Tejuamej xtikinpiyaj teopixkej akin tikintlaxtlauiliaj matechpaleuikan noso matechyekanakan. Ijkon ken nochiuaya ijkuak nosentlaliayaj inomachtijkauan Cristo, tikinpiyaj tlayekankej akin kuajli kintlajpiyaj iyaxkauan toTajtsin (Hechos 20:28). Yejuin tlakamej akin melak kuajli tekitij chikaujtika intlaneltokil. Techyekanaj niman kitlajpiyaj tlanechikojli ijkon ken Biblia kijtoua: “Ma ka xchiuakan pampa tla yakaj mechchiualtia, yej ikan kuajli nemoyojlo ken Dios kineki. Ma ka xchiuakan pampa nenkinekij nenkitlaniskej tomin, yej san pampa nenkinekij nentekitiskej para Dios” (1 Pedro 5:1-3). ¿Tlenon kichiuaj topampa?

Techtlajpiyaj niman techpaleuiyaj. Tlayekankej kiyekanaj tlanechikojli niman techpaleuiyaj matonisiuikan itech toTajtsin. Pampa kimatstokej ika toTajtsin okinmakak yejuin ueyi tekitl, xtexchiualtiaj matikintlakamatikan, techpaleuiyaj matinemikan kuajli niman ika pakilistli (2 Corintios 1:24). Ijkon ken se tlajpixketl kintlajpiya iborreguitos, tlayekankej melak notekipachouaj kimixmatiskej inseselti nochimej akin nosentlaliaj ipan tlanechikojli (Proverbios 27:23).

Techmachtiaj matikchiuakan tlen kineki toTajtsin. Nochi semanas, tlayekankej kiyekanaj kuajli manopanolti tlanechikojli, tlen techpaleuiya machikaui totlaneltokil (Hechos 15:32). Yejuin tlakamej akin ika nochi inyojlo kitekichiuiliaj toTajtsin noijki tlayekanaj manotenojnotsa, touan tenojnotsaj niman techmachtiaj kenon tikchiuiliskej.

Techyolchikauaj toseselti. Pampa yejuamej kinekij nisiu matinemikan itech Jehová, tinochimej techontlajpalouaj tochan niman touan tlajtouaj kampa tonechikouaj. Techyolchikauaj niman techyolseuiyaj ika iTlajtol toTajtsin (Santiago 5:14, 15, NM).

Maski kipiyaj miyek tekitl ipan tlanechikojli, miyekej tlayekankej noijki tekitij niman kinpiyaj inchanejkauan akin kintlajpiyaj niman kitaj maka itlaj makinpolo. Yejuin tokniuan akin chikauak tekitij melak tikintlakaitaj (1 Tesalonicenses 5:12, 13).

• ¿Tlenon kichiuaj tlayekankej ipan tlanechikojli?

• ¿Kenon tlayekankej techpaleuiyaj toseselti?

Biblia tlajtoua ika ipan tlanechikojli nemij akin tekitij ken “tlayekan[kej] intech ikoneuan Dios, niman [...] tlapaleuijkej” (Filipenses 1:1). Ipan miyek tlanechikoltin tikinpiyaj miyekej tokniuan akin ijkon tekitij. ¿Tlen tekitl kichiuaj akin kinpaleuiyaj tlayekankej niman ijkon techpaleuiyaj?

Kichiuaj tlen tlayekankej kintlajtlaniliaj. Akin kinpaleuiyaj tlayekankej (siervos ministeriales) kitekichiuiliaj toTajtsin chikauak, kichiuaj tlen kintlajtlaniliaj, tlen kintlatkitiaj niman kimatstokej ika kuajli noneki kichiuaskej. Intekiyo melak ueyi kijtosneki, san ika, maski nochipa ijkon kichiuaj, kuajli tlayektlaliaj, kitaj tlen poliui niman ijkon kuajli nochi maonia kampa tonechikouaj. Ijkon, tlayekankej uelij tlamachtiaj niman kinpaleuiyaj tokniuan.

Kichiuaj tekitl tlen ueyi kijtosneki. Sekimej akin kinpaleuiyaj tlayekankej kintlaliaj makinselikan akin yauej ipan tlanechikoltin niman makinextikan kanon noseuiskej. Oksekimej kitaj tlatsotsonajli niman ika nochi kuajli makakisti, texelouiliaj amatlajkuiloltin, kinechikouaj tomin tlen nosentlalia ipan cajas niman kinmakaj kanon tenojnotsaskej akin imiuan nonechikouaj. Tlachipauaj niman tlayektlaliaj ipan Kajli kampa Tosentlaliaj, kinpaleuiyaj tokniuan akin ueuentsitsintin niman kichiuaj ijkon ken tlayekankej kimijliaj. Maski san katlejua tekitl tlen kintlatkitiaj, kichiuaj ika nochi inyojlo niman kinektokej kichiuaskej, ika yejon nochimej melak kintlakaitaj (1 Timoteo 3:13).

