Josías okitlasojtlak iTlanauatil toTajtsin

Josías opeuj tekiuajti ijkuak kipiaya chikueyi xiuitl. Ipan yejon tonaltin, kalpan kichiuaya naualyotl niman kiueyichiuaya tajtsitsintin. Ijkuak kipiaya 16 xiuitl, Josías okiyejyeko kimatis kenon kiueyichiuas Jehová ken kinamiki. Ijkuak kipiaya 20 xiuitl, opeuj kinxoxotonia tajtsitsintin niman miyek tlaixpan ipan nochi ueyikalpan. Niman ijkuak kipiaya 26 xiuitl, okichiuj manoyektlali iteopan Jehová.

Ueyi teopixketl, Hilquías, okinexti ipan teopan se tlajkuilolamatl itech iTlanauatil Jehová. Kanaj yejuin tlakuilolamatl tlen Moisés okijkuilojka. Itlajkuilojkauj tekiuaj, Safán, okitkili tlajkuilolamatl Josías niman opeuj chikauak kipouilia. Josías okikak niman okasikamat ika kalpan ikuikaya miyek xiuitl ika xkitlakamatiya Jehová. Kuakon tekiuaj Josías okijli Hilquías: “Jehová melak kualantika touan. Iuan xtlajto, matechijli tlenon kineki matikchiuakan”. Jehová okijli yejuin tlajtojli se siuatl teotlajtoketl itoka Huldá: “Akin chantij Judá yonechkaujkej. Nikintlajtlakolmakas, san ika, xnikchiuas ipan itonaluan Josías pampa yejua yolyemanki”.

Ijkuak tekiuaj Josías okikak yejuin tlajtoltin, oyaj ipan teopan niman okisentlali kalpan Judá. Sakin, ika chikauak tlajtojli okipouili kalpan iTlanauatil Jehová. Josías niman kalpan okijtokej kitlakamatiskej Jehová ika nochi inyojlo.

Yopanoka miyek xiuitl ika kalpan Judá xkipanoltiayaj Pascua. San ika, ijkuak Josías okipouj ipan Tlanauatijli ika Pascua nonekiya nopanoltis nochi xiuitl, yejua okijli kalpan: “Tikiluichiuiliskej Jehová, tikpanoltiskej Pascua”. Kuakon Josías okichiuj manoyektlali miyek uentli niman manemikan sekimej akin nokuikatiaj ipan teopan. Kuakon okipanoltijkej Pascua. Sakin okipanolti Iluitl itoka Tortas tlen Xkipiya Tlaxokolilistli, yejuin ouejkauj chikome tonajli. Youejkauj ika xkipanoltiayaj se Pascua ken yejuin hasta ijkuak nemiya Samuel. Josías melauak kitlasojtlaya iTlanauatil toTajtsin. Niman tejua, ¿tikuelita timomachtis itech Jehová?