TLAMACHTIJLI 28
Xpatiojkaita tlen Jehová niman Jesús yokichiujkej mopampa
¿Kenijki timomachilia ijkuak se moamigo mitstlayokolia itlaj tlen melak kualtsin? ¿Xmelak ika tiyolpaki niman tikneki tikititis ika tikpatiojkaita tlen omitstlayokoli? Jehová niman Jesús yokichiujkej topampa itlaj tlen melak kualtsin niman kinekij matikitakan ken se tetlayokolijli. ¿Itech tlenon titlajtotokej? ¿Niman kenijki uelis tikteititiskej ika tiktlasojkamatij tlen yokichiujkej topampa?
1. ¿Kenijki uelis tikteititiskej ika tikpatiojkaitaj tlen toTajtsin niman Jesús yokichiujkej topampa?
Biblia kijtoua ika akin “kineltokas [Jesús]” uelis kipiyas nemilistli tlen xkeman tlamis (Juan 3:16). ¿Kenijki uelis tikteititiskej ika titlaneltokaj itech Jesús? Xsan noneki tikijtoskej ika itech titlaneltokaj; noneki tikteititiskej ika tlen tikchiuaj (Santiago 2:17). Ijkuak ijkin tikchiuaj, más kuajli touikaj iuan Jesús niman iTajtsin, Jehová (xkita Juan 14:21).
2. ¿Kemanon uelis tikteititiskej ika tiktlasojkamatij tlen Jehová niman Jesús yokichiujkej topampa?
Ijkuak sa achijtsin poliuiya ika kimiktiskej, Jesús okimijli inomachtijkauan tlenon nonekiya kichiuaskej niman ijkon kiteititiskej ika kitlasojkamatiyaj tlen kichiuaskia inpampa. ¿Tlenon nonekiya kichiuaskej? Nonekiya nosentlaliskej niman ijkon kilnamikiskej “iTlakualis toTeko”. Yejuin tlanechikojli noijki noixmati ken Ijkuak noilnamiki imikilis Cristo (1 Corintios 11:20). Jesús kinekiya ika iapóstoles niman nochimej akin kichiuaskiaj ken yejua makipanoltikan yejon tlanechikojli niman ijkon makilnamikikan ika yejua okitemakak inemilis inpampa. Jesús okijto: “Xchiujtokan yejuin niman ijkon xnechilnamikikan” (Lucas 22:19, TNM). Ijkuak tosentlaliaj niman ijkon tikilnamikij imikilis Cristo, tikteititiaj ika tikpatiojkaitaj tlen Jehová niman Jesús yokichiujkej topampa.
OKSEKI XKASIKAMATI
Matikitakan tlenon más uelis tikchiuaskej niman ijkon tikteititiskej ika tiktlasojkamatij tlen Jehová niman Jesús yokichiujkej topampa. Noijki matikitakan tleka noneki tikilnamikiskej imikilis Cristo.
3. Xtlasojkamati tlen Jehová niman Jesús yokichiujkej topampa
Xkonnemili ika yotiapolak niman itiamimiktika, san ika, yakaj mitspaleuiya maka xamimiki. ¿Nimantsin tikilkauaskia kenijki omitspaleui? ¿Noso itlaj tikchiuaskia niman ijkon tikititis ika tiktlasojkamati tlen okichiuj mopampa?
Jehová noijki yotechpaleui noso yotechmakixti. Okichiuj tlen noneki niman ijkon uelis tikpiyaskej nemilistli tlen xkeman tlamis. Xkitakan 1 Juan 4:8-10 (TNM), niman xtlajtokan itech yejuin:
¿Tleka melak kualtsin tlen Jehová niman Jesús yokichiujkej topampa?
¿Kenijki timomachilia ijkuak tikmati tlen Jehová niman Jesús yokichiujkej mopampa?
