Tlen notlajtoltiaj akin kitaj revistas

Ipan 2 Tesalonicenses 3:14 kijtoua ika nonekis totlajpiyaskej itech sekimej tokniuan, ¿akinon noneki techijlis itech akinon noneki totlajpiyaskej?

Apóstol Pablo ijkin okimijli tokniuan akin chantiyaj Tesalónica: “Tla yakaj xkineki kakis in tlinon tikijtouaj ipan in tlajkuilolamatl, xpiyakan cuidado akinon” (2 Tes. 3:14). Yeuejkaui tikijtouayaj ika yejuin tlanauatijli katka para tlayekankej. Tla se tokniuj xkinekiya kitlakamatis tlen kijtoua Biblia maski miyekpa yokinotskaj, tlayekankej kitemakayaj se tlamachtijli ipan tlanechikojli kampa noteijliaya ika tokniuan noneki notlajpiyaskej. Desde ijkuakon, tokniuan xok nosentlaliayaj iuan yejon tokniuj, san iuan nosentlaliayaj ipan tlanechikojli noso ijkuak ontenojnotsayaj.

San ika, aman tikajsikamatij ika yejuin tlanauatijli para tinochimej. Toseselti noneki tikitaskej tlenon panotok niman san no tejuamej noneki tikitaskej tla nonekis totlajpiyaskej itech se tokniuj. Kuakon, aman xok nonekis ika tlayekankej makitemakakan se tlamachtijli ipan tlanechikojli. ¿Tleka onopatlak yejuin? Matikitakan okseki tlen okijto Pablo.

Pablo okijto ika ipan tlanechikojli nemiyaj tokniuan akin xkichiuayaj tlen nonekiya kichiuaskej. Yejuamej xkintlakamatiyaj itlanauatiluan toTajtsin tlen Pablo okimijli. Sejpa, ijkuak yejua okintlajpaloto tokniuan, ijkin okimijli: “Yejuan xkinekis tekitis, maka ma tlakua”. Maski ijkon, sekimej xkinekiyaj tekitiskej para notlakualtiskej maski ueliskiaj tekitiskej. Noijki nokalaktijtinemiyaj kampa xnonekiya nokalaktiskej. ¿Kenon tokniuan nonekiya kimitaskej akin xkichiuayaj tlen nonekiya kichiuaskej? (2 Tes. 3:​6, 10-12).

Pablo okimijli tokniuan makipiyakan “cuidado akinon” xkintlakamatstoya itlanauatiluan toTajtsin. Ika tlajtojli griego teajsikamachiltia ika noneki tikitas akinon ijkon kichiua niman timotlajpiyas para xpeuas tikchiuas ken yejua. Pablo xsan tlayekankej okimijli yejuin tlajtoltin, yej nochimej tokniuan (2 Tes. 1: 1; 3:6). Kuakon, tla yakaj kimatiya ika se tokniuj xkitlakamatstoya tlen kijtoua iTlajtol toTajtsin, nonekiya san yejua kitlapejpenis xok nouikas iuan yejon tokniuj.

¿Yejon kijtosnekiya ika akin xkitlakamatiya iTlajtol toTajtsin kitayaj ijkon ken akin yokikixtijkej itech tlanechikojli? Ka, pampa Pablo noijki ijkin okijto: “Xtlakanonotsakan ken yakaj nemokniuj”. Kuakon tokniuan ok kinotsaskiaj ipan tlanechikojli niman ipan tenojnotsalistli, san ika, xnonekiya iuan nosentlaliskej para noyolpaktiskej. Pablo okijto ika nonekiya ijkon kichiuaskej “para ijki ma pinaua”. Tla xok iuan nosentlaliayaj, yejua ueliskia pinauis pampa xok kitlakamatiya itlanauatil toTajtsin niman ueliskia nopatlas (2 Tes. 3:​14, 15).

¿Niman tejuamej? ¿Kenon uelis tikchiuaskej tlen okijto Pablo? Kachtopa noneki kuajli tikitaskej tla yejon tokniuj melauak xkintlakamatstika itlanauatiluan toTajtsin, ijkon ken okijto Pablo. Pablo xtlajtojtoya itech tokniuan akin kichiuaj tlen tejuamej xtikchiuaskiaj kanaj pampa xtikuelitaj noso kanaj pampa kipasoloua totlamachilis. Noijki xtlajtojtoya itech tokniuan akin kanaj otechyolkokojkej. Pablo, yej tlajtotoya itech tokniuan akin yokinnotskaj para kinpaleuiskej makichiuakan tlen kijtoua Biblia, san ika, xkinekij tetlakamatiskej.

Tla tikitaj ika se tokniuj xkitlakamatstika se itlanauatil Biblia,a san toseselti noneki tiktlapejpeniskej xok iuan tosentlaliskej ijkuak toyolpaktiaj. Xnoneki tikimijliskej oksekimej tokniuan ika xok tosentlaliaj iuan yejon tokniuj, san noneki tikimijliskej tochanejkauan, pampa yejon itlaj tlen san tejuamej otiktlapejpenijkej. Ipan tlanechikojli niman ipan tenojnotsalistli kema uelis iuan tinemiskej. Ijkuak nopatlas, uelis oksejpa iuan tosentlaliskej ijkon ken tikchiuayaj ijkuak kuajli nemiya.