• ¿Tlenon kijtosneki “iTekiuajyo toTajtsin”?
    ¡Nochipa uelis tiyolpakis! Xkita tlen Biblia temachtia
    • Tlamachtijli 31. Jesucristo yeuatika ken tekiuaj ixpan Jehová.

      TLAMACHTIJLI 31

      ¿Tlenon kijtosneki “iTekiuajyo toTajtsin”?

      Ipan nochi Biblia melak noteneua iTekiuajyo toTajtsin. Ika yejuin Tekiuajyotl, Jehová kichiuas ika ipan yejuin tlaltikpaktli matlakualtsintia niman ijkon matinemikan ken yejua kinekiya. ¿Tlenon yejon Tekiuajyotl? ¿Kenijki tikmatij ika yopeuj tlayekana? ¿Tlenon kichiujtika yejuin Tekiuajyotl ipan yejuin tonaltin? ¿Niman tlenon kichiuas ika tlayekapan? Ipan yejuin tlamachtijli niman ipan tlamachtiltin 32 niman 33, tiknankiliskej nochi yejuin.

      1. ¿Tlenon kijtosneki “iTekiuajyo toTajtsin”, niman akinon kiyekana?

      ITekiuajyo toTajtsin se gobierno tlen Jehová yokitlali. Jesús yejua akin kiyekana yejuin Tekiuajyotl niman uajtlayekantika desde iluikak (Mateo 4:​17; Juan 18:​36). Biblia kijtoua: “[Jesús] tlamandaros para nochipa” (Lucas 1:​32, 33). Ajsis se tonajli ijkuak Jesús, akin Tekiuaj itech iTekiuajyo toTajtsin, kinyekanas nochimej akin nemiskej ipan yejuin tlaltikpaktli.

      2. ¿Akinomej tlayekanaj iuan Jesús?

      Jesús xsan yejua tlayekana. Biblia kijtoua ika ipan tlaltikpaktli tlayekanaskej “tlakamej de nochimej razas, nochi [...] tlajtoltin, nochi kalpanmej niman nochi países” (Apocalipsis 5:​9, 10). ¿Kechmej tekiuajtiskej iuan Jesús? Sakin ika Jesús ouajlajka ipan tlaltikpaktli, melak miyekej opeuj kichiuaj ken yejua. San ika, san 144,000 yaskej iluikak niman iuan tekiuajtiskej (xkita Apocalipsis 14:​1-4). Niman, akin xyaskej iluikak, nemiskej ipan tlaltikpaktli kampa tlayekanas iTekiuajyo toTajtsin (Salmo 37:​29).

      3. ¿Kenijki tikmatij ika iTekiuajyo toTajtsin melak kuajli tlayekanas?

      Miyekej tekiuajkej kinekij tepaleuiskej, san ika, xueli tepaleuiyaj ijkon ken kuelitaskiaj. Niman, sakin, ijkuak tlami intekiyo, akin peuaj tlayekanaj kanaj nion xkinemiliaj tepaleuiskej. San ika, Jesús, akin Tekiuaj itech iTekiuajyo toTajtsin, xakaj kitekipatlas. ToTajtsin okitlali se tekiuajyotl tlen “xkaman kixoxotoniskej” (Daniel 2:​44). Jesús tlayekanas ipan nochi tlaltikpaktli niman xakaj kichikoitas. Yejua tetlasojtla, teiknelia niman yolmelajki. Kuakon, akin nemiskej ipan tlaltikpaktli noijki ijkon kichiuaskej pampa yejua kinmajmachtis ijkon makichiuakan (xkita Isaías 11:9).

      OKSEKI XKASIKAMATI

      Matikitakan tleka tikijtouaj ika iTekiuajyo toTajtsin más kuajli tlayekanas xijkon ken tlayekanaj miyekej tekiuajkej.

      Jesucristo uajtlayekantika ipan tlaltikpaktli desde iluikak. Ikuitlapan yeuatokej akin iuan tekiuajtij. Niman inkuitlapan onka itlauil Jehová.

