¿Iteixpantijkauan Jehová akin siuamej noijki temachtiaj Biblia?

Kema, niman melak miyekej nemij ipan nochi tlaltikpaktli. Yejuamej tenojnotsaj itech iTekiuajyo toTajtsin ijkon ken kijtoua Salmo 68:11 itech Traducción del Nuevo Mundo, kampa Jehová kijtoua: “Siuamej akin kiteijlitokej kuajli tlajtoltin melak miyekej”.

Maski ijkon, tlen kichiuaj yejuin siuamej akin iteixpantijkauan Jehová xijkon ken tlen kichiuaj siuamej akin nemij ipan okseki religiones. ¿Tleka?

Pampa xsan noijki ken yejuamej temachtiaj. Siuamej akin tekitij ken teopixkej, niman más akin nemij ipan iglesias, yejuamej akin tlayekanaj ipan yejon religiones niman kinmachtiaj akin ompa nosentlaliaj. San ika, siuamej akin iteixpantijkauan Jehová, xtemachtiaj ipan tlanechikojli, yejuamej temachtiaj techajchan noso oksekan.

Noijki, sejneka noso tlamantik tlen kichiuaj ipan inreligión. Siuamej itech okseki religiones kinyekanaj niman kinmachtiaj itech Biblia akin ompa nosentlaliaj. San ika, siuamej akin iteixpantijkauan Jehová xkeman temachtiaj ipan tlanechikojli ijkuak ompa nemij tlakamej akin yonoapolaktijkej. San ueli temachtiaj tlakamej akin yokintlapejpenijkej para matemachtikan (1 Timoteo 3:2; Santiago 3:1).

Ipan Biblia kijtoua ika san tlakamej noneki tlayekanaskej ipan tlanechikojli. Niman yejon kiteititia tlen apóstol Pablo okijli se tlayekanketl akin itoka katka Tito. Okijli: “Onimitskau ipan tlaluaktli itoka Creta [...] para tikintlalis on ueuetkej tlayekankej itech tokniuan ipan itekiu Dios kampa tlaneltokaj ipan cada kalpan” (Tito 1:5). Niman noijki okijto ika se tlayekanketl noneki “maka yakaj itlaj kitlajtlakolmakas. Ika onkaj kipiyas san se isiuau” (Tito 1:6). Apóstol Pablo noijki ijkon okijli Timoteo ipan se carta tlen okititlanili. Ompa okijli: “Tla se kineki tekitis ken tlayekanketl ipan itiopan Dios, sanoyej kuajli on tekitl yejuan kineki kichiuas. Pero yej kemaj on yejuan kinekis tlayekanas ipan itiopan Dios ika onkaj kuajli nouikas para maka itlaj kijixkomakaskej, san se isiuau ma kipiya [...] niman ma kuajli temachti” (1 Timoteo 3:1, 2).

San ika ¿tleka san tlakamej noneki tlayekanaskej ipan tlanechikojli? Pablo okijto: “Nejua xnikauilia sen siuatl ma temachti nion ma kimandaro tlakatl, yej maka ma nauati, pampa Dios achtopa okichijchiu Adán niman kemaj Eva” (1 Timoteo 2:12, 13). Kuakon pampa toTajtsin kachtopa okichijchiuj Adán, kijtosneki ika kinekiya ika yejua matlayekana niman matemachti.

Pampa Jesucristo yejua kinyekana nochimej akin kitlakamatij Jehová, yejuamej kichiuaj ken Jesús. Lucas okijto ika “Jesús okistinen ipan miyek uejueyikalpanmej niman kalpantsitsimej. Kiteijlijtiaya niman kitemakatiaya on kuajli tlajtojli yejuan kiteijlia ken Dios temakixtia”. ¿Niman tlenon okichiujkej inomachtijkauan ijkuak okintitlankej para matemachtikan? “Oyajkej ipan nochi on kalpantsitsimej, niman temachtiayaj on kuajli tlajtojli yejuan kiteijlia ken Dios temakixtia” (Lucas 8:1; 9:2-6).

Noijki ijkon, akin kitlakamatij Jehová ipan yejuin tonaltin, maski tlakamej noso siuamej, san sekan kichiuaj tlen kijtoua Mateo 24:14. Ompa Jesús okijto ika yejuin kuajli tlajtoltin itech Tekiuajyotl notenojnotsas ipan nochi tlaltikpaktli niman ijkon nochimej kalpamej makimatikan, niman kuakon tlapopoliuis.