Kenon tikyektlaliskej tlaueltin tlen onka imiuan akin titekitij

Ipan 1 Corintios 6:1-8, Pablo otlajto itech tlauejli tlen kipiyaj akin kichiuaj ken Cristo. Kachtopa, okijto ika yejua onajman pampa sekimej akin tlaneltokayaj itech Cristo chanejkej Corinto yayaj “intech on tekiuajkej” xmelajkej (tlaxelojli pitentsin 1). Sakin okimijli ika makiyektlalikan ipan tlanechikojli yejon tlaueltin tlen kipiayaj niman maka itech comisaría noso itech tekiuajkej. Matikitakan tleka ijkon okijto manochiua ipan iamatlajkuilol tlen okijkuilo ika espíritu santo niman sakin noijki tikitaskej kampa kanaj xnonekis tikchiuaskej tlen okijto Pablo.

Ijkuak akin kichiuaj ken Cristo kipiyaj seki tlauejli pampa san sekan tekitij, Jehová kichia matikyektlalikan ken yejua kijtoua niman maka ken tejuamej tiknekij (Proverbios 14:12). Ijkon ken okijto Jesús, melak kuajli tla nimantsin tikyektlaliaj, niman xtijkauiliaj maueyiya se tlauejli (Mateo 5:23-26). Teyolkoko tikijtoskej ika sekimej akin kichiuaj ken Cristo san nokualaniaj niman yauej itech tekiuajkej. San ika, Pablo okijto: “Pampa ijkon [nemoteiluijtokej], nenkiteititijtokej ika sanenka nentlaneltokaj”. ¿Tleka? Pampa uelis xkuajli tlajtoskej itech itoka toTajtsin niman itech tlanechikojli. Tla xtiknekij mapano yejuin, noneki tikchiuaskej tlen okijto Pablo: “Más kuajli nenkijyouiskej on ijkuak xkuajli mechchiuiliaj” (tlaxelojli pitentsin 7).

Pablo noijki okijto ika toTajtsin yokitlali kenon kuajli noyektlalis miyek tlaueltin. Kijtoua ika ipan tlanechikoltin nemij tlakamej akin kipiyaj tlamachilistli pampa yonomachtijkej iTlajtol toTajtsin. Kema, tlayekankej uelis “kinyektlalis[kej]” tokniuan itech “tlajtlamach ipan in nemilistli” (tlaxeloltin pitentsitsintin 3-5). Noijki, Jesús okijto yeyi tlemach tlen noneki tikchiuaskej niman ijkon tikyektlaliskej ueyi tlajtlakoltin, ken ijkuak techtlajtolchijchiuiliskej noso techtlachtekiliskej. Kachtopa, tikyejyekoskej tikyektlaliskej san toselti iuan tokniuj; tla xueli noyektlalia ijkon, ika ome, ixpan se noso omemej oksejpa iuan titlajtoskej; tla nion ijkon xueli, ika yeyi, aman tiaskej itech tlayekankej ipan tlanechikojli (Mateo 18:15-17).

San ika, tlayekankej xkipiya ika nochiuaskej ken abogados noso ken akin tlajtouaj tepampa kampa onka tlauejli. Nion xkichiuaskej itlaj tlen ijkon makiteititikan. Noijki xkimijliskej tlenon kichiuaskej niman ijkon manoyektlali tlauejli tlen kipiyaj omemej tokniuan itech intekiyo. Tlayekankej noneki kinpaleuiskej yejon omemej tokniuan makitakan kenon kichiuaskej tlen kijtouaj tlajtolyekanalistin tlen uajlauej ipan Biblia niman ijkon kuajli makiyektlalikan intlaueluan. Tla nesi melak ouijtika, kanaj kinemiliskej kitlajtoltiskej tlayekanketl ipan circuito noso insucursal iteixpantijkauan Jehová. Aman, kemantika xuelis tikchiuaskej tlen Pablo okijto. ¿Kemanon? Matikitakan san seki.

Timoteiluis itech tekiuajkej xnochipa kijtosneki tikchiujtika san tlen tejua tikneki. Kanaj yejuin ijkon noneki pampa tekiuajkej ijkon tlanauatiaj noso pampa san ijkon xuelis onias tlauejli. Se neskayotl, kanaj nonekis tiktlajtlanis amatl kampa makijto ika titekauas, manoijto akinon itech nokauas se tekoneuj, makimakakan tomin tlen ika notlakualtis, kitlajtlanis makitlaxtlauilikan iseguro, kitlajtlanis makimakakan tomin tlen kinamiki pampa teuan tekitiya noso yemelak manochiua ijkon ken kijtoua se testamento. Niman noijki se akin kichiua ken Cristo hasta uelis noteiluis niman ijkon makipaleuikan ijkuak yakaj kiteiluiya.a

Akin yauj itech tekiuajkej ipampa yejuin xkipanauiya tlen okijto Pablo, tla nochipa kichiua yejuin san pampa kineki kuajli manoyektlali se tlauejli.b Maka matikilkauakan tlenon kachtopa tiknekij manochiua: tikchiuaskej manochipaua itoka Jehová niman maonia yolseuilistli niman matinemikan san sekan ipan tlanechikojli. Akin tikchiuaj ken Cristo, kuajli techixmatij ika tikpiyaj tlasojtlalistli. Yejuin tlasojtlalistli tlen tikpiyaj “xkitejtemoua on tlen kuajli” san totech, kitejtemoua tlen kuajli intech oksekimej (1 Corintios 13:4, 5; Juan 13:34, 35).