Tlen notlajtoltiaj akin kitaj revistas

¿Tlenon okijtosnek apóstol Pablo ijkuak okijto: “[Nejua] sa niken on konetsintli yejuan san uetsi”? (1 Corintios 15:8).

Ipan 1 Corintios 15:8, Pablo okijto: “Sa ika nochi onechnotitij nejua, yejuan sa niken on konetsintli yejuan san uetsi”. Ipan yejuin tlaxelojli Pablo tlajtotoya itech tlatlachalistli kampa okitak ika Jesús nemiya ne iluikak. Yeuejkaui tikijtouayaj ika ijkuak yejua okipix yejuin tlatlachalistli, yejua otlakat noso oyoliuj iluikak ijkuak xinonekiya. ¿Tleka? Pampa ijkuakon ueyi poliuiya para tlapejpeniltin mayoliuikan ne iluikak. San ika, aman más kuajli yotomachtijkej yejuin tlaxelojli niman yotikitakej ika noneki tikpatlaskej ken tikasikamatij.

Ipan yejuin tlaxelojli Pablo kema kiteneujtoya yejon tlatlachalistli tlen okipaleui manoyolkuepa niman manopatla. San ika ¿tlenon okijtosnek ijkuak okijto: “[Nejua] sa niken on konetsintli yejuan san uetsi”? Matikitakan seki tlen kanaj uelis kijtosnekis.

Onomojti ijkuak okitak tlatlachalistli niman san totoka onopatlak. Ijkuak san uetsi se konetsintli, xakaj kichia ijkon mapano. Kuakon, ijkuak Saulo, akin sakin okixmatkej ken Pablo, yajtoya Damasco para kintlaueltokas tokniuan yejua xkichiaya kitas Jesús ne iluikak ipan se tlatlachalistli. Pablo xkeman okinemili tla ueliskia nopatlas nion tokniuan xkichiayaj manoyolkuepa. Ijkuak okitak tlatlachalistli, melak onomojti pampa yeyi tonajli xok tlachiaya (Hech. 9:1-9, 17-19).

Ijkuak onopatlak xakaj kichiaya manopatla. Ika tlajtojli griego “konetsintli yejuan san uetsi” noijki uelis notlajtolkuepas ken “onemiko ijkuak xkichiayaj”. Traducción Kadosh Israelita Mesiánica de estudio ijkin kitlajtolkuepa: “Onitlakat ijkuak xnonekiya”. Ijkuak Pablo onoyolkuep niman onopatlak, Jesús inemiya ne iluikak. Ijkuak Jesús oyoliuj, yejua xkeman okinojtiti Pablo, ijkon ken okinnojtiti oksekimej inomachtijkauan akin okinteneuj Pablo (1 Cor. 15:4-8). Uelis tikijtoskej ika ijkuak Jesús okinojtiti Pablo, xok nochiaya yakaj makita Jesús.

Ijkon okiteititi ika yolyemanki katka. Sekimej ixtlamatkej kijtouaj ika Pablo ijkin okijto pampa kinekiya kiteititis ika xueyixtoya. Tla yejuin yemelak, Pablo kiteititijtoya ika yolyemanki katka niman ika, ipampa nochi tlen okichiuj, xkimelauaya yes se apóstol. Niman sejpatsin, yejua okijto: “Nejua tej, xniueyixtikaj ken on oksekimej apóstoles, niman nion achijtsin xnechmelaua nechtokayotiskej apóstol pampa onikintlauelitak niman onikintlajyouiltij on tlaneltokakej. Pero aman nejua niapóstol ipampa iueyitetlajsojtlalis Dios” (1 Cor. 15:9, 10).

Kuakon, ijkuak Pablo okijto ika yejua yeskia ken se “konetsintli yejuan san uetsi”, kanaj kiteneujtoya kenon onomojti ijkuak okitak Jesús, kenon xakaj kichiaya manopatla noso ika xkimelauaya kitas yejon tlatlachalistli. Maski san kenon, tlen ipan onochiuj melak okipaleui pampa ijkuakon okitak ika Jesús kema yoyoliujka. Ika yejon, ijkuak tenojnotsaya miyekpa kiteijliaya tlen ipan opanok niman kiteijliaya kenon oyoliuj Jesús (Hech. 22:6-11; 26:13-18).