TLAMACHTIJLI 46
¿Tleka melak kuajli tla timosentemaka itech Jehová niman timoapolaktia?
Ijkuak yakaj nosentemaka itech Jehová, kijlia ika nochipa san yejua kiueyichiuas niman ika nochipa san yejua kitlakamatis (Salmo 40:8). Niman ijkuak noapolaktia, kimititia oksekimej ika yonosentemakak itech toTajtsin. Timosentemakas itech Jehová melak ueyi kijtosneki pampa, ijkuak ijkon tikchiuaj, nochi nopatla. ¿Tlenon uelis mitspaleuis xmosentemaka itech Jehová?
1. ¿Tlenon kichiua matiknekikan tosentemakaskej itech Jehová?
Tla melak tiktlasojtlaj Jehová, tiknekiskej itech tosentemakaskej (1 Juan 4:10, 19, TNM). Biblia techijlia: “Xtlajsojtla moTEKO Dios ikan nochi moyojlo, ikan nochi moalma, ikan nochi motlamachilis, niman ikan nochi mochikaualis” (Marcos 12:30). Ika tlen tikchiuaj niman ika tlen tikijtouaj tikteititiaj ika melauak tiktlasojtlaj Jehová. Ijkon ken ijkuak se tlakatl niman se siuatl kinekij nonamiktiskej pampa melauak notlasojtlaj, tejuamej noijki tiknekij tosentemakaskej itech Jehová niman toapolaktiskej pampa melauak tiktlasojtlaj.
2. ¿Kenijki kinteochiua Jehová akin yonoapolaktijkej?
Ijkuak timoapolaktis, peuas tikueyichiuas Jehová imiuan oksekimej akin noijki kitekichiuiliaj, kema, tinemis ipan ikalpan Jehová kampa nochimej melak yolpakij. Niman kuajli tikitas kenijki Jehová melak mitstlasojtla niman más iuan timouikas (xkita Malaquías 3:16-18, TNM). Jehová yes ken se moTaj, niman xsan yejon, noijki tikpiyas se ueyi familia akin melak kitlasojtlaj Jehová niman noijki mitstlasojtlaj (xkita Marcos 10:29, 30). San ika, tla tejua tikneki timoapolaktis, kachtopa noneki kuajli tikixmatis Jehová, tiktlasojtlas niman tikteititis ika titlaneltoka itech iKonetsin. Sa ika tlami, noneki tikijlis Jehová ika itech timosentemaka. Tla tikchiua nochi yejuin niman timoapolaktia, uelis tikselis nemilistli tlen xkeman tlamis. ITlajtol toTajtsin kijtoua: “Apolaktilistli [...] aman noijki mechmakixtijtika” (1 Pedro 3:21, TNM).
OKSEKI XKASIKAMATI
Matikitakan tleka melak noneki xmosentemaka itech Jehová niman xmoapolakti.
3. Tinochimej noneki tiktlapejpeniskej akinon tiktekichiuiliskej
Sekimej israelitas kinemiliayaj ika ueliskia kitekichiuiliskej Jehová niman noijki kitekichiuiliskej Baal. San ika, Jehová okititlan teotlajtoketl Elías niman ijkon makimijliti ika xkuajli tlen kichiujtoyaj. Xkitakan 1 Reyes 18:21 niman xtlajtokan itech yejuin:
¿Tlenon ononek kichiuaskej israelitas?
Ijkon ken israelitas, tejuamej noijki noneki tiktlapejpeniskej akinon tiktekichiuiliskej. Xkitakan Lucas 16:13 niman xtlajtokan itech yejuin:
¿Tleka xuelis tiktekichiuiliskej Jehová niman noijki tiktekichiuiliskej yakaj okse noso itlaj okse?
¿Tlenon uelis tikchiuaskej niman ijkon makita Jehová ika yotiktlapejpenijkej san yejua tiktekichiuiliskej?
4. Xnemili kenijki Jehová melak mitstlasojtla
Jehová yotechtlayokoli miyek tlen kualtsin, san ika ¿tejuamej tlenon uelis tiktlayokoliskej? Xkitakan VIDEO.
