3 Techpaleuiya matikinxikokan tlaueltin

Onka seki tlaueltin tlen xueli tikchiuaj maka topan manochiuakan nion xueli tikinyektlaliaj. Se neskayotl, tla se mochanejkauj yomik noso tikpiya se kokolistli tlen xueli nopajtia, kanaj aman san tiktejtemoua tlen mitspaleuis tikxikos tlen tikmachilia. ¿Uelis techpaleuis Biblia ijkuak ijkin topan nochiujtos?

IJKUAK TIKPIYAJ KOKOLISTLI TLEN XUELI NOPAJTIA

Rosa kijtoua: “Nikpiya se kokolistli tlen onechpanoltilijkej notajuan, yejuin kichiua melak maninokoko niman xkeman popoliui. Xok ueli ninemi ken oksekimej”. Yejua melak najmanaya pampa xueliya tlanemiliaya itech tlen nomachtiaya ipan Biblia nion ipan okseki tlen kichikauaskia itlaneltokil. San ika, melak okiyolchikauj tlen Jesús okijto ipan Mateo 19:26, kampa kijtoua: “Dios nochi ueli kichiua”. Rosa okitak ika onka miyek ken uelis nomachtis. Pampa kemantika xueliya amapouaya pampa melak nokokouaya, opeuj kinkaki grabaciones itech Biblia niman okseki amatlajkuiloltin.a Yejua kijtoua: “Tla xnikpiyaskia yejuin tlapaleuilistin, xueliskia nikchikauas notlaneltokil”.

Ijkuak Rosa melak noyolkokoua pampa xueli kichiua kech kinekiskia, kiyolseuiya tlen uajnestiuj ipan 2 Corintios 8:12, tlen kijtoua: “Tla se tlakatl ikan nochi iyojlo kitemaka kech yejua ueli kitemaka, Dios kiselilia on ofrenda. Yejua, tej, xueli kitlajtlanilia tlen se xkipia”. Yejuin tlajtoltin kilnamiktiaj Rosa ika toTajtsin paki ika tlen kichiua, pampa yejua kichiua nochi kech ueli.

IJKUAK MIKI SE TOCHANEJKAUJ

Diana, akin yotikteneujkaj, kilnamiki: “Melak onechyolkoko ika omik nochpoch, akin san kipiaya 18 xiuitl, onikmachili ika xok ueliskia ninemis niman ika nochi nopatlaskia”. Yejua melak okiyolchikauj tlen kijtoua Salmo 94:19, kampa salmista okijli toTajtsin: “Ijkuak ajmantli nechyolajmanaya, otinechyolchikauj niman otinechyolseui”. Diana kijtoua: “Oniktlajtlanili Jehová manechpaleui maniknexti itlaj tlen nikchiuas tlen nechpaleuiskia manikxiko tlen nikmachiliaya”.

Diana opeuj tlapaleuiya ipan itlaj tlen melak kiyolpaktiaya. Sakin opeuj noita kentla yejon lápices tlen kokonej kintekitiltiaj ika tlatlapalyotiaj, ika maski seki yopojpostejkej ok kintekitiltiaj ika tlatlapalyotiaj. Okasikamat ika maski yejua nomachiliaya kentla yejon lápices tlen yopojpostejkej, ueliskia kinpaleuis oksekimej. Yejua kijtoua: “Onikitak ika ijkuak nikinyolseuiaya akin nikinmachtia ika tlajtolyekanalistin niman tlanemililtin tlen kisaj itech Biblia, Jehová noijki nechyolseuiaya”. Yejua okimijkuilo sekimej itekipanojkauan toTajtsin tlen nesij ipan Biblia akin noijki okixnamijkej ueyi ajmantli. Kuakon okijto: “Nochimej yejuamej okichiujkej teoyotl”. Yejua noijki ouel ika “tla xtikamapouaj Biblia, xuelis tiknextiskej tlen tiknekij tikmatiskej”.

