Nochipa nitlanemilia itech Jehová ijkuak itlaj niktlapejpenia

Oninemiko ipan 19 de mayo de 1940 ipan se ueyikalpan tlen itoka Amiún (Líbano). Sakin, otichantitoj ipan se ueyikalpan tlen itoka Trípoli. Nochanejkauan melak tetlasojtlaj, noijki kixmatiyaj niman kitlasojtlayaj Jehová. Tejuamej timakuiltin katkaj, yeyimej siuamej niman omemej tlakamej, nejua akin nixokoyotl. Notajuan xkinekiyaj notomintiskej, yejuamej kuelitayaj nomachtiskej Biblia, yaskej tlanechikoltin niman kinpaleuiskej oksekimej makixmatikan toTajtsin.

Ipan totlanechikol, nemiyaj sekimej tokniuan akin tlapejpeniltin katkaj. Ompa touan nemiya Michel Aboud, akin kiyekanaya tlanechikojli tlen noixmatiya ken estudio del libro. Yejua okimachtijkej itech Biblia ne Nueva York, niman sakin otenojnotsato Líbano kanaj ipan 1920. Kuajli nikilnamiki kenon yejon tokniuj melak kintlakaitaya niman kinpaleuiaya Anne niman Gwen Beavor, omemej ichpokamej akin oyajkaj ipan iTlamachtil Galaad. Yejuamej melak kuajli onouikakej iuan nochanejkauan. Sakin ika yopanokaj miyek xiujtin melak oniyolpak ijkuak oksejpa onikitak Anne ne Estados Unidos. Sakin, noijki onikitak Gwen, akin yononamiktijka iuan Wilfred Gooch, yejuamej tlapaleuijtoyaj ipan sucursal de Londres (Inglaterra).

IJKUAK TITENOJNOTSAYAJ LÍBANO

Ijkuak nikonetl katka, ne Líbano xmiyekej tokniuan nemiyaj. Maski ijkon, tikinmachtiayaj oksekimej itech Biblia. Ijkon tikchiuayaj maski tlayekankej itech tlaneltokiltin melak kualaniyaj. Hasta aman kuajli nikilnamiki tlen topan onochiuj.

Se tonajli, nokniuj Sana niman nejua titenojnotstoyaj ipan se edificio. Ijkuak ompa titenojnotstoyaj, ouajkis se teopixki, kanaj yakaj okonots. Yejon tlakatl opeuj san tlemach kijlia nokniuj niman pampa melak okualan okonmapeuj ipan escaleras. Pampa yakaj okominnots policías, yejuamej nimantsin oyejkokej niman okipaleuijkej nokniuj Sana, akin onokokojka. On teopixki okuikakej niman okitakej ika kipiaya se arma. Niman okitlajtoltijkej: “¿Tejua tlenon tikchiua? ¿Titeopixki noso titemiktijketl?”.

Noijki xnikilkaua ijkuak totlanechikol okitlaneuj se autobús niman ijkon tontenojnotsaskej ipan se pitentsin kalpan. Melak kualtsin titenojnotstoyaj hasta ijkuak se teopixki okimat ika ompa tinemiyaj niman okinsentlali miyekej para matechkixtikan. Yejon tlakamej otechtemojmotlakej niman hasta okikokojkej notaj ipan itsontekon. Hasta aman nikilnamiki kenon notaj melak yeskistoya ipan ixayak. Ijkuak notaj niman nonan oajsikej ipan autobús tinochimej otikimitatoj. Xnikilkaua tlen okijto nonan ijkuak kichipauilijtoya ixayak notaj: “Jehová, xkintlapopolui pampa xkimatij tlen kichiuaj”.

Se tonajli, otikintlajpalotoj sekimej tochanejkauan. Ijkuak otajsikej kampa noabuelo, ompa nemiya obispo, se ueyi teopixki. Yejua kimatstoya ika notajuan katkaj iteixpantijkauan Jehová. Maski san nikpiaya chikuasen xiuitl, onechtlajtolti: “Tejua, ¿tleka xtimokuatekiya?”. Onikijli ika xninoapolaktiaya pampa ok nipitentsin katka niman ika tla niknekiya ninoapolaktis, kachtopa nonekiya kuajli ninomachtis Biblia niman chikauak nikpiyas notlaneltokil. Pampa xokuelitak ken oniknankili okijli noabuelo ika xoniktlakaitak.

San ika, xnochipa ijkon topan nochiuaya. Miyekej akin chantij Líbano kuajli tenotsaj niman mitspanoltiskej inchan. Yejua ika, ueliya miyekej tikinnojnotsayaj niman tikinmachtiayaj itech Biblia.

OTOCHANTITOJ OKSE PAÍS

Ijkuak nejua ok niaya escuela, se tokniuj venezolano otetlajpaloko Líbano. Yejua yaya ipan totlanechikol niman ompa okixmat nokniuj Wafa. Sakin ononamiktijkej niman onochantitoj Venezuela. Ijkuak Wafa techtlajkuilouiliaya, kijliaya notaj matichantitij Venezuela pampa melak techtemouaya. Niman ijkon opanok.