      4. Se Tekiuajyotl tlen tlayekanas ipan nochi tlaltikpaktli

      Jesús melak kojtik xijkon ken oksekimej tekiuajkej niman san yejua melak kuajli tlayekana. Xkitakan Mateo 28:​18 niman xtlajtokan itech yejuin:

      • ¿Tleka tikijtouaj ika Jesús más kuajli tlayekana xijkon ken oksekimej tekiuajkej?

      Tekiuajkej akin tlayekanaj ipan yejuin tlaltikpaktli xnochiuiyan tlayekanaj niman ajsi tonajli ijkuak kintekipatlaj. San ika ¿tlenon kijtoua Biblia itech iTekiuajyo toTajtsin? Xkitakan Daniel 7:​14 niman xtlajtokan itech yejuin:

      • ¿Tleka melak kuajli ika iTekiuajyo toTajtsin xkeman kipopoloskej?

      • ¿Tleka melak kuajli ika iTekiuajyo toTajtsin nochiuiyan tlayekanas?

      5. Noneki yakaj makintekipatla tekiuajkej akin tlayekanaj

      ¿Tleka noneki ika iTekiuajyo toTajtsin makintekipatla tekiuajkej? Xkitakan VIDEO niman xtlajtokan itech yejuin:

      VIDEO: ¿Tlenon kijtosneki iTekiuajyo toTajtsin? (san achijtsin) (1:​41)

      • ¿Tlenon yokichiujkej tekiuajkej?

      Xkitakan Eclesiastés 8:9 niman xtlajtokan itech yejuin:

      • ¿Tiknemilia ika iTekiuajyo toTajtsin noneki makintekipatla tekiuajkej? ¿Tleka ijkon tiknemilia?

      6. Nochimej akin tlayekanaskej ipan iTekiuajyo toTajtsin techasikamatij

      Ijkuak Jesús ouajlajka ipan tlaltikpaktli, okixnamik tlen tejuamej tikixnamikij. Ika yejon, yejua “ueli techiknelia ijkuak xtikojtikej” (Hebreos 4:​15). Jehová yokintlapejpeni 144,000 tlakamej niman siuamej niman ijkon matekiuajtikan iuan Jesús. Yejuamej de “nochimej razas, nochi [...] tlajtoltin, nochi kalpanmej niman nochi países” (Apocalipsis 5:9).

      • ¿Mitsyolchikaua tikmatis ika Jesús niman akin iuan tekiuajtiskej kimatstokej tlen tejuamej tikixnamikij? ¿Tleka?

      Tlakamej niman siuamej akin tlatlamantikej niman akin tlapejpeniltin.

      Jehová yokintlapejpeni tlakamej niman siuamej akin miyekan ualeuaj niman ijkon matlayekanakan iuan Jesús.

      7. Itlanauatiluan iTekiuajyo toTajtsin xijkon ken intlanauatiluan tekiuajkej

      Tekiuajkej kintlaliaj tlanauatiltin niman ijkon kinpaleuiskej niman kintlajpiyaskej akin kinyekanaj. ITekiuajyo toTajtsin noijki kinpiya tlanauatiltin, niman, nochimej akin kinekij makinyekana, noneki kintlakamatiskej itlanauatiluan. Xkitakan 1 Corintios 6:​9-​11 niman xtlajtokan itech yejuin:

      • ¿Kenijki tiknemilia tinemiskej ijkuak nochimej kintlakamatiskej itlanauatiluan toTajtsin?a

      • ¿Tiknemilia ika kuajli ika Jehová techtlajtlanilia matikintlakamatikan itlanauatiluan? ¿Tleka ijkon tiknemilia?

      • ¿Tleka kuajli tikmatstokej ika akin xkintlakamatij itlanauatiluan toTajtsin ueliskej nopatlaskej? (Xkitakan 1 Corintios 6:​11).

      Se policía kinteltia carros. Miyekej uelij panouaj pampa yokinteltijkej carros.

      Intlanauatiluan tekiuajkej kinpaleuiyaj niman kintlajpiyaj akin kinyekanaj. Itlanauatiluan iTekiuajyo toTajtsin más kinpaleuiya niman kintlajpiya akin kinekij makinyekana.

      SEKIMEJ UELISKIA KIJTOSKEJ: “¿Tlenon kijtosneki iTekiuajyo toTajtsin?”.

      • ¿Tejua tlenon tikijtoskia?

