¿Tleka miyekej xok tetlakaitaj?

TLEKA NONEKI TIKINTLAKAITASKEJ OKSEKIMEJ

Ijkuak tikintlakaitaj oksekimej, kichiua matiyolseuikan niman noijki uelis kichiuas maka maueyiya se tlauejli.

Biblia techijlia yejuin: “Tla se teyemankanankilia, kitlauelseuiya yakaj, pero tla tetlauelnankilia, kichiua para se más ma kualani” (Proverbios 15:1). Ijkuak ika tlen tikijtouaj niman ika tlen tikchiuaj xtikteititiaj tetlakaitalistli ueyiya tlauejli, niman ijkuak ijkon panoua xitlaj kuajli onkisa.
Jesús okijto: “On tlen kisa ipan tekamak ualeua ne ipan teyojlo kampa yejua ika tlatentok” (Mateo 12:34). Ijkuak xtitenotsaj ika tetlakaitalistli uelis tikteititijtoskej ika xkuajli ken titlanemiliaj. Kanaj ijkon tikchiuaj pampa tikteititijtokej on tlen yemelak tikmachiliaj itech akin xsan noijki onoskaltijkej ken tejuamej, xsan noijki kichiuaj ken tejuamej noso oksekan ualeuaj. Ika yejon, tejuamej nonekis tikpatlaskej ken titlanemiliaj.

Xiuejkaui, okintlajtoltijkej ipantsin 32,000 tlaltikpakchanejkej akin chantij ipan 28 países, niman 65 por ciento akin otlanankilijkej okijtokej ika aman melak xok tetlakaitalo ijkon ken yeuejkaui tetlakaitayaj.

TLEN TEJUA UELIS TIKCHIUAS

Maski tla akin iuan titlajtotika xtlanemilia ijkon ken tejua, xtlakaita. Xtejtemo itech tlen kema uelis nentlajtoskej niman ijkon xtitetlajtlakolmakas nion xsan tikitstos tlen xkuajli kichiuaj oksekimej.

“Maka kaman xkintlajtlakolmakakan oksekimej, para Dios no xmechtlajtlakolmakas” (Mateo 7:1).

Xkinchiuili on tlen kuajli oksekimej ijkon ken tejua tikneki mamitschiuilikan. Tla tejua tikinchiuilia tlen kuajli oksekimej niman tikinmasikamati, kanaj yejuamej noijki ijkon mitschiuiliskej.

“Xkinchiuilikan tlen kuajli oksekimej ijkon ken nemejuamej nenkinekiskiaj yejuamej ma mechchiuilikan” (Lucas 6:31).

Xtetlapopolui. Maka nimantsin xnemili ika yakaj kinekiya itlaj mitschiuilis. Niman tla yakaj okijto noso okichiuj itlaj tlen omitsyolkoko, xkilkaua.

“Yejuan tlamatki ueli kiteltlalia itlauel. Niman kipiya tlakaitalistli ijkuak tetlapojpoluiya” (Proverbios 19:11).

Ipan se kajli kampa nosentlaliaj iteixpantijkauan Jehová, miyekej tlakamej niman siuamej akin xsan noijki kampa ualeuaj nonotstokej niman uetskatokej achto peuas tlanechikojli.

TLEN TIKCHIUAJ AKIN TIITEIXPANTIJKAUAN JEHOVÁ

Maski san kanon tichantij noso titekitij, akin tiiteixpantijkauan Jehová nochimej tikintlakaitaj niman tikinyolchikauaj oksekimej noijki ijkon makichiuakan.

Nochimej tikimijliaj tla kinekij nomachtiskej Biblia niman xtlaj kitlaxtlauaskej, san ika, xkeman tikchiualtiaj yakaj matlanemili ijkon ken tejuamej nion makineltoka tlen tejuamej tikneltokaj. Yej, ijkuak tikimijliaj oksekimej tlen tikneltokaj tikchiuaj ijkon ken technauatia Biblia, ika yolseuilistli niman tetlakaitalistli (1 Pedro 3:15; 2 Timoteo 2:24).

Xtitechikoitaj. Kampa tosentlaliaj kuajli tikinseliaj nochimej akin kinekij nomachtiskej Biblia maski san kanon maualeuakan. Tokojtiliaj titeasikamatiskej niman titetlakaitaskej (1 Pedro 2:17).

Tikintlakaitaj tekiuajkej akin tlayekanaj kampa tichantij (Romanos 13:1). Tikintlakamatij tlanauatiltin niman tiktlaxtlauaj impuestos. Niman maski tejuamej xtokalaktiaj ipan política, kema tikintlakaitaj oksekimej itech tlen kitlapejpeniaj ipan política.