Ipan 1953, otajsikej Venezuela niman otichantitoj Caracas, nisiuj kampa ontekitiya presidente. Pampa san nitelpochkonetl katka melak nikuelitaya nikitas kenon ajsiya presidente ipan se kualtsin carro. San ika, notajuan ouijtika okitakej nomatiskej ompa: pampa ipan yejon país xsan noijki tlajtouaj ken ne Líbano, xsan noijki tlen kichiuaj, tlen kikuaj niman xsan noijki ken tona. Kemach yopeujka nomatij ijkuak opanok itlaj tlen melak teajman.

PANOUA ITLAJ TLEN MELAK TEAJMAN

San totoka, notaj opeuj kualo. Xueliya tikneltokayaj pampa xkeman tikitayaj makualo. Tlapajtikej okinextilijkej cáncer ipan ipáncreas niman okichiuilijkej se operación. Melak teyolkoko tlen opanok pampa se semana sakin notaj omik.

Melak tajmanayaj, nejua san nikpiaya 13 xiuitl. Xueliya tikneltokayaj tlen opanok niman hasta xok tikmatiyaj tlenon tikchiuaskej. Nonan ouejkauj para kineltokas ika yomik iueuentsin. San ika, otikasikamatkej ika xnonekiya nochipa tajmantoskej pampa Jehová techpaleuiskia. Ijkuak otlan ninomachtia secundaria ne Caracas, nikpiaya 16 xiuitl niman onikmachili ika nonekiya nikinpaleuis nochanejkauan.

Ijkuakon, nokniuj Sana ononamikti iuan Rubén Araujo, akin oyajka ipan iTlamachtil Galaad niman oksejpa okuajtitlankej Venezuela. Yejuamej okinemilijkej onnochantiskej Nueva York. Nochanejkauan onechijlikej ika nonekiya ninomachtis universidad, ika yejon, oniaj Nueva York iuan Sana niman Rubén niman ijkon ompa ninomachtis. Yejuamej melak onechpaleuijkej más manikchikaua notlaneltokil. Noijki, ipan tlanechikojli kampa tiayaj, Brooklyn Spanish, nemiyaj miyekej tokniuan akin kipiayaj chikauak intlaneltokil. Omemej melak onikintlasojtlak: Milton Henschel niman Frederick Franz, yejuamej tlapaleuiayaj ipan Betel tlen onkatka Brooklyn.

Ijkuak inikajxiltijtoya se xiuitl ipan universidad, opeuj ninotlajtoltia tla kuajli tlen nikchiujtoya. Nejua yonikinpoujka seki tlamachtiltin ipan La Atalaya kampa tlajtouaya itech kenon uelis tiktekichiuilis Jehová, niman yejon onechtlanemililti. Nikitaya ika precursores niman betelitas akin yayaj ipan notlanechikol melak yolpakiyaj niman nejua noijki niknekiya ijkon niyolpakis. Nejua xninoapolaktiaya, ika yejon onikitak ika melak nonekiya ninosentemakas itech Jehová. Kuakon, oninoapolakti ipan 30 de marzo de 1957.

NIKTLAPEJPENIA TLEN UEYI KIJTOSNEKI

Sakin ika oninoapolakti, oniknemili chikauak niktekichiuilis Jehová. Melak niknekiya nitlapaleuis ken precursor, san ika, nikmatstoya ika melak ouijtika yeskia. Pampa niaya universidad ninotlajtoltiaya kenon ueliskia nikajxiltis nohoras. Ipan cartas tlen nikimijkuilouiliaya nonan niman nokniuan nikimijliaya ika yoniknemilijka nikajkauas universidad, ika ninokuepas Venezuela niman ninochiuas precursor.

Ipan junio de 1957, oninokuep Caracas. Ijkuak onajsik, onikitak ika nochanejkauan kixnamiktoyaj tlen ouijtika. Yejuamej xok más kipiayaj tomintsin. Ika yejon oninotlajtolti: “¿Uelis nikinpaleuis?”. Oniknexti tekitl ipan se banco, san ika, nejua niknekiya ninochiuas precursor. Pampa, yejua ika oninokuep Venezuela. Onikijto nikchiuas on ome tlemach. Seki xiujtin onitekit ipan banco niman noijki niprecursor katka. Hasta xninajxiliaya, san ika, melak niyolpakiya.