      TLEN OTIUEL

      ITekiuajyo toTajtsin se gobierno tlen onka iluikak niman tlayekanas ipan nochi tlaltikpaktli.

      ¿Kenon titlanankiliskia?

      • ¿Akinomej tlayekanaj ipan iTekiuajyo toTajtsin?

      • ¿Tleka tikijtouaj ika iTekiuajyo toTajtsin melak kuajli tlayekanas?

      • ¿Tlenon kineki Jehová makichiuakan akin kinekij makinyekana iTekiuajyo?

      Xchiua yejuin

      OKSEKI XKITA

      Jesús okijto kanon oniaskia iTekiuajyo toTajtsin. Xkita tlenon okijto.

      “¿ITekiuajyo toTajtsin onka ipan toyojlo?” (Tlamachtijli de jw.org)

      ¿Tleka iteixpantijkauan Jehová más kinekij kitlakamatiskej iTekiuajyo toTajtsin xijkon ken kintlakamatiskej tekiuajkej?

      San iTekiuajyo toTajtsin tikpaleuiyaj (1:​43)

      Xkita tlenon kijtoua Biblia itech 144,000 tlakamej niman siuamej akin Jehová yokintlapejpeni niman ijkon matekiuajtikan iuan Jesús.

      “¿Akinomej yaskej iluikak?” (Tlamachtijli de jw.org)

      Xkita kenijki se siuatl akin tsauktoya okasikamat ika san iTekiuajyo toTajtsin uelis kiyektlalis tlen panotika.

      “Onikasikamat kenijki uelis tlayektlaliuis” (¡Xtlachiakan!, noviembre de 2011)

      a Ipan sección 3 más tikitaskej tlenon kineki toTajtsin matikchiuakan niman ijkon tikyolpaktiskej.

  • ¡ITekiuajyo toTajtsin yopeuj tlayekana!
    ¡Nochipa uelis tiyolpakis! Xkita tlen Biblia temachtia
    • Tlamachtijli 32. Jesucristo nemi iluikak ken tekiuaj niman uajtlayekantika ipan tlaltikpaktli.

      TLAMACHTIJLI 32

      ¡ITekiuajyo toTajtsin yopeuj tlayekana!

      ITekiuajyo toTajtsin opeuj tlayekana ne iluikak ipan 1914. Desde ijkuakon, tinemij ipan se tiempo tlen noixmati ken “itlamiyan tonaltin”. Sa achijtsin poliui ijkuak kinpopoloskej nochimej tekiuajkej. ¿Tleka ijkon tikijtouaj? Ipan yejuin tlamachtijli, tikitaskej tlenon yokijtojka Biblia itech iTekiuajyo toTajtsin niman tlenon opeuj nochiua ipan tlaltikpaktli desde 1914.

      1. ¿Tlenon yokijtojka Biblia?

      Libro tlen okijkuilo Daniel yokijtojka ika iTekiuajyo toTajtsin peuaskia tlayekanas ijkuak tlamiskia “chikome xipan” (Daniel 4:​16, 17). Ijkuak Jesús ouajlajka ipan tlaltikpaktli, yejua noijki otlajto itech yejon xiujtin, yejua okinteneuj ken tonaltin tlen okintlalilijkej países, niman otemachti ika yejon tonaltin xitlamiyaj (Lucas 21:​24). Ijkon ken tikitaskej, yejon “chikome xipan” otlan ipan 1914.

      2. ¿Tlenon opeuj nochiua ipan 1914?

      Inomachtijkauan Jesús okitlajtoltijkej: “¿Niman tlenon panotos ijkuak titlanauatijtos niman ijkuak sa achijtsin poliuis ijkuak tlamis tlajtlamach tlen nochiua ipan tlaltikpaktli?” (Mateo 24:3, TNM). Jesús okimijli ika ijkuak peuaskia tlayekanas ne iluikak, oniaskiaj miyek guerras, miyekej xkipiyaskiaj tlen kikuaskej niman miyekan tlaloliniskia (xkita Mateo 24:7). Biblia noijki yokijtojka ika ipan itlamiyan tonaltin miyekej kichiuaskiaj tlen “sanoyej xkuajli” (2 Timoteo 3:​1-5). Yonoitak ika desde 1914, más yomiyekiyak tlen xkuajli.

