ITECH TLEN TLAJTOUA IXPAN | ¿TLEKA TIKCHIUAS TLEN MELAUAK?
¿Kenon teijtlakoua tla yakaj xkijtoua tlen melauak?
“Miyekpa ijkuak tikixnamikis tlen ouijtika tikitas ika mitspaleuis achijtsin tla titekajkayaua.” (Samantha, Sudáfrica)
¿Noijki ijkon titlanemilia? Ijkon ken Samantha, tinochimej tikixnamikij kemantika tlen ouijtika. San ika, tlen tikchiuaj ijkuak tiknekij titekajkayauaskej, noteititiaj tla melak ueyi kijtosneki tikijtoskej tlen melauak. Se neskayotl, tla xtiknekij matopinaujtikan niman yejon melak techajmana, uelis tiknekiskej matitlakajkayauakan. San ika, ijkuak oksekimej kimatij ika xotikchiujkej tlen melauak, kuakon xkuajli tonkisaj. Aman matikitakan tlenon panoua ijkuak xtikijtouaj tlen melauak.
IJKUAK XTIKIJTOS TLEN MELAUAK XOK MITSNELTOKASKEJ
Ijkuak toneltokaj kuajli touikaj. Ijkuak omemej noneltokaj, yejuamej kuajli nomachiliaj. Ijkuak peuas tikneltokas yakaj xnochiua san ipan se tonajli. Noneki uejkaujtipan iuan tipanoskej, iuan toijliskej tlen melauak niman tajmanaskej itech. San ika se tlakajkayaualistli xok uelis techneltokaskej. Ijkuak xok techneltokaj akin iuan touikaj, ika tlayekapan xok kinekiskej oksejpa techneltokaskej.
¿Yomitskajkayauj yakaj akin kuajli tikixmati? Tla kema, tejua xkuajli otimomachili noso otimoyolkoko, niman tinochimej ijkon tomachiliaj. Kuajli nesi ika ijkuak se xkijtoua tlen melauak, xok uelis kuajli iuan touikaskej.
TLA TITEKAJKAYAUA UELIS TITEMAUAS
Itech tlen onomachti Robert Innes, se temachtijketl ipan Universidad de California, okitakej ika “tlakajkayaualistli notepanoltilia”. Yejuin kentla se virus. Ijkuak uejkaujtipan tinemij iuan yakaj akin tekajkayaua, sakin tejuamej noijki peua titekajkayauaj ken yejua.
¿Tlenon uelis techpaleuis maka matikchiuakan ken oksekimej? Biblia, iTlajtol toTajtsin, uelis techpaleuis. Timitstlajtlaniliaj xkita seki tlajtolyekanalistin itech Biblia.