BIBLIOTECA IPAN INTERNET Watchtower
Watchtower
BIBLIOTECA IPAN INTERNET
náhuatl de guerrero
  • BIBLIA
  • AMATLAJKUILOLTIN
  • TLANECHIKOLTIN
  • w21 febrero págs. 14-19
  • Ken noneki kichiuaskej intekiyo akin tlayekanaj ipan tlanechikojli

Xonka video tlen otiktlapejpeni.

Xtechtlapopolui, xueli tlapoui video.

  • Ken noneki kichiuaskej intekiyo akin tlayekanaj ipan tlanechikojli
  • Amatl Tekakistilijketl kiteijlitika iTekiuajyo Jehová (tlen tomachtiaj) 2021
  • Subtítulos
  • Okseki ken yejuin
  • MATIKINTLAKAITAKAN TOKNIUAN SIUAMEJ
  • ¿MELAUAK IKA NOCHIMEJ TOKNIUAN TLAKAMEJ NONEKI KINYEKANASKEJ NOCHIMEJ TOKNIUAN SIUAMEJ?
  • ¿TLENON KINAMIKI KICHIUASKEJ TLAYEKANKEJ NIMAN AKIN KINYEKANAJ INFAMILIAS?
  • MATIKTLAKAITAKAN CRISTO, AKIN KIYEKANA TLANECHIKOJLI
  • “Cristo yejua tlayekanki ipan cada tlakatl”
    Amatl Tekakistilijketl kiteijlitika iTekiuajyo Jehová (tlen tomachtiaj) 2021
  • Matikinpaleuikan tokniuan siuamej
    Amatl Tekakistilijketl kiteijlitika iTekiuajyo Jehová (tlen tomachtiaj) 2020
  • ¿Tikimita siuamej ijkon ken Jehová kimita?
    Amatl Tekakistilijketl kiteijlitika iTekiuajyo Jehová (tlen tomachtiaj) 2024
  • Matikpatiojkaitakan tlen kichiuaj tokniuan ipan tlanechikojli
    Amatl Tekakistilijketl kiteijlitika iTekiuajyo Jehová (tlen tomachtiaj) 2020
Xkita okseki
Amatl Tekakistilijketl kiteijlitika iTekiuajyo Jehová (tlen tomachtiaj) 2021
w21 febrero págs. 14-19

TLAMACHTIJLI 7

Ken noneki kichiuaskej intekiyo akin tlayekanaj ipan tlanechikojli

“Cristo yejua tlayekanki intech on yejuan kineltokaj. On yejuan kineltokaj nochiuaj icuerpo niman yejua kimakixtia” (EFES. 5:23).

TLAKUIKAJLI 137 Siuamej yolmelajkej

TLEN TIKITASKEJa

1. ¿Tleka akin tinemij ipan ikalpan Jehová xitlaj techxeloua?

MELAK techyolpaktia tinemiskej ipan ikalpan Jehová. Akin tinemij ipan ikalpan Jehová tinemij ika yolseuilistli niman xitlaj techxeloua. ¿Tleka? Pampa tinochimej tokauiliaj matechyekanakan akin Jehová yokintekitlali. Tla kuajli tikasikamatij tleka Jehová techijlia matikintlakamatikan akin yejua yokintekitlali, más kuajli tiktekichiuiliskej Jehová imiuan tokniuan.

2. ¿Tlenon tiknankiliskej ipan yejuin tlamachtijli?

2 Ipan yejuin tlamachtijli, tikitaskej akinomej yokintekitlalijkej makiyekanakan tlanechikojli. Noijki tiknankiliskej yejuin: ¿kenon tlapaleuiyaj tokniuan siuamej ipan tlanechikojli?, ¿melauak ika nochimej tokniuan tlakamej noneki kinyekanaskej nochimej tokniuan siuamej? niman ¿kinamiki ika tlayekankej makinyekanakan tokniuan ipan tlanechikojli ijkon ken se teueuentsin kiyekana isiuauj niman ikoneuan? Kachtopa matikitakan kenon tokniuan siuamej tlapaleuiyaj ipan tlanechikojli niman kenon noneki tikintlakaitaskej.

MATIKINTLAKAITAKAN TOKNIUAN SIUAMEJ

3. ¿Tlenon techpaleuis más matikintlakaitakan tokniuan siuamej?