      3. ¿Tleka más yomiyekiyak tlen xkuajli desde ijkuak iTekiuajyo toTajtsin opeuj tlayekana?

      Sakin ika Jesús opeuj tlayekana ipan iTekiuajyo toTajtsin, onochiuj se guerra ne iluikak. Jesús onouijsok iuan Satanás niman idemonios. Satanás xouel otetlan, kuakon, yejua iuan idemonios “okinuajxinijkej ipan in tlaltikpaktli” (Apocalipsis 12:​9, 10, 12). Satanás melak tlauelmiki pampa kimatstika ika sa achijtsin poliui niman ijkon kipopoloskej. Ika yejon, kichiua mamiyekiya tlen xkuajli niman techtlajyouiltia. Aman tikasikamatij tleka nochiua tlen melak xkuajli. San ika, iTekiuajyo toTajtsin kipopolos nochi yejuin.

      OKSEKI XKASIKAMATI

      Matikitakan tlenon techititia ika iTekiuajyo toTajtsin opeuj tlayekana ipan 1914. Noijki matikitakan tlenon uelis tikchiuaskej niman ijkon tikteititiskej ika tikneltokaj ika iTekiuajyo toTajtsin yopeuj tlayekana.

      4. Biblia yokijtojka ika iTekiuajyo toTajtsin peuaskia tlayekanas ipan 1914

      Xkitakan VIDEO.

      VIDEO: ITekiuajyo toTajtsin opeuj tlayekana ipan 1914 (5:​02)

      ToTajtsin okichiuj ika Nabucodonosor, akin tlayekanaya Babilonia, makitemiki itlaj tlen temojkatlachialti. Ijkuak kochtoya, toTajtsin okititi tlenon panoskia ika tlayekapan. Ijkuak tikitaj tlen okitemik Nabucodonosor niman tlen okijkuilo Daniel itech yejuin temiktli, tikitaj ika yejuin temiktli tlajtoua itech itekiuajyo Nabucodonosor niman itech iTekiuajyo toTajtsin (xkitakan Daniel 4:​17).a

      Xkitakan Daniel 4:​20-​26. Sakin xkitakan recuadro niman xnankilikan yejuin:

      • A) ¿Tlenon okitemik Nabucodonosor? (Xkitakan Daniel 4:​20, 21).

      • B) ¿Tlenon ipan nochiuaskia yejon kojtli? (Xkitakan Daniel 4:​23).

      • C) ¿Tlenon panoskia ijkuak tlamiskia “chikome xipan”? (Xkitakan Daniel 4:​26).

      On ueyi kojtli niman iTekiuajyo toTajtsin

      TEOTLAJTOJLI (Daniel 4:​20-​36)

      Tekiuajyotl

      A) Se ueyi kojtli

      Se kojtli melak uejkapan.

      Kitekikotonaj tekiuajyotl

      B) “Xtsontekikan” yejon kojtli niman “chikome xipan” ijkon xkauakan

      Se kojtemetsontli saliujtika ika tepostli.

      Oksejpa tlayekana tekiuajyotl

      C) “Oksejpa titlamandaros ken rey”

      Se kojtli melak uejkapan.

      Ijkuak kachtopa onochiuj yejuin teotlajtojli:

      • D) ¿Akinon kineskayotiaya yejon kojtli? (Xkitakan Daniel 4:​22).

      • E) ¿Kemanon okitekikotonkej tekiuajyotl? (Xkitakan Daniel 4:​29-​33).

      • F) ¿Tlenon ipan onochiuj Nabucodonosor ijkuak yopanoka “chikome xipan”? (Xkitakan Daniel 4:​34-​36).

      IJKUAK KACHTOPA ONOCHIUJ YEJUIN TEOTLAJTOJLI

      Tekiuajyotl

      D) Nabucodonosor, akin tlayekanaya Babilonia

      Tekiuaj Nabucodonosor noueyimatstika.

      Kitekikotonaj tekiuajyotl

      E) Ijkuak yopanoka xiuitl 606 i.x.x. 1,b Nabucodonosor otlamachilispoliuj niman xouel otekiuajtik chikome xiuitl

      Nabucodonosor kikuajtika xiujtli ken yolkamej.

