¿Kenon uelis tikpiyaskej nemilistli para nochipa?

1. ¿Tlenon kinemiliaj sekimej itech “nemilistli para nochipa”?

MIYEKEJ tlaltikpakchanejkej kitlajpiyaj tlen kikuaj niman kichiuaj ejercicio para kuajli nomachiliskej niman xkualoskej para ijkon uejkaujtipan nemiskej. Maski ijkon, yejuamej kimatstokej ika yejon xkichiuas maka maueuentsintiakan niman mamikikan. Niman miyekej tlaltikpakchanejkej xkineltokaj tla uelis tinemiskej para nochipa, noso sekimej hasta xkuelitaskiaj nochipa nemiskej pampa xkinekij tlajyouiskej ijkuak ueuentsintiaskej. San ika, Jesús okijto ika uelis tikpiyaskej “nemilistli para nochipa”, ijkon ken kijtoua ipan Juan 3:16 niman 5:24.

2. ¿Tlenon kijtoua Juan capítulo 6 itech nemilistli para nochipa? (Juan 6:​39, 40).

² Se tonajli, Jesús okichiuj se milagro: melak miyekej tlaltikpakchanejkej okintlakualti ika panes niman michitsitsintin.a Yejon melak otemojkatlachialti, san ika, tlen uajmostla okijto más otemojkatlachialti. Tlaltikpakchanejkej okitokakej Jesús hasta Capernaúm, itenko mar de Galilea, niman ompa Jesús okijto ika mijkatsitsintin uelis yoliuiskej niman uelis nochipa nemiskej (xpoua Juan 6:​39, 40). Xontlanemili itech mochanejkauan noso moamigos akin yomikkej. ¡Tejua niman mochanejkauan uelis nochipa ninemiskej ika nemoyojlo! San ika, ipan Juan capítulo 6, Jesús okijto seki tlajtoltin tlen miyekej xuelij kajsikamatij. Kuajli matikitakan tlen okijto Jesús.

3. ¿Tlenon okijto Jesús ipan Juan 6:51?

³ Sakin ika Jesús okintlakualti tlaltikpakchanejkej, yejuamej okilnamikkej on maná tlen Jehová okinmakaka israelitas ipan tlaluaktli. Biblia kitokayotia maná ken “pan yejuan ne iluikak ualeua” (Sal. 105:40; Juan 6:31). Jesús okiteneuj tlen tlaltikpakchanejkej kimatstoyaj itech maná para itlaj kinmachtis. Maski toTajtsin okinmakaka israelitas maná itechkopa se milagro, akin okikuajkej sakin omikkej (Juan 6:49). Aman tej, Jesús okijto ika yejua katka “pan yejuan melauak ualeua iluikak”, “pan yejuan Dios kitemaka” niman “[pan] yejuan kitemaka nemilistli” (Juan 6:​32, 33, 35). Niman sakin Jesús okijto ika yejua xkatka ken maná, yejua okijto: “Nejua nipan yejuan kitemaka nemilistli niman yejuan oniualeu iluikak. Yejuan kikuas in pan nemis para nochipa” (xpoua Juan 6:51). Judíos xokajsikamatkej tleka Jesús okijto ika yejua katka pan tlen ualeua iluikak niman ika más kuajli katka xken maná. Ika yejon, Jesús ijkin okimijli: “On pan yejuan nejua nikmakas sano yejua nonakayo”. ¿Tlenon kijtosnekiya? Melak noneki matikajsikamatikan yejuin pampa ijkon tikmatiskej kenon tejuamej niman tochanejkauan uelis nochipa tinemiskej. Matikitakan tlenon kijtosnekiya Jesús.

PAN “YEJUAN KITEMAKA NEMILISTLI” NIMAN ITLALNAKAYO

4. ¿Tleka sekimej okualankej ijkuak okikakkej tlen okijto Jesús?

⁴ Sekimej akin kikaktoyaj Jesús okualankej ijkuak okijto ika kitemakaskia itlalnakayo niman ijkon tlaltikpakchanejkej nochipa manemikan. Yejuamej kanaj okinemilijkej ika yemelak nonekiya kikuaskej inakayo Jesús (Juan 6:52). San ika, sakin Jesús okijto itlaj tlen más okinmojkatlachialti. Yejua okimijli: “Tla nemejuamej xnenkikuaj nonakayo niman xnenkonij noyesyo, xnennemiskej para nochipa” (Juan 6:53).

