¿Tlenon kijtoua Biblia ijkuak se tekaua ixpan tekiuajkej niman ijkuak se noxeloua?

Jehová kineki ika akin yononamiktijkej makichiuakan tlen onoijlikej ijkuak ononamiktijkej. Ijkuak okinsentlali kachtopa tlakatl niman siuatl, okijto: “Tlakatl [...] nosentlalis iuan isiuauj, niman nochiuaskej san se tlalnakayotl”. Sakin, Jesucristo oksejpa okijto yejuin tlajtoltin: “Yejua ika se tlakatl xuelis kixelos on tlen Dios okisentlalij” (Génesis 2:24; Mateo 19:3-6). Ken tikitaj, Jehová niman Jesús kinekij ika akin nonamiktiaj maka keman manokauakan, uelis tlamis innamiktilis san ijkuak se ixnamik miki (1 Corintios 7:39). Pampa toTajtsin yejua akin okitlali namiktilistli, xkipiya ika tikxotoniskej san ijkuak tejuamej tiknekiskej. Kema, Jehová kitlauelita ijkuak nokauaj niman xkichiuaj ijkon ken kijtoua iTlajtol, Biblia (Malaquías 2:15, 16).

¿San kemanon kijtoua Biblia se uelis kikauas ixnamik? Jehová yokijto ika melak kitlauelita auilnemilistli (Génesis 39:9; 2 Samuel 11:26, 27; Salmo 51:4). Pampa yejua melak kitlauelita yejon, tekauilia manokauakan ijkuak nochiua auilnemilistli. (Ipan capítulo 9, párrafo 7, kijtoua tlenon kijtosneki auilnemilistli.) ToTajtsin kikauilia akin xokichiuj auilnemilistli yejua makitlapejpeni tla kikauas ixnamik noso ka (Mateo 19:9). Ika yejon, tla yejua kitlapejpenia kixotonis inamiktilis, xkichiujtika tlen Jehová kitlauelita. Aman, nion se tokniuj ipan tlanechikojli xkipiya ika kijlis makichiua yejon. Pampa uelis onias itlaj tlen kichiuas se makinemili xkikauas ixnamik, kanaj yejuin ijkon yes tla kita ika yemelak noyolkuepa itech tlen yokichiuj. Maski ijkon, yejua akin yemelak noneki kitlapejpenis tla tekauas noso ka ijkon ken kijtoua Biblia niman kixnamikis tlen panos ipampa tlen kichiuas (Gálatas 6:5).

Aman, panoua okseki tlen melak ouijtika kampa akin kitekichiuilia toTajtsin uelis kinemilis noxelos itech ixnamik noso hasta kikauas, maski ixnamik xkichiua auilnemilistli. Ijkuak ijkon panoua, Biblia kinauatia akin kitlapejpenia kichiuas ijkon “ma ka ma nonamikti [...], noso tla ueli ma noyoltlali iuan” ixnamik (1 Corintios 7:11). Kuakon, tla ijkon panoua xuelis oksejpa peuas kinemilis iuan yakaj nonamiktis (Mateo 5:32). San ika, aman matikitakan seki tlen melak ouijtika noixnamiki tlen yokichiuj ika sekimej manoxelokan itech imixnamik.

Ijkuak xkineki kintlakualtis inchanejkauan. Nemij teueuentsitsinuan akin xkinmakaj inchanejkauan tlen kinpoloua. San ika, xpampa tla xuelij, ijkon panoua pampa yejuamej xkinekij. Ika yejon, ichanejkauan kinpoloua miyek tlemach. Biblia kijtoua ika tla yakaj xkinmaka ichanejkauan tlen kinpoloua, “xkichiua tlen on kuajli tlaneltoktli technauatia, niman más xkuajli kichiua xken yejua on yejuan xtlaneltoka” (1 Timoteo 5:8). Tla se teueuentsin ijkon kichiua niman xkineki nopatlas, tesiuauj kuajli kitas tla noxelos itech iueuentsin melak kipaleuis kuajli nemis yejua niman ikoneuan. Aman, tokniuan tlayekankej ipan tlanechikojli noneki kuajli makimatikan tla yemelak ijkon kichiua se teueuentsin akin kitekichiuilia toTajtsin, pampa akin ijkon kichiua uelis kikixtiskej ipan tlanechikojli.

Melak kiuisoki. Sekimej nochiuaj melak tlauelejkej, niman ijkon se teueuentsin uelis kikokolismakas niman hasta uelis kimiktis ixnamik. Niman tla akin ijkon kichiua yejua kitekichiuilia toTajtsin, tlayekankej noneki kuajli kitaskej tlenon yemelak panotok, pampa akin melak kualani niman tlauisoki yejuin uelis kichiuas makikixtikan ipan tlanechikojli (Gálatas 5:19-21).

Ijkuak uelis kichiuas maka sa makitekichiuili toTajtsin. Nemij akin kitejtemouaj kenon melak xkikauiliskej imixnamik makiueyichiua Jehová noso hasta kichiualtiaj itlaj makichiua niman ijkon maka makitlakamati Biblia. Tla ijkon panoua, akin kitekichiuilia toTajtsin noneki kuajli kitas tla noxelos itech ixnamik san ijkon uelis kitlakamatis toTajtsin (Hechos 5:29).

Kuajli matikmatikan ika ijkuak melak ouijtika kixnamiktokej ijkon ken nikan yotikitakej, xkipiya ika tikijliskej akin ijkon ipan nochiua manoxelo itech ixnamik nion xtikijliskej maka manoxelo. Maski tlayekankej niman oksekimej tokniuan uelis kipaleuiskej niman kitlajtolpaleuiskej ika Biblia, noneki kimatstoskej ika san Jehová kuajli kimati tlenon panoua itech se teueuentsin niman tesiuauj. Tla se akin kitekichiuilia toTajtsin, san pampa kineki noxelos itech ixnamik, kijtoua ika melak ueyi tlauejli kipiya maski san pitentsin, xkitlakaita namiktilistli nion toTajtsin akin okitlali. Niman noijki, Jehová kimati tla yakaj kitejtemojtika kenon tekajkayauas, maski ijkuak melak kuajli yokinemili kenon tetlaneltokiltis. Kema, “nochi tlen onkaj niman nemi panestikaj niman pantlantitikaj ixpan. Yejua, tej, ika onkaj ixpan titoyolkuitiskej ikan nochi tlen tikchiuaj” (Hebreos 4:13). Aman, tla se kixnamiktika tlen melak temomojti niman, xok onka okse tlen kichiuas, akin kitekichiuilia toTajtsin kitlapejpenia noxelos itech ixnamik, xakaj kipiya ika kitejteneuas. Pampa, “cada se ika onkaj tikijliskej Dios nochi tlen kuajli niman on tlen xkuajli tikchiuaj” (Romanos 14:12).