      Oksejpa tlayekana tekiuajyotl

      F) Pajti Nabucodonosor niman oksejpa peua tlayekana

      Tekiuaj Nabucodonosor ajkotlachixtika niman nomateketstika.

      Ijkuak ika okpa nochiua yejuin teotlajtojli:

      • G) ¿Akinomej kinneskayotiaya yejuin kojtli? (Xkitakan 1 Crónicas 29:​23, TNM).

      • H) ¿Kemanon okikajkaujkej ika tlayekanaj yejon tekiuajkej? ¿Kenijki tikmatij ika xtekiuajtitoyaj ijkuak Jesús nemiya ipan tlaltikpaktli? (Xkitakan Lucas 21:​24).

      • I) ¿Kemanon niman kanon oksejpa opeuj tlanauatia yejuin tekiuajyotl?

      IJKUAK IKA OKPA NOCHIUA YEJUIN TEOTLAJTOJLI

      Tekiuajyotl

      G) Tekiuajkej israelitas akin toTajtsin okintlali para matlayekanakan

      Nochimej akin otekiuajtikej ipan Israel. Desde iluikak kinuajtlauiluijtokej.

      Kitekikotonaj tekiuajyotl

      H) Kixoxotoniaj Jerusalén ipan xiuitl 607 i.x.x. 1. Tekiuajkej israelitas xok tlayekanaj 2,520 xiuitl

      Ipan xiuitl 607 ijkuak xpeuaya xiuitl 1, Jerusalén otlatlak. Panouaj 2,520 xiujtin.

      Oksejpa tlayekana tekiuajyotl

      I) Jesús peua tlayekana ne iluikak ken Tekiuaj itech iTekiuajyo toTajtsin ipan 1914

      Jesús opeuj tekiuajti desde ne iluikak ipan 1914. Melak petlani.

      ¿Kech uejkaui “chikome xipan”?

      Yejuin uelis tikasikamatiskej tla tikimitaj okseki textos tlen uajnestiuej ipan Biblia. Ipan Apocalipsis noijtoua ika yeyi xipan iuan tlajko kipiya 1,260 tonaltin (Apocalipsis 12:​6, 14). Kuakon, yejuin kijtosneki ika chikome xipan kipiya 2,520 tonaltin. Kemantika, ipan Biblia, se tonajli kijtosneki se xiuitl (Ezequiel 4:6). Ika yejon, tikasikamatij ika “chikome xipan” tlen okiteneuj Daniel, kijtosneki 2,520 xiuitl.

      5. Miyek onopatlak ipan 1914

      Xkitakan VIDEO.

      VIDEO: Miyek onopatlak ipan 1914 (1:​10)

      Jesús okijto tlenon panoskia ijkuak yejua peuaskia tekiuajtis. Xkitakan Lucas 21:​10, 11 niman xtlajtokan itech yejuin:

      • ¿Melauak nochiujtika tlen kijtoua Biblia? ¿Tlenon yotikitak noso yotiktekakili nochiujtika aman?

      Apóstol Pablo yokijtojka tlenon kichiuaskiaj miyekej ipan itlamiyan tonaltin. Xkitakan 2 Timoteo 3:​2-5 niman xtlajtokan itech yejuin:

      • Ken kijtouaj yejuin textos, ¿tlenon kichiuaj miyekej ipan yejuin tonaltin?

      Miyek tlaixkopinaltin: Ken nesij yejuin tonaltin: 1. Se tlakatl akin kinyekana soldados nomateketstika kampa tojlan. 2. Kaltin yoxoxotonkej pampa otlalolin. 3. Inaviones soldados. 4. Miyekej kistinemij ipan ojtli ika incubrebocas. 5. Ijkuak otlatlakej Torres Gemelas de Nueva York. 6. Se tlakatl kinotlalilijtika droga. 7. Se tlakatl kitsajtsajtsilia isiuauj niman kiuisoki. 8. Miyek tlen tetlauanti niman drogas. 9. Omemej siuamej akin melak yonokualnextijkej kinokixtilijtokej se foto. 10. Se tlakatl kintlatsotsonilia oksekimej para manijtotikan. 11. Se akin teixnamiki kontlajkaltika se bomba molotov.

