Kenon uelis timomachtis Biblia niman ijkon mamitspaleui niman mamitsyolpakti

Josué kipoua Tlanauatijli; uetsij itepanuan Jericó, san ika, ikal Rahab xtlaj ipan nochiua; Josué nomateketsa ijkuak kichiua teoyotl

JOSUÉ kipiaya se ueyi tekitl: kiyekanas niman kiuikas kalpan Israel kampa Tlajli tlen yokimijlikaj kinmakaskej. Yejuin melak ouijtika yeskia. San ika, Jehová kijlia ika kuajli onkisas, niman kijlia ika manoyolchikaua niman makipiya chikaualistli. Noijki kijlia makitlakamati iTlanauatil niman makipoua ika tonajli niman ika yeuajli niman ijkon ueliskia kichiuas nochi tlen ompa ijkuiliujtoya. Niman oksejpa kijlia ika, tla kichiua, kuakon kuajli onkisaskia niman noyekanaskia ika tlamachilistli (Jos. 1:7, 8).

Ipan yejuin “sanoyej xkuajli tonaltin”, tejuamej noijki tikixnamikij tlen melak ouijtika (2 Tim. 3:1). Niman noijki kuajli tonkisaskej tla tikchiuaj tlen Jehová okijli Josué. Noneki mojmostla tikpouaskej Biblia niman yejon techpaleuis kuajli matoyekanakan ijkuak tikixnamikiskej tlen ouijtika.

Maski ijkon, noijki matokuitikan ika timiyekej xtikmatij kenon tomachtiskej niman sekimej nion xkuelitaj nomachtiskej. San ika, pampa melak ueyi kijtosneki matomachtikan Biblia, kinamiki matikitakan recuadro tlen itoka “Xyejyeko tikchiuas yejuin”. Ompa tikitas kenon uelis timomachtis Biblia niman ijkon mamitspaleui niman mamitsyolpakti.

Se salmista onokuikati: “Xnechyekana ipan ojtli itech motlanauatiluan, pampa intech niyolpaki” (Sal. 119:35). Tejua noijki uelis mitsyolpaktis timomachtis iTlajtol toTajtsin. Tiknextis miyek tlamachtiltin tlen tepaleuiyaj tla timokojtilia timomachtis Biblia.

Maski tejua xtikyekanas se kalpan ijkon ken okichiuj Josué, kema kipiya tikixnamikis motlaueluan. Kuakon, ijkon ken Josué, xmomachti itlajtol toTajtsin niman xchiua tlen tiueltiuj. Tla ijkon tikchiua, kuajli tonkisas niman timoyekanas ika tlamachilistli.

XYEJYEKO TIKCHIUAS YEJUIN

Xchiua teoyotl ijkuak tipeuas timomachtis. Ipan Biblia ijkuiliujtika tlen kinemilia toTajtsin akin nochi ueli kichiua, niman yejua okichiuj ompa manoijkuilokan niman ijkon matechpaleui. Kuakon, ijkuak tikpouas Biblia, xtlajtlanili toTajtsin mamitspaleui xkasikamati tlen tikpouas, mamitspaleui xkilnamiki niman mamitspaleui tikchiuas tlen timomachtis (Esd. 7:10).
Xmotlajtolti. Ijkuak tikpoujtias Biblia noso amatlajkuiloltin tlen tlajtouaj itech Biblia, xmotlajtolti: “¿Tlenon nechmachtia yejuin itech Jehová? ¿Kenon notlajtolnamiki iuan iueyitlamachtil Biblia? ¿Kenon uelis niktekitiltis yejuin tlaxeloltin niman ijkon nikinpaleuis oksekimej?”.
Xtlanemili itech tlen timomachtia. Ijkuak titlapoujtos, xmotelti niman xnemili: “¿Kenon kichiua maninomachili yejuin tlen onikpouj? ¿Tleka ijkon ninomachilia? ¿Kenon nechpaleuiya yejuin iuan tlen yeuejkaui nopan onochiuj, iuan tlen aman nopan nochiujtika noso iuan tlen uelis nopan nochiuas ika tlayekapan? ¿Kenon uelis nikchiuas ipan nonemilis yejuin tlen kijtoua Biblia?” (Job 23:5; Sal. 49:3). Xnemili tla tiueliskia tiktetomilis tleka Jehová kimijlia itekipanojkauan maka makichiuakan seki tlemach, noso xnemili kenon yakaj xkuajli onkisaskia tla xkichiua tlen kijtoua Biblia (Deut. 32:28, 29).
Xyejyeko xkita tlen panotika ijkuak tikpouas tlen kijtoua Biblia. Se neskayotl, ¿ueli tikimita ikniuan José ijkuak kinemakatokej itech ismaelitas? (Gén. 37:18-28). ¿Tlenon tikita? ¿Tlenon tijkaki? ¿Tlenon tikijnekui? Xnemili ika mopan nochiujtika yejon tlen yejuamej inpan onochiuj niman xmotlajtolti: “¿Tlenon kinemilijtokej? ¿Tlenon kimachilijtokej?”. Ijkuak ijkon titlanemilis, kentla tikitstoskia tlen panotika niman melak mitspaleuis tlen timomachtis.
Xtekitilti tlen mitspaleuis kuajli xmomachti. Tikpiyaj miyek tlen ika kuajli tomachtiskej. Xyejyeko tikixmatis tlen onka ipan motlajtol, kanaj tlen onka ipan Internet niman noijki tlen ionka ipan amatl. Maka okpa xnemili tikintlajtlatlanilis oksekimej mamitsmachtikan kenon uelis kuajli tikintekitiltis. Se neskayotl, ipan Índice de las publicaciones Watch Tower niman Tlen kinpaleuiya ika nomachtiaj iteixpantijkauan Jehová tiknextis miyek tlen yonoijkuilo ipan toamatlajkuiloluan niman mitstomilis tlenon kijtosnekij miyek tlaxeloltin itech Biblia. Noijki, ipan amatlajkuilojli Tlen tepaleuiya timomachtis iTlajtol toTajtsin uelis tikitas kenon onkatka tlajli kampa chantiyaj, kemanon itlaj onochiuj, kenon tlatemachiuayaj niman okseki tlemach.
Xkilnamiki tlamachtiltin tlen ueyi kijtosnekij. Yejon mitspaleuis maka tikilkauas tlen kemach yotimomachti. Niman melak mitspaleuis tla tikimijlia oksekimej tlaltikpakchanejkej tlen yotiuel. Xnemili: “¿Uelis niktekitiltis yejuin ijkuak nontenojnotsas?”. Tla tikchiua yejuin, mitspaleuis xkilnamiki tlen ueyi kijtosneki itech tlen yotimomachti, niman uelis tiktekitiltis tlen yotiuel ika tikinpaleuis oksekimej.