5. ¿Tleka kuajli tikmatstokej ika Jesús xkimijlijtoya tlaltikpakchanejkej yemelak makonikan iyesyo?

⁵ Ipan itonaluan Noé, toTajtsin otlanauati maka makikuakan yestli (Gén. 9:​3, 4). Niman sakin, ipan Tlanauatijli tlen okinmakak israelitas, noijki ijkon okinnauati niman okijto ika nochimej akin kikuaskiaj yestli nonekiya kinmiktiskej (Lev. 7:27). Aman tej, Jesús yokinmachtijka judíos ika nonekiya kitlakamatiskej Tlanauatijli (Mat. 5:​17-19). Ika yejon, yejua xkeman kimijliskia yemelak makikuakan itlalnakayo noso makonikan iyesyo, yejua, yej kinmachtijtoya tlenon nonekiya kichiuaskej para kipiyaskej “nemilistli para nochipa” (Juan 6:54).

6. ¿Kenon tikmatij ika tlen okijto Jesús ipan Juan 6:53 san se neskayotl katka?

⁶ Kuajli nesi ika tlen Jesús okijto san se neskayotl katka. Jesús miyekpa kintekitiltiaya neskayomej ijkuak temachtiaya, ken ijkuak okinojnots siuatl samaritana. Yejua ijkin okijli: “Akin konis on atl yejuan nikmakas xkaman amikis, pampa on atl yejuan nikmakas yejua ijtik ken itlaj ameyajli yejuan kimakas nemilistli para nochipa” (Juan 4:​7, 14).b Jesús xkijtosnekiya tla yejuin siuatl ueliskia nochipa nemis tla koniya atl de se pozo. Noijki ijkon, Jesús xkijtosnekiya tla tlaltikpakchanejkej, akin okinnojnots ne Capernaúm, ueliskiaj nochipa nemiskej tla yemelak kikuayaj itlalnakayo niman koniyaj iyesyo.

XSAN NOIJKI TLEN OKIJTOSNEK JESÚS

7. ¿Tlenon kijtouaj sekimej itech Juan 6:53?

⁷ Sekimej kijtouaj ika ipan Juan 6:53 Jesús otemachti tlenon nonekiya nochiuas ijkuak noilnamikiskia iTlakualis toTeko, niman ijkon kinemiliaj pampa san noijki kakistisneki tlen okimijli judíos niman tlen okimijli iapóstoles ipan iTlakualis toTeko (Mat. 26:​26-28). Yejuamej kijtouaj ika nochimej akin yauej ijkuak noilnamiki iTlakualis toTeko noneki kikuaskej pan niman koniskej vino tlen ompa nopanoltia. Melak noneki matikmatikan tla kuajli ken yejuamej kinemiliaj pampa sejse xiuitl melak miyekej tlaltikpakchanejkej touan nosentlaliaj para kilnamikiskej iTlakualis toTeko. Kuakon, matikitakan tleka tikijtouaj ika xsan noijki tlen okijto Jesús ipan Juan 6:53 niman tlen okijto ipan iTlakualis toTeko.

8. ¿Tlenon techititia ika tlen Jesús okimijli judíos xsan noijki katka tlen okimijli iapóstoles? (Noijki xkimita tlaixkopinaltin).

⁸ Matikitakan ome tlemach tlen techititia ika tlen Jesús okimijli judíos xsan noijki katka tlen okimijli iapóstoles ipan iTlakualis toTeko. Kachtopa, ¿kemanon niman kanon okijto Jesús tlen kijtoua ipan Juan 6:​53-56? Okijto ipan xiuitl 32 ne Galilea. Yejuin opanok se xiuitl achto ika Jesús kipeualtiskia iTlakualis toTeko ne Jerusalén. Ika ome, ¿akinomej okimijli yejon tlajtoltin? Judíos akin ompa tlakaktoyaj akin san kinekiyaj makintlakualti niman xyemelak kinekiyaj ueliskej itech Jehová noso itech iTekiuajyo (Juan 6:26). Ika yejon, ijkuak Jesús okimijli itlaj tlen xokajsikamatkej, xok itech otlaneltokakej niman hasta sekimej inomachtijkauan okikaujteujkej (Juan 6:​14, 36, 42, 60, 64, 66). San ika, melak tlamantik tlen opanok ipan xiuitl 33, ijkuak Jesús okipeualti iTlakualis toTeko. Ijkuakon, Jesús nemiya imiuan 11 iapóstoles akin xijkomej katkaj ken tlaltikpakchanejkej akin nemiyaj Galilea. ¿Tleka ijkon tikijtouaj? Pampa apóstoles xokikaujkej Jesús maski xnochi kajsikamatiyaj tlen kinmachtijtoya. Yejuamej kuajli kimatstoyaj ika Jesús katka iKoneuj toTajtsin niman ika ouajtemok desde ne iluikak (Mat. 16:16). Ika yejon, Jesús ijkin okimijli: “Nemejuamej nochipa nouan yonentlajyouijtinenkej” (Luc. 22:28). Yejuin tlen yotikonitakej yetechajsikamachiltia ika Jesús xkijtojtoya ipan Juan 6:53 kenon nonekiya nopanoltis iTlakualis toTeko. San ika, matikitakan okseki tlen techpaleuis más kuajli matikajsikamatikan yejuin.