      6. Xteititi ika tikneltoka ika iTekiuajyo toTajtsin yopeuj tlayekana

      Xkitakan Mateo 24:​3, 14 (TNM), niman xtlajtokan itech yejuin:

      • ¿Otikitak tlenon nochiuaskia ijkuak tlayekantoskia iTekiuajyo toTajtsin?

      • ¿Kenijki uelis titlapaleuis ipan yejuin tekitl?

      ITekiuajyo toTajtsin yopeuj tlayekana niman sa achijtsin poliui ijkuak kiyekanas nochi tlaltikpaktli. Xkitakan Hebreos 10:​24, 25 niman xtlajtokan itech yejuin:

      • ¿Tlenon noneki tikchiuaskej aman ika tinemij ipan itlamiyan tonaltin?

      Miyek tlaixkopinaltin: 1. Se siuatl akin nomachtia Biblia nemi ipan se intlanechikol iteixpantijkauan Jehová. 2. Sa no yejua siuatl kinojnotstika yakaj akin kixmati.

      Tla tikmatiskia itlaj tlen ueliskia kinpaleuis niman kinmakixtis oksekimej, ¿tlenon tikchiuaskia?

      SEKIMEJ UELISKIA KIJTOSKEJ: “¿Tleka iteixpantijkauan Jehová melak tlajtouaj itech 1914?”.

      • ¿Tejua tlenon tikijtoskia?

      TLEN OTIUEL

      Tlen ijkuiliujtika ipan Biblia niman tlen aman panotika techititia ika iTekiuajyo toTajtsin yopeuj tlayekana. Tikteititiaj ika tikneltokaj yejuin ijkuak titenojnotsaj niman ijkuak tiauej tlanechikoltin.

      ¿Kenon titlanankiliskia?

      • ¿Tlenon opanok ijkuak otlan “chikome xipan” tlen okiteneuj Daniel?

      • ¿Tleka tikneltoka ika iTekiuajyo toTajtsin opeuj tlayekana ipan 1914?

      • ¿Tlenon uelis tikchiuas niman ijkon tikteititis ika tikneltoka ika iTekiuajyo toTajtsin yopeuj tlayekana?

      Xchiua yejuin

      OKSEKI XKITA

      Miyekej ixtlamatkej yokitakej ika ipan 1914 miyek opeuj nopatla. Xkita tlenon yokijtojkej.

      “Miyekej opeujkej kichiuaj tlen melak xkuajli” (¡Xtlachiakan!, abril de 2007)

      Xkita tlenon opanok ijkuak se tlakatl okasikamat tlen kijtoua Mateo 24:​14.

      “Melak nikuelitaya béisbol” (Tlamachtijli itech Amatl Tekakistilijketl)

      ¿Kenijki tikmatij ika teotlajtojli tlen uajnestiuj ipan Daniel capítulo 4 tlajtoua itech iTekiuajyo toTajtsin?

      “¿Kemanon opeuj tlayekana iTekiuajyo toTajtsin? (Parte 1)” (Amatl Tekakistilijketl, 1 de octubre de 2014)

      ¿Tlenon techititia ika “chikome xipan” tlen noteneua ipan Daniel capítulo 4 otlan ipan 1914?

      “¿Kemanon opeuj tlayekana iTekiuajyo toTajtsin? (Parte 2)” (Amatl Tekakistilijketl, 1 de noviembre de 2014)

      a Xkimita sa ika tlami ome tlamachtiltin tlen uajlauej ipan sección “Okseki xkita”.

      b Ijkuak tikitas i.x.x. 1, kijtosneki ijkuak xpeuaya xiuitl 1.

  • Tlen kichiuas iTekiuajyo toTajtsin
    ¡Nochipa uelis tiyolpakis! Xkita tlen Biblia temachtia
    • Tlamachtijli 33. Miyekej nemij ipan se kuakualtsin tlaltikpaktli.

      TLAMACHTIJLI 33

      Tlen kichiuas iTekiuajyo toTajtsin

      ITekiuajyo toTajtsin yopeuj tlayekana. Sa achijtsin poliui ijkuak tlayektlalis ipan nochi tlaltikpaktli. Ipan yejuin tlamachtijli, tikitaskej tlen kualtsin kichiuas iTekiuajyo toTajtsin.

