TLAMACHTIJLI 42
¿Tlenon kijtoua Biblia intech akin yononamiktijkej niman intech akin xnonamiktiaj?
Miyekej kinemiliaj ika, tla se kineki yolpakis, noneki nonamiktis. San ika, yejon xmelauak. Miyekej akin xnonamiktiaj melak yolpakij, niman yonoitak ika xnochimej akin yononamiktijkej yolpakij. Biblia kijtoua ika se tlateochiualistli ijkuak yakaj nonamiktia niman noijki ijkuak yakaj san iselti nemi.
1. ¿Tlenon ueli kichiuaj akin xnonamiktiaj?
Biblia kijtoua ika akin nonamiktiaj kuajli kichiuaj, san ika, akin xnonamiktiaj más kuajli kichiuaj (xkita 1 Corintios 7:32, 33, 38). ¿Tlenon kijtosneki ijkuak Biblia kijtoua ika más kuajli kichiuaj akin xnonamiktiaj? Tokniuan akin xnonamiktiaj miyek ueli kichiuaj pampa xkinemilijtokej tlenon kinpoloua inueuentsin noso insiuauj. Kuakon, yejuamej ueli kichiuaj miyek tlemach ipampa Jehová. Sekimej yauej ipan okseki kalpamej niman ijkon miyekej kinnojnotsaskej itech toTajtsin. Noijki kipiyaj más tiempo para nomachtiskej niman ijkon más kuajli nouikaskej iuan Jehová.
2. ¿Tlenon panoua ijkuak yakaj nonamiktia ijkon ken kinamiki?
Ijkon ken yotikitakej, kualtsin ijkuak se san iselti nemi, san ika, noijki kualtsin ijkuak se nonamiktia. Biblia kijtoua ika “más kuajli omemej xken se san iselti” (Eclesiastés 4:9). Kema, akin yononamiktijkej melak kuajli nemij ijkuak kitlakamatij tlen temachtia Biblia. Ijkuak se tlakatl niman se siuatl nonamiktiaj ken kinamiki, yejuamej noijliaj ika nochipa notlasojtlaskej, notlakaitaskej niman notlajpiyaskej. Yonoitak ika akin ijkon kichiuaj más kuajli nemij xijkon ken akin san nosentlaliaj. Niman, xsan yejon, noijki yonoitak ika inkoneuan más ika inyojlo noskaltiaj.
3. ¿Tlenon kineki Jehová makichiuakan akin yononamiktijkej?
Ijkuak Jehová okinnamikti kachtopa tlakatl niman kachtopa siuatl, yejua okijto: “Sen tlakatl kikaua itataj niman inanaj para nosentlalia san sekan iuan isiuau” (Génesis 2:24). ToTajtsin kineki ika se tlakatl niman se siuatl akin yononamiktijkej manotlasojtlakan niman nochipa san sekan manemikan hasta ijkuak mikiskej. Jehová san kinkauilia manokauakan ijkuak se auilnemi. Ijkuak ijkon panoua, toTajtsin kikauilia akin okikajkayaujkej makitlapejpeni tla yas kampa tekiuajkej niman ijkon kikauas ixnamik (Mateo 19:9).a Jehová xkineki ika itekipanojkauan makinpiyakan miyekej insiuauan noso miyekej inueuentsitsinuan (1 Timoteo 3:2).
OKSEKI XKASIKAMATI
Matikitakan tlenon uelis mitspaleuis xyolpaki niman xyolpakti Jehová maski tla yotimonamikti noso xtimonamiktia.
4. Xchiua tlen kuajli aman ika xtimonamiktia
Jesús kinemiliaya ika se tlateochiualistli ijkuak se xnonamiktia (Mateo 19:11, 12). Xkitakan Mateo 4:23 niman xtlajtokan itech yejuin:
Pampa Jesús xononamikti, ¿tlenon ouel okichiuj ipampa Jehová niman inpampa oksekimej?
Akin xnonamiktiaj uelis yolpakiskej tla chikauak kitekichiuiliaj Jehová, ijkon ken Jesús okichiuj. Xkitakan VIDEO niman xtlajtokan itech yejuin:
¿Tlenon uelis kichiuaskej akin xnonamiktiaj?
¿Tikmatiya yejuin?
Biblia xkijtoua kech xiuitl noneki kipiyas se tlakatl noso se siuatl niman ijkon uelis nonamiktis, san ika, kema techijlia ika melak kuajli tla se nonamiktia hasta ijkuak yopeuj más kuajli tlanemilia niman ijkuak xok san kinemilijtika yakaj iuan notekas (1 Corintios 7:36, TNM).
5. Kuajli xtlapejpeni akinon iuan timonamiktis
Ijkuak se nonamiktia, nochi nopatla. Ika yejon, melak noneki kuajli xtlapejpeni akinon iuan timonamiktis. Xkitakan Mateo 19:4-6, 9 niman xtlajtokan itech yejuin:
Tla se akin kitekichiuilia Jehová kineki nonamiktis, ¿tleka melak noneki kuajli makinemili?