3 Melak tikintlakaitaj tokniuan siuamej. Yejuamej melak kuajli kintlajpiyaj infamilias, tenojnotsaj niman kinpaleuiyaj tokniuan ipan tlanechikojli. Tla tikitaj kenon Jehová, Jesús niman apóstol Pablo okintlakaitakej tokniuan siuamej, techpaleuis más matikintlakaitakan yejuin tokniuan.

4. ¿Kenon kiteititia Biblia ika Jehová kintlasojtla siuamej ijkon ken kintlasojtla tlakamej?

4 Biblia kijtoua ika Jehová kintlasojtla siuamej ijkon ken kintlasojtla tlakamej. San matitlanemilikan itech yejuin, ipan kachtopa siglo yejua okinmakak espíritu santo tlakamej niman siuamej niman ijkon mauelikan makinchiuakan milagros, niman hasta okichiuj ika sekimej matlajtokan miyek tlajtoltin (Hech. 2:1-4, 15-18). Jehová yokintlapejpeni tlakamej niman siuamej niman ijkon matlayekanakan iuan Jesús ne iluikak (Gál. 3:26-29, TNM). Noijki, Jehová kichiuas ika tlakamej niman siuamej makipiyakan se nemilistli tlen xkeman tlamis nikan ipan tlaltikpaktli (Apoc. 7:9, 10, 13-15). Niman Jesús yokinnauati tlakamej niman siuamej matenojnotsakan niman makinmachtikan oksekimej itech iTlajtol toTajtsin (Mat. 28:19, 20, TNM). Amoxtli Hechos kijtoua ika tokniuj Priscila iuan iueuentsin, Áquila, okipaleuijkej más kuajli makasikamati tlen kijtoua iTlajtol toTajtsin se tlakatl akin itoka katka Apolos, akin kuajli kixmatiya “on Yektlajkuilojli” (Hech. 18:24-26).

5. Itech tlen kijtoua Lucas 10:38, 39, 42, ¿kenon okiteititi Jesús ika kintlakaitaya siuamej?

5 Jesús kintlakaitaya siuamej. Yejua xkichiuaya ijkon ken fariseos. Yejuamej xkintlakaitayaj siuamej, xkinekiyaj teixpan kinnotsaskej nion xkeman kimijliayaj tlenon kijtouaya iTlajtol toTajtsin. San ika, Jesús okinnojnots tlakamej niman siuamej itech tlen kijtoua iTlajtol toTajtsin (xpoua Lucas 10:38, 39, 42).b Noijki, ijkuak tenojnotstinemiya, okinkauili sekimej siuamej imiuan mauiyan (Luc. 8:1-3). Niman hasta okinkauili sekimej siuamej makimijlitij iapóstoles ika yejua yoyoliujka (Juan 20:16-18).

6. ¿Kenon okiteititi apóstol Pablo ika kintlakaitaya siuamej?

6 Apóstol Pablo okijli Timoteo makintlakaita siuamej. Yejua okijli: “On lamajtsitsimej kuajli inuan xmouika ken timouikaskia iuan monanaj, niman on ichpokamej no inuan xmouika ken mokniuan yeskiaj” (1 Tim. 5:1, 2). Maski Pablo melak okipaleui Timoteo niman ijkon chikauak makipiya itlaneltokil, Pablo okijto ika inan niman iabuela yejuamej akin okimachtijkaj Timoteo “on iYektlajkuilol Dios” (2 Tim. 1:5; 3:14, 15). Niman, ijkuak Pablo okintlajkuilouili tokniuan romanos, hasta okintokayoti sekimej tokniuan siuamej para makintlajpalouilikan. Yejua kitaya kenon yejuamej chikauak kitekichiuiliayaj toTajtsin niman okinek kimijlis kenon melak kipatiojkaitaya intekiyo (Rom. 16:1-4, 6, 12; Filip. 4:3).

7. ¿Tlenon tiknankiliskej?

7 Ken yotikitakej, Biblia xkijtoua tla Jehová más kintlasojtla tlakamej xijkon ken siuamej. Tokniuan siuamej melak tetlasojtlaj niman kuelitaj tepaleuiskej ipan tlanechikojli, niman, yejon kichiua ika tokniuan kuajli manouikakan niman maka itlaj makinxelo. Ipampa nochi yejuin, tlayekankej melak kintlakaitaj yejuin tokniuan. San ika, aman matiknankilikan yejuin: ¿tleka Jehová kimijlia tokniuan siuamej ika kemantika noneki manokuatlapachokan? niman, pampa san tlakamej ueli kintekitlaliaj ken tlayekankej niman tlapaleuijkej ipan tlanechikojli, ¿kijtosneki ika nochimej tokniuan tlakamej noneki kinyekanaskej nochimej tokniuan siuamej?