Teititiaj kenon noneki yes se akin kitekichiuilia toTajtsin. Yejuin tlapaleuijkej kintlapejpeniaj pampa kiteititiaj ipan innemilis ikualneskayouan toTajtsin. Tlen kipanoltiaj tlayekapan kichikaua totlaneltokil. Pampa nochipa tenojnotsaj itech iTlajtol toTajtsin, techyoleuaj noijki matikchiuakan. Pampa touan kisaj ontenojnotsaj, techpaleuiyaj ika matikchiuakan totekiyo san sekan niman ika pakilistli (Efesios 4:16). Ika tlayekapan, yejuamej noijki uelis nochiuaskej tlayekankej.

• ¿Kenon kimixmatij akin tekipanouaj ken tlapaleuijkej?

• Akin tekipanouaj ken tlapaleuijkej, ¿kenon tlapaleuiyaj ika kuajli nochi maonia niman manochiua ipan tlanechikojli?

Ipan Biblia tlen onoijkuilo ika griego miyekpa kinteneua Bernabé niman Pablo. Yejuin tlakamej kintlajpalojtinemiyaj tlanechikoltin ipan yejon tonaltin. ¿Tlenon kinyolchikauaya ijkon matekipanokan? Pampa kinekiyaj ika nochi inyojlo kinpaleuiskej tokniuan akin noijki kiueyichiuayaj Jehová. Pablo okijto ika melak kinekiya oksejpa komintlajpaloskia tokniuan niman ijkon kimitaskia kenon nemij. Kominyolchikauaya maski melak uejka nonekiya yas (Hechos 15:36). Pampa ijkon kimachiliaj akin kintlajpalojtinemij tlanechikoltin ipan yejuin tonajli, noijki kichiuaj ken Pablo.

Techuajyolchikauaj. Nochimej akin tlayekanaj ipan circuitos kintlajpalouaj kanaj veinte tlanechikoltin niman ipan se tlanechikojli nokauaj se semana. Ipan se xiuitl okpa kontlajpalouaj se tlanechikojli. Yejuin tokniuan imiuan insiuauan, tla kipiyaj imixnamik, uelis melak techpaleuiskej ika intekiyo tlen yejuamej kimatstokej. Kiyejyekouaj kimixmatiskej telpokamej niman noijki akin uejueyimej, niman melak kinekij touan ontenojnotsaskej niman komintlajpaloskej akin tikinmachtijtokej itech Biblia. Yejuin tokniuan iuan tlayekankej ipan tlanechikojli tlajtouaj imiuan sekimej niman ijkon kinyolchikauaj. Noijki techpanoltiliaj kualtsitsintin tlamachtiltin ipan tlanechikoltin niman ipan ueyi tlanechikoltin tlen techpaleuiyaj matiyolchikaujtokan (Hechos 15:35).

Najmanaj topampa. Yejuin tokniuan melak najmanaj ika tlanechikoltin makipiyakan chikauak intlaneltokil. Tlajtouaj imiuan tlayekankej niman tlapaleuijkej, niman ijkon imiuan kitaj tlenon kuajli yonochiuj niman kimijliaj tlenon kinpaleuis ika nochipa kuajli makichiuakan intekiyo. Kinpaleuiyaj precursores kuajli matenojnotsakan niman makiueyilikan intekiyo. Melak pakij ijkuak kimixmatij akin yenkuik peuaj nosentlaliaj touan niman ika yopeuj kiskaltiaj intlaneltokil. Inseselti yejuin tokniuan tekitij niman ijkon nochiuaj ken se “tlapaleuijketl ika tlen kuajli [topampa]” (2 Corintios 8:23, NM). Machikaujto totlaneltokil niman matikueyichiuakan toTajtsin noijki ken yejuamej (Hebreos 13:7).

• ¿Tleka techuajtlajpalouaj ipan tlanechikojli?

• ¿Kenon uelis techpaleuis ijkuak techuajtlajpalos tlayekanketl ipan circuito?

Ijkuak itlaj tlen xkuajli panoua, iteixpantijkauan Jehová nimantsin tikitaj kenon tikinpaleuiskej tokniuan akin inpan panotika tlen teajman. Yejuin tlen tikchiuaj teititia ika yemelak totlasojtlaj (Juan 13:34, 35; 1 Juan 3:17, 18). ¿Kenon tikinpaleuiyaj?

Tiktemakaj ika toyojlo totomintsin. Akin kichiuayaj ken Cristo, chanejkej Antioquía, okititlankej tomin niman ijkon okinpaleuijkej imikniuan akin chantiyaj Judea ijkuak xtlaj okipixkej tlen kikuaskej (Hechos 11:27-30). Noijki ijkon, ijkuak tikimitaj ika tokniuan akin chantij oksekan itlaj kinpoloua, tiktitlanij tlen nosentlalia kampa tonechikouaj niman ijkon tikinpaleuiyaj itech tlen kinpolojtika (2 Corintios 8:13-15).

