ToTajtsin okichijchiuj iluikak niman tlaltikpaktli

ToTajtsin Jehová yejua akin otexchijchiuj. Yejua okichijchiuj nochi tlen tikitaj niman tlen xtikitaj. Ijkuak xikichijchiuaya tlen tikitaj, okinchijchiuj melak miyekej iluikaktekitkej. ¿Tikmati akinomej yejon iluikaktekitkej? Yejuamej itekipanojkauan toTajtsin niman tlachiaj ijkon ken yejua. Tejuamej xuelij tikimitaj, ijkon ken xtikitaj Jehová. Kachtopa iluikaktekitketl akin Jehová okichijchiuj onochiuj itlapaleuijkauj. Yejua okipaleui Jehová ijkuak okinchijchiuj sitlalimej, planetas niman nochi okseki tlemach. Se itech yejuin planetas, tlaltikpaktli, ipan tichantij niman melak kualtsin.

Ijkuakon Jehová okiyektlali tlaltikpaktli, ijkon yolkamej niman tlaltikpakchanejkej ueliskiaj ipan chantiskiaj. Okichiuj ika itlauil tonaltsintli mapetlani ipan tlaltikpaktli. Yejua okinchijchiuj tepemej, atentin niman mar.

¿Tlenon opanok sakin? Jehová okijto: “Nikchijchiuas sakatl, xiujtli niman kojtin”. Melak miyek tlakilyomej, kijli niman xochimej opeuj noskaltiaj. Jehová noijki okinchijchiuj nochimej yolkamej: akin patlanij, apanouaj, manejnemij niman notechiuilanaj. Okinchijchiuj yolkamej pipitikej, ken kimichimej, niman uejueyimej, ken elefantes. ¿Katlejua yolkatsin tikuelita?

Kuakon, Jehová okijli kachtopa iluikaktekitketl: “Matikchijchiuakan tlakatl”. Tlaltikpakchanejkej xijkon yeskiaj ken yolkamej. Ueliskiaj kichijchiuaskiaj yenkuikej tlemach, tlajtoskiaj, uetskaskiaj niman kinotsaskiaj toTajtsin. Kitlajpiyaskiaj tlaltikpaktli niman yolkamej. ¿Tikmati akinon kachtopa tlakatl? Matikitakan.