Miyekej xok yauej ontlakakij kampa tlaneltokaj pampa xkinmachtiaj tlen kinekij kimatiskej nion xkiseliaj yolseuilistli. Kuakon, ¿tleka tikuelitas tias ipan totlanechikoluan? ¿Tlenon tiknextis ompa?

Techyolpaktia tonechikoskej imiuan akin tetlasojtlaj. Inomachtijkauan Cristo, onosentlalijkej ken tlanechikojli kampa kiueyichiuayaj toTajtsin, nomachtiayaj iTlajtol niman san sekan noyolchikauayaj (Hebreos 10:24, 25). Ijkuak nosentlaliayaj imiuan akin notlasojtlaj niman kiueyichiuayaj toTajtsin, melak kuajli nouikayaj ken ikniujtin (2 Tesalonicenses 1:3; 3 Juan 14). Tejuamej noijki tosentlaliaj niman tikmachiliaj pakilistli ken yejuamej.

Techpaleuiya matikchiuakan tlen uajlauj ipan Biblia. Biblia kijtoua ika tlakamej, siuamej niman kokonej nosentlaliayaj san sekan. Aman noijki tosentlaliaj niman ijkon tikinkakij tlamachtijkej akin melak kuajli techmelajkaijliaj Biblia. Techasikamachiltiaj tlenon tikchiuaskej ipan tonemilis (Deuteronomio 31:12; Nehemías 8:8). Tinochimej uelis titlanankiliskej ijkuak tikitaj se tlamachtijli kampa techtlajtoltiaj niman noijki uelis tikueyichiuaskej toTajtsin ika tlakuikaltin. Ijkon tikteititiaj totlaneltokil itech tlen tikchiaj (Hebreos 10:23).

Techpaleuiya matikchikauakan totlaneltokil itech toTajtsin. Pablo okontlajkuilouili se tlanechikojli: “Sanoyej nikneki nemechitas para [...] ma titoyoleuakan se iuan okse  ika on tlaneltoktli yejuan tikpiaj” (Romanos 1:11, 12). Ijkuak tikimitaj tokniuan ipan tlanechikojli, chikaui totlaneltokil niman techyolmapeua matikchiuakan mojmostla ijkon ken kijtoua Biblia.

¿Xtikuelitaskia tias ijkuak tonechikoskej niman ijkon tikonitas tla yemelak? Melak techyolpaktis timitsseliskej. Xtlaj notlaxtlaua niman xnotlajtlani tomin.

• Ijkon ken kachtopa inomachtijkauan Cristo, ¿kenon noijki tikchiuaj ijkuak tosentlaliaj?

• ¿Kenon mitspaleuis tla tias ipan tlanechikojli?

Maski makiyaui, melak tona, noso noneki tinejnemiskej melak uejka, iteixpantijkauan Jehová xkeman itlaj techteltia matonechikokan. Maski tlemach tlen xkuajli tikixnamikij ipan tonemilis niman melak tisiauij ijkuak tikisaj kampa titekitij, ¿tleka xtlaj techteltia matosentlalikan iuan tokniuan?

Techpaleuiya kuajli matinemikan. Ijkuak Pablo otlajto ika noneki matiakan ipan tlanechikojli, yejua okijto: “Ma tiknemilikan ken [...] uelis tikinyoleuaskej oksekimej” (Hebreos 10:24). Ika yejuin tlajtoltin Pablo kijtotoya ika noneki matoixmatikan, matiknemilikan kenon tikinpaleuiskej oksekimej. Ijkuak tikimixmatij akin imiuan tosentlaliaj, tikmatij kenon okixnamijkej tlen topan nochiujtika niman tlen uelis techpaleuis kuajli matikisatij.

Techpaleuiya nochipa melak kuajli matouikakan. Kampa tonechikouaj, kualtsin touikaj akin imiuan ompa tosentlaliaj. Kemantika san sekan tipakij, titlakuaj, tauiltiaj noso tonpaxialouaj. ¿Kenon techpaleuiya ika ijkon matosentlalikan? Kichiuaj ika matotlasojkaitakan niman noijki kichikaua totlasojtlalis imiuan akin tonechikouaj. Niman ijkuak se ipan panoua tlen xkuajli, nimantsin tiauej tikonpaleuiyaj pampa yemelak kualtsin iuan touikaj (Proverbios 17:17). Ijkon tikteititiaj ika tikintlasojtlaj nochimej akin imiuan tosentlaliaj (1 Corintios 12:25, 26).

