¿Kanaj tejua yotikpixka se kokolistli? Kanaj nimantsin otipajtik niman hasta xok tikilnamiki kemanon otikualok. San ika, ijkuak se noyolkokoua ipampa akin omik, xnimantsin kilkaua ika noyolkokoua. Ipan amoxtli tlen tlajtoua kenon titeyolseuis, tlapajtiketl Alan Wolfelt okijkuilo: “Xtlaj uelis mitsyolseuis ijkuak timoyolkokos ipampa akin omik. [...] Ika yolik niman ika intlapaleuilis oksekimej uelis tiyolseujtias”.

Matikitakan kenon onomachili Abrahán, akin yeuejkaui onen, ijkuak omik isiuauj Sara. Biblia kijtoua ika “Abrahán opeuj najmana niman kichokilia Sara”. Ika tlajtojli “opeuj” kijtosneki ika opanok seki tiempo ika oyolseujtia.a Noijki, Jacob melak onoyolkoko pampa kineltokaya ika se yolkatl okimikti ikoneuj, José. Yejua miyek tonaltin onoyolkoko niman ichanejkauan xueliyaj kiyolseuiayaj. Maski yopanoka miyek xiuitl ika omik ikoneuj, ok melak najmanaya ipampa (Génesis 23:2; 37:34, 35; 42:36; 45:28).

Ipan yejuin tonajli, noijki ijkon inpan nochiuaj miyekej ijkuak miki se inchanejkauj. Xtlanemili itech yejuin omemej akin tikinteneuaskej.

• “Noueuentsin Robert omik ipan se accidente ipan 9 julio, 2008. Ipan yejon kualkan ijkuak onochiuj accidente kentla xtlaj panoskia. Otitlakuajkej niman ijkuak iyaskia ontekitis otikchiujke ken nochipa tikchiuaj. Otopipitsojkej noso ototenkuajkej, otonapalojkej niman otoijlikej ‘Nimitstlasojtla’. Maski yopanok chikuasen xiuitl ika omik Rob, ok ninoyolkokoua. Niknemilia ika xuelis ajsis tonajli ijkuak xok ninoyolkokos ipampa” (Gail, 60 xiuitl).

• “Maski ikipiya 18 xiuitl ika xok ninemi iuan nosiuauj, ok niktemoua niman ninoyolkokoua ipampa. Ijkuak nikita itlaj tlen kualtsin, peua itech nitlanemilia. Niman xueli nikajkaua niknemilis kenon yejua melak kiyolpaktiskia kitas tlen nejua nikuelita” (Etienne, 84 xiuitl).

Tinochimej uejkaujtipan toyolkokouaj ijkuak yakaj miki. Sesejneka noso tlatlamantik ken tikmachiliaj yejuin. Niman xkuajli yeskia tla tikijtouaj tleka xijkon kixnamiki ken okse tlen ipan panotika. San ika, maka matiknemilikan tla xnoneki tikteititiskej ika toyolkokouaj. Aman, ¿kenon uelis ika yolik tiyolseujtiaskej ijkuak ijkon topan nochiuaj?

Onka miyek tlen uelis mitsijliskej ijkuak timoyolkokoua. San ika, xnochi uelis mitspaleuis. Xnemili, kanaj sekimej mitsijliskej maka xchoka niman maka xteititi tlen tikmachilia. Niman oksekimej uelis mitsijliskej xteititi noso xkijto nochi tlen tikmachilia. San ika, Biblia techijlia tlen kinamiki tikchiuaskej, niman tlen kijtoua, noijki ijkon yokitakej akin tlaixmatkej ika tepaleui tlen kemach yonomachtijkej itech yejuin.

Oksekimej kinemiliaj ika xkuajli nesi tla se tlakatl choka. San ika ¿noneki tipinauis tichokas teixpan? Akin yonomachtijkej kenon kuajli tomachiliskej, kimatstokej ika ijkuak se noyolkokoua nochipa choka. Ijkuak se noyolkokoua pampa okipolo se ichanejkauj, ika yolik yolseujtias. Tla xtikteititia ika timoyolkokoua, uelis mitsijtlakos niman xmitspaleuis. Biblia xkijtoua ika tla xkuajli tichokas ijkuak timoyolkokoua. Xtlanemili itech Jesús,