KENON MITSPALEUIYA TLEN OKIJTO JESÚS

9. ¿Akinomej teuamej itech on yenkuik pacto tlen Jesús okijto ipan iTlakualis toTeko?

⁹ Ipan iTlakualis toTeko, Jesús okinmakak iapóstoles pan tlen xkipiaya tlaxokolilistli niman okimijli ika yejon kixneskayotiaya itlalnakayo. Satepan, okinpanoltili vino niman okimijli: “In noyesyo yejuan nenkoniskej yejua kipeualtia on yenkuik pacto” (Mar. 14:​22-25; Luc. 22:20; 1 Cor. 11:24). Jesús okiteneuj se yenkuik pacto niman yejuin melak ueyi kijtosneki. On yenkuik pacto xnochiua imiuan nochimej tlaltikpakchanejkej, yej sa iuan on “tlakamej chanejkej ne Israel”, tlen kijtosneki akin iuan tekiuajtiskej toTeko Jesucristo ne “kampa tlamandaroua Dios” (Heb. 8:​6, 10; 9:15). Apóstoles xnochi okajsikamatkej tlen Jesús okimijli, san ika, xok ueyi poliuiya ijkuak kintlapejpeniskiaj ika espíritu santo niman ijkon teuamej yeskiaj itech on yenkuik pacto para tekiuajtiskej iuan Jesús ne iluikak (Juan 14:​2, 3).

10. ¿Tlenon noijki techititia ika tlen okijto Jesús ne Galilea xsan noijki tlen okijto ipan iTlakualis toTeko? (Noijki xkita tlaixkopinajli).

¹⁰ Matikilnamikikan ika ipan iTlakualis toTeko, Jesús san kiteneujtoya on pitentsin grupo akin iuan tekiuajtiskia. Niman apóstoles akin nemiyaj ipan iTlakualis toTeko, yejuamej akin kachtopa okintlapejpenijkej para manemikan ipan on pitentsin grupo (Luc. 12:32). Apóstoles niman oksekimej akin teuamej itech yejuin pitentsin grupo nonekiskia kikuaskej pan niman koniskej vino. Niman nochimej yejuamej nemiskej ne iluikak iuan Jesús. Ika yejon, tlen Jesús okimijli iapóstoles niman tlen okimijli tlaltikpakchanejkej ne Galilea xsan noijki katka, pampa ne Galilea, Jesús kinteneujtoya nochimej tlaltikpakchanejkej.

11. ¿Kenon tikmatij ika tlen okijto Jesús ne Galilea xsan para se pitentsin grupo?

¹¹ Ijkuak Jesús nemiya ne Galilea ipan xiuitl 32, kinnojnotstoya judíos akin san kinekiyaj makintlakualti. Jesús okintlajtlatouili itech itlaj tlen más kinpaleuiskia xken on tlakuajli tlen kikuaskiaj, itlaj tlen ueliskia kichiuas nochipa manemikan. Jesús noijki okijto ika akin mikiskiaj uelis kinyolitiskej ipan “on sa ika nochi tonajli” niman nochipa nemiskej. Yejuin tlen okijto Jesús xsan para se pitentsin grupo, ken tlen okijto ipan iTlakualis toTeko, yej para nochimej tlaltikpakchanejkej. Yejua hasta ijkin okijto: “Yejuan kikuas in pan nemis para nochipa. On pan yejuan nejua nikmakas sano yejua nonakayo yejuan nikuentlalis para on tlaltikpaktlakamej ueliskej nemiskej para nochipa” (Juan 6:51).c

12. ¿Tlenon noneki tikchiuaskej tla tiknekij tikseliskej nemilistli tlen xkeman tlamis?

