya Egipto pampa nikneki nikitas kenon nemij akin ken nikimita’. Kuakon ijkuak Jetró okikauili, Moisés oksejpa onokuep Egipto.

Éxodo 3:1-22; 4:1-20.

Historia 31

Moisés iuan aarón yauej itech Faraón

IJKUAK Moisés oksejpa oyaj Egipto, okitlajtlatouili ikniuj Aarón itech milagros tlen okimitak. Niman ijkuak Moisés iuan Aarón okinmijtitikej israelitas yejon milagros, nochimej okineltokakej ika Jehová imiuan nemiya.

Kuakon Moisés iuan Aarón oyajkej itech Faraón. Okijlikej: ‘Jehová iTajtsin Israel kijtoua: “Xkauili mauiya nokalpan Israel yeyi tonajli, niman manechueyichiuakan ipan tlaluaktli”’. Faraón okijto: ‘Nejua xnikneltoka Jehová. Xnikinkauilis mayakan israelitas’.

Faraón melak kualaniya, pampa israelitas kinekiyaj kiueyichiuaskej Jehová ijkuak yejuamej tekitiyaj. Ika yejon, okinchiualti matekitikan chikauak. Israelitas okitlajtlakoltijkej Moisés, pampa melak chikauak opeuj kintekitiltiaj, niman Moisés melak onoyolkoko. Jehová okijli maka manotekipacho. Niman okijto: ‘Nikchiuas, Faraón makikauili makisa nokalpan Israel’.

Moisés iuan Aarón oksejpa oyajkej itech Faraón. Aman yejuamej okichiujkej se milagro. Aarón okitlajkal itlakouj, niman onokuep se ueyi kouatl. Niman iteopixkauan Faraón akin nanaualtin katkaj noijki okitlajkalkej intlakouj, niman noijki onokuepkej kouamej. San ika, ¡xkita! itlakouj Aarón tlen onokuep se kouatl, opeuj kintoloua okseki kouamej tlen intlatki katka teopixkej. Maski ijkon, Faraón xokinkauili makisakan israelitas.

Ika yejon, Jehová okinemili kititis Faraón, iueyilis. ¿Tikmatstika kenon okichiuj? Okichiuj makipiya Egipto majtlaktli tlajyouilistin.

Sakin, ijkuak panouayaj tlajyouilistin, Faraón kinnotsaya Moisés niman kijliaya: ‘Xtelti yejuin tlajyouilistli niman nikinkauilis mayakan israelitas’. San ika, ijkuak tlajyouilistli noteltiaya, kipatlaya tlen yokijtoka. Xkinkauiliaya mayakan. Sakin, ijkuak opanok tlajyouilistli majtlaktli, okimijli makisakan.

¿Tikimixmatstika katlejuamej majtlaktli tlajyouilistin? Xpano ipan okse página niman matikimitakan.

Éxodo 4:27-31; 5:1-23; 6:1-13, 26-30; 7:1-13.

Historia 32

Majtlaktli Tlajyouilistin

XKITA tlaixkopinaltin. Nikan nesij tlajyouilistin tlen Jehová okintitlanili egipcios. Ipan kachtopa tlaixkopinajli nesi Aarón kiuitektika atentli Nilo ika itlakouj. Kuakon yejon atl onokuep yestli, michimej omijkej, niman aman atentli opeuj molonia.

Sakin, Jehová okichiuj makisakan temomej ipan atentli Nilo. Nemiyaj ipan hornos, kampa tlaxakualouayaj, ipan tlapextin, nochiuiyan. Ijkuak temomej omijkej, egipcios melak miyekej okinnechikojkej, niman ipan nochi país otlamoloniak.

Kuakon Aarón okiuitek tlajli ika itlakouj niman tlalpoktli onokuep jejenes, sayolintsitsintin tlen tekuaj. Yejuin katka ika yeyi tlajyouilistli.

Okseki tlajyouilistin xokintlajyouilti israelitas, san egipcios. Ika naui, okintitlanilijkej uejueyimej sayolimej tlen okalakitoj ipan inchan nochimej egipcios. Ika makuijli, okintlajyouilti yolkamej. Melak miyekej uakaxtin, borregos niman chivos tlen intlatki katka egipcios omijkej.

Sakin, Moisés iuan Aarón okixinijkej tlikonextli, niman yejuin okichiuj tlaltikpakchanejkej iuan yolkamej makipiyakan tsotsomej tlen temalkisaj. Yejuin ika chikuasen tlajyouilistli.

Sakin, Moisés tlakpak okajkok itlakouj, niman Jehová opeuj kichiua matlakomoni niman matesiui. Xkeman ijkon tesiuiya ipan Egipto.

Ika chikueyi tlajyouilistli, okititlan miyekej chapolimej. Xkeman ijkon melak miyekej nemiyaj, niman xkeman noita melak miyekej chapolimej. Okitlamijkej nochi tlen okikauj tesiujtli.

Ika chiknaui tlajyouilistli, inpan otlayouak. Yeyi tonajli ipan nochi país ijkon onenkej, san ika, kampa israelitas nemiyaj kipiayaj tlauijli.

