3. ¿Tleka tlajyouiyaj akin kichiuaj tlen kuajli?
¿Tleka melak noneki matikmatikan?
Xkinamiki ika akin kuajkualtin matlajyouikan. Ijkuak tikitaj ken tlajyouiyaj, uelis tiknemiliskej ika xtepaleui tikchiuaskej tlen kuajli.
Xkonnemili yejuin
Sekimej kineltokaj ika ijkuak timikij oksejpa tiuajnemij ipan itlalnakayo yakaj noso itlaj okse. Kinemiliaj ika tla aman tikchiuaj tlen kuajli, ijkuak oksejpa tiuajnemiskej más kuajli yes tonemilis, san ika, tla tikchiuaj tlen xkuajli melak titlajyouiskej. Pampa kineltokaj yejuin, kinemiliaj ika se uelis tlajyouis maski kuajli iyojlo pampa okichiuj tlen xkuajli ipan okse inemilis. San ika, xmotlajtolti:
¿Techpaleuiskia titlajyouiskej aman ipampa itlaj tlen otikchiujkej ipan okse tonemilis tlen nion xtikilnamikij?
Tla iijkuiliujtika kenon tontlamiskej itech tlen otikchiujkej ipan okse tonemilis, ¿tleka noneki totlajpiyaskej niman ijkon xtikualoskej niman xtopan nochiuas itlaj tlen xkuajli?
TLA OKSEKI TIKMATISNEKI
Xkita video ¿Tleka kikauilia toTajtsin maonia tlajyouilistli?, tlen onka ipan jw.org.
Tlen Biblia kijtoua
ToTajtsin xtechtlajyouiltia
Miyekpa titlajyouiyaj pampa tinemiyaj kampa xnonekiya tinemiskej niman ijkuak xnonekiya.
“Ipan sen tlaksalistli xnochipa tetlani on yejuan más tlaksa, nion ipan sen nouijsokilistli xnochipa tetlani on yejuan más tlauelej; ika on tlamatkej xnochipa kipiyaj tlen kuaskej, nion on tlamachilisyejkej xnochipa nochiuaj ricos, nion on tlaixmatkej xnochipa kuajli kiminseliaj, yej nochimej impan yejko ijkuak kiseliaj tlen kuajli noso xkuajli” (ECLESIASTÉS 9:11).
Titlajyouiyaj pampa ijkuak otinemikoj ititlajtlakolejkej katkaj
Miyekej kitekitiltiaj tlajtojli tlajtlakojli pampa kinekij kiteasikamachiltiskej tlen xkuajli tikchiuaj. San ika, Biblia noijki kiteneua yejuin tlajtojli ijkuak tlajtoua itech tlajtlakojli tlen otechpanoltilijkej Adán niman Eva.
“Tej, melauak ijkuak onitlakat, ye nikpiyaya tlajtlakojli. Desde ijkuak oninochiu ijtik nonanaj, ye nikpiyaya tlajtlakojli” (SALMO 51:5).
Tlajtlakojli melak yokintlajyouilti tlaltikpakchanejkej
Kichiua maka kuajli matouikakan iuan akin otexchijchiuj, noijki kichiua ika maka kuajli matouikakan iuan nochi tlen yejua okichijchiuj ken tlaltikpakchanejkej niman nochi tlen toyeualiyan onka. Yejuin tinochimej yotechtlajyouilti.
“Ijkuak nikneki nikchiuas on tlen kuajli, xniueli pampa on tlajtlakojli onkaj ipan notlalnakayo” (ROMANOS 7:21).
“Nochi tlen Dios okichijchiu nokokoua niman tena” (ROMANOS 8:22).