¿MELAUAK IKA NOCHIMEJ TOKNIUAN TLAKAMEJ NONEKI KINYEKANASKEJ NOCHIMEJ TOKNIUAN SIUAMEJ?

Nesi kenon melak petlantikaj kampa nemi Jehová niman itlauil ajsi hasta kampa nemi Jesús, akin yeuatika ipan se trono ne iluikak. Noijki nesi kenon nopanoltijtika se tlanechikojli, kenon se familia san sekan kiueyichiujtika toTajtsin niman kenon se tokniuj siuatl iselti nomachtijtika. Yejuin tlaixkopinaltin oksejpa noitaj ipan párrafos 8 niman 11 hasta 14.

8. Itech tlen kijtoua Efesios 5:23, ¿tleka xnochimej tokniuan tlakamej noneki kinyekanaskej nochimej tokniuan siuamej?

8 ¿Melauak ika nochimej tokniuan tlakamej noneki kinyekanaskej nochimej tokniuan siuamej? ¡Ka! San Cristo kinyekana nochimej tokniuan siuamej akin nemij ipan tlanechikojli (xpoua Efesios 5:23). Ipan se familia, san teueuentsin uelis kiyekanas isiuauj. Niman, maski kipiyaskiaj se intelpoch, on telpochtli xuelis kiyekanas inan (Efes. 6:1, 2). Niman ipan tlanechikojli, tlayekankej xuelis kimijliskej tokniuan siuamej nochi tlen noneki kichiuaskej (1 Tes. 5:12; Heb. 13:17). Se tokniuj siuatl akin xok chanti iuan itaj niman inan noneki nochipa kintlakaitas itajuan niman tlayekankej. San ika, ijkon ken tokniuan tlakamej akin nemij ipan tlanechikojli, san Jesús itlayekankauj.

Se tokniuj siuatl iselti nomachtijtika.

Akin xinonamiktiaj niman xok chantij imiuan intajuan noijki kipiyaj se intlayekankauj: Jesús. (Xkita párrafo 8).

9. ¿Tleka kemantika noneki nokuatlapachoskej tokniuan siuamej?

9 Melauak, Jehová yokijto ika san tokniuan tlakamej noneki tlayekanaskej ipan tlanechikojli (1 Tim. 2:12). ¿Tleka? Pampa Jehová kineki ika kuajli manochiua tekitl ipan tlanechikojli. Ika yejon, noijki yokitekitlali Jesús niman ijkon makinyekana tlakamej akin tlayekanaj ipan tlanechikojli. Tla kemantika se tokniuj siuatl nonekiskia kichiuas itekiyo se tokniuj tlakatl, kuakon noneki nokuatlapachos. Jehová kineki ijkon makichiuakan (1 Cor. 11:4-7).c San ika, yejuin xkijtosneki ika Jehová xkintlasojtla tokniuan siuamej. Jehová san kineki kimititis kenon noneki kintlakaitaskej akin yejua yokintekitlali matlayekanakan. Aman matiknankilikan yejuin: ¿tlenon kinamiki kichiuaskej tlayekankej niman nochimej akin kinyekanaj infamilias, niman, tlenon xkinamiki kichiuaskej?

¿Kemanon nonekis nokuatlapachos se tokniuj siuatl?

Se tokniuj siuatl kikixtia grupo niman ijkon ontenojnotsaskej. Yejua yeuatika niman yonokuatlapacho ika se pañuelo.

Yejuin tlajtoltilistin techpaleuiskej matikasikamatikan kemanon nonekis nokuatlapachos se tokniuj siuatl:

  1. 1. ¿Kichiuas teoyotl noso temachtis ixpan se tokniuj tlakatl akin yonoapolakti? (1 Cor. 11:4, 5).

  2. 2. Maski xompa nemi se tokniuj tlakatl akin yonoapolakti, ¿kichiuas se tekitl tlen san tlakamej akin yonoapolaktijkej noneki kichiuaskej? (1 Tim. 2:11, 12; Heb. 13:17).

  3. 3. Tla yononamikti, ¿chikauak kichiuas teoyotl noso temachtis itech Biblia ijkuak iueuentsin ompa nemis? (1 Cor. 11:3).

