¿Uelis kuajli tinemis tla tikinpaleuiya oksekimej?

Desde yeuejkaui miyekej kinemiliaj ika tla tikneki kuajli tinemis ika tlayekapan noneki tikinpaleuis oksekimej. Confucio se ixtlamatki akin onen ipan 551 niman omik ipan 479 ijkuak xpeuaya xiuitl 1, okijto: “Maka xkinchiuili oksekimej tlen xtikuelitaskia mamitschiuilikan”.a Niman miyekej akin chantij Asia noijki ijkon tlanemiliaj.

TLEN MIYEKEJ KICHIUAJ

Miyekej noijki kinemiliaj ika tla kinekij chantiskej kuajli ika tlayekapan noneki kichiuaskej tlen kuajli. Ika yejon, nokojtiliaj tetlakaitaskej, kuajli tenotsaskej, kintlakamatiskej gobiernos niman xkinemiliskej kichiuaskej tlen xkuajli. Linh, se siuatl akin chanti Vietnam okijto: “Niknemiliaya ika tla nikijtouaya tlen melauak kuajli ninemiskia”.

Sa no yejua siuatl kintlakualtia akin xkipiyaj tlen kikuaskej nion xkipiyaj kanon chantiskej.

Sekimej kichiuaj tlen kuajli pampa yejon tlen kinmachtiaj ipan inteopan. Hsu-Yun, se tlakatl akin chanti Taiwán, kijtoua: “Onechmachtijkej ika ijkuak se miki uelis nochipa yolpakis noso tlajyouis tla okichiuj tlen kuajli noso tlen xkuajli ijkuak nemiya”.

¿YEMELAK TEPALEUIYA YEJON?

Ika teotlak, sa no yejua siuatl yosiauj niman najmana, noijki kinapalojtika ikonetsin.

Ijkuak tikinpaleuiyaj oksekimej topan nochiua tlen kuajli. San ika, miyekej yokitakej ika maski kinpaleuiyaj oksekimej, xnochipa inpan nochiua tlen kuajli. Shiu Ping, se siuatl akin chanti Hong Kong, kijtoua: “Yonikitak ika xnochimej akin kichiuaj tlen kuajli kiseliaj tlen kuajli. Nejua melak oninokojtili niktlajpiyas nofamilia, san ika, noueuentsin otechkajteuj nejua niman nokoneuj”.

Miyekej yokitakej ika teopan kampa yauej xkinpaleuiya makichiuakan tlen kuajli. Etsuko, se siuatl akin chanti Japón kijtoua: “Ninemiya ipan se religión kampa nikyekanaya tlen kichiuayaj telpokamej. Melak oninoyolkoko ijkuak onikitak ika akin imiuan ninosentlaliaya xnoyekanayaj ika tlen kijtouaya iTlajtol toTajtsin, nokualaniayaj pampa kinekiyaj tlayekanaskej niman xkuajli kikuiyaj tomin tlen tiktemakayaj”.

“Nejua melak oninokojtili niktlajpiyas nofamilia, san ika, noueuentsin otechkajteuj nejua niman nokoneuj” (SHIU PING, HONG KONG)

Miyekej najmanaj pampa kitaj ika nochi tlen okichiujkej niman tlen okitemakakej xitlaj ika otepaleui. Ijkon onomachili Van, se siuatl akin chanti Vietnam, yejua okijto: “Mojmostla nikinuentlaliliaya nochanejkauan akin yomijkej pampa niknemiliaya ika nechteochiuaskiaj ika tlayekapan. Maski miyekpa ijkon onikchiuj niman melak onikinpaleui oksekimej, sakin noueuentsin melak okualok. Niman sakin nochpoch akin onomachtito okse país omik ijkuak san kipiaya 20 xiuitl”.

TLEKA XSAN NONEKI TIKINPALEUISKEJ OKSEKIMEJ

Maski noneki tikinpaleuiskej oksekimej, xsan yejon noneki tikchiuaskej tla tiknekij kuajli tinemiskej ika tlayekapan. ¿Tleka? Xkita tlen kijtoua iTlajtol toTajtsin.

XNOCHIMEJ KINEKIJ TETLAKAMATISKEJ

“San ika sen tlajtlakolejketl [akin] nopopoloua, ueli kixoxotonia miyek tlen kuajli” (ECLESIASTÉS 9:18).

San ika, maski tejuamej tokojtiliaj tikchiuaskej tlen kuajli, tlen kichiuaj oksekimej uelis techijtlakos. San xkonnemili, kanaj ijkuak panoua se pandemia tejua tikintlakamati gobiernos ijkuak mitsijliaj maka xkinnisiui oksekimej. San ika ¿tlenon panos tla oksekimej xtetlakamatij? Uelis kichiuaskej makualokan akin kema kinekij tetlakamatiskej.

MIYEKEJ XKIMATIJ TLENON KUAJLI NIMAN TLENON XKUAJLI

“Onkaj ojtli yejuan nesi kuajli, pero on ojtli teuika ipan mikilistli” (PROVERBIOS 14:12).

Desde yeuejkaui nemij akin kinemiliayaj ika kuajli tlen kichiujtoyaj, san ika, sakin okitakej ika onopopolojkej. Kemantika tlen tikchiuaj kimijtlakoua oksekimej maski tejuamej yemelak tiknekiyaj tikinpaleuiskej.

XTIKMATIJ TLENON TOPAN NOCHIUAS

“Nemejuamej xnenkimatij tlinon nochiuas mostla” (SANTIAGO 4:14).

Maski yakaj nochipa kichiua tlen kuajli, uelis nimantsin mikis. San xkonnemili, ipan pandemia COVID-19 miyekej omijkej maski okinpaleuijkej oksekimej. Matikitakan tlen okipanok Liting, se siuatl akin ualeua China niman itaj omik ipan se accidente. Yejua kijtoua: “Xueliya nikneltokaya tleka omik. Notaj melak tekitki katka, yolyemanki niman xkeman tekajkayauaya. Niman itech nochimej akin yayaj ipan carro san yejua omik”.

Tla yakaj xuelis kuajli nemis ika tlayekapan maski kinpaleuiya oksekimej, kuakon, ¿tlenon uelis kipaleuis? Tla tiknekij tikmatiskej yejuin, noneki tikitaskej itlaj tlen matechpaleui matikmatikan kenon kuajli tinemiskej ika tlayekapan. ¿Kanon tiknextiskej yejon tlen uelis techpaleuis?

a Tla tikneki tikmatis más itech tlen otemachti Confucio, xkinpoua párrafos 31 a 35 itech capítulo 7 itech libro El hombre en busca de Dios. Yejuin libro okichijchiujkej iteixpantijkauan Jehová niman uelis tiknextis ipan www.jw.org.