¿Tlenon uelis tikchiuaskej niman ijkon tikteititiskej ika tikpatiojkaitaj tlen Jehová niman Jesús yokichiujkej topampa? Xkitakan 2 Corintios 5:15 niman noijki 1 Juan 4:11 niman 5:3. Ijkuak nenkitaskej se texto, xtlajtokan itech yejuin:
¿Tlenon uelis tikchiuaskej niman ijkon tikteititiskej ika tiktlasojkamatij tlen Jehová niman Jesús yokichiujkej topampa?
4. Xchiua ijkon ken Jesús
Ijkuak tikchiuaj ijkon ken Jesús, noijki tikteititiaj ika tiktlasojkamatij tlen Jehová niman Jesús okichiujkej topampa. Xkitakan 1 Pedro 2:21 niman xtlajtokan itech yejuin:
¿Kenijki uelis tikteititis ika tikchiua ijkon ken Jesús?
Jesús kitlasojkaitaya iTlajtol toTajtsin, tenojnotsaya niman kinpaleuiaya oksekimej.
5. Xkilnamiki imikilis Cristo
Biblia kijtoua tlenon opanok ipan yeuajli ijkuak Jesús okimijli inomachtijkauan nochipa makilnamikikan imikilis. Xkitakan Lucas 22:14, 19, 20 niman xtlajtokan itech yejuin:
¿Tlenon opanok ijkuak Jesús sa ika tlami otlakua imiuan inomachtijkauan?
¿Tlenon kijtosneki pan niman vino? (Xkitakan Lucas 22:19, 20).
Jesús kinekiya ika, sejse xiuitl, inomachtijkauan makilnamikikan imikilis ipan tonajli ijkuak yejua omik. Ika yejon, akin tiiteixpantijkauan Jehová tosentlaliaj sejse xiuitl niman ijkon tikilnamikiskej imikilis Cristo, ijkon ken yejua otechnauati. ¿Tikmatstika tlenon nochiua ijkuak noilnamiki imikilis Cristo? Xkitakan VIDEO niman xtlajtokan itech yejuin:
¿Tlenon nochiua ijkuak tikilnamikij imikilis Jesús?
Pan kijtosneki itlalnakayo Jesús tlen okitemakak topampa. Niman vino kijtosneki iyesyo Jesús.
SEKIMEJ KIJTOUAJ: “San xtlaneltoka itech Jesús niman ijkon timakisas”.
¿Kenijki uelis tikteititis tlen kijtoua Juan 3:16 niman Santiago 2:17 niman ijkon titeasikamachiltis ika xsan noneki titlaneltokaskej itech Jesús?
TLEN OTIUEL
Tikteititiaj ika tiktlasojkamatij tlen Jesús okichiuj topampa tla itech titlaneltokaj niman tla tosentlaliaj ijkuak noilnamiki imikilis.
¿Kenon titlanankiliskia?
¿Kenijki tikteititiaj ika titlaneltokaj itech Jesús?
¿Tikuelitaskia tikititis Jehová niman Jesús ika tikpatiojkaita tlen okichiujkej mopampa? ¿Tlenon tikuelitaskia tikchiuas?
¿Tleka melak noneki matosentlalikan ijkuak noilnamiki imikilis Cristo?
OKSEKI XKITA
Xkita tlenon tiknekiskej tikchiuaskej tla tikasikamatij tleka omik Jesús.
Jesús okiueyichiuj toTajtsin ijkuak okitemakak inemilis (9:28)
Xkita tlenon uelis tikchiuaskej niman ijkon tikteititiskej ika titlaneltokaj.
Se siuatl melak okipaleui ijkuak okasikamat tlen Jesús okichiuj topampa. Xkita tlamachtijli tlen itoka “Aman melak kuajli ninomachilia”.
“Biblia okichiuj manopatlakan” (Amatl Tekakistilijketl, 1 de agosto de 2011)
Xkita tleka san achijtsitsintin kikuaj pan niman konij vino tlen notekitiltia ijkuak noilnamiki imikilis Cristo.