Tla kema, kuakon tokniuj siuatl nonekis nokuatlapachos. Niman tla ka, xnonekis nokuatlapachos.e

¿TLENON KINAMIKI KICHIUASKEJ TLAYEKANKEJ NIMAN AKIN KINYEKANAJ INFAMILIAS?

10. ¿Tleka se tlayekanketl ueliskia kinemilis ika kinamiki kimijlis tokniuan nochi tlen noneki kichiuaskej?

10 Tlayekankej kitlasojtlaj Cristo niman noijki on borreguitos akin Jehová niman iKonetsin yokinnauatijkej makintlajpiyakan (Juan 21:15-17). Kanaj se tlayekanketl kineki kuajli kitlajpiyas tlanechikojli niman kanaj hasta kinemilia ika yejua kentla intaj tokniuan. Kanaj kinemilia: “Tla se tajtli ueli kijlia ifamilia tlenon noneki kichiuas niman ijkon kuajli manemikan, se tlayekanketl noijki uelis kimijlis tokniuan tlenon noneki kichiuaskej niman ijkon kuajli manemikan”. Niman, sekimej tokniuan tlakamej niman siuamej kichiuaj ika tlayekankej ijkon matlanemilikan pampa kimijliaj makimijlikan nochi tlen noneki kichiuaskej. San ika ¿kinamiki ika tlayekankej makinyekanakan tokniuan ijkon ken se teueuentsin kiyekana ifamilia?

Se tlayekanketl kipanoltijtika se tlamachtijli ipan tlanechikojli.

Tlayekankej kinpaleuiyaj tokniuan akin nemij ipan tlanechikojli machikaujto intlaneltokil niman manemikan ika inyojlo. Jehová yokintekitlali tlayekankej matemelajkatlalikan ipan tlanechikojli niman makinkixtikan akin xkitlakamatij Jehová niman xnoyolkuepaj. (Xkimita párrafos 11 niman 12).

11. ¿Tleka tikijtouaj ika tokniuan tlayekankej kichiuaj seki tlemach tlen kichiua se teueuentsin ipan ifamilia?

11 Apóstol Pablo okijto ika tokniuan akin tlayekanaj ipan tlanechikojli kichiuaj seki tlemach tlen kichiua se teueuentsin ipan ifamilia (1 Tim. 3:4, 5). San matitlanemilikan itech yejuin, Jehová kineki ika tekoneuan makitlakamatikan intaj niman ika tesiuauan makitlakamatikan inueuentsin (Col. 3:20). Niman, toTajtsin noijki kineki ika nochimej akin nemij ipan tlanechikojli makintlakamatikan tlayekankej. Jehová kineki ika teueuentsitsinuan niman tlayekankej makinpaleuikan akin kinyekanaj machikaujto intlaneltokil niman makinpaleuikan manemikan ika inyojlo. Ijkon ken se kuajli teueuentsin kipaleuiya ifamilia, tokniuan tlayekankej noijki kinpaleuiyaj tokniuan (Sant. 2:15-17). Jehová noijki kineki ika tlayekankej niman teueuentsitsinuan makinpaleuikan oksekimej makitlakamatikan tlen yejua kintlajtlanilia niman maka makichiuakan tlen xok noijtoua ipan Biblia (1 Cor. 4:6).

Se tokniuj tlakatl kiueyichiujtika Jehová iuan ifamilia.

Teueuentsitsinuan noneki kinyekanaskej infamilia pampa Jehová ijkon yokinnauati. Melak kuajli tla se teueuentsin tlajtoua iuan isiuauj achto itlaj kitlapejpenis. (Xkita párrafo 13).

12, 13. Ijkon ken kijtoua Romanos 7:2, ¿tleka tikijtouaj ika onka seki tlemach tlen xsan noijki kichiua se tlayekanketl niman se teueuentsin?

12 San ika, onka seki tlemach tlen xsan noijki kichiua se tlayekanketl niman se teueuentsin. San matitlanemilikan itech yejuin, Jehová yokintekitlali tlayekankej matemelajkatlalikan ipan tlanechikojli niman makinkixtikan akin xkitlakamatij Jehová niman xnoyolkuepaj (1 Cor. 5:11-13).