Tiauej tontlapaleuiyaj. Tlayekankej akin nemij kampa opanok tlen xkuajli kintejtemouaj nochimej akin imiuan nosentlaliaj niman kimatij tla kuajli nemij. Kanaj noneki sekimej tokniuan kitaskej kenon notemakas tlakuajli, atl niman tlakentli, akin tlapaleuiskej niman kanon teseuiskej. Miyekej iteixpantijkauan Jehová akin uelij kichiuaj se tekitl, inselti kitaj kenon yaskej ontlapaleuiskej noso kenon konyektlaliskej inkaluan tokniuan niman kaltin kampa tonechikouaj. Pampa san sekan titekitij niman ika yotomatkej ijkon tikchiuaj, tiuelij nimantsin tiauej kampa noneki matitlapaleuikan. Niman maski tikinpaleuiyaj akin “kineltokaj Jesucristo” ken tejuamej, noijki ijkuak tiuelij tikinpaleuiyaj oksekimej akin kipiyaj okse tlaneltokijli (Gálatas 6:10).

Titeyolseuiyaj ika iTlajtol toTajtsin. Akin itlaj xkuajli ipan panoua kinekij matikinyolchikauakan. Ijkuak ijkon panotika, Jehová kinyolseuiya niman kichiua ika kuajli manomachilikan (2 Corintios 1:3, 4). Ika yejon, akin najmantokej tikimijliaj tlen kijtoua Biblia, ika iyejkotika ijkuak iTekiuajyo toTajtsin kipopolos nochi tlen techyolkokoua niman tlen techtlajyouiltia (Apocalipsis [Revelación] 21:4).

• ¿Tleka isiujkan tontlapaleuiyaj ijkuak panoua tlen teajman?

• ¿Kenon tikinyolseuiyaj akin itlaj tlen xkuajli inpan panoua?

Ijkuak sa achijtsin poliuiya ika mikis, Jesús ichtaka otlajto iuan naui itlatitlankauan: Pedro, Santiago, Juan niman Andrés. Ijkuak yokimijli tlenon panotos ijkuak kinualitstoskia tlaltikpakchanejkej, okinchiuili yejuin ueyi tlajtoltilistli: “¿Akinon on tekitketl [yolmelauak] yejuan nochipa kichiua ken iteko kinauatia niman kipia kuajli itlamachilis? On tekitketl sa no yejua on, yejuan iteko kimaktilia ichanchanekauan niman itekitkauan para kimakas on tlen kikuaskej ijkuak noneki” (Mateo 24:3, 45; Marcos 13:3, 4). Jesús okimijli inomachtijkauan ika pampa yejua tlayekanaskia, kintlapejpeniskia sekimej akin kitemakaskiaj tlaixmatilistli tlen kikixtiskiaj itech Biblia ipan sa itlamiyan tonaltin. ¿Akinomej yejuamej?

Yejuin se grupo achijtsitsintin akin kichiuaj ken Cristo niman tlapejpeniltin. “Tekitketl” kixmatij ken Grupo akin Tlayekana ipan nochi tlanechikoltin. Yejuin grupo kinmaka tlakuajli akin imiuan kiueyichiuaj toTajtsin, nochipa ijkuak kinamiki. Yejuin tekitketl akin yolmelaujkanemi kinmaka akin yemelak kitekichiuiliaj toTajtsin “tlen kimpoloua ijkuak nonekis kiseliskej” (Lucas 12:42).

Yokimaktilijkej ichan toTajtsin (1 Timoteo 3:15). Jesús okimaktili yejuin tekitketl se ueyi tekitl, kiyekanas ikalpan Jehová tlen onka ipan tlaltikpaktli, kijtosneki kitas itech tlemach tlen kinpoloua, kiyekanas tenojnotsalistli niman techmachtis ika tlanechikoltin. Ika yejon, yejuin “tekitketl” techmaka tlen tiknekij ijkuak techonpoloua. Kichiua ika amatlajkuiloltin tlen tikintekitiltiaj kampa titenojnotsaj tlen kikixtia itech iTlajtol toTajtsin, niman ika nochi tlen nopanoltia ipan tlanechikoltin iuan ueyi tlanechikoltin.

“Tekitketl” yolmelauak pampa kichiua nochipa tlen melauak kijtoua Biblia niman kichiua manoteijli tlen kualtsin techijlia toTajtsin, niman kipiya kuajli itlamachilis pampa ika tlamachilistli kitlajpiya nochi tlen Cristo yokitlatkiti ipan tlaltikpaktli (Hechos 10:42). Jehová kiteochiua itekiyo pampa melak yonomiyekilijkej iTeixpantijkauan niman kipiya melak miyek tlen Jehová kimaka (Isaías 60:22; 65:13).

• ¿Akinon Jesús okitlapejpeni makitemaka tlakuajli tlen ualeua itech toTajtsin?

• ¿Tleka yolmelauak niman tlamachilise yejuin “tekitketl”?

Ijkuak onenkej inomachtijkauan Jesús, se grupo achijtsitsintin, akin katkaj “apóstoles niman [...] tlayekankej itech tokniuan [ne Jerusalén]”, yejuamej akin tlayekanayaj, niman ijkon inpampa tlajtouayaj nochimej akin tlapejpeniltin (Hechos 15:2). Ijkuak nonekiya kimatiskej tlenon nochiuas, san sekan kitejtemouayaj tlenon kijtoua iTlajtol Jehová niman ijkon kikauiliayaj makinyekana iespíritu santo toTajtsin (Hechos 15:25). Ipan yejuin tonajli, Grupo akin Tlayekana ipan nochi tlanechikoltin noijki kichiua ken yeuejkaui okichiujkej inomachtijkauan Jesús.

