¿Tleka iteixpantijkauan Jehová xkilnamikij imikilis Cristo ijkon ken okseki religiones?

Tejuamej tikchiuaj ijkon ken kijtoua Biblia ijkuak tikpanoltiaj imikilis Cristo, yejuin noijki noixmatij ken “itlakualis toTeko” noso sa ika tlami Pascua (1 Corintios 11:20). San ika, tlen kineltokaj niman ken kipanoltiaj imikilis Cristo okseki religiones xuajlauj ipan Biblia.

¿Tleka tikpanoltiaj?

Tikpanoltiaj itlakualis toTeko pampa ijkon tikilnamikij tlen Jesús okichiuj topampa niman tiktlasojkamachiliaj (Mateo 20:28; 1 Corintios 11:24). Xtikchiuaj yejuin para tikseliskej itlaj itech toTajtsin, ken makitlapopolui totlajtlakoluan. Biblia temachtia ika toTajtsin techtlapopoluis tla titlaneltokaj itech Jesús niman xsan pampa tiauej ipan se tlanechikojli ​(Romanos 3:​25; 1 Juan 2:​1, 2).

¿Kechpa noneki nopanoltis?

Jesús okimijli inomachtijkauan ika nonekiya kipanoltiskej itlakualis toTeko, san ika, xokimijli kechpa noneki kipanoltiskej (Lucas 22:19). Sekimej kineltokaj ika noneki nopanoltis nochi metstin, oksekimej cada semana, nochi tonaltin, miyekpa ipan se tonajli noso maski san kech kinekis yakaj kipanoltis.a San ika, noneki itlaj tikilnamikiskej.

Jesús okipanolti itlakualis toTeko ipan tonajli ijkuak judíos kipanoltiayaj Pascua niman seki horas sakin, omik (Mateo 26:​1, 2). Yejuin xsan ijkon opanok, Biblia kijtoua ika imikilis Cristo yeskia ken borreguito tlen nokuiya ipan iluitl Pascua. (1 Corintios 5:​7, 8). Iluitl Pascua kipanoltiayaj sejpa ipan se xiuitl (Éxodo12:​1-6; Levítico 23:5). Akin kachtopa kichiuayaj ken Cristo, kipanoltiayaj imikilis Jesús sejpa ipan se xiuitlb niman pampa iteixpantijkauan Jehová kitlakamatij Biblia, noijki ijkon kichiuaj.

Tonajli niman tlen hora

Jesús okiteititi kenon tikpanoltiskej itlakualis toTeko, noijki tlen tonajli niman tlen hora tikpanoltiskej. Yejua okipanolti ipan 14 de nisán ipan xiuitl 33, ijkuak yokalajka tonaltsintli, ijkon ken kijtoua calendario lunar bíblico (Mateo 26:18-​20, 26). Iteixpantijkauan Jehová tikpanoltiaj nochi xiujtin imikilis Cristo ipan yejon tonajli, ijkon ken okichiujkej akin kachtopa kichiuayaj ken Cristo.c

Ipan xiuitl 33, 14 de nisán katka viernes, san ika xnochi xiujtin sa no yejua tonajli kinamiki. Para tikmatiskej tlen tonajli kinamiki 14 de nisán, iteixpantijkauan Jehová tiktekitiltiaj calendario judío tlen yeuejkaui nokuiya niman xtlen judíos kitekitiltiaj aman.d

Pan niman vino

Ijkuak Jesús okipanolti yejuin, okikuik pan tlen xkipiya tlaxokolilistli niman vino tlen onokauj ijkuak okipanoltijkej Pascua (Mateo 26:26-​28). Ika yejon, tejuamej tiktekitiltiaj pan tlen xkipiya tlaxokolilistli niman xtiktekitiltiaj san katlejua jugo, tiktekitiltiaj vino tlen xkipiya azúcar, licor, hierbas noso okseki.

Seki religiones kitekitiltiaj pan tlen kipiya tlaxokolilistli. San ika, ipan Biblia ijkuak noteneua tlaxokolilistli kijtosneki tlajtlakojli niman nochi tlen xkuajli (Lucas 12:1; 1 Corintios 5:​6-8; Gálatas 5:​7-9). Ika yejon, pan tlen xkipiya tlaxokolilistli kuajli kineskayotiaj itlalnakayo Cristo tlen xkipiya tlajtlakojli (1 Pedro 2:​22). Seki religiones xkitlakamatij tlen kijtoua Biblia pampa xkitekitiltiaj vino yej kitekitiltiaj jugo de uva, ijkon kichiuaj pampa kijtouaj ika xkuajli tla kitekitiltiaj alcohol ​(1 Timoteo 5:​23).