      1. ¿Tlenon kichiuas iTekiuajyo toTajtsin niman ijkon ika toyojlo tinemiskej?

      Jesús, akin tlayekana ipan iTekiuajyo toTajtsin, kinpopolos tekiuajkej niman nochimej akin xkuajkualtin ipan se guerra tlen itoka Armagedón (Apocalipsis 16:​14, 16). Ijkuak ijkon panos, nochiuas tlen yokijtojka Biblia: “San xuejkajtika on xompayejyeuamej [noso akin xkuajkualtin] popoliuiskej” (Salmo 37:​10). Itechkopa yejuin Tekiuajyotl, Jesús kichiuas ika akin chantiskej ipan tlaltikpaktli manemikan ika inyojlo niman nochimej makichiuakan tlen kuajli (xkita Isaías 11:4).

      2. ¿Kenijki tinemiskej ijkuak iTekiuajyo toTajtsin tlayekanas ipan tlaltikpaktli?

      Biblia kijtoua ika ijkuak iTekiuajyo toTajtsin tlayekanas ipan tlaltikpaktli, “on yolmelajkej tlakamej kinmakaskej on kuajli tlajli, para ipan chantiskej nochipa” (Salmo 37:​29). ¡Melak kualtsin ken tinemiskej ika tlayekapan! Ijkuakon nochimej kichiuaskej tlen kuajli, kitlasojtlaskej Jehová niman kintlasojtlaskej oksekimej. Niman, xsan yejon, ijkuakon noijki xok yakaj kualos niman xok yakaj mikis.

      3. ¿Tlenon panos ijkuak iTekiuajyo toTajtsin yokinpopolo akin xkuajkualtin?

      Ijkuak Jesús yokinpopolo akin xkuajkualtin, yejua tekiuajtis 1,000 xiuitl. Ipan yejon tiempo, Jesús niman 144,000 akin iuan tekiuajtiskej, kinpaleuiskej akin nemiskej ipan tlaltikpaktli maka sa makipiyakan tlajtlakojli. Ijkuak tlamis yejon 1,000 xiuitl, tlaltikpaktli melak kualtsin yes niman san nemiskej akin kitlakamatij toTajtsin. Ijkuakon, nochimej melak yolpakiskej. Satepan, Jesús kikuepilis Jehová yejon tekiuajyotl. Niman ipan yejon tonajli, itoka toTajtsin noyekteneuas (Mateo 6:​9, 10). Kuajli nesis ika san Jehová kinamiki matlayekana niman ika yejua nochimej kuajli kintlajpiya. Satepan, Jehová kipopolos Satanás, demonios niman nochimej akin xkinokauiliskej makinyekana (Apocalipsis 20:​7-​10). ITekiuajyo toTajtsin kichiuas tlen noneki niman ijkon nochipa matinemikan ika toyojlo.

      OKSEKI XKASIKAMATI

      ToTajtsin yokijto ika, itechkopa iTekiuajyo, kichiuas melak kualtsin matinemikan ika tlayekapan. Matikitakan tleka uelis tikneltokaskej yejuin.

      4. ITekiuajyo toTajtsin kinpopolos tekiuajkej

      Biblia kijtoua ika se “tlakatl kipiya poder para ika nauiltia niman kichiuilia tlen xkuajli okse tlakatl” (Eclesiastés 8:9). Itechkopa iTekiuajyo, Jehová kiyektlalis nochi tlen tlaltikpakchanejkej yokichiujkej.

      Xkitakan Daniel 2:​44 niman 2 Tesalonicenses 1:​6-8, niman xtlajtokan itech yejuin:

      • Ijkon ken kijtoua Biblia, ¿tlenon inpan nochiuas tekiuajkej niman akin kinpaleuiyaj?

      • Aman ika yotikixmat Jehová niman Jesús, ¿tiknemilia ika kuajli tlen kichiuaskej niman ijkon tlayektlaliskej? ¿Tleka ijkon tiknemilia?

      Jesús tlayekantika ipan tlaltikpaktli desde ne iluikak ipan yejuin tlaltikpaktli tlen melak yokualtsintiak.