ToTajtsin kintekitiltia makichiuakan tlen yejua kineki. Tokniuan tlapejpeniltin akin tekitij ken Grupo akin Tlayekana ipan nochi tlanechikoltin melak nosentemakaj ipan iTlajtol toTajtsin niman kuajli kimatstokej kenon nochiua totekiyo iuan kenon kiyekanaskej se tlaneltokijli. Nochi semanas nosentlaliaj niman ijkon kitaj tlen kinpoloua tokniuan ipan nochi tlaltikpaktli. Ijkon ken kichiuayaj inomachtijkauan Jesús, kikixtiaj itech Biblia tlen noneki nochiuas niman kiteijliaj ika se amatlajkuilojli noso itech akin kintlajpalojtinemi tlanechikoltin niman itech oksekimej tokniuan. Ijkon, ikalpan toTajtsin kipiya san se tlanemilijli niman san sekan tekitij (Hechos 16:4, 5). Noijki, yejuamej kitemakaj tlakuajli tlen kikixtiaj ipan iTlajtol toTajtsin, techyolchikauaj matitenojnotsakan chikauak itech iTekiuajyo niman kintlaliaj tokniuan akin yeskej ken tlayekankej itech se tekitl.

Kichiuaj tlen kineki iespíritu santo toTajtsin. Grupo akin Tlayekana ipan nochi tlanechikoltin kitejtemoua tlenon kichiuas itech akin melak Ueyixtika, Jehová, niman itech Jesús, Tlayekanketl ipan tlanechikoltin (1 Corintios 11:3; Efesios 5:23). Akin tekitij ipan yejuin grupo xnoueyimatij ipan ikalpan toTajtsin. Ijkon ken oksekimej tlapejpeniltin, “san kanon yau on Borreguito yejuamej ompa iuan yauij” (Apocalipsis [Revelación] 14:4). Yejuin Grupo melak kitlasojkamati makichiuakan teoyotl ipampa.

• ¿Akinomej otekitkej ken Grupo akin oTlayekan ipan nochi tlanechikoltin ijkuak onenkej inomachtijkauan Jesús?

• ¿Kenon Grupo akin Tlayekana ipan nochi tlanechikoltin aman kitejtemoua makiyekana toTajtsin itech tlen kichiuas?

Betel tlen onoijkuilo ika hebreo, kijtosneki “iKal toTajtsin” (Génesis 28:17, 19). Ijkon kinamiki manotokayotikan kaltin tlen iteixpantijkauan Jehová tikinpiyaj ipan nochi tlaltikpaktli niman ompa uajnoyekantok tenojnotsalistli. Grupo akin Tlayekana ipan nochi tlanechikoltin nemi Nueva York (Estados Unidos), niman ompa kitaj kenon tekititokej okseki kaltin Betel ipan miyekej países. Nochimej tokniuan akin tekitij san sekan ipan yejuin kaltin kimixmatij ken familia Betel. Ijkon ken yemelak se familia, tlakuaj, chantij, tekitij niman nomachtiaj Biblia san sekan (Salmo 133:1).

Melak tlakualkan kampa nochimej tekitij ika inyojlo. Ipan nochi kaltin Betel nemij tlakamej niman siuamej akin nosentemakaj itech toTajtsin, kichiuaj tlen yejua kineki niman tlapaleuiyaj itech iTekiuajyo (Mateo 6:33). Nion se xkitlaxtlauiliaj noso kitlani tomin, tlen kema, nochimej kinmakaj kampa chantiskej, tlen kikuaskej niman kinmakaj tlen ika kitlaxtlauaskej tlen kitekitiltiaj. Nochimej kinmakaj intekiyo: sekimej kichijchiuaj tlakuajli noso tlayektlaliaj kampa tlakuaj, oksekimej tekitij kampa kinchijchiuaj amoxtin niman amatlajkuiloltin; niman oksekimej tlachipauaj, tlapakaj, kiyektlaliaj tlen notekitiltia ipan yejuin kajli niman miyek okseki tlemach.

Melak miyek tekitl nochiua kampa nopaleuijtok manotenojnotsa iTekiuajyo toTajtsin. Ipan nochi kaltin Betel, nochipa notejtemoua ika maajsi tlen melauak temachtia Biblia itech melak miyekej tlaltikpakchanejkej kech uelis. Yejuin amatlajkuilojli notekitiltijtika ika ijkon manochiua. Grupo akin Tlayekana ipan nochi tlanechikoltin okiyekan manoijkuilo yejuin amatlajkuilojli, okintitlanili ipan nochi tlaltikpaktli melak miyekej akin tlajtolkuepaj, okimixkopinkej ipan tepostin tlen melak isiujkan tekitij tlen tikinpiyaj ipan seki países niman okontitlankej ipantsin ciento diez mil tlanechikoltin. Itech nochi tekitl tlen nochiua ijkuak ok xkisa tlen notitlanis, akin nemij Betel tlapaleuiyaj ipan yejuin ueyi tekitl tlen melak noneki manochiua: manotenojnotsa kualtsin tlajtoltin tlen techijlia toTajtsin (Marcos 13:10).

• ¿Akinomej tekipanouaj Betel, niman tlenon kinmakaj?

