Rebeca kinekiya kiyolpaktis Jehová

Rebeca katka se siuatl akin okitlasojtlak Jehová. Iueuentsin itoka katka, Isaac. Yejua noijki okitlasojtlak Jehová. ¿Kenon Rebeca okixmat Isaac? Niman, ¿kenon okiteititi Rebeca ika kinekiya kiyolpaktis Jehová? Matikitakan tlenon okichiuj.

Itajuan Isaac katkaj Abrahán niman Sara. Yejuamej nemiyaj Canaán, niman akin ompa chantiyaj xkiueyichiuayaj Jehová. San ika, Abrahán kinekiya ika ikoneuj manonamikti iuan se siuatl akin makiueyichiua Jehová. Ika yejon, okititlan se itlakeual, kanaj yejon tlakatl katka Eliezer. Yejua okititlan mauiya Harán makitejtemoti akin yeskia isiuauj Isaac, kampa chantiyaj akin ken kimita Abrahán.

Eliezer oyaj iuan oksekimej itlakeualuan Abrahán. ¡Melak uejka oyajkej! Okuikakej majtlaktli camellos ika tlakuajli niman tetlayokoliltin. ¿Kenon kimatiskia Eliezer akinon yeskia isiuauj Isaac? Ijkuak Eliezer imiuan akin yaya oajsikej Harán, onoteltijkej kampa onkatka se pozo, pampa Eliezer kimatstoya ika akin ompa chanejkej ikuajkixtiskiaj atl. Okichiuili teoyotl Jehová niman okijli: “Tla yejon ichpochtli akin niktlajtlanilis atl, kema nechmaka atl niman kinmatlitia nocamellos, nikmatis ika yejua akin yotiktlapejpeni”.

Kuakon Rebeca oyejkok kampa onka pozo. Biblia kijtoua ika katka se ichpochtli melak kualtsin. Eliezer okitlajtlanili makimaka atl, niman Rebeca okinankili: “Kema. Nimitsmakas atl niman noijki nikinmatlitis mocamellos”. ¡San xnemili! Camellos melak miyek atl konij, ika yejon, uelis tiknemiliskej ika Rebeca miyekpa okikixtito atl. ¿Ueli tikita ipan tlaixkopinajli tlenon kichiujtika Rebeca?... ¡Eliezer melak okimojkatlachialti kenon Jehová okinankili iteoyouj!

Eliezer okitlayokoli Rebeca miyek tlemach tlen kualtsin. Rebeca okijli Eliezer niman akin imiuan yaya ika manokauakan ichan. Eliezer opeuj kimijlia ichanejkauan Rebeca tleka Abrahán ompa okititlan niman kenon Jehová okinankili iteoyouj. Ichanejkauan melak okinyolpakti ika Rebeca manonamikti iuan Isaac.

Aman, ¿kinekiskia Rebeca nonamiktis iuan Isaac?... Rebeca kimatstoya ika Jehová ompa okontitlan Eliezer. Ika yejon, ijkuak ichanejkauan Rebeca okitlajtoltijkej tla kinekiya yas Canaán niman nonamiktis iuan Isaac, yejua okijto: “Kema, niknektika nias”. Nimantsin oyaj iuan Eliezer. Ijkuak oajsikej Canaán, ononamikti iuan Isaac.

Pampa Rebeca okitlakamat Jehová, yejua okiteochiuj. Sakin ijkuak yopanoka miyek xiuitl, onemiko Jesús itech ichanejkauan Rebeca. Tla ijkon tikchiua ken Rebeca niman tikyolpaktia Jehová, noijki mitsteochiuas.