      5. Jesús se kuajli Tekiuaj

      Jesús, akin tlayekana ipan iTekiuajyo toTajtsin, melak kinpaleuis nochimej akin nemiskej ipan tlaltikpaktli. Xkitakan VIDEO niman ijkon nenkilnamikiskej kenijki Jesús okiteititi ika kineki techpaleuis niman ika Jehová yokimakak kojtilistli niman ijkon matechpaleui.

      VIDEO: Jesús okiteititi tlenon kichiuas iTekiuajyo toTajtsin (1:​13)

      Nochi tlen okichiuj Jesús ijkuak ouajlajka ipan tlaltikpaktli techititia tlenon kichiuas iTekiuajyo toTajtsin ika tlayekapan. Itech tlen kichiuas iTekiuajyo toTajtsin, ¿katlejua más tikuelitaskia manochiua? Xkimitakan nochi textos kampa nesi tlenon kichiuas iTekiuajyo toTajtsin.

      TLEN OKICHIUJ JESÚS

      TLEN KICHIUAS JESÚS

      • Kiyektlalis nochi tlen yoijtlakauj ipan tlaltikpaktli (Isaías 35:​1, 2).

      • Nochimej kinmakas tlen kikuaskej (Isaías 30:​23).

      • Kichiuas maka yakaj makualo (Isaías 33:​24).

      • Kichiuas maka yakaj mamiki nion manoyolkoko (Apocalipsis 21:​3, 4).

      6. ITekiuajyo toTajtsin kichiuas melak kuajli matinemikan

      Jehová, itechkopa iTekiuajyo, kichiuas matinemikan ijkon ken kinekiya. Tinochimej tichantiskej ipan se kualtsin tlaltikpaktli kampa xok yakaj mikis. Xkitakan VIDEO niman ijkon nenkimatiskej kenijki Jehová kichiuas tlen yejua kineki itechkopa Jesús.

      VIDEO: Ken tinemiskej ika tlayekapan (4:​38)

      Xkitakan Salmo 37:4 niman xtlajtokan itech yejuin:

      • ¿Kenijki timomachilia ijkuak tikmati ika Jehová mitsmakas “on tlen tikneki tipiyas”?

      SEKIMEJ KIJTOUAJ: “Tla tinochimej san sekan topaleuiyaj, uelis tikchiuaskej maka sa manochiua tlen xkuajli”.

      • ¿Tlenon xueli kiyektlaliaj tekiuajkej tlen iTekiuajyo toTajtsin kema uelis kiyektlalis?

      TLEN OTIUEL

      Jehová, itechkopa iTekiuajyo, kichiuas matinemikan ijkon ken kinekiya. Kikualtsintilis yejuin tlaltikpaktli kampa chantiskej akin kichiuaj tlen kuajli niman yejuamej nochipa kiueyichiuaskej Jehová.

      ¿Kenon titlanankiliskia?

      • ¿Tlenon kichiuas iTekiuajyo toTajtsin niman ijkon manoyekteneua itoka Jehová?

      • ¿Tleka kuajli tikmatstokej ika iTekiuajyo toTajtsin kichiuas manochiua tlen kijtoua Biblia?

      • Itech nochi tlen kichiuas iTekiuajyo toTajtsin, ¿katlejua más tikneki manochiua?

      Xchiua yejuin

      OKSEKI XKITA

      Xkita tlenon kijtosneki Armagedón.

      “¿Tlenon kijtosneki Armagedón?” (Tlamachtijli de jw.org)

      Xkita tlenpanos tlen Jesús okitokayoti ueyi tlajyouilistli (Mateo 24:21).

      “¿Tlenon kijtosneki ueyi tlajyouilistli?” (Tlamachtijli de jw.org)

      Xkita tlenon uelis kinpaleuis familias makonnemilikan ika nemij ipan yejon tlaltikpaktli tlen Jehová kikualtsintilis.

      Timoita ipan xochitlalpan (1:​50)

      Se tlakatl akin nokalaktiaya ipan política okasikamat itlaj tlen melak okipaleui. Xkita yejuin ipan tlamachtijli “Miyek xnikasikamatiya”.

      “Biblia okichiuj manopatlakan” (Amatl Tekakistilijketl, 1 de enero de 2012)