• ¿Ipan tlen ueyi tekitl tlapaleuiyaj manochiua isiujkan nochimej akin nemij Betel?

Nochimej akin nemij ipan Betel kipiyaj tlatlamantik noso sesejneka intekiyo niman ijkon tlapaleuiyaj manotenojnotsa ipan se noso miyek países. Sekimej tlajtolkuepaj, kichijchiuaj noso kinyektlaliaj amatlajkuiloltin, kinchijchiuaj grabaciones tlen nokakij noso noitaj ika video, niman miyek okseki tlemach.

Grupo akin tlayekana ipan se Sucursal kita nochi tekitl tlen ompa nochiua. Grupo akin Tlayekana ipan nochi tlanechikoltin kinmaktilia sekimej tokniuan tekitl tlen nochiua ipan sucursales, kanaj yeyimej noso miyekej akin kuajli tlayekanaj. Grupo akin tlayekana ipan Sucursal kijlia Grupo akin Tlayekana ipan nochi tlanechikoltin tlenon kuajli yonochiuj kampa yejuamej yokintlatkitijkej niman tlen tlauejli uelis peuas. Ijkuak Grupo akin Tlayekana ipan nochi tlanechikoltin kimati nochi yejuin, kipaleuiya makimati itech tlen tlamachtijli tlajtos ipan amatlajkuiloltin, ipan tlanechikoltin niman ipan ueyi tlanechikoltin. Grupo akin Tlayekana ipan nochi tlanechikoltin kintitlani akin tlajtouaj inpampa, makitlajpalotij sucursal niman makimijli akin ompa tlayekanaj tlenon kinpaleuis makichiuakan kuajli intekiyo (Proverbios 11:14). Ijkuak kontlajpaloua sucursal, yejuin akin ualeua kampa kinuajyekantokej nochi tlanechikoltin, nopanoltia se tlanechikojli kampa kitemaka se tlamachtijli tlen kinyolchikaua nochimej kampa sucursal kiyekantika.

Kinpaleuiyaj tlanechikoltin. Ipan sucursal kitaj tla kema nopeualtis se yenkuik tlanechikojli. Kiyekanaj intekiyo precursores, misioneros niman akin tlayekanaj ipan circuitos itech yejon país noso países kampa kiyekantika yejon sucursal. Kitaj kenon nopanoltiskej uejueyimej tlanechikoltin, kiyekanaj ijkuak nochijchiua Kajli Kampa nosentlaliaj iTeixpantijkauan Jehová niman notitlanij amatlajkuiloltin ipan tlanechikoltin. Nochi tlen nochiua ipan se sucursal tlapaleuiya manotenojnotsa kuajli niman ken kinamiki (1 Corintios 14:33, 40).

• ¿Kenon Grupo akin tlayekana ipan se Sucursal kipaleuiya Grupo akin Tlayekana ipan nochi tlanechikoltin?

• ¿Tlen tekitl nochiua ipan se sucursal?

Pampa tiknekij tikteijliskej “temachtilistli yejuan para nochipa kitemaka on temakixtilistli [...] ipan nochi país, nochi raza, ipan nochi pueblo, niman [...] sesetlamantik tlajtoltin”, tikinchijchiuaj amatlajkuiloltin kanaj ipan setecientos cincuenta tlajtoltin (Apocalipsis [Revelación] 14:6). ¿Kenon tikchiuaj yejuin ueyi tekitl? Nemij sekimej tokniuan ipan nochi tlaltikpaktli akin tekitij ken tlajkuilojkej niman tlajtolkuepkej akin nochi ika inyojlo kichiua intekiyo, nochimej iteixpantijkauan Jehová.

Ijkuak peua nochijchiua noijkuiloua ika inglés. Grupo akin Tlayekana ipan nochi tlanechikoltin kita nochi tekitl tlen kichiuaj akin tlajkuilouaj. Yejuin tlajkuilojkej akin nemij Nueva York (Estados Unidos), kiyekanaj tlen noijkuiloua ompa niman ipan okseki sucursales. Pampa akin tlajkuilouaj miyekan kampa ualeuaj, techpaleuiya matitlajtokan itech miyek tlemach tlen onka noso nochiua oksekan. Yejuin kichiua ika nochimej tlaltikpakchanejkej makuelitakan kinpouaskej amatlajkuiloltin.

Tlen yonoijkuiloj kintitlaniliaj akin tlajtolkuepaj. Ijkuak yotlan noijkuilouaj niman kitaj tla kema kisas, kintitlaniliaj ipan Internet akin tlajtolkuepaj ipan nochi tlaltikpaktli. Akin tlajtolkuepaj kitlapejpeniaj tlen tlajtojli kinamiki niman ijkon manasikamati ika intlajtol tlen melauak kijtosneki ika inglés (Eclesiastés 12:10).

Computadoras tlapaleuiyaj isiujkan manochiua tekitl. Se computadora xueli kitekipatla se tlaltikpakchane akin tlajkuiloua nion akin tlajtolkuepa. San ika, kema ueli nochiua isiujkan yejuin tekitl ijkuak tikintekitiltiaj diccionarios, computadoras niman okseki tlemach tlen techpaleuiya matiktejtemokan. Iteixpantijkauan Jehová otikchijchiujkej Sistema Electrónico de Edición Plurilingüe (tlen ika inglés itoka MEPS), ika yejuin ueli notlaliaj ipan computadora tlen yonoijkuilo ipan melak miyek tlajtoltin, nosentlaliaj iuan tlaixkopinaltin niman noyektlalia tlen kisas.

