Josías kuajli okintlapejpeni akinomej imiuan nouikas

¿Tiknemilia ika xuelis tikchiuas tlen Jehová kineki?... Miyekej tlaltikpakchanejkej kinemiliaj ika xuelis kichiuaskej. Biblia xijkon kijtoua. Tlajtoua itech se telpochtli akin itoka Josías, yejua melak onochikauj kuajli kitekichiuilis Jehová. Okintlapejpeni akinomej imiuan nouikas noso iamigos niman ijkon okitekichiuili toTajtsin. Aman matiuelikan itech Josías niman akin imiuan onosentlali.

Itataj noso itaj Josías itoka katka Amón akin tekiuaj katka ipan Judá. Amón xyolkuajli katka, kinueyichiuaya tajtsitsintin akin xmelajkej. Ijkuak Amón omik, Josías onochiuj tekiuaj ipan Judá. ¿Tikmatstika kech xiuitl kipiaya Josías ijkuak opeuj tekiuajti? ¡San chikueyi xiuitl kipiaya! ¿Xyolkuajli katka ken itataj?... Ka, yejua xijkon katka.

Ijkuak pitentsin katka, Josías kinekiya kitekichiuilis Jehová. Ika yejon, okintejtemo akinomej imiuan nouikas. Okintlapejpeni san akin kitlasojtlayaj toTajtsin, niman yejuamej okipaleuijkej makitlakamati Jehová. ¿Akinomej imiuan onouikak Josías?

Se akin iuan onouikak, katka Sofonías. Yejua teotlajtoketl katka, okimijli akin chantiyaj Judá inpan nochiuaskia tlen xkuajli tla xkikajkauayaj ika kinueyichiuaj tajtsitsintin xmelajkej. Josías okikak tlen okijto Sofonías niman san okiueyichiuj Jehová, niman xyejon tajtsitsintin.

Okse akin iuan onouikak Josías, katka Jeremías. Jeremías xuejka iuan notstiaya Josías, niman nisiu chantiyaj kampa onoskaltijkej. Onopaleuijkej niman san sekan okitekichiuilijkej Jehová. Ika yejon, ijkuak Josías omik, Jeremías okijkuilo se tlakuikajli kampa kijtouaya ika melak okiyolkoko tlen ipan onochiuj Josías. ¿Tikita kuakon kenon melak kuajli onouikakej?

¿Tlenon tiuelij itech tlen okichiuj Josías?... Maski Josías pitentsin katka, yejua kinekiya kitlakamatis Jehová. San ika, nonekiya kintlapejpenis makitlasojtlakan Jehová akin imiuan nouikaskia. ¿Tejua tikneki tiktekichiuilis Jehová? Kuakon, ¿akinomej imiuan timouikas? Kema, noijki imiuan akin kitlasojtlaj Jehová.