Iamatlajkuilol Grupo akin Tlayekana ipan nochi tlanechikoltin

Nokniuan:

Tejuamej melak tiktlasojtlaj toTajtsin niman noijki melak tikintlasojtlaj oksekimej, ika yejon, tiktlakamatij tlanauatijli tlen kijtoua: “Xuiyan niman xkinmachtikan tlaltikpakchanejkej ipan nochi kalpamej. Xkinapolaktikan” (Mat. 28:​19, 20, TNM; Mar. 12:​28-31). Tla melauak titetlasojtlaj, uelis tikinpaleuiskej makixmatikan Jehová akin kinekij nochipa nemiskej (Hech. 13:48).

Yeuejkaui melak tokojtiliayaj tiktsontekontlaliskej tlen tikteijliskej niman tikintemakaskej toamatlajkuiloluan. San ika, aman más noneki matikmatikan kenijki uelis tonojnotsaskej imiuan oksekimej. Ijkuak imiuan tonojnotsaj itech tlen yejuamej kuelitaj noso itech tlen kinekij kimatiskej, tikimititiaj ika tikintlasojtlaj. Ijkuak titenojnotsaskej, matiknektokan tikpapatlaskej tlen tikijtoskej pampa tinochimej titlatlamantikej, kuakon noneki tikitaskej tlenon kuelita niman tlenon kajmana akin tiknotstokej. ¡Yejuin amatlajkuilojli techpaleuis ijkon matikchiuakan!

Yejuin folleto kipiya 12 tlamachtiltin tlen kiteititia 12 kualneskayomej tlen noneki tikinpiyaskej para uelis tikteititiskej ika titetlasojtlaj niman uelis titemachtiskej. Ipan cada tlamachtijli uajnestiuj kenijki Jesús noso okse itekipanojkauj Jehová akin onen ipan kachtopa siglo okiteititi se kualneskayotl ijkuak tenojnotstinemiya. Aman xok tiknekij tiktsontekontlaliskej tlen tikimijliskej akin tikinnojnotsaj, aman tiknekij tikimititiskej ika tikintlasojtlaj. Maski nochi kualneskayomej tlen noteneuaj ipan yejuin folleto melak noneki matikinteititikan ijkuak titenojnotsaj, tikitas ika seki más noneki matikinteititikan ijkuak kemach yakaj iuan tonojnotsaskej, ijkuak oksejpa tonteitaskej niman ijkuak titemachtiskej Biblia.

Ijkuak timomachtijtias tlamachtiltin, xnemilijtiuj kenijki uelis tikinteititis yejon kualneskayomej ijkuak titenojnotsas kampa tichanti. Xkilnamiki, tla tiktlasojtla Jehová niman tla tikintlasojtla oksekimej, mitspaleuis melak kuajli xchiua yejuin tekitl. Ika yejon, xmokojtili más xtetlasojtla. Tla ijkon tikchiua, uelis melak kuajli titemachtis.

Melak tiyolpakij ika san sekan tiktekichiuiliaj Jehová (Sof. 3:9). Jehová mamechteochiua pampa melak nemokojtiliaj nentemachtiskej.