¿Tikselijtika nochi tlamachtijli tlen Jehová temaka?
1. ¿Tlen ueyi tlamachtijli notemakatika?
1 Melak ueyi tlamachtijketl, Jehová, kita ueyi kijtosneki ika itekipanojkauan makiselikan tlamachtijli tlen noneki (Is. 30:20). Ipan yejuin tonajli, Jehová kiyekantika ueyi tlamachtijli tlen xkeman notemakaya. Ken okijto Isaías, melak miyekej tlaltikpakchanejkej ipan nochi tlaltikpaktli yajtokej itech “tepetl kampa onka ikal Jehová” (Is. 2:2). ¿Tleka? Pampa kinekij Jehová makinmachti niman makiselikan itlanauatiluan (Is. 2:3).
2. ¿Kenon yomitspaleui tlamachtijli tlen Jehová temaka?
2 Kuajli yotoyektlalijkej. ¡Melak yotechpaleui tlamachtijli tlen ualeua itech toTajtsin! Ipampa yejon aman tikmatij ika toTajtsin kipiya itokayo niman najmana topampa (Sal. 83:18; 1 Ped. 5:6, 7). Noijki technankilia itech tlen melak tiknekij tikmatiskej ken: ¿Tleka titlajyouiyaj niman timikij? ¿Kenon uelis tinemiskej ika melauak pakilistli? ¿Tleka otinemikoj? Niman xsan yejon, Jehová noijki techmaka tlanauatiltin tlen techpaleuiyaj matichipaujkanemikan niman kuajli matinemikan ipan tonemilis (Jos. 1:8).
3. ¿Kenon notemaka tlamachtijli itech tiamapouas niman titlajkuilos niman kenon uelis mitspaleuis?
3 Jehová noijki kinmaka kualtsin tlamachtijli akin ok xuelij amapouaj niman tlajkuilouaj. Tlamachtijli itech tiamapouas niman titlajkuilos tlen kitemakaj tlanechikoltin yokinpaleui melak miyekej tenojnotskej niman tlaltikpakchanejkej akin kinekij kixmatiskej toTajtsin. Tla noneki, grupo ika tlayekankej uelis kitas manotemaka yejuin tlamachtijli. Tlen kineki kichiuas yejuin tlamachtijli ika “akin nosentlaliaj mauelikan maamapouakan niman matlajkuilokan niman ijkon mauelikan manomachtikan Biblia niman makinmachtikan tlen melauak oksekimej” (km 10/11 página 4 [Xonka ika náhuatl de guerrero.]; be páginas 21-23). Tla kuajli tikseliaj tlamachtijli tlen techmakaj, techpaleuis matinemikan ika toyojlo aman niman ipan yenkuik tlaltikpaktli (Sal. 119:105; Juan 17:3).