San kineskayotiaj itlalnakayo niman iyesyo Jesús

Pan tlen xkipiya tlaxokolilistli niman vino tlen tiktekitiltiaj ijkuak tikilnamikij imikilis Cristo san kineskayotiaj itlalnakayo niman iyesyo. Xnokuepaj noso nonelouaj ika itlalnakayo niman iyesyo Cristo, ijkon ken oksekimej kinemiliaj. Matikitakan tlenon techijlia Biblia.

• Tla Jesús kimijliskia inomachtijkauan makonikan iyesyo, kentla kimilijtoskia maka makitlakamatikan itlanauatil toTajtsin itech maka makikuakan yestli (Génesis 9:4; Hechos 15:28, 29). Jesús xkeman kichiuaskia yejon, xkeman kintlajtlaniliskia makixnamikikan itlanauatil toTajtsin ​(Juan 8:​28, 29).

• Inomachtijkauan Jesús xokonikej iyesyo pampa yejua ok yoltoya. Ijkuak Jesús ok nemiya imiuan iapóstoles okijto ika iyesyo toyauiskia, yejuin kiteititia ika yejua xinotemakaya ​(Mateo 26:28).

• Biblia kijtoua ika Jesús “san sejpa niman para nochipa onotemakak” (Hebreos 9:​25, 26). Tla pan niman vino nokuepaskiaj itlalnakayo niman iyesyo, yeskia kentla Jesús mikiskia nochipa ijkuak nochiua itlakualis toTeko.

• Jesús xokijto: “Xchiujtokan yejuin niman ijkon miyekpa manimiki nemopampa”, ka, yejua okijto: “Xchiujtokan yejuin niman ijkon xnechilnamikikan” (1 Corintios 11:24).

Miyekej kinemiliaj ika, pan niman vino nokuepaj noso nonelouaj ika itlalnakayo niman iyesyo Jesús, ijkon kinemiliaj pampa seki Biblias ijkon yonotlajtolkuepkej. Ipan seki Biblias kijtouaj ika ijkuak Jesús okitemakak vino yejua okijto: “Yejuin noyesyo” (Mateo 26:28). San ika, noijki uelis notlajtolkuepas ken: “Yejuin kijtosneki noyesyo” noso “yejuin kixneskayotiaj noyesyo”.e Ken tikmatij, Jesús miyekpa okitekitilti neskayomej niman ijkon temachtis (Mateo 13:34, 35).

¿Akinomej kikuaj pan niman konij vino?

Ijkuak iteixpantijkauan Jehová kipanoltiaj imikilis Cristo, san achijtsitsintin kikuaj pan niman konij vino. ¿Tleka?

Ijkuak Jesús omik, onochiuj se yenkuik pacto tlen kipatlaya pacto noso tlajtolkaualistli tlen Jehová okichiuj iuan israelitas (Hebreos 8:​10-​13). Ipan yenkuik pacto ompa nemij akin kikuaj pan niman konij vino ijkuak noilnamiki imikilis Jesús. Xnochimej akin kichiuaj ken Cristo uelij ijkon kichiuaj, san akin toTajtsin kintlapejpenia (Hebreos 9:​15; Lucas 22:20). Yejuamej tekiuajtiskej iuan Jesús ne iluikak. Biblia kijtoua ika san 144,000 tlaltikpakchanejkej ueliskej tekiuajtiskej iuan Jesús (Lucas 22:28-​30; Apocalipsis 5:​9, 10; 14:​1, 3).

San achijtsitsintin akin kichiaj tekiuajtiskej iuan Jesús ne iluikak, san ika, miyekej akin chantiskej ipan tlaltikpaktli iuan “on sajnoye miyekej tlakamej” (Lucas 12:32; Apocalipsis 7:​9, 10). Maski akin tikchiaj tinemiskej ipan tlaltikpaktli xtijkuaj pan nion xtikonij vino ijkuak tikilnamikij imikilis Cristo, tiauej pampa ijkon tiktlasojkamatij tlen Jesús okichiuj topampa (1 Juan 2:2).