Tlen miyekej notlajtoltiaj

MIYEK tlen noijtoua itech nemilistli niman mikilistli. Nemij akin kinemiliaj ika ijkuak yakaj miki ok yoltika oksekan. Sekimej kinemiliaj ika oksejpa uajtlakatiskej niman ijkon oksejpa kipiyaskej nemilistli. Niman oksekimej kinemiliaj ika ijkuak se miki, ompa tlami nochi.

Tejua kanaj noijki tikpiya tlen tikneltoka itech yejuin, tlen otiuel itech ken otimoskalti noso kampa tiualeua. San ika, pampa onka miyek tlen noneltoka, ¿nemi yakaj noso onka itlaj tlen uelis techijlis tlen melauak panoua ijkuak se miki?

Melak youejkauj ika akin tlayekanaj ipan tlaneltokiltin yotemachtijkej ika tinochimej tikpiyaj se alma tlen nokaua ijkuak timikij. Uejueyimej tlaneltokiltin ken cristianismo, hinduismo, judaísmo, islam niman oksekimej, kineltokaj ika tikpiyaj se alma tlen nokaua ijkuak yakaj miki niman yauj oksekan. Niman budistas kineltokaj ika ijkuak miyekpa youajtlakatkej, aman melak pakij pampa ajsij itech tlen kitokayotiaj nirvana.

Nochi yejuin tlen temachtiaj, yokichiuj ika miyekej tlaltikpakchanejkej makinemilikan ika mikilistli san teuika oksekan. Miyekej kinemiliaj ika mikilistli itlaj tlen noneki panos ipan tonemilis, pampa ijkon kineki toTajtsin. San ika ¿tlenon kijtoua Biblia? Timitstlajtlaniliaj xkita okse tlamachtijli. Kanaj ken nonankilis yejuin, nion xtiknemiliaya.