Célula tlen kipiya levadura melak ouijtika ken tekiti. Yejuin células kipiyaj inADN tlen melak kuajli tekiti. Noijki ijtik kipiyaj tlen kinpaleuiya maka mamikikan.
Tlen techititia nochi tlen yoltika
Nochiuiyan nemij tlaltikpakchanejkej niman yolkamej akin noskaltiaj, nouiyoniaj, nomiyekiliaj niman kichiuaj kualtsin manesi yejuin tlaltikpaktli. Ipan yejuin tonaltin kuajli tikixmatij nochi tlen yoltika. ¿Tlenon techmachtia? Matikitakan.
Nesi ika yakaj okichijchiuj nochi tlen yoltika. Ijkon ken se kajli kipiya miyek ladrillos, noijki tejuamej tikinpiyaj miyek células tlen kichiuaj matinemikan. Ipan yejuin pipitikej células nochiua miyek tlemach tlen techpaleuiya matinemikan niman matomiyekilikan. Yejuin células noijki onka ipan okseki tlemach. San xontlanemili itech levadura tlen notekitiltia ijkuak nochijchiua pan. Yejuin levadura san kipiya se célula. Maski célula tlen kipiya levadura xijkon ken células tlen kinpiya totlalnakayo, uelis tikijtoskej ika ouijtika ken tekiti. Yejuin células kipiyaj inADN tlen melak kuajli tekiti. Noijki ijtik kipiyaj tlen kinpaleuiya maka mamikikan. Ijkuak se de yejuin células xkipiya tlen kikuas, san no yejua noteltia. Ijkon levadura ok yoltika maski xtekititika. Sakin, ijkuak akin kichijchiua pan oksejpa kikui, célula oksejpa peua tekiti.
Científicos yeuejkaui ika nomachtiaj células tlen levadura kinpiya niman ijkon kuajli kimixmatiskej células tlen kinpiya totlalnakayo. Maski ijkon, ok noneki más nomachtiskej. Ross King, akin temachtia Inteligencia Artificial ipan Universidad Tecnológica Chalmers, ne Suecia, kijtoua: “Noneki manemikan más miyekej biólogos niman ijkon matikasikamatikan kenon tekiti levadura”.
Aman ika yotikitakej kenon tekiti célula tlen kipiya levadura, ¿ken tikita? ¿Tiknemilia ika yakaj okichijchiuj noso san ijkon onesiko?
Itlaj san uelis nemis tla kisa itech itlaj tlen yoltok. ADN kipiya seki moléculas tlen itoka nucleótidos. Cada célula tlen tikpiyaj ipan totlalnakayo kinpiya 3,200 millones de nucleótidos. Nochi yejuin nucleótidos kichiuaj ika célula makinchijchiua enzimas niman proteínas.
Científicos kijtouaj ika maski melak miyek nucleótidos san no yejuamej miyekpa nosentlaliskiaj, xkeman ueliskiaj kichijchiuaskiaj itlaj tlen mayolto.
Hasta aman científicos xuelij kichiuaj mayoliui itlaj tlen xyoltok.
Melak kuajli ken titlachijchiujtin. San tlaltikpakchanejkej ueli tlanemiliaj, itlaj kimachiliaj niman ueli nouikaj imiuan oksekimej. San tejuamej ueli tiyolpakij ijkuak tikueliliaj noso tikijnekuij itlaj, niman ijkuak tijkakij noso tikitaj itlaj tlen tikuelitaj. Noijki tiknemiliaj tlenon tikchiuaskej ika tlayekapan niman tiktejtemouaj kenon tinemiskej ika toyojlo. Nochi yejuin kichiua matiyolpakikan.
¿Ken tikita? ¿Kanaj nochi yejuin ueli tikchiuaj san para matiuelikan matinemikan niman matomiyekilikan? ¿Noso kanaj toTajtsin otexchijchiuj para matiyolpakikan pampa techtlasojtla?