Xkintlapejpeni timouikas imiuan akin kichiujtokej tlen kineki toTajtsin. Tikinnextis itech iteixpantijkauan Jehová. Timitstlajtlaniliaj ika maka itlaj mamitstelti xmosentlali touan.

• ¿Tleka techpaleuis matosentlalikan imiuan tokniuan?

• ¿Kemanon tikuelitaskia tias kampa tonechikouaj?

Ijkuak nosentlaliayaj inomachtijkauan Cristo, nokuikatiayaj, kichiuayaj teoyotl, kipouayaj niman nomachtiayaj tlen kijtoua iTlajtol toTajtsin (1 Corintios 14:26). Kampa tonechikouaj tikitas ika noijki ijkon tikchiuaj.

Tikimitaj tlamachtiltin tepaleuijkej tlen nokixtiaj ipan Biblia. Nochipa itlamiyan semanas, ipan nochi tlanechikoltin tosentlaliaj niman ijkon technojnotsaj tlen kisa itech Biblia, uejkaui treinta minutos. Ompa tikitaj kenon tlen kijtoua Biblia techpaleuiya ipan tonemilis niman tikasikamatij ipan tlen tonaltin tinentokej. Tinochimej akin ompa titlakaktokej techijliaj matikitakan ipan Biblia tlen techpouiliaj. Sakin, tomachtiaj Tlamachtijli itech Amatl Tekakistilijketl, uejkaui se hora, techyolchikauaj matitlanankilikan ipan tlamachtijli tlen tikitaj ipan revista Amatl Tekakistilijketl tlen nomachtilo. Yejuin techititia kenon tikchiuaskej ipan tonemilis tlen techijlia Biblia. Ipan nochi tlaltikpaktli, kanaj ipantsin ciento diez mil kampa tosentlaliaj tomachtiaj san se tlamachtijli nochiuiyan.

Techpaleuiya kuajli matitlamachtikan. Noijki tosentlaliaj se teotlak ipan semana niman yexkan noxeloua tlen nopanoltia ipan tlanechikojli tlen itoka Nemilistli niman Tekitl ken Cristo, tlen nokixtia itech amatl Nemilistli niman Tekitl tlen Tomachtiskej tlen tikseliaj sejse metstli. Tlen nopanoltia kachtopa itoka Tlen tepaleui itech iTlajtol toTajtsin, techpaleuiya matikasikamatikan tlen yotikpoujkej ipan Biblia. Sakin, itech Xmomachti melak kuajli xtenojnotsa noteititia kenon tikinnojnotsas oksekimej itech Biblia. Se tlajtolpaleuijketl kimijlia tlenon kinpaleuis amapouaskej niman kuajli tlajtoskej ijkuak tlamachtiaj (1 Timoteo 4:13). Tlen san ika ontlami, Matinemikan ken Cristo, techpaleuiya mojmostla ipan tonemilis matiktlakamatikan tlajtolyekanalistin itech Biblia. Noijki kuajkui tlajtoltilistin niman tlanankilistin tlen techpaleuiyaj kuajli matikasikamatikan Biblia.

Ijkuak tias ipan totlanechikoluan, tikmatstokej ika mitsmojkatlachialtis kenon melak kualtsin notemaka yejuin tlamachtijli ipan Biblia (Isaías 54:13).

• ¿Tlenon tikitas ika noijki nochiua ijkuak tias ipan intlanechikol iteixpantijkauan Jehová?

• ¿Ipan katlejua tlanechikojli tlen nopanoltia ipan nochi semanas tikuelitaskia peuas tias?

¿Yotikitak ipan yejuin amatlajkuilojli tlaixkopinaltin kampa nesij iteixpantijkauan Jehová kenon totlakentiaj ijkuak tiauej ipan totlanechikoluan? ¿Tleka kuajli totlakentiaj niman tokualnextiaj?