Noijki melak onechyolpakti ijkuak onikixmat Sylvia, se kualtsin tokniuj akin melak kitlasojtlaya Jehová, yejua ualeuaya Alemania niman onochantitoj Venezuela iuan itajuan. Sakin, otonamiktijkej niman otikinpixkej omemej tokoneuan: Michel (akin tiktokayotiaj Mike) niman Samira. Noijki otikijtokej ika nonan touan chantiskia niman ijkon ueliskia tiktlajpiyaskiaj. Xok ouel onitlapaleui ken precursor pampa nonekiya nikintlajpiyas nochanejkauan. Maski ijkon, chikauak niktekichiuiliaya toTajtsin. Nochipa ijkuak tiueliyaj, Sylvia niman nejua tochiuayaj precursores auxiliares ipan vacaciones.

ITLAJ OKSE NIKTLAPEJPENIA

Ijkuak nopan opanok tlen onimechijli ijkuak otipeujkej, nokoneuan ok yayaj escuela. Nochanejkauan niman nejua xtlaj techpolouaya niman akin imiuan nitekitiya ipan banco melak nechtlakaitayaj. Maski ijkon, san niknekiya manechixmatikan ken se itekipanojkauj Jehová. Niman san itech yejon nitlanemilijtoya. Kuakon, oniuajnotlali iuan Sylvia niman otikitakej tlenon ueliskia tikchiuaskej. Otikitakej ika tla nijkauaya notekiyo ipan banco, nechmakaskiaj miyek tomin. Otikijtokej ika ueliskia tinemiskiaj san ika achijtsin niman noijki pampa xtikteuikiliayaj techuejkauaskia on tomintsin tlen nechmakaskiaj.

Tlen otiknemilijkej tikchiuaskej ouijtika katka. San ika, nosiuatsin niman nonan melak onechpaleuijkej. Kuakon, oksejpa ueliskia chikauak niktekichiuilis Jehová. ¡Melak niyolpakiya! Nikitaya xok itlaj nechtsakuiliskia niktekichiuilis Jehová. San ika, topan onochiuj itlaj tlen xtikchiayaj.

TOPAN NOCHIUA ITLAJ TLEN MELAK KUALTSIN

Se tonajli, doctor otechijli ika Sylvia koneua katka. Yejon xtikchiatoyaj. Melak tiyolpakiyaj, san ika, nejua ok niknemilijtoya ninochiuas precursor. Opeuj titlanemiliaj itech tokonetsin akin uajtlakatiskia niman sa tikchiatoyaj. San ika, ¿tlenon panoskia ika tlen yotiktlapejpenijkaj?

Otiknemilijkej tikchiuaskej ijkon ken yotikijtokaj. Tokoneuj Gabriel onemiko ipan abril de 1985. Ipan junio de 1985 onijkajkauj ika nitekiti ipan banco niman oninochiuj precursor regular. Sakin, opeuj nitlapaleuiya ipan Grupo akin tlayekana ipan se Sucursal. Sucursal nokauaya 80 kilómetros de Caracas, maski ijkon, niaya okpa noso yexpa ipan se semana.

OKSEJPA OTOCHANPATLAKEJ

Sucursal onkatka ipan se pitentsin kalpan tlen itoka La Victoria, kuakon otikijtokej ompa tonchantiskej niman ijkon más nisiuj tinemiskej itech Betel. Tinochimej itlaj otikpatlakej. Melak niktlasojkamati kenon onechpaleuijkej nochanejkauan. Nokniuj Baha okijto ika yejua kitlajpiyaskia tonan. Mike yononamiktijka, san ika, Samira niman Gabriel ok touan chantiyaj. Kuakon, nonekiya kinkaujteuaskej inamigos akin nemiyaj Caracas. Niman nosiuatsin Sylvia ononek nomatis ipan se pitentsin kalpan. Niman tinochimej ononek tomatiskej tichantiskej ipan se pitentsin kajli. Ijkuak otochantitoj La Victoria, ononek miyek tikpatlaskej.

Sakin, Gabriel ononamikti niman Samira oksekan ochantito. Noijki, ipan 2007, Sylvia niman nejua otechnotskej Betel niman hasta aman ompa titlapaleuijtokej. Mike, tokoneuj akin yenkuiyotl, tlayekanketl niman precursor iuan isiuatsin, Mónica. Gabriel noijki tlayekanketl niman tlapaleuiya Italia iuan isiuatsin, Ambra. Samira precursora niman san uejka tlapaleuiya Betel.

OKSEJPA SAN NOIJKI NIKTLAPEJPENISKIA

Miyekpa yoniktlapejpeni tlen ueyi kijtosneki. Xninoyolkuepa itech tlen onikchiuj. Oksejpa ijkon niktlapejpeniskia. Nipaki ika chikauak niktekichiuilia Jehová. Yonikitak ika melak noneki kuajli timouikas iuan Jehová. Maski san tlenon matiktlapejpenikan, Jehová uelis techmakas “yolseuilistli más ueyi yejuan xakaj uelis kajsikamatis” (Filip. 4:6, 7). Sylvia niman nejua melak tipakij ika titlapaleuiyaj Betel, niman tiknemiliaj ika melak kuajli tlen otiktlapejpenijkej pampa nochipa otitlanemilijkej itech Jehová.