MAKA SA MATITETLAUELITAKAN
2 | Maka Xmotlakuepilti
Biblia kijtoua:
“Tla yakaj mechchiuilia itlaj xkuajli, maka no ijki xkuepiltikan. Xchiuakan kanika [...] hasta kampa nenueliskej kenijki nennemiskej kuajlotika iuan nochi tlakatl. Notlajsojkaikniuan, maka sano nemejuamej itlaj xtekuepiltikan [...] pampa on Yektlajkuilojli ijkin kijtoua: ‘Nejua nitetlakuepiltis; nitetlaxtlauilis ken kitocaroua’. Ijkin kijtoua toTEKO” (ROMANOS 12:17-19).
¿Tlenon kijtosneki?
Tinochimej tikualanij ijkuak texchiuiliaj itlaj tlen xkuajli, san ika, toTajtsin xkineki matotlakuepiltikan. Yejua kineki matitlamachiakan hasta ijkuak yejua kiyektlalis nochi tlen xkuajli (Salmo 37:7, 10).
Xyejyeko xchiua yejuin:
Ijkuak totlakuepiltiaj, tikchiuaj ika akin tiktlauelitaj noijki makineki notlakuepiltis. Ika yejon, tla yakaj omitschiuili itlaj tlen xkuajli noso omitsyolkoko, maka xkuepilti. Xmotelti niman maka xkualani. Kemantika más kuajli tla san tikpanoltia (Proverbios 19:11). San ika, tla yakaj mitschiuilia itlaj tlen melak xkuajli, kanaj nonekis tikonteijlis kampa policía.
Tla totlakuepiltiaj, san no tejuamej totlajyouiltiaj
¿Niman tla nesi ika xuelis noyektlalis yejon tlen omitschiuilijkej? ¿Noso maski tla yotikyejyeko xtikualanis tikita ika xueli noyektlalia? Maski ijkon, maka xmotlakuepilti pampa yejon kichiuas más mamitstlauelitakan. Xneltoka ika toTajtsin uelis mitspaleuis. Ipan Salmo 37:3-5 kijtoua ika tla tikneltoka toTajtsin, “yejua uajlas para mitspaleuis”.