ITECH TLEN TLAJTOUA IXPAN | ¿TLEKA TIKCHIUAS TLEN MELAUAK?
¿Ok kipatiojkaitaj ipan yejuin tonajli tikijtos tlen melauak?
Hitoshi tekitiya kampa nochiua miyek tekitl ipan Japón itech se oficina de contabilidad. Se tonajli, akin itech tekiti okijli ika makitlalikan tlen xmelauak ijkuak san sekan kitayaj kech tomin onkatka. Hitoshi okijli ika itlamachilis xkikauiliskia makijto tlen xmelauak itech itekiyo. Kuakon Hitoshi okijlikej ika kipoloskia itekiyo niman ijkon opanok.
Opanok seki metstli, Hitoshi melak onajman pampa xueliya kinextiaya se tekitl kampa xnonekis matekajkayaua. Se tonajli, kampa okitlajtlanito tekitl, yejua okiteijli ika xkuelita tekajkayauas itech itekiyo. Kuakon okijlikej: “¡Ken titlanemilia xakaj ijkon tlanemilia!”. Ichanejkauan niman akin imiuan nouikaya kiyolchikauayaj maka makilkaua kichiuas tlen melauak, san ika, yejua xok kuajli kimatiya ika tla ken kichiujtoya kuajli onkisaskia. Yejua kijtoua: “Opeuj ninotlajtoltia tla kuajli nikteijlis tlen niknemilia itech tekajkayaualistli”.
Tlen ipan onochiuj Hitoshi techilnamiktia ika xnochimej kipatiojkaitaj tikijtos tlen melauak. Sekimej kitaj ika kuajli tonkisas tla xnochipa tikteijlis tlen melauak itech tekitl kampa tlanemakalo. Se siuatl, chanej Sudáfrica, okijto: “Kampa nitekiti miyekej xkijtouaj tlen melauak. Niman kemantika melak ouijtika xtikchiuas ken kichiuaj yejuamej”.
Melak miyekej xkijtouaj tlen melauak noso tekajkayauaj ipan yejuin tonajli. San kemach yopanok san seki xiuitl, ipan Universidad Massachusetts ika itlapaleuilis tlapajtiketl Robert Feldman, akin nomachtia ken noyekana se tlaltikpakchane, okitakej ika 60% tekajkayauaj maski san sejpa ijkuak tlajtotokej san ipan diez minutos. Yejon tlapajtiketl Feldman okijto: “Tlen okisato melak otechmojkatlachalti. Xtiknemiliayaj tla tlakajkayaualistli itlaj tlen melak nochiua mojmostla”. ¿Tleka melak onka tlakajkayaualistli maski xakaj kuelita makikajkayauakan?
¿Tleka nochiuiyan tekajkayauaj, tlachtekij niman itech okseki tlemach xkichiuaj tlen melauak? ¿Tlenon panoua ijkuak xnoijtoua tlen melauak? Niman, ¿tlenon uelis tikchiuaskej niman ijkon xtechmauaskej ken kichiuaj sekimej?