TLAMACHTIJLI 36
Maka matitlakajkayauakan
¿Xmelak ika tikuelitaskiaj ika akin imiuan touikaj maka matlakajkayauakan? Jehová noijki kineki ika akin iuan nouikaj maka matlakajkayauakan. San ika, ipan yejuin tlaltikpaktli, miyekej melak tekajkayauaj niman kemantika techmauasnekij. ¿Tleka melak kuajli tla xtitlakajkayauaj? Matikitakan.
1. ¿Tleka xnoneki titlakajkayauaskej?
Ijkuak xtitlakajkayauaj, tikititiaj Jehová ika tiktlasojtlaj niman ika tiktlakaitaj. Maka keman xkilkaua: Jehová kimatstika nochi tlen tiknemiliaj niman nochi tlen tikchiuaj (Hebreos 4:13). Yejua kita ijkuak tokojtiliaj xtitlakajkayauaskej niman sajnoye yolpaki. Biblia kijtoua: “Jehová melak kitlauelita akin kichiua tlen xmelaktik, san ika, yejua kuajli imiuan nouika akin yolmelaujkej” (Proverbios 3:32, TNM).
2. ¿Kenijki tikteititiaj ika xtitlakajkayauaj?
Jehová kineki matoijlikan “tlen melauak imiuan oksekimej” (Zacarías 8:16, 17, TNM). ¿Tlenon kijtosneki yejuin? Ika xkipiya ika tikinkajkayauaskej tochanejkauan, akin imiuan titekitij, tokniuan akin nemij ipan tlanechikojli niman tekiuajkej. San ika, xsan yejon, noijki xkipiya ika titetlachtekiliskej (xkita Proverbios 24:28 niman Efesios 4:28). Noijki noneki tiktlaxtlauaskej tlen tekiuajkej techtlajtlaniliaj (Romanos 13:5-7). Maski san tlenon tikixnamikiskej, noneki tokojtiliskej xtitlakajkayauaskej (Hebreos 13:18).
3. ¿Tleka melak kuajli tla xtitlakajkayauaj?
Tla xkeman titlakajkayauaj, oksekimej uelis totech tlaneltokaskej. Niman xsan yejon, noijki titlapaleuiyaj ika ipan tlanechikojli tinochimej kuajli matouikakan ken se familia. Noijki, tinemij ika toyojlo pampa xtechpajsoloua totlamachilis. Ijkuak xtitlakajkayauaj, oksekimej kitaj ika melak kuajli tlen techmachtia toTajtsin Jehová, niman, kanaj noijki kinekiskej kitekichiuiliskej toTajtsin (Tito 2:10).
OKSEKI XKASIKAMATI
Ijkuak xtitlakajkayauaj, más kuajli touikaj iuan Jehová. Matikitakan tleka ijkon tikijtouaj, niman noijki matikitakan kenijki uelis tikteititiskej ika xtitlakajkayauaj.
4. Jehová kintlasojtla akin xtlakajkayauaj
Xkitakan Salmo 44:21 niman Malaquías 3:16 (TNM), niman xtlajtokan itech yejuin:
¿Kuajli yeskia tla tiknemiliaj ika xakaj kimatis tla titlakajkayauaj? ¿Tleka ijkon tiknemilia?
Kemantika kanaj tiknekiskej titlakajkayauaskej, san ika ¿kenijki nomachilis Jehová tla xijkon tikchiuaj niman tikijtouaj tlen melauak?
Ijkuak kokonej xtlakajkayauaj, kinyolpaktiaj intajuan. Ijkuak tejuamej xtitlakajkayauaj, tikyolpaktiaj Jehová.
5. Maka keman matitlakajkayauakan
Sekimej kinemiliaj ika xtlaj tlenon tla kemantika titlakajkayauaj. San ika, matikitakan tleka melak kuajli tla xkeman titlakajkayauaj. Xkitakan VIDEO.
Xkitakan Hebreos 13:18 niman xtlajtokan itech yejuin:
¿Kenijki uelis tikititiskej tofamilia ika xtitlakajkayauaj?
¿Kenijki uelis tikteititiskej ipan totekiyo noso ipan escuela ika xtitlakajkayauaj?
¿Uelis tikijtos kanon noijki uelis tikteititiskej ika xtitlakajkayauaj?
6. Melak kuajli tla xtitlakajkayauaj
Kemantika kanaj tikinpiyas seki tlaueltin pampa xtitlakajkayaua, san ika, kuajli xmatsto ika melak kuajli tonkisas tla xtitlakajkayaua. Xkitakan Salmo 34:12-16 niman xtlajtokan itech yejuin:
¿Kenijki techpaleuis tla xkeman titlakajkayauaj?
Tla se teueuentsin niman isiuauj nochipa kinoijliaj tlen melauak, más kuajli nouikaskej.
Tla xtitlakajkayauaj kampa titekitij, akin itech titekitij más totech tlaneltokas.
Tla tikintlakamatij intlanauatiluan tekiuajkej niman xtikinkajkayauaj, yejuamej más techtlakaitaskej.
SEKIMEJ KIJTOUAJ: “Kemantika noneki titlakajkayauas niman ijkon xtimokalaktis ipan tlauejli”.
¿Tiknemilia ika Jehová xkineki nion achijtsin matitlakajkayauakan? ¿Tleka ijkon tiknemilia?
TLEN OTIUEL
Jehová xkineki ika akin iuan nouikaj matlakajkayauakan.
¿Kenon titlanankiliskia?
¿Kenijki tikteititiaj ika xtitlakajkayauaj?
¿Kuajli yeskia tla tiknemiliaj ika xakaj kimatis tla titlakajkayauaj?
¿Tleka melak kuajli tla tejua xkeman titlakajkayaua?
OKSEKI XKITA
¿Kenijki tajtin uelis kinmachtiskej inkoneuan maka matlakajkayauakan?
¿Tleka melak kuajli tla nochipa tikchiuaj tlen tikijtouaj?
Kuajli tonkisaskej tla nochipa tikchiuaj tlen tikijtouaj (9:09)
Xkita tla noneki tikinmakaskej tomintsin tekiuajkej maski tla yejuamej xkuajli kitekitiltiaj.
“¿Noneki tiktlaxtlauas impuestos?” (Amatl Tekakistilijketl, 1 de septiembre de 2011)
Se tlakatl akin tlakajkayauaya niman ijkon kitekuilis tomin ouel onopatlak. Xkita tlenon okipaleui.