Pampa tiktlakaitaj toTajtsin. Tikmatstokej ika toTajtsin xsan kita ken tinesij (1 Samuel 16:7). San ika, ijkuak tosentlaliaj niman tikueyichiuaj toTajtsin tiknekij tikteititiskej ika tiktlakaitaj yejua niman tokniuan akin imiuan tosentlaliaj. Tla tiaskiaj ixpan se tekiuaj, tiknekiskiaj kuajli totlakentiskiaj pampa ijkon kinamiki tiaskej ixpan se akin ueyixtika. Noijki ijkon, ken totlakentiaj ijkuak tiauej ipan totlanechikoluan tikteititiaj ika tiktlakaitaj Jehová, toueyiTekiuaj akin nemi nochipa niman tiktlasojkaitaj kampa tikueyichiuaj (1 Timoteo 1:17).

Ijkon nesi ika tikchiuaj tlen Jehová kuelita. Biblia kimijlia ika akin kichiuaj ken Cristo “manotlakentikan kuajli ken noneki” (1 Timoteo 2:9, 10). Timotlakentis “kuajli ken noneki” kijtosneki xtiktlalis motlaken tlen makichiua mamitsileuikan. Yejuin tlen uajlauj ipan Biblia, techpaleuiya matiktlapejpenikan totlaken tlen kualtsin manesi, san ika, noijki techkauilia matiktlapejpenikan tlen tlakentli tiktlaliskej. Tla kualtsin totlakentiaj ken kinamiki, Biblia kijtoua ika uelis “kimatiskej impampa on tlamachtilistli ika Dios toTemakixtijkau yejua sanoyej kuajli” niman tikueyichiuaskej toTajtsin (Tito 2:10; 1 Pedro 2:12). Ken totlakentiskej ijkuak tiaskej kampa tonechikouaj, kichiuas ika tlaltikpakchanejkej ijkon matlanemilikan itech iteixpantijkauan Jehová.

Tiktlaliskej tlen matechkualnexti niman tiaskej tichipaujkej xkijtosneki tikpiyaskej totlaken tlen melak patioj. Ika yejon, maka mamitstelti tias ipan tlanechikojli tla xtikpiya motlaken tlen patioj.

• ¿Tleka melak noneki matotlakentikan ken kinamiki ijkuak tiauej kampa tikueyichiuaj toTajtsin?

• ¿Kenon tlen uajlauj ipan Biblia techpaleuiya matotlakentikan ken kinamiki?

Tla timomachtijtika Biblia iuan se iteixpantijkauj Jehová, kanaj tikyejyekoua timomachtis kachtopa tlen tikitas. Noijki noneki tikchiuas ijkuak tias tlanechikojli pampa ijkon melak tikasikamatis. Melak mitspaleuis tla tiktlalia se tonajli ijkuak timomachtis.

Xnemili kemanon niman kanon timomachtis. ¿Kemanon xtlaj mitstsakuilis ijkuak timomachtis? ¿Ika kualkan ijkuak ok xtipeua titekiti noso ika tlayoua ijkuak yokochkej kokonej? Maski ijkuak xtiuelis miyek timomachtis, xnemili kech uelis tiuejkauis niman xyejyeko maka itlaj mamitstelti. Xkita kampa xtlaj mitskuapajsolos niman xkejkuani nochi tlemach tlen mitstsakuilis xmomachti, xseui radio, televisión niman teléfono. Tikchiuas teoyotl ijkuak tipeuas timomachtis mitspaleuis xpopolo tlen mitstekipachoua niman uelis kuajli titlanemilis itech iTlajtol toTajtsin (Filipenses 4:6, 7).

Xkintlapalyoti san seki tlajtoltin niman xnemili kenon titlanankilis. Xnemili itech tlenon tlajtoua ipan nochi tlamachtijli. Xkita kenon itoka tlamachtijli, xkimita kenon subtítulos kipaleuiyaj itech tlen tlajtoua yejon tlamachtijli, xkimita tlaixkopinaltin niman xkita tlen techtlajtoltiskej ijkuak ontlamis. Sakin, xpoua sesentetl párrafos niman xnexti kenon kinankilia tlajtoltilistli. Xtejtemo niman xkinpoua textos tlen ompa uajlauej niman xnemili kenon kipaleuiyaj yejon tlamachtijli (Hechos 17:11). Ijkuak tiknextis tlen kinankilia se tlajtoltilistli xtlapalyoti san seki tlajtoltin tlen mitspaleuiskej xkilnamiki. Ijkon ipan tlanechikojli uelis tikajkokuis moma tla tikneki, niman san ika achijtsin tlajtoltin iuan ika motlajtoluan uelis titlanankilis.