¿Tleka melak tochikauaj tikchiuaj yejuin, maski kemantika onka tlajtoltin tlen kimatij san seki miles? Pampa Jehová kineki ika “nochi tlakatl ma makisa niman ma kimati on tlen melauak” (1 Timoteo 2:3, 4).

• ¿Tlen tekitl nochiua ijkuak noijkuilouaj toamatlajkuiloluan?

• ¿Tleka titlajtolkuepaj ipan melak miyek tlajtoltin?

Nochi xiuitl iteixpantijkauan Jehová tikinchijchiuaj niman tikintemakaj melak miyek biblias niman okseki amatlajkuiloltin tlen xnotlaxtlauaj; tikinchijchiuaj kaltin kampa tosentlaliaj niman sucursales niman tikinyektlaliaj ijkuak noneki; tikinmakaj intomintsin tlen ika nopanoltiaj betelitas niman misioneros, niman tiktitlanij tlemach tlen ika tikinpaleuiyaj akin panouaj tlen xkuajli. ¿Kanon kisa tomin tlen ika notlaxtlaua nochi yejuin?

Xtiktlajtlanij diezmo, tomin nion xonka kech se kitlaxtlauas. Maski miyek tlen notlaxtlaua niman ijkon tikchiuaj totekiyo ika matikteijlikan iTlajtol toTajtsin, xtikintlajtlaniliaj tomin tlaltikpakchanejkej. Yopanok ipantsin cien xiuitl ijkuak se revista Amatl Tekakistilijketl okijto ika titlaneltokaj ika Jehová techpaleuiya. Noijki okijto ika tiiteixpantijkauan Jehová xkeman tikintlajtlaniliskej tlaltikpakchanejkej matechpaleuikan. Niman melauak xkeman titetlajtlaniliaj tomin (Mateo 10:8).

Notlaxtlaua ika tlen sekimej temakaj ika nochi inyojlo. Miyekej tlaltikpakchanejkej kitlasojkaitaj ika titemachtiaj itech Biblia niman techpaleuiyaj matitlatlaxtlauakan ika tomin tlen kitemakaj ika inyojlo. Iteixpantijkauan Jehová titlapaleuiyaj ijkuak tikxelouaj tonajli ika titenojnotsaj, tiktekitiltiaj tochikaualis niman tiktemakaj nochi tlen tikpiyaj ika manochiua tlen kineki toTajtsin ipan nochi tlaltikpaktli (1 Crónicas 29:9). Kampa tosentlaliaj niman ipan uejueyimej totlanechikoluan onka cajas kampa nochimej akin kinekiskej uelis kitlaliskej intomintsin noso ipan jw.org noijki uelis tiktemakas. Miyek tlen nosentlalia ualeua itech akin xkipiyaj miyek tlen ika nopanoltiskej, ijkon ken siuakauajli akin Jesús kuajli otlajto itech pampa okitlali ome tomintsin ijtik caja tlen onkatka ipan teopan (Lucas 21:1-4). San akinon uelis nochipa kixelos itomintsin niman ijkon kitemakas tlen “[ki]kixtia ipan iyojlo” (1 Corintios 16:2; 2 Corintios 9:7).

Kuajli tikneltokaj ika Jehová nochipa kinyolmapeuas akin kinekij kiueyichiuaskej ika tlemach tlen kipiyaj, matlapaleuikan itech iTekiuajyo niman ika manochiua tlen yejua kineki (Proverbios 3:9).

• ¿Kenon tiiteixpantijkauan Jehová xijkon ken oksekimej tlaneltokiltin?

• ¿Kenon notekitiltia tomin tlen nosentlalia?

Kampa tonechikouaj niman tikueyichiuaj toTajtsin tiktokayotiaj Kajli Kampa nosentlaliaj iTeixpantijkauan Jehová. Ompa tomachtiaj itech Biblia niman itech tlen otlajto Jesús ijkuak otenojnots: iTekiuajyo toTajtsin (Lucas 8:1).

Ompa noueyichiua toTajtsin ken yejua kineki. Ipan yejuin kaltin noyekana manotenojnotsa iTekiuajyo toTajtsin (Mateo 24:14). Yejuin kaltin kemantika nochijchiuaj uejueyimej niman kemantika ka, san ika, tikinchijchiuaj ken kinamiki kualtsin matlachiakan; ipan miyek yejon kaltin xsan se tlanechikojli ompa nosentlalia. Itech xiujtin tlen kemach youajpanokej otikinchijchiujkej melak miyekej (kanaj makuijli ipan se tonajli) pampa uajnomiyekilijtiuej tlanechikoltin. ¿Tlenon yotechpaleuij ijkon matikchiuakan? (Mateo 19:26.)

Nochijchiuaj ika tomin tlen nejyeujtok tlen kitemakatokej ika inyojlo. Tomin tlen nosentlalia notitlani ipan sucursal niman ijkon kintlaneujtiaj tlanechikoltin akin kinekij kichijchiuaskej se yenkuik noso kiyektlaliskej tlen kipiyaj.

