Tlen notlajtoltiaj akin kitaj revistas

¿Eclesiastés 5:8 san tlajtoua intech tekiuajkej akin tlayekanaj ipan tlaltikpaktli noso noijki tlajtoua itech Jehová?

Tlen kijtoua Eclesiastés 5:8 melak techtlanemililtia. Itech Traducción del Nuevo Mundo, yejuin tlaxelojli kijtoua: “Tla tikita ika ipan moueyikalpan kitlajyouiltiaj akin mayanki niman xnochiua tlen melajki niman tlen kinamiki, maka mamitsmojkatlachialti. Pampa yejon tlayekanketl kualitstika yakaj akin más ueyixtika xijkon ken yejua, niman noijki nemij oksekimej akin más uejueyixtokej xijkon ken yejuamej”.

Ijkuak tejuamej xtikitaj tlenon kinemilia Jehová itech yejuin, kanaj tikijtoskiaj ika yejuin tlaxelojli san kinteneujtika akin tlayekanaj ipan tlaltikpaktli. San ika, tla kuajli titlanemiliaj, yejuin tlaxelojli techijlia itlaj itech Jehová tlen techyolchikaua niman techyolseuiya.

Eclesiastés 5:8 tlajtoua itech se tekiuaj akin kintlajyouiltia akin mayankej niman kinchiuilia tlen xkinamiki. Yejuin tlakatl nonekiya kilnamikis ika kanaj kualitstoya yakaj akin más ueyixtika xijkon ken yejua. Niman, kanaj uelis nemiskej oksekimej akin más uejueyixtokej xijkon ken yejuamej. Melak teajman ika akin aman tlayekanaj san kichiuaj tlen xkuajli niman kintlajyouiltiaj oksekimej.

San ika, maski tikitaj tlen xkuajli nochiujtika, techyolchikaua tikmatiskej ika Jehová kinualitstika hasta yejon uejueyixtokej tekiuajkej. Uelis tiktlajtlaniliskej Jehová matechpaleui niman uelis tikijliskej tlen techajmana (Sal. 55:22; Filip. 4:6, 7). Tikmatstokej ika “toTEKO kitstikaj nochi tlen nochiua ipan in tlaltikpaktli” niman ika “kinkojtilia on yejuan itech kitlaliaj nochi inyojlo” (2 Crón. 16:9).

Kuakon, Eclesiastés 5:8 techilnamiktia ika nochipa nemis yakaj akin más ueyixtok intech tekiuajkej. San ika, noijki techititia ika Jehová yejua akin más ueyixtika ipan nochi universo. Aman, yejua tekiuajtitok itechkopa iKoneuj, Jesucristo, akin Tekiuaj ipan Tekiuajyotl. Jehová, akin nochi ueli kichiua niman nochi kitstika, xkeman kichiua tlen xkuajli, niman iKoneuj noijki xkeman kichiuas tlen xkuajli.