Biblia noijki yokimachti matlanemili itech tlen uajlas tlayekapan niman maka itech tlen yopanok. Kiyolchikaua tlamachialistli tlen noteneua ipan Hechos 24:15, kampa kijtoua: “On mimikej yoliuiskej nochimej, sanken on yejuan yolmelajkej niman on yejuan xyolmelajkej”. ¿Kenon kimati ika Jehová yemelak kiyolitis ichpoch? Diana kijtoua: “Kuajli nikmatstok ika oksejpa nikitas nochpoch. NoTajtsin iluikakchane yokijto kemanon oksejpa tonextiskej. Ueli kuajli ninoita iuan nochpoch, ijkon ken kuajli nikilnamiki kenon oninomachili ijkuak yejua otlakat”.

a Miyek itech yejon grabaciones tikinnextis ipan jw.org.

Biblia uelis techyolseuis maski tikixnamiktokej tlen melak xkuajli

¿KENON UELIS TECHPALEUIS TOTAJTSIN?

Biblia techmelajkaijlia: “Jehová nisiuj nemi itech nochimej akin kinotsaj, nochimej akin yemelak kinotsaj. Kinmaka tlen melak kinekij akin kimojkaitaj, yejua kinkaki akin kitlatlaujtiaj makinpaleui, niman kinmakixtia” (Salmo 145:18, 19). ¿Xmelak ika teyolchikauaj yejuin tlajtoltin? San ika ¿kenon technankilia toTajtsin ijkuak tiktlatlaujtiaj matechpaleui?

TECHMAKA KOJTILISTLI

Tlaueltin techtekipachouaj niman kichiua matikmachilikan ika xkojtik totlaneltokil, totlalnakayo niman ika xueli kuajli titlanemiliaj (Proverbios 24:10). San ika, Jehová “yejua kimaka kojtilistli akin siaujtika niman kintemiltia ika ueyi kojtilistli akin xkojtikej” (Isaías 40:29). Apóstol Pablo akin okixnamik uejueyimej tlatlatalistin, okijto: “Nochi niueli nikxikoua tlen nopan uajlau pampa [...] yejua nechpaleuiya” (Filipenses 4:13). Pablo okiseli kojtilistli ipampa iespíritu santo toTajtsin niman tejua noijki uelis mitsmakas tla tiktlajtlanilia (Lucas 11:13).

TECHMAKA TLAMACHILISTLI

¿Tlenon uelis tikchiuas tla mitspoloua tikasikamatis niman tiktlakamatis se itlajtolpaleuilis Biblia? Santiago, inomachtijkauj Cristo, okijkuilo: “Tla semej nemejuamej xnenkimatij on tlen kuajli nenkichiuaskej, xtlajtlanilikan Dios kuajli tlamatkilistli, niman yejua mechmakas. Yejua, tej, melauak nochimej kinmaka, niman xitlaj kiteixkomaka” (Santiago 1:5). Tla tikneki tikchiuas ijkon ken tiktlajtlani ipan moteoyouan, noneki tikpouas Biblia niman tikchiuas tlen temachtia (Santiago 1:23-25). Tla tikchiua, tikitas kenon melak tepaleuiyaj itlajtolpaleuilisuan.

TECHMAKA YOLSEUILISTLI

Maski melak timajmanas, Jehová uelis mitspaleuis xnemi ika moyojlo. Ipan iTlajtol kijtoua: “Ma ka itlaj xkomatstiakan, yej nochipa xchiuakan oración, niman xtlajtlanilikan Dios ikan tlaxtlauijli nochi tlen mechpoloua. Ijkon Dios mechmakas yolseuilistli on yejuan más ueyi de nochi kech se tlakatl uelis kajsikamatis. Niman in yolseuilistli kejeuas nemoyojlo niman nemotlamachilis pampa itechkopa Cristo Jesús nennemij san sekan iuan” (Filipenses 4:6, 7). ¿Tleka xtiktlajtlanilia Jehová mamitsmaka yolseuilistli?

San ika ¿tlenon tikchiuas tla motlaueluan xnimantsin noyektlaliaj? Maka xnemili ika toTajtsin yomitsilkauj. Maski tla tlaueltin xpopoliuij, Jehová uelis techmakas chikaualistli niman kojtilistli tlen techpaleuis matikxikokan (1 Corintios 10:13). Biblia kijtoua ika yejkos tonajli ijkuak nochi totlaueluan popoliuiskej.