“Xnochimej tlaneltokaj”

Tla tiknekij tikyolpaktiskej Jehová, noneki itech titlaneltokaskej. San ika, Biblia kijtoua ika “xnochimej tlaneltokaj” (2 Tes. 3:2). Ijkuak apóstol Pablo okijkuilo yejuin tlajtoltin, kinteneujtoya akin kitlaueltokayaj, “on xkuajkualtin tlakamej niman xompayejyeuamej”. San ika, aman noijki nemij sekimej akin xtlaneltokaj. Sekimej xkinekij kineltokaskej ika nemi se toTajtsin maski kitaj nochi tlen yokichijchiuj (Rom. 1:20). Sekimej san kijtouaj ika kineltokaj ika nemi yakaj akin más ueyixtika. San ika, xsan yejon noneki tikijtoskej para tikyolpaktiskej Jehová.

Tla tiknekij tikyolpaktiskej toTajtsin, noneki kuajli tikneltokaskej ika yejua melauak nemi niman ika yejua kinteochiua akin itech tlaneltokaj (Heb. 11:6). Tlaneltokijli itlakilyo espíritu santo. Niman tla tiknekij tikpiyaskej espíritu santo, noneki tiktlajtlaniliskej Jehová (Luc. 11:​9, 10, 13). Noijki melak noneki matikpouakan Biblia pampa toTajtsin okijkuilo Biblia ika iespíritu. Niman tla yotikamapoujkej, itech matitlanemilikan niman matikchiuakan tlen otiuelkej. Ijkon, uelis tikpiyaskej iespíritu santo toTajtsin niman yejon techpaleuis matitlaneltokakan itech Jehová para ijkon uelis tikyolpaktiskej.