Isobrino Pablo katka yolchikauak

Matomachtikan itech se telpochtli akin okipaleui maka makimiktikan itío. Itío yejuin telpochtli katka Pablo. Xtikmatij kenon itoka katka yejuin telpochtli, san ika, tikmatstokej ika ononek yolchikaualistli itech tlen yejua okichiuj. ¿Tikuelitaskia tijkakis tlenon okichiuj yejuin telpochtli?...

Pablo tsauktoya Jerusalén. Okitsajkej pampa tenojnotsaya itech Jesús. Sekimej tlakamej melak kitlauelitayaj Pablo, ika yejon, okitejtemouilijkej kenon kichiuiliskej tlen xkuajli. Yejuamej okijtokej: “Matiktlajtlanilikan akin kinyekana soldados matlanauati makuajuikakan Pablo kampa teyolkuitilo. Tejuamej tiyanaskej ipan ojtli, niman ijkuak Pablo panos, ¡tikmiktiskej!”

Isobrino Pablo okikak ika itío kinekiyaj kichiuiliskej tlen xkuajli. ¿Niman tikmatis tlenon okichiuj? Okitato Pablo kampa tsauktika niman okijlito. Kuakon, Pablo okinauati isobrino ika nimantsin makijliti akin kinyekana soldados tlenon kinemilijtokej kichiuiliskej. ¿Tiknemilia onomojti isobrino Pablo ijkuak otlajtoto iuan akin kinyekana soldados?... Kema, pampa yejon tlakatl ueyixtika katka. San ika, isobrino Pablo okipix yolchikaualistli niman otlajtoto iuan yejon tlakatl.

Akin kinyekana soldados kuajli okinemili tlenon kichiuas. Kanaj 500 soldados okintitlanili niman ijkon maka itlaj kichiuiliskej Pablo. Ipan yejon yeuajli otlanauati makuikakan Pablo ipan ueyikalpan Cesarea. ¿Ipan itlaj onochiuj Pablo?... Ka, ¡xtlaj ipan onochiuj! Yejon tlakamej xkuakualtin xouelkej okimiktijkej. Xokis ijkon ken yokinemilijkaj.

¿Tlenon tiueli itech tlen otomachtijkej?... Tejua noijki uelis tiyolchikauak yes ken isobrino Pablo. Tinochimej noneki tiyolchikaujkej yeskej ijkuak titenojnotsaskej itech Jehová. ¿Tikneki nochipa titenojnotsas itech Jehová ika yolchikaualistli?... Tla ijkon tikchiua, uelis tikinpaleuis oksekimej makipiyakan se nemilistli tlen xkeman tlamis.