MAKA SA MATITETLAUELITAKAN
3 | Maka Sa Xtetlauelita
Biblia kijtoua:
“Xkauilikan Dios ma yejua kiyenkuili nemotlamachilis. Ijkin tej, nenkimatiskej tlinon Dios kineki: on tlen kuajli, on tlen kipaktia niman nochi on tlen chipauak” (ROMANOS 12:2).
¿Tlenon kijtosneki?
ToTajtsin kineki kuajli matitlanemilikan (Jeremías 17:10) Kema, noneki tikitaskej tla kuajli tlen tikijtouaj niman tlen tikchiuaj, san ika, xsan yejon noneki tikchiuaskej. Noijki noneki xtiknemiliskej itlaj tlen ueliskia kichiuas matitetlauelitakan. Tla ijkon tikchiuaj, uelis topatlaskej niman xtitetlauelitaskej.
Xyejyeko xchiua yejuin:
Xkita tlenon tikmachilia niman tlenon tiknemilia itech oksekimej. Noijki xmotlajtolti yejuin: “¿Kenon nikimita akin xijkon ken nejua niman akin oksekan ualeuaj? ¿Itlaj niknemilia intech yejuamej pampa yonikimixmat, noso san pampa yakaj ijkon yonechchikonakasti?”. Maka xkimita redes sociales noso películas kampa nesi kenon notlauelitaj noso nouijsokij.
ITlajtol toTajtsin uelis techpaleuis maka sa matitetlauelitakan
Kanaj kemantika tiknemiliskej ika nochi kuajli tikchiujtokej niman ika xitlaj noneki tikpatlaskej. San ika, iTlajtol toTajtsin uelis techpaleuis matikmatikan tlenon noneki tikpatlaskej ipan tonemilis (Hebreos 4:12). Kuakon, xkita tlenon kijtoua Biblia niman xkita tla notlajtolnamiki iuan tlen tejua tiknemilia. Kuakon, xmokojtili titlanemilis ijkon ken temachtia Biblia. ITlajtol toTajtsin techpaleuiya matijkixtikan tlen xkuajli tikpiyaj ipan totlamachilis niman ipan toyojlo. Niman uelis kichiuas maka matitetlauelitakan (2 Corintios 10:4, 5).