Tla timomachtia miyek tlemach tlen nopanoltia ipan tlanechikoltin nochi semanas, uelis tikasikamatis miyek okseki itech Biblia (Mateo 13:51, 52).

• ¿Kenon mitspaleuis tla tiktlalia se tonajli ijkuak timomachtis?

• ¿Kenon uelis kuajli timomachtis niman ijkon titlanankilis ipan tlanechikojli?

Ijkon ken yeuejkaui, Jehová kineki ika nochimej familias manosentlalikan niman ijkon makichikauakan intlaneltokil niman kualtsin machantikan (Deuteronomio 6:6, 7). Ika yejon, iteixpantijkauan Jehová tikxelouaj ipan se tonajli nochi semanas tikueyichiuaj toTajtsin iuan tochanejkauan. San sekan ika toyojlo niman ika paktli tomachtiaj tlen toTajtsin techijlia ipan iTlajtol niman ijkon tikitaj tlen noneki matikchiuakan iuan tochanejkauan. Noijki akin chantij inselti kiueyichiuaj toTajtsin ijkuak kitejtemouaj ipan Biblia tlen kitlapejpeniaj kasikamatiskej.

Kichiua ika kuajli matonisiuikan itech Jehová. “Xnisiuikan Dios niman yejua mechnisiuis.” (Santiago 4:8.) Kuajli tikixmatij Jehová ijkuak tomachtiaj ipan iTlajtol kenon yejua niman itech tlen kichiua. Uelis peuas timomachtis iuan mochanejkauan ijkuak tikchiuas makakisti tlen tikpoujtok ipan Biblia, kanaj tiknekis tikpouas tlen noita nochi semanas itech Tlen Tomachtiskej ipan Nemilistli niman Tekitl. Nochimej mochanejkauan uelis kipouaskej san achijtsin, sakin makijtokan ken kinpaleuis Biblia.

Kichiua ika san sekan matinemikan imiuan tochanejkauan. Teueuentsitsinuan niman tesiuatsitsinuan, ijkon ken tajtin niman tekoneuan, kuajli nouikaj ijkuak san sekan nomachtiaj Biblia ken familia. Noneki makipanoltikan ika paktli, yolseuilistli niman nochimej melak makuelitakan ompa nemiskej. Maski tla ok kokonej noso yonoskaltijkej inkoneuan, tajtin kipiyaj ika kitlapejpeniskej tlenon kinpaleuis nomachtiskej ipan Amatl Tekakistilijketl niman ¡Despertad! noso ipan jw.org. Kemantika kanaj nonekis kitaskej tlenon kinpaleuis inkoneuan ijkuak kixnamikij tlauejli ipan kaltlamachtijli niman kenon kiyektlaliskej. ¿Tleka xnenkitaj tlen yonotlali ipan JW Broadcasting (tv.jw.org) niman sakin san sekan xkijtokan tlenon omechmachti? Noijki uelis nomachtiskej tlakuikaltin tlen kiueyichiuaj toTajtsin ipan tlanechikojli niman sakin pakiskej tlakuaskej san sekan.

Kech tikxelouaj ijkuak tikueyichiuaj Jehová nochi semanas san sekan, kinpaleuiya ika tochanejkauan makuelitakan nomachtiskej Biblia, niman toTajtsin melak ueyi techteochiuas (Salmo 1:1-3).

• ¿Tleka tikxelouaj tonajli ijkuak tikueyichiuaj toTajtsin iuan tochanejkauan?

• ¿Tlenon uelis tajtin kinpaleuis ika nochimej inchanejkauan makuelitakan kiueyichiuaskej toTajtsin?