13 San ika, Jehová yokinkauili teueuentsitsinuan makichiuakan seki tlemach tlen xuelis kichiuaskej tlayekankej. Se tlayekanketl xuelis kijlis se familia tlenon noneki kichiuas niman tlenon ka, pampa yejon itekiyo teueuentsin (xpoua Romanos 7:2). Se teueuentsin kinamiki makijli ifamilia tlen hora noneki ajsiskej inchan ijkuak itlayoua, niman noijki kinamiki kinmelajkatlalis tla xkitlakamatij (Efes. 6:1). Melauak, achto kijlis ifamilia tlenon noneki kichiuaskej, melak kuajli tla kachtopa tlajtoua iuan isiuauj, pampa yejuamej yonochiujkej san se tlalnakayotl (Mat. 19:6).d

MATIKTLAKAITAKAN CRISTO, AKIN KIYEKANA TLANECHIKOJLI

Nesi kenon melak petlantikaj kampa nemi Jehová niman itlauil ajsi hasta kampa nemi Jesús, akin yeuatika ipan se trono ne iluikak.

Jesús kiyekana tlanechikojli, ijkon ken Jehová yokinauati. (Xkita párrafo 14).

14. a) Itech tlen kijtoua Marcos 10:45, ¿tleka tikijtouaj ika melak kuajli ika Jehová okitlali Cristo ken tlayekanketl? b) ¿Katlejua itekiyo Grupo akin Tlayekana ipan nochi tlanechikoltin? (Xkita recuadro “Itekiyo Grupo akin Tlayekana ipan nochi tlanechikoltin”).

14 Jehová okitemakak isenteKonetsin niman ijkon nochimej akin nemij ipan tlanechikojli makipiyakan se nemilistli tlen xkeman tlamis (xpoua Marcos 10:45; Hech. 20:28; 1 Cor. 15:21, 22). Melak kuajli ika Jehová yokitlali Cristo ken tlayekanketl ipan nochi tlanechikoltin pampa yejua akin omik topampa. Ipampa yejuin, Jesús kinamiki kijtos tlenon noneki kichiuaskej nochimej akin nemij ipan tlanechikojli, niman kinamiki makichiua tlen noneki niman ijkon manochiua tlen yokijto (Gál. 6:2). San ika, yejua xsan techijlia tlenon noneki tikchiuaskej, noijki techtlajpiya niman techpaleuiya machikaujto totlaneltokil (Efes. 5:29).

Itekiyo Grupo akin Tlayekana ipan nochi tlanechikoltin

Tokniuan akin nemij ipan Grupo akin Tlayekana ipan nochi tlanechikoltin san sekan tlajtlajtouaj.

Tokniuan akin nemij ipan Grupo akin Tlayekana ipan nochi tlanechikoltin xnokalaktiaj ipan tonemilis niman kineltokaj ika tiktekichiuiliaj Jehová pampa tiktlasojtlaj (2 Cor. 1:24). Kasikamatij ika Jesucristo yejua akin kinyekana nochimej tokniuan akin nemij ipan tlanechikojli niman nochipa kilnamikij tlen Jesús okijto: “Nochimej nemejuamej nemiknijtin” (Mat. 23:8). Niman, pampa melak kintlasojtlaj tokniuan, nochipa nokojtiliaj kinpaleuiskej. Ijkuak Grupo akin Tlayekana kita kenon kinyekanas tokniuan, kinokauilia makiyekana Jesús. Kita akinomej nemiskej ipan Grupo akin tlayekana ipan se Sucursal niman noijki kita akinomej uelis yeskej tlayekankej ipan circuito (Efes. 4:7-13). Niman, tlayekankej ipan circuito kitaj akinomej uelis yeskej tlayekankej (Hech. 14:23; Tito 1:5). Grupo akin Tlayekana ipan nochi tlanechikoltin noijki kita kenon kinmakas tokniuan tlen ika kichikauaskej intlaneltokil. Nochi tlen kinmaka kisa itech Biblia. Kintitlanilia cartas niman amatlajkuiloltin. Kinkixtia programas ipan JW Broadcasting®, kita tlen nopanoltis ipan tlanechikoltin niman ipan uejueyimej tlanechikoltin (Hech. 15:22-35). Niman noijki kiminotsa tokniuan ipan tlamachtiltin. Niman, ijkuak tlaixpoliui noso ijkuak tokniuan tlajyouijtokej, nimantsin kita kenon kinpaleuis. Ijkon kichiua pampa melak kintlasojtla tokniuan.f

15, 16. ¿Tlenon tiueli itech tlen kijtoua Marley niman Benjamin?

