Kenon tecnología kimijtlakoua mokoneuan
Miyekej akin iuejueyimej ouijtika kitaj kinkuiskej aparatos eléctronicos, san ika, kokonej melak uelij kinkuij.
Sekimej yokitakej ika telpokamej akin melak uejkaui kitstokej Internet uelis inpan nochiuas yejuin:
Xika inyojlo nemiskej tla xkikuij tecnología.
Kinchiuiliskej tlen xkuajli ipan Internet noso yejuamej kitechiuiliskej tlen xkuajli.
Kanaj uelis kitaskej pornografía, maski xkitejtemouaj.
TLEN NONEKI TIKMATIS
XUELIS TIKAJKAUAS
Ipan Internet onka miyek tlen uelis mitsyoltilanas, ken juegos noso itlaj okse ¿Tleka? Libro En defensa de la conversación kijtoua ika akin kinchijchiuaj aplicaciones kinekij melak xkinkui. Ijkuak tiuejkauij tikinkuij aplicaciones kampa uajnesi tlen kinemakaj seki empresas, yejuamej más kitlanij.
XNEMILI YEJUIN: ¿Mokoneuan melak kinkuij aparatos electrónicos? ¿Kenon uelis tikinpaleuis maka san nochipa ijkon makichiujtokan? (EFESIOS 5:15, 16).
CIBERACOSO
Sekimej ijkuak melak kikuij Internet nimantsin kualanij, xtetlakaitaj nion xteikneliaj. Niman yejon kichiua san tlemach makimijlikan noso makinchiuilikan oksekimej.
Sekimej ijkon kichiuaj pampa melak kinekij makimixmatikan niman san makitstokan tlen kichiuaj. Oksekimej kinemiliaj ika kintlauelitaj san pampa xokinnotskej ipan se iluitl.
XNEMILI YEJUIN: ¿Tikitaj ika Internet kimijtlakojtika mokoneuan? (Efesios 4:31). ¿Kenon nomachiliaj mokoneuan ijkuak oksekimej kichiuaj itlaj niman xkinnotsaj?
PORNOGRAFÍA
Aman ipan Internet más miyekej uelij kitaj pornografía. Niman maski seki aparatos uelis kintlaliliskej tlen kichiuas maka mauajnesikan seki páginas, kemantika yejon xmelak tepaleuiya.
Sexteo, kijtosneki tikintitlanis noso tikinselis mensajes kampa uajnesi ika auilnemij. Yejon melak xkuajli pampa miyekan gobiernos xkitekauiliaj matetitlanilikan pornografía infantil, hasta uelis mitstsakuaskej.
XNEMILI YEJUIN: ¿Kenon uelis tikpaleuis mokoneuj maka makimita noso makintitlani mensajes kampa uajnesi ika auilnemij? (EFESIOS 5:3, 4).
TLEN UELIS TIKCHIUAS
KUAJLI XKINMACHTI MOKONEUAN
Maski kokonej melak uelij kikuij tecnología, noneki yakaj makinmachti kenon kuajli kikuiskej. Libro Indistractable (Indistraíble) kijtoua ika tla tikmaka mokoneuj se aparato electrónico maski xueli kuajli kikui yeskia kentla tijkauiliskia maonnotlajkali ipan atl maski xueli apanoua.
TLEN BIBLIA KIJTOUA: “Xmachti mokoneu ken kuajli nouikas aman chika konetl, niman hasta ijkuak ueuentsintias nochipa ijki nouikas” (PROVERBIOS 22:6).
Xtlapejpeni noso xkijkuilo tlen tikuelitaskia tikchiuas:
Nikijlis nokoneuj kenon kuajli kikuis Internet.
Nikpaleuis nokoneuj maka manoyolkoko ijkuak oksekimej itlaj kichiuaskej niman xkinotsaskej.
Niktlalilis Internet itlaj tlen makichiua maka mauajnesikan seki páginas.
Nikitas tlenon kichiua nokoneuj ipan iteléfono.
Nikijlis nokoneuj kech tiempo uelis kinkuis aparatos electrónicos.
Nikijlis nokoneuj maka makinkui aparatos electrónicos ika tlayoua.
Nikijlis nokoneuj maka makinkui aparatos electrónicos ijkuak tlakua.