¹² Aman tej, ¿Jesús kijtojtoya ika san akinon uelis kiselis nemilistli tlen xkeman tlamis? Ka, xyejon kijtojtoya, san uelis kiseliskej akin kikuaskej pan, tlen kijtosneki akin kiteititiskej ika tlaneltokaj itech Jesús. Miyekej kinemiliaj ika uelis makisaskej tla san kijtouaj ika tlaneltokaj itech Jesús niman tla kitaj ken inTemakixtijkauj (Juan 6:29). San ika, yeuejkaui miyekej akin kijtouayaj ika tlaneltokayaj itech Jesús, okitlalkauijkej. ¿Tleka ijkon opanok?

13. ¿Tlenon nonekiya kichiuaskej akin yemelak kinekiyaj yeskej inomachtijkauan Jesús?

¹³ Miyekej tlaltikpakchanejkej akin Jesús okintlakualti, kinektoyaj iuan kistinemiskej tla kinmakaya tlen kinekiyaj. Yejuamej san kinekiyaj makinpajti, makintlakualti niman makinmachti tlen yejuamej kinekiyaj kikakiskej. San ika, Jesús xouajla san para kinmakas tlaltikpakchanejkej tlen kinpolouaya. Ika yejon, Jesús okimijli ika tla kinekiyaj yemelak inomachtijkauan yeskej, nonekiya iuan yaskej, yejuin kijtosneki ika nonekiya kiseliskej tlen kinmachtiaya niman kitlakamatiskej (Juan 5:40; 6:44).

14. ¿Tlenon noneki tikchiuaskej para matechpaleui tlen Jesús okichiuj topampa?

¹⁴ Jesús okimijli ika nonekiya kiteititiskej ika tlaneltokaj. San ika ¿tlenon nonekiya kineltokaskej? Ika itlalnakayo niman iyesyo tlen kitemakaskia kichiuaskia ika tlaltikpakchanejkej mauelikan nochipa manemikan. Melak nonekiya ika judíos makineltokakan yejuin, niman aman tejuamej noijki (Juan 6:40). Kuakon, tla tiknekij matechpaleui itlalnakayo niman iyesyo Jesús tlen noteneuaj ipan Juan 6:​53, noneki tikneltokaskej ika Jesús onotemakak topampa. Tlen Jesús okichiuj uelis melak miyekej kinpaleuis (Efes. 1:7).

15, 16. ¿Tlenon tiuelij itech Juan capítulo 6?

¹⁵ Tejuamej niman akin tikintlasojtlaj melak techpaleuiya niman techyolchikaua tlen kijtoua Juan capítulo 6. Ompa tikitaj kenon Jesús melak kintlasojtla tlaltikpakchanejkej. Ne Galilea okinpajti akin kualouayaj, okintlakualti akin apismikiyaj niman okintlajtlatouili itech iTekiuajyo toTajtsin (Luc. 9:11; Juan 6:​2, 11, 12). Niman xsan yejon, noijki okinmachti ika yejua pan “yejuan kitemaka nemilistli” (Juan 6:​35, 48).

¹⁶ Akin kikuaj pan niman konij vino ijkuak noilnamiki iTlakualis toTeko kiteititiaj ika teuamej itech on yenkuik pacto niman ika tekiuajtiskej iuan Jesús ne iluikak. San ika, tlaltikpakchanejkej akin Jesús okintokayoti “oksekimej borregos” xnoneki kikuaskej pan nion koniskej vino (Juan 10:16). Maski ijkon, kema kinpaleuiya itlalnakayo niman iyesyo Jesús. San ika, para uelis kinpaleuis, noneki kiteititiskej ika kineltokaj ika Jesús onotemakak topampa (Juan 6:53). Kema, tlen noijtoua ipan Juan capítulo 6 melak kinpaleuiya tlapejpeniltin, san ika, noijki kinpaleuiya “oksekimej borregos” pampa ompa tiuelij ika melak noneki titlaneltokaskej itech imikilis Jesús para uelis tikpiyaskej nemilistli tlen xkeman tlamis.