15 Ijkuak tokniuan siuamej kintlakamatij tokniuan akin Cristo yokintekitlali makitlajpiyakan tlanechikojli, kiteititiaj ika kitlakaitaj Cristo. Se tokniuj, akin itoka Marley niman chanti Estados Unidos, kijtoua: “Melak niktlasojkamati tlen Jehová nechkauilia manikchiua ipan nofamilia niman ipan tlanechikojli. Ok noneki ninokojtilis más niktlakaitas noueuentsin niman noijki tokniuan akin Jehová yokintlali matlayekanakan ipan tlanechikojli. San ika, nikmatstika ika uelis nikchiuas pampa noueuentsin niman tlayekankej nechtlakaitaj niman nechititiaj ika kipatiojkaitaj nochi tlen nikchiua”. Tikmatstokej ika miyekej tokniuan siuamej noijki ijkon kijtoskiaj.

16 Ijkuak tokniuan tlakamej kintlakaitaj tokniuan siuamej, kiteititiaj ika kasikamatij tlen toTajtsin kintlajtlanilia makichiuakan akin tlayekanaj. Benjamin, se tokniuj akin chanti Inglaterra, kijtoua: “Tlen kijtouaj tokniuan siuamej ipan tlanechikojli yonechpaleui más kuajli maninomachti, manitenojnotsa niman más kuajli manitemachti. Nikita ika tokniuan siuamej melak tepaleuiyaj”.

17. ¿Tleka melak kuajli tla tikteititiaj ika tikasikamatij akinomej yokintlalijkej para matlayekanakan?

17 Ijkuak nochimej tlakamej, siuamej, teueuentsitsinuan niman tlayekankej kiteititiaj ika kasikamatij akinomej yokintlalijkej para matlayekanakan, nochi tlanechikojli nemi ika yolseuilistli. Niman tlen más ueyi kijtosneki, tikueyichiuaj toTajtsin Jehová (Sal. 150:6).

¿KENON TITLANANKILISKIA?

  • ¿Tlenon techpaleuis más matikintlakaitakan tokniuan siuamej?

  • ¿Melauak ika nochimej tokniuan tlakamej noneki kinyekanaskej nochimej tokniuan siuamej? Xkijto tleka ijkon titlanankilia.

  • ¿Tleka tikijtouaj ika onka seki tlemach tlen xsan noijki kichiua se tlayekanketl niman se teueuentsin?

TLAKUIKAJLI 123 Matokauilikan matechyekana Jehová

a ¿Kenon tlapaleuiyaj tokniuan siuamej ipan tlanechikojli? ¿Melauak ika nochimej tokniuan tlakamej noneki kinyekanaskej nochimej tokniuan siuamej? ¿Kinamiki ika tlayekankej makijtokan tlenon noneki kichiuaskej okseki familias? Ipan yejuin tlamachtijli, tikitaskej tlenon kijtoua Biblia itech yejuin.

b Xkita tlamachtijli “Matikinpaleuikan tokniuan siuamej”, itech Amatl Tekakistilijketl de septiembre de 2020, párrafo 6.

c Xkita recuadro “¿Kemanon nonekis nokuatlapachos se tokniuj siuatl?”.

d Ipan tlamachtijli “Matikpatiojkaitakan tlen kichiuaj tokniuan ipan tlanechikojli”, itech Amatl Tekakistilijketl de agosto de 2020, párrafos 17-19 kijtoua akinon noneki kitlapejpenis ipan katlejua tlanechikojli yas se familia.

e Tla okseki tikneki tikmatis, xkita amoxtli Nochipa xnemikan itech itlasojtlalis toTajtsin, páginas 209-211.

f Tla okseki tikneki tikmatis itech tlen kichiua Grupo akin Tlayekana ipan nochi tlanechikoltin, xkita La Atalaya del 15 de julio de 2013, páginas 20-25.

    Amatlajkuiloltin ika Náhuatl de Guerrero (2006-2025)
    Nikisas
    Nikalakis ika nocuenta
    • náhuatl de guerrero
    • Xtetitlanili
    • Ken tikneki manesi
    • Copyright © 2025 Watch Tower Bible and Tract Society of Pennsylvania
    • Ken noneki notekitiltis
    • Ken notlajpiyaj modatos
    • Xpatla ken notekitiltiaj modatos
    • JW.ORG
    • Nikalakis ika nocuenta
    Xtetitlanili