“Onikseli tetlayokolijli tlen melak ueyi kijtosneki”

Yejon tlen okijto se siuakonetl akin kipiaya 13 xiuitl ijkuak okitlayokolijkej se itskuintsin. Se siuatl akin kipiya se kuajli tekitl okijto ika computadora tlen itaj okitlayokoli ijkuak ichpochtli katka okipatlak inemilis. Niman se tlakatl akin kemach ononamikti kinemilia ika amatsintli tlen isiuauj okimachijchiuili ijkuak okajxiltijkej se xiuitl ika ononamiktijkej, yejon tetlayokolijli tlen melak ueyi kijtosneki tlen yokiseli.

Nochi xiujtin, miyekej nokojtiliaj niman nosiauitiaj kitejtemoskej katlejua tetlayokolijli “melak kuajli yes” tlen kimakaskej akin iuan nouikaj noso se inchanejkauj ipan se tonajli tlen ueyi kijtosneki. Niman miyekej kuelitaskiaj ika tlen kitetlayokoliaj makichiua ijkon manomachilikan ken tlakpak yonoijto. ¿Tikuelitaskia titetlayokolis noso mamitstlayokolikan itlaj ijkon?

San tiknemilis yejuin mitsyolpaktis, xsan pampa tlen kimachilis akin kiselis se tetlayokolijli, noijki ipampa tlen kimachilis akin kitemakas. Biblia kuajli techijlia: “Más paki on yejuan kitemaka xken on yejuan kiselia” (Hechos 20:35). Melauak, pakilistli tlen tikmachilis ijkuak titetlayokolis itlaj ueyiya ijkuak akin kiselia melak kipatiojkaita.

¿Tlenon uelis tikchiuaskej niman ijkon tlen titetlayokoliskej techyolpaktis tejuamej niman akin kiseliskej? Niman tla xuelis tiktemakaskej se tetlayokolijli “tlen melak maueyi kijtosneki”, ¿kenon kuajli tikmatstoskej ika tlen titetlayokoliskej yemelak kipatiojkaitaskej?