¿Kenijki yomitsititi Jehová ika mitstlasojtla? Xkitakan Salmo 104:14, 15 niman 1 Juan 4:9, 10 (TNM), niman xtlajtokan itech yejuin:
Itech nochi tlen yotechtlayokoli Jehová, ¿tlenon más tiktlasojkamati?
¿Tlenon tikmachilia ipampa Jehová ijkuak tikita nochi tlen yotechmakak?
Ijkuak yakaj techtlayokolia itlaj tlen tikuelitaj, tiknekij makita ika melak tiktlasojkamatij. Xkitakan Deuteronomio 16:17 niman xtlajtokan itech yejuin:
Ijkuak titlanemilia itech nochi tlen yomitsmakak Jehová, ¿tiknekiskia noijki itlaj tikmakas? ¿Tlenon tikmakaskia?
5. Akin nosentemaka itech toTajtsin kiselia tlen melak kualtsin
Miyekej kinemiliaj ika melak yolpakiskiaj tla kipiyaskiaj miyek tomin, tla melak nomachtiskiaj ipan escuelas noso tla melak kimixmatstoskiaj, san ika ¿yejon melauak? Xkitakan VIDEO niman xtlajtokan itech yejuin:
Ijkon ken otikitakej ipan video, ¿tleka yejon tlakatl okikajkauj ika nauiltia fútbol?
Yejua okitlapejpeni kitekichiuilis Jehová niman kikauas fútbol, ¿tiknemilia ika kuajli tlen okichiuj? ¿Tleka?
Ijkuak apóstol Pablo xinochiuaya inomachtijkauj Cristo, yejua melak onomachti ipan escuelas. Okipix se maestro akin miyekan kixmatstoyaj pampa melak kuajli kimasikamatiya itlanauatiluan judíos. San ika, Pablo okikauj nochi yejon niman ijkon peuas kichiuas ken Cristo. ¿Onoyolkuep pampa ijkon okichiuj? Xkitakan Filipenses 3:8 niman xtlajtokan itech yejuin:
¿Tleka Pablo okijto ika nochi tlen okikauj yeskia “ken itlaj tlajsojli”?
¿Tlenon okiseli ipampa nochi tlen okikauj?
¿Tiknemilia ika más kuajli tinemis tla tiktekichiuilia Jehová? ¿Tleka ijkon tiknemilia?
Ijkuak Pablo opeuj kichiua ken Cristo, más miyek tlen okiseli xijkon ken tlen okikauj.
SEKIMEJ KIJTOUAJ: “Nikmatstika ika tlen ninomachtijtika itech Biblia yejon tlen melauak, san ika, niknemilia ika ok nechpoloua para ninoapolaktis”.
¿Tiknemilia ika mitspaleuis tla timosentemakas itech Jehová? ¿Tleka ijkon tiknemilia?
TLEN OTIUEL
Ijkuak melak tiktlasojtlaj Jehová, tiknekij itech tosentemakaskej niman toapolaktiskej.
¿Kenon titlanankiliskia?
¿Tleka kinamiki matiktlasojtlakan Jehová ika nochi toyojlo niman matikueyichiuakan?
¿Kenijki kinteochiua Jehová akin yonoapolaktijkej?
¿Tikuelitaskia timosentemakas itech Jehová?
OKSEKI XKITA
Xkita tleka onosentemakakej itech Jehová se siuatl akin tlakuikaya niman se tlakatl akin nauiltiaya.
Xkita tleka melak noneki matosentemakakan itech Jehová.
“¿Tleka noneki tosentemakaskej itech Jehová?” (Amatl Tekakistilijketl, 15 de enero de 2010)
Xkita ipan yejuin video kenijki melak yolpakij akin nosentemakaj itech Jehová.
Xkita tleka se siuatl opeuj kuajli kinemilia tlenon melak nonekiya kichiuas ipan inemilis. Xkita tlamachtijli “Xnikasikamatiya akinon otexchijchiuj niman tleka otexchijchiuj”.
“Biblia okichiuj manopatlakan” (Amatl Tekakistilijketl, 1 de noviembre de 2012)