Tlen mitspaleuis maka melak xmoyolkokojto: Tlen uelis tikchiuas

Onka miyek tlen uelis mitsyolseuis, san ika, onka seki tlen xtepaleuiya. Ijkon panoua pampa, ken yotikitakej, xnochimej san noijki ken noyolkokouaj. Ika yejon, tlen yakaj kipaleuiya, kanaj xkipaleuiya yakaj okse.

Maski ijkon, miyekej akin nomachtiaj tlen kimachiliaj akin noyolkokouaj, yokitakej ika onka miyek tlen uelis kinpaleuis akin noyolkokouaj. Seki tlen yejuamej kichiuaj uajlauj ipan se libro tlen yeuejkaui onoijkuilo. Yejuin libro itoka Biblia.

1: XMOKAUILI MAMITSPALEUIKAN MOCHANEJKAUAN NIMAN MOAMIGOS

• 

  Sekimej kijtouaj ika yejuin tlen más uelis mitspaleuis ijkuak timoyolkokoua. Maski ijkon, kemantika kanaj tiknekis san moselti tinemis, niman hasta tikualanis tla oksekimej kinekij mitspaleuiskej. Miyekej ijkon inpan nochiua.

• Xnoneki nochipa tinemis imiuan oksekimej, san ika, maka xkintlalkaui moamigos. Kanaj sakin tiknekis mamitspaleuikan. Xkimijli tlenon mitspoloua niman tlenon ka, san ika, kuajli xkinnotsa.

• Kuajli xkita kemanon nonekis san moselti tinemis niman kemanon más kuajli tla tinemis imiuan oksekimej.

TLEN BIBLIA KIJTOUA: “Más kuajli omemej xken se san iselti, pampa [...] tla se de yejuamej uetsi, on okse kuiteuas” (Eclesiastés 4:9, 10).

2: KUAJLI XTLAKUA NIMAN XCHIUA EJERCICIO

• Tla kuajli titlakua, uelis más titlaxikos ijkuak timoyolkokojtos. Xkinkua frutas niman verduras niman maka xkua tlen melak chiauak.

• Xkoni atl niman okseki tlen uelis mitspaleuis.

• Tla xtiapismiki, miyekpa xtlakua maski san achijtsin. Noijki uelis tiktlajtoltis doctor mamitsijli tlenon uelis tijkuas niman tlenon ka.a

• Tla timotlaloua niman tikchiua ejercicio, uelis mitspaleuis más kuajli xmomachili. Sekimej ijkuak kichiuaj ejercicio, tlanemiliaj itech tlen inpan yonochiuj niman oksekimej kichiuaj ejercicio para xipan yejon tlanemiliskej.

TLEN BIBLIA KIJTOUA: “Xakaj nemi yejuan xkitlajsojtla itlalnakayo, yej kitlakualtia niman cuidaroua” (Efesios 5:29).

3: KUAJLI XKOCHI

• 

  Maski tinochimej noneki kuajli tikochiskej, akin noyolkokouaj noneki más kuajli kochiskej pampa más siauij.

• Maka xkoni tlen melak kipiya cafeína niman alcohol pampa yejon uelis kichiuas maka xkochi.

TLEN BIBLIA KIJTOUA: “Más kuajli titekitis ken [...] kitokaroua, niman tikpiyas achitsin neseuijli, xken sanoyej tichikajkatekitis niman tikpiyas miyek, pero xtikpiyas neseuijli” (Eclesiastés 4:6).

4: XCHIUA TLEN UELIS MITSPALEUIS

• 

  Pampa xnochimej san noijki noyolkokouaj, tejua noneki tikitas tlen uelis mitspaleuis.

• Sekimej para kuajli nomachiliskej kimijliaj oksekimej kenon nomachiliaj, san ika, oksekimej xkinekij kiteijliskej kenon nomachiliaj. Sekimej kijtouaj ika melak tepaleuiya tikijtos tlen tikmachilia ijkuak timoyolkokoua. Tla tejua tikneki tikijtos ken timomachilia, san ika, xueli tikimijlia oksekimej, uelis tikijlis yakaj akin melak kuajli iuan timouika.

• Sekimej noneki chokaskej, san ika, oksekimej ka.

TLEN BIBLIA KIJTOUA: “Xakaj kimati tlinon mitsajmana niman tlinon mitspaktia. Yej, san tejua tikmati” (Proverbios 14:10).

5: MAKA XCHIUA TLEN UELIS MITSIJTLAKOS

• 

  Sekimej akin melak noyolkokouaj tlauanij niman kikuij drogas para más kuajli nomachiliskej. Uelis tiknemilis ika kuajli timomachilia, san ika, uelis melak mitsijtlakos. Xtejtemo tlen mamitsyolseui, san ika, xkita maka mamitsijtlako.

TLEN BIBLIA KIJTOUA: “Ma tikixtikan ipan totlalnakayo niman toalma nochi on tlen techijtlakoua” (2 Corintios 7:1).

6: KUAJLI XKUI MOTIEMPO

• Sekimej yokitakej ika kinpaleuiya kijliskej yakaj tlen kimachiliaj. San ika, yolik kichiuaj. Kachtopa noteltiaj, yauej konchiuaj itlaj okse niman sakin oksejpa uajnokuepaj.

