¿Itikmatiya?
¿Tleka Jehová kinkauiliaya israelitas makinuentlalikan tórtolas noso palomas?
IPAN tlanauatijli tlen Jehová okinmakaka israelitas kijtouaya ika ueliskiaj kinuentlaliskiaj tórtolas noso palomas. Yejuin ome totomej nochipa san sekan kinteneuaj ipan tlanauatijli kampa kijtoua tlenon noneki nouentlalis. Yejuin kiteasikamachiltia ika ueliskiaj kitemakaskej se tórtola noso se paloma (Lev. 1:14; 12:8; 14:30). Yejuin kinpaleuiyaya israelitas, pampa xnochipa ueliyaj kinnextiayaj tórtolas. Matikitakan tleka.
Tórtola
Ne Israel, tórtolas san nemij ipan metstin ijkuak tona. Ipan metstli octubre, yejuin totomej yauej ipan okseki países kampa tona niman uajnokuepaj Israel ijkuak oksejpa itona (Cant. 2:11, 12; Jer. 8:7). Yejua ika, ijkuak seuaya, israelitas xueliyaj kinnextiayaj tórtolas para kinuentlaliskej.
Paloma brava
San ika, palomas xkeman oksekan yauej, yejua ika, israelitas ueliyaj kinnextiayaj nochi xiuitl. Noijki, ueliyaj kinnextiayaj pampa ne Israel nochimej kinpiayaj inchan (uelis tikitas Juan 2:14, 16). Se libro, tlen tlajtoua itech plantas niman yolkamej tlen noteneuaj ipan Biblia, kijtoua ika nochimej akin chantiyaj ipan yejon kalpamej kinpiayaj palomas. Ipan nochi kaltin, kinkoyoniayaj tepantin niman ompa kinchantiayaj palomas (uelis tikitas Isaías 60:8).
Paloma akin nemi ichan
¿Tlenon techmachtia yejuin itech Jehová? Ika yejua melak tetlasojtla niman teasikamati. Ijkon tikijtouaj pampa yejua xkintlajtlaniliaya israelitas totomej tlen kimatiya ika xueliskiaj kinnextiskiaj.