TLAMACHTIJLI 14

Xteititi tlen ueyi kijtosneki

Hebreos 8:1

TLEN TIUELIS: Xkinpaleui akin mitskaktokej ika makasikamatstiakan motlamachtil niman kuajli xteititi kenon notlajtolnamikij tlajtoltin tlen ueyi kijtosnekij iuan ken itoka motlamachtil niman xteititi kenon kinpaleuis tlen tikimijlia.

KENON TIKCHIUAS:

Xmatsto tlenon tikneki tikimasikamachiltis. Xnemili tlenon tikneki tikchiuas ika motlamachtil: itlaj tiktemachiltis, tikintlaneltokiltis noso tikinyolmapeuas akin mitskakiskej, yejon xkilnamiki ijkuak timoyektlalis. Kuajli xkita ika nochi tlen ueyi kijtosneki mamitspaleui titeasikamachiltis tlen tikneki.

Xmotlajtolti: “¿Tlenon uelis nechijliskej noso nechtlajtoltiskej itech notlamachtil akin nechkakiskej, niman kanaj kenon peuaskej?”. Sakin, xyektlali tlen ueyi kijtosneki ipan motlamachtil ijkon ken yotiknemili, niman ijkon akin mitskakiskej uelis kasikamatstiaskej tlen tikimijlia niman kitaskej ika melauak ijkon.
Kuajli xteititi itech tlenon tlajtoua motlamachtil. Itech nochi motlamachtil, miyekpa xteneujtiuj itech tlenon tikinnojnotstika, uelis tikchiuas yejuin tla miyekpa tikijtoua tlen ueyi kijtosneki, kanaj ika tlajtoltin tlen san noijki kijtosnekij.
Nimantsin manasikamati ijkuak tiktetomilis tlen ueyi kijtosneki. Xtlapejpeni san tlen uelis tiktetomilis ipan tiempo kech uejkauis motlamachtil. Maka miyek xtlapejpeni tlen ueyi kijtosneki niman xkimijto ken nimantsin uelis kasikamatiskej. Ijkuak yotikijto se xmotelti, maka san totoka xpano itech okse.

Uelis tikinteneuas tlajtoltin tlen ueyi kijtosnekij ipeujyan motlamachtil niman ijkon kichiuas ika, akin mitskakiskej, maka manopopolokan, ijkuak ititlamis oksejpa xkinteneua, ijkon xkimilkauaskej.