¿Tikimita kenon melak pakij? Yejuamej nentokej ipan se ueyi tlanechikojli tlen tikpiyaj. Ijkon ken itekipanojkauan toTajtsin akin yeuejkaui onenkej, okinnauati yexpa manosentlalikan ipan se xiuitl, tejuamej melak techyolpaktia ijkuak timiyekej tosentlaliaj (Deuteronomio 16:16). Nochi xiuitl, tikpiyaj yeyi uejueyimej tlanechikoltin: okpa tikpiyaj ueyi tlanechikojli se tonajli niman sejpa ueyi tlanechikojli yeyi tonajli.

Techpaleuiyaj san sekan matouikakan ken ikniujtin. Israelitas melak kinyolpaktiaya ijkuak kiueyichiuayaj Jehová “ipan ueyi tlanechikojli”, niman tejuamej noijki melak techyolpaktia san sekan tikueyichiuaj Jehová ijkuak tikinpiyaj yejuin kualtsitsintin tlanechikoltin (Salmo 26:12; 111:1). Ipan yejuin tlanechikoltin kichiua matosentlalikan imiuan iteixpantijkauan Jehová akin oksekan ualeuaj niman kemantika tosentlaliaj imiuan akin ualeuaj itech okse país. Ijkuak ajsi tlajkotonajli, inpan toueyitlanechikoluan, san sekan titlakuaj niman ijkon tikimixmatij oksekimej tokniuan niman toyolchikauaj matikueyichiuakan Jehová (Hechos 2:42). Ompa tikmachiliaj kenon tlasojtlalistli kichiua ika san sekan matinemikan imiuan “nochimej tokniuan” ipan nochi tlaltikpaktli (1 Pedro 2:17).

Techyolchikauaj matiktekichiuilikan toTajtsin ika nochi toyojlo. Israelitas kinpaleuiaya ijkuak “[kasikamatiyaj] tlajtoltin” ipan iTlajtol toTajtsin tlen kinmachtiayaj (Nehemías 8:8, 12). Tejuamej noijki melak tiktlasojkaitaj tlamachtijli tlen kisa ipan Biblia niman techkakistiliaj ipan uejueyimej tlanechikoltin. Nochi tlemach tlen nopanoltia nokixtia ipan Biblia. Itech tlen techtomiliaj niman tlen techpanoltiliaj tlayekapan techmachtia kenon tikchiuaskej tlen kineki toTajtsin. Noijki, techyolchikaua tijkakiskej kenon kuajli okisatoj oksekimej maski opanokej tlemach tlen xkuajli. Yejon techititia kenon noneki tikistinemiskej tla tiknekij tikchiuaskej ken Cristo ipan yejuin tonajli maski tikixnamikij tlen xkuajli. Ipan ueyi tlanechikojli yeyi tonajli nopanoltiaj tlamauisoltin, kampa notlakentiaj ken yeuejkaui, niman ijkon tikasikamatij tlenon kijtoua Biblia opanok niman tikseliaj ueyi tlamachtijli. Ipan ueyi totlanechikoluan noapolaktiaj akin kinekij ika inyojlo nosentemakaskej itech toTajtsin.

• ¿Tleka ipan uejueyimej tlanechikoltin melak tiyolpakij?

• ¿Kenon mitspaleuis ijkuak tias ipan se toueyitlanechikol?

Ijkuak sa achijtsin poliuiya ika mikis Jesús, okijto: “In kuajli tlajtojli [...] noteijlis nochiuiyan ipan in tlaltikpaktli para nochimej países ma kixmatikan on tlen melauak” (Mateo 24:14). San ika, ¿kenon noteijliskia ipan nochi tlaltikpaktli? Nochiuaskia ijkon ken Jesús otenojnots ijkuak onen ipan tlaltikpaktli (Lucas 8:1).

Tiauej tontetlajpalouaj techajchan. Jesús okinmachti inomachtijkauan mateijlikan tlen kualtsin techijlia toTajtsin techajchan (Mateo 10:11-13; Hechos 5:42; 20:20). Akin kachtopa opeujkej tenojnotsaj kuajli okimijlikej kanon tenojnotsaskiaj (Mateo 10:5, 6; 2 Corintios 10:13). Noijki ijkon, ipan yejuin tonajli tikmatstokej kanon kipiya ika titenojnotsaskej, niman nochi tlanechikoltin kinmakaj kanon niman kech ueyi kampa tenojnotsaskej. Ijkon uelis tikchiuaskej tlen Jesús otlanauati ika matikinnojnotsakan nochimej tlaltikpakchanejkej niman “ma tikteixpantilikan” ipan nochi tlaltikpaktli (Hechos 10:42).