• Uelis mitspaleuis tla timouika imiuan moamigos noso tla tikintejtemoua oksekimej. Noijki tla timomachtia itlaj noso tiktejtemoua tlen ika timoyolpaktis.

• Ika yolik nopatlatias tlen tikchiuas. Kanaj tikitas ika yopeuj más tikchiua okseki tlemach niman xok más titlanemilia itech tlen mitsyolkokoua. Ijkon tikmatis ika aman xok más timoyolajmana.

TLEN BIBLIA KIJTOUA: “Nochi tlen nochiua ipan in tlaltikpaktli kipiya kamanon nochiuas: kamanon se choka, niman kamanon se uetska” (Eclesiastés 3:1, 4).

7: KUAJLI XKITA TLEN TIKCHIUAS MOJMOSTLA

• 

  Nimantsin xtlapejpeni tlenon tikchiuas mojmostla.

• Tla itikmati tlen hora tikochi, titekiti noso tikchiua itlaj okse, peuas más kuajli timomachilis.

• Tla tikchiua itlaj tlen mitsyolpaktia, xok melak timoyolkokos.

TLEN BIBLIA KIJTOUA: “Pampa Dios kitemiltia ipan iyojlo ikan miyek paktli, xsanoyej kontematstikaj on tlen ipan inemilis nochiuas” (Eclesiastés 5:20).

8: MAKA SAN NIMANTSIN XTLAPEJPENI TLEN TIKNEKI TIKCHIUAS

• Sekimej kitlapejpeniaj kichiuaskej itlaj ijkuak kemach omik akin kitlasojtlayaj, san ika, sakin noyolkuepaj.

• Tla tiueli, xmochia achijtsin. Maka nimantsin xmochanpatla, maka xkajkaua motekiyo noso maka nimantsin xpopolo tlen kipiaya akin yomik.

TLEN BIBLIA KIJTOUA: “Ijkuak itlaj kuajli kinemiliaj ken kichiuaskej, kuajli kisa. Pero itlaj yejuan san kisijkachiuaj, xkuajli kisa” (Proverbios 21:5).

9: XKILNAMIKI AKIN YOMIK

• 

  Miyekej kuelitaj kichiuaskej itlaj tlen makimilnamikti akin yomik.

• Uelis mitspaleuis kuajli xmomachili tla tikinsentlalia fotos noso tikijkuiloua ipan se amatl tlen otikchiujka iuan akin yomik.

• Xkejyeua tlen mitsilnamiktia akin yomik niman xkita ijkuak tiknekis.

TLEN BIBLIA KIJTOUA: “Xkelnamikikan on tonaltin yeuejkaui” (Deuteronomio 32:7).

10: XMOSEUI SEKI TONALTIN

• Xkita tla uelis timoseuis seki tonaltin.

• Tla kampa titekiti xmitskauiliaj xmoseui miyek tonaltin, kuakon uelis tikxelos se noso ome tonajli niman ijkon oksekan tonpaxalos.

• Maski san achijtsin tikpatlas tlen mojmostla tikchiua uelis kichiuas más kuajli xmomachili.

TLEN BIBLIA KIJTOUA: “Xuajuiyan, tiauij neka kampaka xakaj nemi, niman ompa tiueliskej titoseuiskej achijtsin” (Marcos 6:31).

11: XKINPALEUI OKSEKIMEJ

• 

  Maka xkilkaua ika tla tikinpaleuiya oksekimej noijki más kuajli timomachilis.

• Uelis tikinpaleuis akin noijki noyolkokouaj ken tejua, ken moamigos noso mochanejkauan. Kanaj yejuamej noijki kinekij yakaj kijliskej kenijki nomachiliaj.

• Tla tikinpaleuiya niman tikinyolseuiya oksekimej, más tiyolpakis niman más kuajli timomachilis.

TLEN BIBLIA KIJTOUA: “Más paki yejuan kitemaka xken on yejuan kiselia” (Hechos 20:35).

12: OKSEJPA XKITA TLEN MÁS NONEKI TIKCHIUAS

• Tlen mopan yonochiuj uelis mitspaleuis xkasikamati tlen más noneki tikchiuas.

• Xnemili tla kuajli tlen tikuajchijtiuj.

• Tla noneki, xpatla seki tlen tikchiua.

TLEN BIBLIA KIJTOUA: “Más kuajli tias kampa mikapan, xken tias kampa iluikapan [...], niman kuajli para xkelkauaskej yejuan aman nemij” (Eclesiastés 7:2).

Kuajli xmatsto ika xtlaj uelis kichiuas nion achijtsin xmoyolkoko. San ika, miyekej akin noyolkokouaj pampa omik yakaj akin kitlasojtlayaj, yokitakej ika tla kichiuaj tlen kijtoua yejuin tlamachtijli, más kuajli nomachiliaj. Onka miyek tlen uelis mitspaleuis kuajli xmomachili, san ika, tla tikchiua tlen nikan yotiuelkej, tikitas ika uelis tiyolseuis.