Miyekan ualeuaj niman tekitij ika inyojlo iuan xkitlanij tomin. Ipan miyek países nemij Grupos akin kinchijchiuaj Kaltin kampa Tosentlaliaj. Yejuin grupos akin tekitij ika nochi inyojlo, yauej ipan se tlanechikojli niman sakin yauej ipan okse tlen onka ipan yejon país, maski kemantika melak uejka, kinpaleuiyaj iteixpantijkauan Jehová akin kichijchiuaj se kajli kampa nosentlaliskej. Ipan okseki países nemij iteixpantijkauan Jehová akin kuajli tlayekanaj ijkuak nochijchiuaj noso noyektlaliaj yejuin kaltin. Maski miyekej kuajli kimatstokej kenon nochijchiua se kajli, kichiuaj ika inyojlo niman xtlaj tomin kitlanij ijkuak ontlapaleuiyaj. San ika, miyekej akin kichijchiuaj yejuin Kajli kampa Tosentlaliaj san no yejuamej akin ompa nonechikoskej. Ika iespíritu santo Jehová niman ika nochi tlen ikalpan kitemaka ika nochi iyojlo, kichiua ika manochijchiuakan yejuin kaltin (Salmo 127:1; Colosenses 3:23, NM).

• ¿Tlenon nochiua ipan Kaltin kampa Tosentlaliaj?

• ¿Kenon ueli tikinchijchiuaj Kaltin kampa Tosentlaliaj ipan nochi tlaltikpaktli?

Ipan nochi Kaltin Kampa nosentlaliaj iTeixpantijkauan Jehová kipiya itokayo toTajtsin. Ika yejon, noneki chipauak niman nochi kuajli maonia. Yejuin se kualtsin tekitl, tlen kiueyichiua toTajtsin kampa tinochimej uelis titlapaleuiskej.

Matitlapaleuikan ika nochi toyojlo titlachipauaskej ijkuak tlami totlanechikol. Ijkuak tlami tlanechikojli, akin ompa tosentlaliaj titlapaleuiyaj ika nochi toyojlo tikchipauaj san tlen noneki; sejpa ipan se metstli titlachipauaj kampa tlaxoxomolko. Se tlayekanketl noso se akin kipaleuiya tlayekanketl kiyekana tekitl, miyekpa nochiua ijkon ken yonoijkuilo ipan se lista: tlachpanaj niman kipajpakaj piso; kinpojpouaj sillas tlen yotlaltejxinkej niman kuajli kinyektlaliaj; kinxapopajpakaj niman kuajli kinchipauaj baños; kinchipauaj ventanas niman teskamej; konxiniaj tlasojli, niman kichipauaj iuan kiyektlaliaj nochi tlen kiyauak onka. Noijki san sejpa ipan se xiuitl, melak kuajli nochipaua nochi. Ijkuak kokonej tikintlaliaj matlapaleuikan niman makichiuakan san tlen ueliskej, tikinmachtiaj makitlasojkaitakan kampa tikueyichiuaj toTajtsin (Eclesiastés 5:1).

Matitlapaleuikan ijkuak noyektlalia Kajli kampa Tosentlaliaj. Nochi xiujtin, noita tlenon poliui kalijtik niman kiyauak, ijkon tikitaj tlenon noneki noyektlalis kuajli maonia niman xnopopolos tomin kampa xnoneki (2 Crónicas 24:13; 34:10). Se Kajli kampa Tosentlaliaj tlen chipauak niman tlen kuajli onka, melak kinamiki ompa matikueyichiuakan toTajtsin. Tla ika toyojlo titlapaleuiyaj titlayektlaliaj, tikteititiaj ika melak tiktlasojkaitaj kampa tosentlaliaj niman ika tiktlasojtlaj Jehová (Salmo 122:1). Niman xsan yejon, noijki kichiua ika kuajli matlanemilikan tlaltikpakchanejkej itech iteixpantijkauan Jehová (2 Corintios 6:3).

• ¿Tleka xkipiya tijkauaskej maijtlakaui kampa tikueyichiuaj toTajtsin?

• ¿Tlen tekitl nochiua niman ijkon tlachipaujtok kampa tosentlaliaj?

¿Tikuelitaskia tikasikamatis miyek itech Biblia? ¿Tiknekiskia kuajli tikasikamatis seki tlajtoltin, noso itech yakaj akin tlajtoua ipan Biblia, noso kenon opanok tlen ompa uajnestiuj? ¿Timotlajtoltia tla iTlajtol toTajtsin uelis mitspaleuis tikyektlalis se tlauejli tlen tikpiya? Tla tiknemilia ika kema, kuajli yes tla tias biblioteca tlen onka kampa tosentlaliaj.