Tiauej nochiuiyan kampa nemij tlaltikpakchanejkej. Jesús otechititi ijkon matikchiuakan ijkuak otenojnots nochiuiyan kampa nemilo, ken ipan pozo kampa konkuij atl noso itenko mar (Marcos 4:1; Juan 4:5-15). Noijki titenojnotsaj itech iTlajtol toTajtsin nochiuiyan kampa tiuelij: ipan ojtli, kampa tlanemakalo, kampa onpaxalolo noso tontenotsaj ipan teléfono. Noijki ijkuak ueli, tikinnojnotsaj itech tlen tikneltokaj akin chantij nisiu kampa tichantij, akin imiuan titekitij, akin imiuan tiauej ipan kaltlamachtijli niman akin ken tikimitaj. Nochi yejon yokichiuj ika melak miyekej tlaltikpakchanejkej makikakikan “kuajli tlajtojli yejuan kitemaka temakixtilistli” (Romanos 1:16).

¿Tiknemilia itech yakaj akin tikuelitaskia tiknojnotsas itech iTekiuajyo toTajtsin niman itech kenon uelis kipaleuis ipan inemilis? Maka san tejua xmatsto yejuin kualtsin tlajtojli. Nochipa ijkuak tiuelis xteijli nimantsin.

• ¿Tlen “kuajli tlajtojli” noneki tikteijliskej?

• ¿Kenon iteixpantijkauan Jehová titenojnotsaj ken Jesús okichiuj?

Tlajtojli precursor uelis noijtos itech akin kachtopa peua niman noijki kijtosneki se akin kachtopa kitlapoua yenkuik ojtli, ijkon akin kuajtokaj uelis kalakiskej. Uelis tikijtoskej ika Jesús onochiuj precursor pampa okuajtitlankej ipan tlaltikpaktli niman ijkon otenojnotsako niman okitlapoko se ojtli tlen techmakixtis (Mateo 20:28). Aman, noijki tikchiuaj ken yejua niman nochipa kech tiuelij tikinmachtiaj oksekimej makichiuakan ken Cristo (Mateo 28:19, 20). Sekimej yopeujkej kitekipanouaj toTajtsin ken precursores.

Se precursor tenojnotsa nochipa. Nochimej iteixpantijkauan Jehová titenojnotsaj tlen kualtsin techijlia toTajtsin. San ika, nemij akin yokitakej kenon uelis tekitiskej ken precursores regulares niman ipan nochi metstli tenojnotsaj setenta horas. Miyekej, san keski tonajli tekitij kampa kitlanij tlen ika nopanoltiskej. Oksekimej kintlapejpeniaj matekitikan ken precursores especiales niman kintitlanij kampa noneki akinomej tlapaleuiskej tenojnotsaskej; tenojnotsaj ciento treinta horas noso ipantsin ipan nochi metstli. Precursores kineltokaj ika Jehová kinmakas nochi tlen kinpoloua, ika yejon, san kipiyaj tlen noneki (Mateo 6:31-33; 1 Timoteo 6:6-8). Akin xuelij nochiuaj precursores regulares noso especiales, uelis tekitiskej ken precursores auxiliares, akin tenojnotsaj treinta noso cincuenta horas ipan se metstli.

Se precursor tenojnotsa pampa kitlasojtla toTajtsin niman tlaltikpakchanejkej. Ijkon ken Jesús, tajmanaj inpampa akin melak kinekij kixmatiskej itech toTajtsin niman tlen kichiuas (Marcos 6:34). San ika, tejuamej uelis tikinmachtiskej tlen melak kinpaleuis niman ijkon kichiaskej tlen yemelak kualtsin panos. Pampa se precursor kintlasojtla tlaltikpakchanejkej, kixeloua seki tonaltin niman kinpaleuiya oksekimej makixmatikan toTajtsin (Mateo 22:39; 1 Tesalonicenses 2:8). Yejuin, kichikaua itlaneltokil niman kualtsin nouika iuan toTajtsin, tlen kichiua manemi ika ueyi pakilistli (Hechos 20:35).