¿Kenijki uelis tikmatis tla yakaj kuajli kichiuas itekiyo ken tesiuauj noso ken teueuentsin? Biblia uelis mitspaleuis pampa tlajtoua itech yejuin. San ika, tlen más ueyi kijtosneki, xtejtemo yakaj akin makitlasojtla Jehová.b Xkitakan 1 Corintios 7:39 niman 2 Corintios 6:14, niman xtlajtokan itech yejuin:
Tla se akin kitekichiuilia toTajtsin kineki nonamiktis, ¿tleka noneki kitejtemos yakaj akin noijki makitekichiuili Jehová?
Tla yakaj nonamiktia iuan se akin xkitlasojtla toTajtsin, ¿kenijki tiknemilia nomachilis Jehová?
Tla san sekan tikintekitiltiaj omemej yolkamej akin tlatlamantikej, yejon yolkamej melak tlajyouiskej. Noijki ijkon, tla se nonamiktia iuan yakaj akin xkitekichiuilia Jehová, yejua melak tlajyouis.
6. Xkita monamiktilis ijkon ken Jehová kita
Yeuejkaui, sekimej israelitas kinkauayaj insiuauan san pampa ijkon kinekiyaj kichiuaskej. Xkitakan Malaquías 2:13, 14, 16 (TNM), niman xtlajtokan itech yejuin:
¿Tleka Jehová xkuelita ijkuak yakaj kikaua ixnamik maski tla xakaj oauilnen?
Ijkuak yakaj kikajkayaua ixnamik noso kikaua, ixnamik melak tlajyouiya niman noijki tlajyouiyaj inkoneuan.
Xkitakan VIDEO niman xtlajtokan itech yejuin:
Tla moueuentsin noso mosiuauj xkitekichiuilia Jehová, ¿tlenon uelis tikchiuas niman ijkon nochipa nenyolpakiskej?
7. Xchiua tlen Jehová kintlajtlanilia akin yononamiktijkej
Sekimej kinemiliaj ika xuelis kichiuaskej tlen Jehová kintlajtlanilia akin yononamiktijkej.c San ika, yejua kinpaleuiya akin nokojtiliaj kitlakamatiskej. Xkitakan VIDEO.
Xkitakan Hebreos 13:4 niman xtlajtokan itech yejuin:
¿Tiknemilia ika kuajli tlen Jehová kintlajtlanilia akin yononamiktijkej? ¿Tleka ijkon tiknemilia?
Jehová kineki ika ijkuak se itekipanojkauj nonamiktia noso kikaua ixnamik, mauiya kampa tekiuajkej niman ijkon makichijchiuilikan se amatl kampa manoijkuilo tlen yokitlapejpenijkej kichiuaskej. Ipan miyek países notlajtlani ijkin manochiua. Xkitakan Tito 3:1 niman xtlajtokan itech yejuin:
Tla tejua yotimonamikti, ¿tikpiya yejon amatl tlen kitemaka registro civil?
SEKIMEJ KIJTOUAJ: “Xnoneki ninonamiktis ipan registro civil. Uelis san ijkon ninemis iuan noixnamik”.
¿Tejua tlenon tikijtoskia?
TLEN OTIUEL
Biblia kijtoua ika se tlateochiualistli ijkuak yakaj nonamiktia niman ijkuak yakaj san iselti nemi. Tinochimej, maski tla yotonamiktijkej noso ka, uelis tiyolpakiskej tla tiktlakamatij toTajtsin.
¿Kenon titlanankiliskia?
¿Tlenon ueli kichiuaj akin xnonamiktiaj?
¿Tleka Biblia kijtoua ika akin kitekichiuiliaj toTajtsin san noneki nonamiktiskej imiuan akin noijki kitekichiuiliaj Jehová?
Ijkon ken kijtoua Biblia, ¿kemanon uelis nokauaskej akin yononamiktijkej?
OKSEKI XKITA
¿Tlenon kijtosneki timonamiktis san iuan akin noijki “kineltoka toTeko”?
“Tlen notlajtoltiaj akin kitaj revistas” (Amatl Tekakistilijketl, 1 de julio de 2004)
Yejuin video uelis kinpaleuis akin san sekan kistinemij niman akin kinekij nonamiktiskej.
Xkita tleka se tokniuj kijtoua ika tlen Jehová yokimakak más kuajli xijkon ken tlen okikauj.
Tla akin yononamiktijkej kinemiliaj nokauaskej, ¿tlenon noneki kilnamikiskej?
“Matiktlakaitakan ‘on tlen Dios okinsentlalij’” (Amatl Tekakistilijketl, diciembre de 2018)
a Ipan nota 4 más tikasikamatis tlenon uelis nochiuas ijkuak yakaj kineki kikauas ixnamik maski tla xokikajkayaujkej.
b Ipan seki kalpamej, tajtin kitlapejpeniaj akinon iuan nonamiktis intelpoch noso imichpoch. Kampa ijkon nochiua, tajtin akin tetlasojtlaj, xkitaj tla akin nonamiktis iuan inkoneuj makipiya miyek tomin noso melak makixmatikan, yejuamej kitaj tla kitlasojtla Jehová.
c Tla tejua tichanti iuan yakaj akin xiuan timonamiktia, san tejua noneki tiktlapejpenis tla iuan timonamiktis noso tijkauas.