Biblioteca kipiya miyek kampa uelis tiknextis tlen tiknekis tikmatis. Kanaj tejua xtikinpiya nochi amatlajkuiloltin ika motlajtol tlen iteixpantijkauan Jehová yokinchijchiujkej; san ika, ipan biblioteca tlen onka kampa tosentlaliaj uelis tiknextis miyek amatlajkuiloltin tlen kemach yokiskej. Uelis tikinnextis miyek tlatlamantikej noso sesejneka Biblias, se diccionario niman okseki tlen mitspaleuis xnexti tlen tiktejtemoua. Uelis tias ipan yejuin biblioteca ijkuak xpeua noso tla yotlan tlanechikojli. Tla onka se computadora, kanaj kipiya Watchtower Library, tlen kipiya miyek amatlajkuiloltin niman xouijtika noso xtetekiyomaka tiktejtemos tlen tikneki tikmatis, tlajtoltin noso se tlaxelojli pitentsin itech Biblia.

Melak kinpaleuiyaj akin yonoijkuilojkej itech Tlen Tomachtiskej ipan Nemilistli niman Tekitl. Tejua uelis tiktekitiltis biblioteca tlen onka ipan Kajli kampa Tosentlaliaj ijkuak tikyektlalis tlen tikpanoltis. Akin kita ken nopanoltis tlanechikojli Nemilistli niman Tekitl kichiua maonia amatlajkuiloltin tlen kemach yokiskej niman kuajli maoniakan. Yejua noso akin mitsmachtia mitsititis kenon tiknextis tlen tiktejtemoua. San xkilnamiki ika xuelis tikinkixtis yejuin amoxtin itech biblioteca; noijki, noneki tikinmaluis niman maka itlaj xkijkuilo ompa.

Biblia kijtoua ika tla tikneki “tiknextis itlaixmatilis toTajtsin” kipiya ika tiktejtemoskej kentla itlaj tlen patioj (Proverbios 2:1-5). Itech biblioteca tlen onka kampa tosentlaliaj ompa melak kuajli yes tipeuaskej tiktejtemoskej.

• ¿Tlenon kipiya biblioteca tlen onka kampa tosentlaliaj, tlen techpaleuis matiknextikan tlen tiknekij?

• ¿Akinon uelis mitspaleuis kuajli xtekitilti yejuin biblioteca?

Jesucristo okimijli inomachtijkauan: “Xchiuakan para nemotlauil ma tlauilo imixpan on tlakamej para ijki kitaskej on tlen kuajli nenkichiuaskej, niman yejua ika kueyiliskej nemoTajtsin yejuan nemi ne iluikak” (Mateo 5:16). Ika yejon tiktekitiltiaj miyek tlemach tlen aman kistika, ken Internet. Itech jw.org notemachiltia tlenon kineltokaj niman tlenon kichiuaj iteixpantijkauan Jehová. ¿Tlenon tiknextis ompa?

Nonankiliaj tlajtoltilistin ika Biblia. Ompa tiknextis kenon nonankiliaj seki tlajtoltilistin tlen notlajtoltiaj tlaltikpakchanejkej. Se neskayotl, amatlajkuiloltin pitentsitsintin ¿Yejkos tonajli ijkuak xok titlajyouiskej? niman ¿Uelis yoliuiskej akin yomijkej? tlen uelis tikinnextis ipan Internet ipantsin seiscientos tlajtoltin. Noijki tiknextis Traducción del Nuevo Mundo ipantsin ciento treinta tlajtoltin; miyek tlen notekitiltia ika timomachtis Biblia, kentla amoxtli ¿Tlenon melauak temachtia Biblia?, niman yenkuikej revistas Amatl Tekakistilijketl niman ¡Despertad! Miyek itech yejuin amatlajkuiloltin uelis tikinpouas noso tikinkakis itech yejon página ipan Internet, noso uelis tikintemoltis kentla MP3, PDF noso EPUB. Noijki, tla tikneki, uelis tijkixtis seki páginas itech se amatlajkuilojli tlen onka ika motlajtol niman ijkon makita yakaj akin kineki kikakis kualtsin tlajtoltin itech Tekiuajyotl. Onka miyek videos ika señas, niman uelis tiktemoltis grabación tlen kisa itech Biblia tlen yonotlalili tlen kakisti niman seki tlajtoltin, tlamauisoltin tlen kisaj itech Biblia niman kualtsin tlatsotsonajli tlen uelis tijkakis.

Noteijlia tlen melauak itech iteixpantijkauan Jehová. Ipan yejon página noijki kipiya tlen panotika niman videos kampa nesi tlen tikchiujtokej nochiuiyan, tlen inpan panotok iteixpantijkauan Jehová niman kenon tikinpaleuiyaj oksekimej. Noijki, noteijlia kemanon niman kanon nopanoltis se ueyi tlanechikojli niman kenon ontenotsaskej ipan se sucursal.

Ika yejuin ueli nochiua makimatikan tlen melauak maski kampa melak uejka niman ijkon manopaleuikan nochimej tlaltikpakchanejkej, hasta kampa melak seua, itoka Antártida. Tiktlajtlanij ipan teoyotl ika “iTlajtol Jehová manomoyaua isiujkan” ipan nochi tlaltikpaktli niman ijkon manoueyichiua toTajtsin (2 Tesalonicenses 3:1, NM).

• ¿Kenon tepaleuiya página ipan Internet jw.org ika miyekej tlaltikpakchanejkej makimatikan tlen melauak itech Biblia?

• ¿Tikuelitaskia itlaj tiktejtemos itech yejon página ipan Internet?