• ¿Tlenon kichiua se precursor?

• ¿Tlenon kinyolchikaua sekimej matenojnotsakan nochipa?

Iteixpantijkauan Jehová kimixmatij ika nochipa nomachtiaj Biblia. Akin tenojnotsaj nochipa itech iTekiuajyo toTajtsin, kiseliaj ueyi tlamachtijli niman ijkon kuajli kichiuaj intekiyo (2 Timoteo 4:5).

Tlamachtijli tlen kiselia se Precursor. Ijkuak yakaj kaxiltia se xiuitl ika tenojnotsa ken precursor regular, kijkuilouaj makiseli tlamachtijli tlen uejkaui chikuasen tonajli niman nochiua ipan se Kajli kampa Tosentlaliaj tlen nisiu nokaua. Yejuin tlamachtijli kinpaleuiya precursores manonisiuikan itech Jehová, kuajli makichiuakan nochi intekiyo niman maka makikauakan.

Tlamachtijli tlen kiseliaj akin tenojnotsaj itech iTekiuajyo toTajtsin. Yejuin tlamachtijli kiseliaj siuamej niman tlakamej akin yononamiktijkej noso inselti niman kipiyaj 23-65 xiuitl. Uejkaui ome metstli. Uelis yaskej akin youejkaujkej tenojnotsaj niman kinektokej kikaujteuaskej inchan niman ontlajtolmoyauaskej kampa xmiyekej nemij akin tenojnotsaj itech iTekiuajyo toTajtsin. Yejuamej kijtouaj: “¡Nikan ninemi! Nejua xnechtitlani”, niman kiyejyekouaj kichiuaskej ken Jesucristo akin chikauak otenojnots ijkuak onen ipan tlaltikpaktli (Isaías 6:8; Juan 7:29). Ijkuak tikaujteuas mochan, kanaj nonekis tikpatlas monemilis niman timopanoltis san ika achijtsin. Kemantika okse tlakuajli tijkuas, kanaj melak tona noso seua niman xijkon tichantis ken kampa tiualeua. Kemantika nonekis tiuelis okse tlajtojli. Yejuin tlamachtijli kinpaleuis makipiyakan kualneskayomej tlen nonekiskej kampa kintitlaniskej, niman ijkon nokauiliskej ika Jehová iuan ikalpan makintekitilti.

Galaad-Tlamachtijli itech Biblia tlen kiyekana Watchtower. Ika Hebreo, “Galaad” kijtosneki “temej nepanijtokej noso tepetitokej tlen teixpantiliaj”. Ipan 1943 ijkuak opeuj yejuin tlamachtijli, ipantsin 8,000 misioneros akin okinmachtijkej ipan Galaad yokintitlankej matenojnotsatij ipan “nochiuiyan [...] tlaltikpaktli” niman melak kuajli tekitl yokichiujkej (Hechos 13:47). Matikteneuakan ome. Ijkuak oajsikej Perú, misioneros akin kachtopa okintitlankej, xonkatka nion se tlanechikojli; aman onka ipantsin 1,000 tlanechikoltin; ijkuak oajsikej Japón, nemiyaj kanaj 10 iteixpantijkauan Jehová; aman nemij ipantsin 200,000. Uejkaui makuijli metstli. Kuajli nomachtiaj iTlajtol toTajtsin niman kasikamatij kenon tlapaleuiskej kuajli manotenojnotsa nochiuiyan. Uelis yaskej akin tekipanojtokej ken precursores especiales, misioneros akin ok xkiseliaj yejuin tlamachtijli, akin tekitij ipan sucursal noso akin tlayekanaj ipan circuitos.

• ¿Kenon tepaleuiya Tlamachtijli tlen kiseliaj Precursores?

• ¿Akinomej uelis kiseliskej Tlamachtijli tlen kiseliaj akin tenojnotsaj itech iTekiuajyo toTajtsin?