Ika otlamito, toTajtsin okimijli nochemej israelitas makixauilikan iyesyo borreguito iyeualiyan puertas. Kuakon iiluikaktekitkauj toTajtsin oyaj Egipto. Ijkuak iluikaktekitketl kitaya yestli ipan yejon kajli, xakaj kimiktiaya. Niman ijkuak xkitaya yestli, kimiktiaya nochimej tekoneuan akin kachtopa otlakatikoj, itech tlaltikpakchanejkej niman yolkamej. Yejuin katka ika majtlaktli tlajyouilistli.

Ijkuak yopanok yejuin tlajyouilistli, Faraón okinkauili israelitas makisakan, akin sa kichiayaj makinkauilikan, nimantsin ipan yejon yeuajli opeuj kisaj itech Egipto.

Éxodo, tlaxeloltin uejueyimej 7 ontlami ipan 12.

Historia 33

Panouaj itlajkotian mar Rojo

¡XKITA tlen panotika! Moisés akin konteketstika itlakouj ipan mar Rojo. Akin iuan nemij, yejuamej israelitas. Niman Faraón iuan isoldados iamimiktokej. Matikitakan kenon opanok yejuin.

Ken otomachtijkej, sakin ijkuak yopanok tlajyouilistli majtlaktli, Faraón okimijli israelitas makisakan itech Egipto. Kanaj 600 mil tlakamej israelitas okiskej, noijki miyekej siuamej niman kokonej. Oksekimej miyekej tlaltikpakchanejkej akin yotlaneltokakaj itech Jehová imiuan okiskej israelitas. Nochimej okinuikakej inyolkauan, inborregos niman chivos ijkuak okiskej itech Egipto.

Ijkuak xkisayaj, israelitas okintlajtlanilijkej egipcios tlakentin niman miyek tlemach tlen tlachijchiujtin ika plata niman ika oro. Egipcios melak onomojtijkej ika tlajyouilistli majtlaktli. Kuakon okinmakakej israelitas nochi tlen okitlajtlankej.

Opanok san seki tonaltin niman israelitas oajsikej itech mar Rojo. Ompa onoseuijkej. Niman Faraón iuan itlapaleuijkauan okinemilijkej ika xkuajli okichiujkej, pampa okinkauilijkej israelitas makisakan. Kijtouayaj: ‘¡Otikinkauilijkej mayakan totlakeualuan!’

Kuakon Faraón oksejpa okipatlak tlen yokijtoka. Nimantsin opeuj kiyektlalia icarro tlen kitekitiltia ipan guerra niman isoldados. Kuakon opeuj kintoka israelitas ika 600 carros melak kuajli tlachijchiujtin, niman ika nochi carros tlen onkatkaj Egipto.

Ijkuak israelitas okontakej uajlauj Faraón niman isoldados, melak onomojtijkej. Xueliskiaj choloskiaj. Imixpan onkatka mar Rojo niman inkuitlapan uajlayaj egipcios. San ika, Jehová okitlali se moxtli tlen kixelouaya ikalpan itech egipcios. Ika yejon, egipcios xueliyaj kimitayaj israelitas niman ijkon xueliyaj kinmajsiyaj.

Jehová okijli Moisés makonteketsa itlakouj ipan mar Rojo. Ijkuak Moisés okichiuj yejuin, Jehová okichiuj maejeka melak chikauak tlen ualeuaya ikisayan tonajli. Atl otlajkoxeliuj, niman onochiujkej kentla tepantin.

Kuakon israelitas opeujkej nejnemij ipan tlajli uajki. Nonekiya miyek horas niman ijkon mauelikan mapanokan yejon tlaltikpakchanejkej iuan inyolkauan. Aman egipcios oksejpa ouel okimitakej, niman oyajkej ipan mar okintokakej.

Ijkuak ijkon okichiujkej, toTajtsin okichiuj maijtlakauikan incarros. Egipcios melak onomojtijkej niman otsajtsikej: ‘Jehová techixnamiki inpampa. ¡Matikisakan!’ San ika, xok ueliskiaj.

Kuakon Jehová okijli Moisés makonteketsa itlakouj ipan mar Rojo, ken otikitak ipan tlaixkopinajli. Atl tlen onochiujkej ken tepantin inpan otoyauj egipcios niman incarros. Nochimej soldados nemiyaj ipan mar. ¡Nion se egipcio xomakis!

¡Melak opak ikalpan toTajtsin pampa omakiskej! Tlakamej onokuikatijkej pampa okitlasojkamachilijkej Jehová, kijtouayaj: ‘Jehová otetlan. Okichiuj maamimikikan ipan mar caballos niman akin inpan tlejkotiayaj’. Míriam, ikniuj Moisés, okikixti ipandereta, niman nochi siuamej ijkon okichiujkej. Onijtotijkej, niman noijki onokuikatijkej: ‘Jehová otetlan. Okichiuj maamimikikan ipan mar caballos niman akin inpan tlejkotiayaj’.

Éxodo, tlaxeloltin uejueyimej 12 ontlami ipan 15.